វិធីបង្ការ និងរោគសញ្ញា ចេញដោយក្រសួងសុខាភិបាល។ រូបថត ក្រសួងសុខាភិបាល
ភ្នំពេញៈ ក្រសួងសុខាភិបាលបានចាត់មន្ត្រីជំនាញនៅតាមមូលដ្ឋានឱ្យចុះតាមដាន ផ្តល់ការព្យាបាល និងអប់រំពលរដ្ឋពីវិធីការពារការឆ្លងជំងឺភ្នែកក្រហម ដើម្បីទប់ស្កាត់ការឆ្លងបន្តក្នុងសហគមន៍ បន្ទាប់ពីរកឃើញជំងឺនេះកំពុងកើតថ្មីនៅតាមខេត្តមួយចំនួននៅកម្ពុជា។
យោងតាមសេចក្តីប្រកាសព័ត៌មានក្រសួងសុខាភិបាលចុះថ្ងៃទី ១៩ ខែតុលា ឆ្នាំ ២០២៣ បានឱ្យដឹងថា គិតត្រឹមថ្ងៃទី ១៨ ខែតុលា មានការរកឃើញករណីជំងឺឆ្លងភ្នែកក្រហម កំពុងកើតថ្មីគួរឱ្យកត់សម្គាល់ក្នុងបណ្តាខេត្តមួយចំនួននៅក្នុងប្រទេសកម្ពុជា។
ក្រសួងបន្តថា ពេលនេះក្រុមឆ្លើយតបបន្ទាន់របស់ក្រសួងសុខាភិបាល មន្ទីរសុខាភិបាល ស្រុកប្រតិបត្តិ មន្ទីរពេទ្យបង្អែក និងមណ្ឌលសុខភាពបានចុះអង្កេត ឆ្លើយតប តាមដាន ផ្ដល់ការព្យាបាល និងអប់រំបង្ការការឆ្លងរាលដាលដើម្បីទប់ស្កាត់ការឆ្លងបន្តក្នុងសហគមន៍។
ក្រសួងបានបញ្ជាក់ថា៖ «រោគសញ្ញាជំងឺឆ្លងភ្នែកក្រហម រួមមាន នៅផ្នែកសនៃភ្នែក ឡើងពណ៌ផ្កាឈូក ឬពណ៌ក្រហម ហើមត្របកភ្នែក ជាពិសេសនៅពេលព្រឹកមានហូរទឹកភ្នែកច្រើនជាងមុន រកាំភ្នែកដោយសារមានអារម្មណ៍ថា មានអ្វីនៅក្នុងភ្នែក ឬចង់ញីភ្នែក រមាស់ភ្នែក រលាក និង/ឬក្រហាយភ្នែក មានអាចម៍ភ្នែក (ពណ៌ខ្ទុះ ឬពណ៌ទឹកបាយ) ឈឺគ្រាប់ភ្នែកជាដើម»។
ក្រសួងបានបញ្ជាក់ទៀតថា ជំងឺភ្នែកក្រហមនេះបណ្តាលមកពីមូលហេតុធំៗចំនួន ២ គឺការបង្កដោយវីរុសនិងការបង្កដោយបាក់តេរីដែលឆ្លងលឿនណាស់ និងរាលដាលយ៉ាងងាយពីមនុស្សម្នាក់ទៅមនុស្សផ្សេងទៀត។ អ្នកអាចកាត់បន្ថយហានិភ័យនៃការកើតជំងឺភ្នែកក្រហមឬការចម្លងទៅអ្នកដទៃ ដោយអនាម័យល្អពោលគឺសម្អាតដៃឱ្យបានស្អាតជានិច្ច។
ជុំវិញរឿងនេះអ្នកឯកទេសភ្នែកនៃមន្ទីរពេទ្យភ្នែកខេត្តតាកែវ លោកវេជ្ជបណ្ឌិត នៀង ម៉ៅ ជា បានអំពាវនាវឱ្យពលរដ្ឋចូលរួមថែរក្សាសុខភាពភ្នែកឱ្យបានល្អ ខណៈជំងឺភ្នែកក្រហមកំពុងតែរីករាលដាលនៅតាមបណ្តាខេត្តមួយចំនួន។
លោកបានបន្តថា៖ «ខ្ញុំសូមផ្តាំទៅបងប្អូនទាំងអស់ដែលមានបញ្ហាភ្នែកសូមអញ្ជើញមកពិនិត្យនៅមន្ទីរពេទ្យ ដែលមានជំនាញច្បាស់លាស់ ហើយជាទូទៅបើទោះជាគ្មានបញ្ហាភ្នែកណាមួយក៏ដោយ សូមឱ្យបងប្អូនគួរមកត្រួតពិនិត្យភ្នែកយ៉ាងតិច ១ ឆ្នាំម្តង ព្រោះភ្នែកមានសារៈសំខាន់សម្រាប់ការប្រកបការងាររបស់យើង»។
យោងតាមសេចក្តីប្រកាសរបស់ក្រសួងសុខាភិបាលក៏បានណែនាំចំពោះបុគ្គលដែលមិនទាន់មានជំងឺភ្នែកក្រហមថា គឺត្រូវអនុវត្តលាងដៃឱ្យបានញឹកញាប់ជាមួយសាប៊ូ និងទឹកក្ដៅឧណ្ហៗយ៉ាងហោចណាស់ ២០ វិនាទី។ លាងដៃរបស់អ្នកបន្ទាប់ពីប៉ះពាល់ជាមួយអ្នកមានជំងឺភ្នែកក្រហម ចៀសវាងការប៉ះភ្នែករបស់អ្នកដោយដៃដែលមិនបានលាងសម្អាត កុំប្រើរបស់របរប្រើប្រាស់ជាមួយអ្នកជំងឺ រក្សាគម្លាតឱ្យបានឆ្ងាយ ដោយសារជំងឺភ្នែកក្រហមបង្កដោយវីរុស និងបាក់តេរីឆ្លងតាមខ្យល់ តាមការក្អកនិងកណ្តាស់នៃអ្នកមានជំងឺភ្នែកក្រហម។
យ៉ាងណាមិញ ក្រសួងសុខាភិបាលអះអាងថា ករណីភាគច្រើននៃជំងឺឆ្លងភ្នែកក្រហម គឺស្រាល ហើយជាធម្មតាការឆ្លងនឹងជាសះស្បើយក្នុងរយៈពេលពី ៧ ទៅ ១៤ ថ្ងៃដោយមិនតម្រូវឱ្យមានការព្យាបាល និងមិនមានផលវិបាករយៈពេលវែងនោះទេ។
ទោះជាយ៉ាងណា ក្រសួងបានបញ្ជាក់បន្ថែមថា ក្នុងករណីខ្លះ ការរលាកភ្នែកដោយវីរុសត្រូវការរយៈពេល ២ ទៅ ៣ សប្ដាហ៍ ឬច្រើនជាងនេះដើម្បីជាសះស្បើយ។គ្រូពេទ្យអាចផ្តល់ថ្នាំអង់ទីប្យូទិក ដូចជា ថ្នាំបន្តក់ភ្នែក ឬថ្នាំដាក់ភ្នែក។ ការឱ្យថ្នាំបន្តក់ឬថ្នាំដាក់ភ្នែក ជួយបន្ថយរយៈពេលនៃការឆ្លង កាត់បន្ថយផលវិបាក និងកាត់បន្ថយការរីករាលដាលដល់អ្នកដទៃបាន។
សូមរំឭកថា នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលធ្លាប់បានប្រកាសពីការរកឃើញជំងឺភ្នែកក្រហមកម្រិតស្រាលចំនួន ៩៣ ករណីនៅក្នុងស្រុកអូរយ៉ាដាវ ខេត្តរតនគិរី កាលពីពេលថ្មីៗកន្លងមកនេះ៕
.jpg)
