សម្ព័ន្ធហិរញ្ញវត្ថុយុត្តិធម៌កម្ពុជា បានចេញផ្សាយការសិក្សាស្រាវជ្រាវមួយស្តីពី «ការផ្ដល់ហិរញ្ញប្បទានដោយធនាគារអភិវឌ្ឍន៍អាស៊ី (ADB) គាំទ្រការស្តារសេដ្ឋកិច្ចកម្ពុជាឡើងវិញក្រោយវិបត្តិនៃជំងឺកូវីដ ១៩» និងបានផ្តល់អនុសាសន៍គន្លឹះជូនរាជរដ្ឋាភិបាល ដើម្បីនិរន្តរភាពហិរញ្ញវត្ថុនៅកម្ពុជា។
របាយការណ៍នេះ ត្រូវបានផ្សព្វផ្សាយ នៅថ្ងៃទី ២៧ ខែតុលា ឆ្នាំ២០២៣ ដែលចងក្រងឡើង ក្នុងគោលបំណងកំណត់គម្លាតគោលនយោបាយស្តីពីសេដ្ឋកិច្ចបៃតង និងនិរន្តរភាព និងវាយតម្លៃពីភាពខុសគ្នា រវាងគោលនយោបាយ និងការអនុវត្ត នៅក្នុងស្ថាប័នពាក់ព័ន្ធនានា។ ជាពិសេសការសិក្សាវាយតម្លៃពីផលប៉ះពាល់នៃគម្រោងហេដ្ឋារចនាសម្ព័ន្ធ (ផ្លូវលេខ ២៣ និង ៣១២) ដែលទទួលបានហិរញ្ញប្បទានពី ADB។
សេចក្តីប្រកាសព័ត៌មានរបស់សម្ព័ន្ធហិរញ្ញវត្ថុយុត្តិធម៌កម្ពុជា បានឱ្យដឹងថា ការសិក្សានេះបានផ្តល់អនុសាសន៍សំខាន់ៗចំនួន៧ សម្រាប់ ធនាគារអភិវឌ្ឍន៍អាស៊ី និងរាជរដ្ឋាភិបាល រួមមានអនុសាសន៍ចំនួន៣ ផ្តោតលើ គោលនយោបាយទូទាត់សំណងដោយឥតស្ម័គ្រចិត្ត គួរតែត្រូវបានធ្វើឡើងនៅដំណាក់កាលដំបូងបំផុតនៃគម្រោង ការពង្រឹងអំណាចសេដ្ឋកិច្ចរបស់ស្ត្រី និងការលើកកម្ពស់លទ្ធភាពទទួលបានជំនួយហិរញ្ញវត្ថុរបស់ស្ត្រី។
អនុសាសន៍ចំនួន៤ ផ្សេងទៀត ផ្តោតលើ ការព្រមព្រៀងជារួមលើលក្ខខណ្ឌច្បាប់ ពាក្យបច្ចេកទេស និងគោលគំនិតស្តីពីសេដ្ឋកិច្ចបៃតង និងនិរន្តរភាពហិរញ្ញវត្ថុ ការពង្រឹងស្ថាប័នដោយការរួមបញ្ចូលចំណេះដឹង និងជំនាញរបស់ស្ថាប័នរយៈពេលវែង ការបង្កើតឧបករណ៍សមស្របសម្រាប់វាយតម្លៃផលប៉ះពាល់បរិស្ថាន និងសង្គម និងដំណោះស្រាយលើចំណេះដឹង និងជំនាញដែលនៅមានកម្រិតរបស់អ្នកបង្កើត និងអ្នកអនុវត្តគោលនយោបាយ ទាក់ទងនឹងសេដ្ឋកិច្ចបៃតង និងនិរន្តរភាពហិរញ្ញវត្ថុ។
របាយការណ៍សិក្សាស្រាវជ្រាវបានបញ្ជាក់ថា៖«សហគមន៍ពេញចិត្តចំពោះគម្រោងកែលម្អផ្លូវថ្នល់ និងសង្កត់ធ្ងន់លើចំណុចសំខាន់ចំនួន ៣ គឺ៖ ១ សហគមន៍បានទទួលយកលទ្ធផលនៃការវាយតម្លៃលើផលប៉ះពាល់ ២ សហគមន៍បានទទួលស្គាល់នូវតម្រូវការនៃគម្រោងកែលម្អផ្លូវថ្នល់ ជាពិសេសបញ្ហាទាក់ទងទៅនឹងលក្ខខណ្ឌហេដ្ឋារចនាសម្ព័ន្ធនៅក្នុងសហគមន៍របស់ពួកគាត់ និង ៣ សហគមន៍បានកត់សម្គាល់នូវអត្ថប្រយោជន៍ជាច្រើនដែលនឹងកើតចេញពីគម្រោងកែលម្អផ្លូវថ្នល់នេះ»។
អត្ថប្រយោជន៍ទាំងនោះរួមមាន ការធ្វើឱ្យប្រសើរឡើងនូវលទ្ធភាពទៅសាលារៀន ទីផ្សារ មន្ទីរពេទ្យ និងកសិដ្ឋាន ដែលវាពិតជាមានសារៈសំខាន់ណាស់សម្រាប់សកម្មភាពប្រចាំថ្ងៃ និងការរីកចម្រើនផ្នែកសេដ្ឋកិច្ចរបស់ពួកគាត់។ ទោះជាយ៉ាងណាក៏ដោយ សហគមន៍ក៏បានសម្ដែងនូវការព្រួយបារម្ភអំពីការទូទាត់សំណងផងដែរ។
លោកស្រី ភាណ សោភ័ណ នាយិកាអង្គការអុកស្វាម បានថ្លែថា ទោះបីជាមានការប្រកាន់ខ្ជាប់នូវក្របខ័ណ្ឌច្បាប់ និងគោលនយោបាយក្នុងការធានាឱ្យមានការពិចារណាលើបរិស្ថាន សង្គម និងសេដ្ឋកិច្ចនៅក្នុងគម្រោងកែលម្អផ្លូវក៏ដោយ វាពិតជាចាំបាច់ដែលយើងត្រូវបង្ហាញផែនការទូទាត់សំណងទាន់ពេលវេលា ដោយផ្តល់ឱ្យគ្រួសារ និងសហគមន៍ដែលរងផលប៉ះពាល់ជាមួយនឹងគម្រោងសំណងដែលអាចទទួលយកបាន និងមានរយៈពេលច្បាស់លាស់»។
ជាមួយគ្នានេះលោកស្រី បានស្នើឱ្យមានការអនុវត្តសេចក្តីថ្លែងការណ៍គោលនយោបាយការពារសុវត្ថិភាព របស់ធនាគារអភិវឌ្ឍន៍អាស៊ី ស្តីពីការទូទាត់សំណងដោយឥតស្ម័គ្រចិត្ត អមដោយនីតិវិធីសមស្រប និងការយកចិត្តទុកដាក់ជាពិសេស ចំពោះតម្រូវការរបស់ស្ត្រី និងកុមារ។
លោកស្រីបញ្ជាក់ថា៖«វាមានសារៈសំខាន់ណាស់ដែលយើងផ្តល់អាទិភាពដល់សុខុមាលភាពរបស់ក្រុមដែលងាយរងគ្រោះទាំងនេះនៅក្នុងគម្រោងអភិវឌ្ឍន៍របស់យើង»។
លោកស្រី ស៊ិន ពុទ្ធារី នាយិកាប្រតិបត្តិអង្គការគណៈកម្មាធិការសហប្រតិបត្តិការដើម្បីកម្ពុជា (គ.ស.ក)ថ្លែងថា លក្ខណៈវិនិច្ឆ័យនៃការរួមបញ្ចូលគោលគំនិត ESG និង និរន្តរភាពហិរញ្ញវត្ថុ ត្រូវបានបង្កើតឡើងដោយផ្អែកលើសង្គម និងសេដ្ឋកិច្ច សំដៅចូលរួមចំណែកដល់ការអភិវឌ្ឍប្រកបដោយ សមធម៌ បរិយាប័ន្ន និងនិរន្តរភាពនៅក្នុងប្រទេសកម្ពុជា។ លោកស្រីថា៖«នេះគឺជាផលជះដែលយើងរំពឹងពីការអនុវត្តគម្រោង ដើម្បីចែករំលែកចំណេះដឹងឱ្យបានទូលំទូលាយ និងកិច្ចសហប្រតិបត្តិការកាន់តែប្រសើរក្នុងចំណោមអ្នកពាក់ព័ន្ធទាំងអស់ ដែលបានពាំនាំពីលទ្ធផលស្រាវជ្រាវ»។
បើតាមលោកស្រី ស៊ិន ពុទ្ធារី ការសិក្សានេះ បានផ្តល់អនុសាសន៍ថា របកគំហើញនឹងត្រូវបានប្រើប្រាស់នៅក្នុងគោលនយោបាយ និងក្របខ័ណ្ឌច្បាប់នានា ដើម្បីលើកកម្ពស់កំណើនសេដ្ឋកិច្ចបៃតង និងការអភិវឌ្ឍប្រកបដោយនិរន្តរភាពនៅក្នុងប្រទេសកម្ពុជា៕
