លោក ឆាយ ឫទ្ធិសែន ក្នុងកិច្ចប្រជុំពីថ្ងៃទី ២៣ តុលា។ រូបថត ក្រសួងអភិវឌ្ឍន៍ជនបទ
ភ្នំពេញៈ លោក ឆាយ ប្ញទ្ធិ សែន រដ្ឋមន្ត្រីក្រសួងអភិវឌ្ឍន៍ជនបទបានណែនាំឱ្យបន្ដជំរុញបង្កើតភូមិគំរូបន្ថែមទៀត ដើម្បីជំរុញកំណើនសេដ្ឋកិច្ចទៅដល់តំបន់ជនបទឱ្យកាន់តែរីកចម្រើន ខណៈបច្ចុប្បន្នការផ្គត់ផ្គង់ទឹកស្អាត និងអនាម័យជនបទនៅទូទាំងប្រទេសកម្ពុជាសម្រេចបាន ៨០ ភាគរយ។
លោកបានថ្លែងដូចនេះ នៅក្នុងកិច្ចប្រជុំបូកសរុបលទ្ធផលការងារប្រចាំខែតុលា និងលើកទិសដៅការងារខែវិច្ឆិកា ឆ្នាំ ២០២៣ របស់ក្រសួងអភិវឌ្ឍន៍ជនបទកាលថ្ងៃទី ២៣ ខែតុលា ឆ្នាំ ២០២៣ នៅទីស្ដីការក្រសួង។នេះបើតាមហ្វេសប៊ុកក្រសួងអភិវឌ្ឍន៍ជនបទ។
ប្រភពដដែលបានឱ្យដឹងថា នៅក្នុងឱកាសនោះ លោក ឆាយ ប្ញទ្ធិសែន បានថ្លែងថា៖ «យុទ្ធសាស្ត្របញ្ចកោណរបស់រាជរដ្ឋាភិបាលនីតិកាលទី៧ គឺមានមហិច្ឆតាលើកស្ទួយមោទនភាពជាតិឱ្យឈានកាន់តែខ្ពស់ឡើងដូចសម័យអង្គរ តាមរយៈការកសាងជាតិមួយឱ្យរឹងមាំ រស់រវើក រុងរឿង និងមានវិបុលភាពឱ្យក្លាយជាប្រទេសមានចំណូលខ្ពស់នៅត្រឹមឆ្នាំ ២០៥០»។
លោកបានបន្តថា ដើម្បីរួមចំណែកអនុវត្តយុទ្ធសាស្ដ្រនេះ ក្រសួងអភិវឌ្ឍន៍ជនបទបានដាក់ចេញកម្មវិធីសំខាន់ចម្បងសំដៅជំរុញកំណើនសេដ្ឋកិច្ចទៅដល់តំបន់ជនបទតាមរយៈការកែលម្អលក្ខខណ្ឌនៃការរស់នៅរបស់សហគមន៍ជនបទក្នុងគោលដៅជំរុញសេវាគ្របដណ្តប់ ១០០ ភាគរយនៃទឹកស្អាតនិងអនាម័យនៅត្រឹមឆ្នាំ ២០៣០។
លោករដ្ឋមន្ត្រីបានបញ្ជាក់ថា៖ «បច្ចុប្បន្នវឌ្ឍនភាពវិស័យផ្គត់ផ្គង់ទឹកស្អាត និងអនាម័យជនបទសម្រេចបាន ៨០ ភាគរយ ហើយ ខណៈក្រសួងក៏បានបន្ដជំរុញបង្កើតភូមិគំរូបន្ថែមទៀតលើភូមិគំរូដែលមានស្រាប់ចំនួន ៣០ ភូមិ ក្នុងគោលដៅបម្រើប្រជាជននៅជនបទដោយសុចរិត និងទទួលខុសត្រូវខ្ពស់»។
ជុំវិញរឿងនេះ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លោក ហុង វណ្ណៈ បានថ្លែងនៅថ្ងៃទី ២៤ ខែតុលាថា ការដាក់ចេញយុទ្ធសាស្ត្រលើកកម្ពស់វិស័យទឹកស្អាត អនាម័យ ជំរុញឱ្យបង្កើតភូមិគំរូ និងការយកចិត្តទុកដាក់លើការអភិវឌ្ឍសេដ្ឋកិច្ចនៅតំបន់ជនបទបន្ថែមទៀត គឺជារឿងមួយល្អដែលក្រសួងបានបំប្លែងចេញជាសកម្មភាពតូចដើម្បីសម្រេចយុទ្ធសាស្ត្របញ្ចកោណរបស់រាជរដ្ឋាភិបាលនីតិកាលទី៧។
លោកបានបន្តថា ដើម្បីឈានទៅសម្រេចកិច្ចការងារទាំងនេះ គឺទាក់ទងនឹងហិរញ្ញវត្ថុ និងធនធានមនុស្ស។ ដូច្នេះថាតើការដាក់ចេញគម្រោងទាំងអស់នេះ ក្រសួងបានបំប្លែងទៅជាសកម្មភាពទៅតាមឆ្នាំប្រតិបត្តិការនីមួយៗដែរ ឬអត់? ហើយការអនុវត្តនេះតើឆ្លើយតបពេលវេលាដែលបានដាក់ចេញឬអត់?
លោក ហុង វណ្ណៈ បញ្ជាក់ថា ៖ «ព្រោះកិច្ចការទាំងអស់នេះ គឺជាកិច្ចការធំណាស់ដូច្នេះប្រសិនបើក្រសួងបានអនុវត្ត ហើយមានថវិកាឆ្លើយតបនូវយុទ្ធសាស្ត្រខាងលើនេះឱ្យក្លាយជាការពិតគឺជារឿងប្រសើរអាចឆ្លើយតបបំណងប្រាថ្នារបស់ប្រជាពលរដ្ឋយើង»។
សូមរំឭកថា ពាក់ព័ន្ធនឹងការបង្កើតភូមិគំរូនេះដែរ លោក ឆាយ ឫទ្ធិសែន ក៏ធ្លាប់បានណែនាំនិងជំរុញនាយកដ្ឋានអភិវឌ្ឍន៍សហគមន៍និងនាយកដ្ឋានអភិវឌ្ឍន៍ជនជាតិភាគតិចឱ្យសិក្សាបង្កើតភូមិគំរូដែលមានសក្ដានុពល និងអំណោយផលលើផ្នែកសេដ្ឋកិច្ច ទេសចរណ៍ ឬកសិផលផ្សេងៗនៅតំបន់សហគមន៍ជនជាតិដើមភាគតិចដើម្បីពង្រឹងជីវភាពរស់នៅនៃសហគមន៍ជនជាតិដើមភាគតិចនៅកម្ពុជា៕
