អាជ្ញាធរជួយបុរសម្នាក់ ក្រោយជាន់មីនផ្ទុះនៅខេត្តបន្ទាយមានជ័យ។ រូបថត CMAC
ភ្នំពេញៈ អាជ្ញាធរមីនបន្តអំពាវនាវជាថ្មីដល់ពលរដ្ឋទាំងអស់កុំចូលទៅតំបន់ដែលមិនស្គាល់ប្រវត្តិច្បាស់លាស់ និងសូមកុំប៉ះពាល់នៅពេលឃើញមីន និងគ្រាប់មិនទាន់ផ្ទុះខណៈដែលមានករណីផ្ទុះមីននៅខេត្តបន្ទាយមានជ័យ បានបណ្ដាលឱ្យពលរដ្ឋម្នាក់ពិការជើង។
ការបន្តអំពាវនាវបែបនេះ ដោយសារមានពលរដ្ឋម្នាក់នៅខេត្តបន្ទាយមានជ័យ បានដើរចូលព្រៃដែលជាតំបន់មិនស្គាល់ ដើម្បីគាស់គល់ឈើ មិនប្រយ័ត្នធ្វើឱ្យផ្ទុះមីន បណ្ដាលឱ្យរងរបួសដាច់ជើងខាងឆ្វេង។ នេះបើតាមអាជ្ញាធរមីន បានឱ្យដឹងនៅថ្ងៃទី ២៥ ខែតុលានេះ។
លោក លី ធុជ អនុប្រធានទី១ អាជ្ញាធរមីន បានឱ្យដឹងថា ក្នុងនាមជាអាជ្ញាធរមីន គឺពិតជាសោកស្ដាយខ្លាំងចំពោះករណីផ្ទុះមីននេះ ខណៈទាំងថ្នាក់ដឹកនាំ និងទាំងអាជ្ញាធរមីន គឺពិតជាមិនចង់ឱ្យមានករណីបែបនេះកើតឡើងចំពោះប្រជាជនកម្ពុជានោះទេ ដូច្នេះរាល់គ្រោះថ្នាក់ទាំងនេះ គឺបានលើកទឹកចិត្តដល់កងកម្លាំងដែលកាន់ខាងវិស័យមីន ប្រតិបត្តិករទាំងអស់ដែលមានអ្នកបោសសម្អាតមីនជាង ៥ ពាន់នាក់ នឹងបន្តខិតខំការងារបោសសម្អាតមីនស្របតាមចក្ខុវិស័យរបស់នាយករដ្ឋមន្ត្រីកម្ពុជា។
លោកថ្លែងថា៖ «យើងសូមអំពាវនាវដល់បងប្អូនប្រជាពលរដ្ឋទាំងអស់ សូមកុំចូលទៅតំបន់ណាដែលមិនដឹងប្រវត្តិច្បាស់លាស់ និងត្រូវសាកសួរអាជ្ញាធរមូលដ្ឋានមុនចូលតំបន់នោះ និងសូមកុំប៉ះពាល់នៅពេលឃើញមីន និងគ្រាប់មិនទាន់ផ្ទុះហើយត្រូវរាយការណ៍ជាបន្ទាន់ដល់អាជ្ញាធរមានសមត្ថកិច្ច និងប្រតិបត្តិករបោសសម្អាតមីនដែលនៅជិតទីនោះដើម្បីយកគ្រាប់ទាំងនោះទៅកម្ទេចចោល»។
លោកថ្លែងថា ក្រៅពីនេះអាជ្ញាធរមីន នឹងបង្កើនការផ្សព្វផ្សាយអំពីគ្រោះថ្នាក់ដោយសារមីន នៅតាមមូលដ្ឋាន ជាពិសេសតំបន់ដែលមានគ្រាប់រំសេវច្រើនជាបន្តទៅទៀត តាមរយៈការគាំទ្រពីក្រសួងអប់រំ ដើម្បីជួយផ្សព្វផ្សាយនៅតាមសាលារៀនដែលស្ថិតក្នុងតំបន់ដាច់ស្រយាល និងតាមរយៈមន្ត្រីនគរបាលជាតិ អង្គភាពស៊ីម៉ាក់ កាកបាទក្រហម និងកងទ័ពមួកខៀវជាដើម។
យោងតាមរបាយការណ៍របស់អាជ្ញាធរមីន រយៈពេល ៩ ខែ ឆ្នាំ ២០២៣ នេះជនរងគ្រោះថ្នាក់ដោយសារយុទ្ធភណ្ឌគ្រឿងផ្ទុះមានចំនួន ២៧ នាក់ ក្នុងនោះជនរងគ្រោះដោយសារមីនមានចំនួន ១៣ នាក់ និងជនរងគ្រោះដោយសារសំណល់ជាតិផ្ទុះពីសង្គ្រាមមានចំនួន ១៤ នាក់។ បើប្រៀបធៀបរយៈពេលដូចគ្នាក្នុងឆ្នាំ ២០២២ ជនរងគ្រោះថ្នាក់ដោយសារយុទ្ធភណ្ឌគ្រឿងផ្ទុះមានចំនួន ៤០ នាក់ ដូច្នេះក្នុងឆ្នាំ ២០២៣ នេះថយចុះចំនួន ១៣ នាក់ ឬស្មើ ៣៣ ភាគរយ៕
