នៅក្នុងរយៈពេលជាង ៣ ឆ្នាំ ពោលគឺចាប់ពីខែមិថុនា ២០២០ ដល់ ខែតុលា ២០២៣ រាជរដ្ឋាភិបាលកម្ពុជាបានឧបត្ថម្ភជូនពលរដ្ឋតាមរយៈការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ប្រមាណ ៤ ៨៥០ ប៊ីលានរៀល ឬស្មើនឹង ១ ២១២,៦៩ លានដុល្លារអាមេរិក ក្នុងអំឡុងពេលប្រយុទ្ធនឹងកូវីដ១៩។
យោងតាមការចេញផ្សាយ របស់ប្រព័ន្ធគាំពារសង្គមកម្ពុជា ដែលមានការគាំទ្រដោយ UNDP និង Australian AID បានឱ្យដឹងថា កម្មវិធីនេះ បានជួយសម្រួលជីវភាពពលរដ្ឋមានបណ្ណសមធម៌ ទាំងនៅទីប្រជុំជន និងទីជនបទ ទូទាំងប្រទេស។
កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេល ប្រយុទ្ធនឹងជំងឺកូវីដ១៩ ត្រូវបានដាក់ឱ្យអនុវត្តជាលើកដំបូងនៅកម្ពុជា កាលពីថ្ងៃទី២៤ ខែមិថុនា ឆ្នាំ២០២០ ដែលជាការបោះជំហានដ៏សំខាន់មួយ ដើម្បីឧបត្ថម្ភគាំទ្រដល់គ្រួសារក្រីក្រ និងងាយរងគ្រោះ ដែលទទួលរងផល ប៉ះពាល់ពីការរាតត្បាតជាសកលនៃជំងឺកូវីដ១៩។
ប្រព័ន្ធគាំពារសង្គមកម្ពុជា បានឱ្យដឹងទៀតថា អ្នកដែលមានបណ្ណក្រីក្រស្ទើរតែទាំងអស់ បានទទួលសាច់ប្រាក់ឧបត្ថម្ភយ៉ាងហោចណាស់មួយលើក ចាប់តាំងពីឆ្នាំ ២០២០ មក ខណៈពេលដែលដំណើរការអត្តសញ្ញាណកម្មគ្រួសារក្រីក្រតាមការស្នើសុំកំពុងត្រូវបានបន្តអនុវត្ត ដែលផ្ដល់លទ្ធភាពឱ្យគ្រួសារដែលទើបធ្លាក់ចូលទៅក្នុងភាពក្រីក្រ អាចដាក់ពាក្យសុំការវាយតម្លៃលើស្ថានភាពជីវភាពរបស់ពួកគេ ក្នុងការកំណត់ពីការបំពេញតាមលក្ខខណ្ឌរបស់គ្រួសារទាំងនោះ ដើម្បីអាចទទួលបានប្រាក់ឧបត្ថម្ភដោយមិនចាំបាច់រងចាំការវាយតម្លៃលើភាពក្រីក្រដែលធ្វើជារៀងរាល់ ៣ឆ្នាំម្ដង។
លោក ចន ណារិទ្ធ អនុរដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាក្រុមប្រឹក្សាជាតិគាំពារសង្គម បានឱ្យដឹងថា ក្នុងរយៈពេលបីឆ្នាំនេះ ការដាក់ឱ្យអនុវត្តកម្មវិធីនេះ បានផ្តល់ផ្លែផ្កាយ៉ាងល្អប្រសើរ។
លោកបានបញ្ជាក់ថា៖«គឺបន្ទាប់ពីការអនុវត្តកម្មវិធីឧបត្ថម្ភសាច់ប្រាក់នេះ ធ្វើឱ្យអត្រានៃការធ្លាក់ចុះចូលទៅក្នុងក្រីក្ររបស់ប្រជាជនកម្ពុជាមានភាពយឺតជាង ក្នុងករណីដែលកម្ពុជា មិនមានដាក់នូវកម្មវិធីឧបត្ថម្ភសាច់ប្រាក់នេះ។ ពោល ប្រសិនគ្មានការដាក់ចេញនូវកម្មវិធីឧបត្ថម្ភសាច់ប្រាក់នេះទេ នឹងធ្វើឱ្យការធ្លាក់ចូលទៅក្រោមបន្ទាត់ក្រីក្រកាន់តែមានល្បឿនលឿន»។
ទោះជាយ៉ាងណាក៏ដោយ ប្រព័ន្ធគាំពារសង្គមកម្ពុជា បានផ្តល់ជាអនុសាសន៍គោលនយោបាយចំនួន ៦ ដើម្បីស្នើដល់រាជរដ្ឋាភិបាល ក្នុងការធ្វើឱ្យប្រសើរនូវកិច្ចគាំពារសង្គមដល់គ្រួសារក្រីក្រ និងងាយរងគ្រោះដូចជា៖ រាជរដ្ឋាភិបាលកម្ពុជា គួរបន្តអនុវត្តកម្មវិធីឧបត្ថម្ភសាច់ប្រាក់ពិសេសនេះ យ៉ាងហោចណាស់ក្នុងអំឡុងពេលស្ដារសេដ្ឋកិច្ចឡើងវិញពីជំងឺកូវីដ១៩ ដោយធ្វើការពិចារណាពីលម្ហសារពើពន្ធដែលមាន ដោយថ្លឹងថ្លែងធៀបជាមួយនឹងអាទិភាពដទៃទៀត។
ប្រព័ន្ធគាំពារសង្គមកម្ពុជាបន្តថា៖«ក្នុងអំឡុងពេលនៃការសិក្សានេះក៏ដោយ ក៏នីតិវិធី ចុះឈ្មោះគ្រួសារក្រីក្រ គួរពន្លឿនបន្ថែមទៀត ដើម្បីធានាថាគ្រួសារក្រីក្រ និងងាយរងគ្រោះ ត្រូវបានបញ្ចូលទៅក្នុងកម្មវិធីនេះបានកាន់តែឆាប់រហ័ស, គួរមានកិច្ចខិតខំប្រឹងប្រែង ដើម្បីកែលម្អយន្តការកំណត់ក្រុមគោលដៅរបស់កម្មវិធីនេះ, គួរមានការពិនិត្យឡើងវិញអំពីមធ្យោបាយអប់រំផ្សព្វផ្សាយ ដែលមានសម្រាប់ជូនដំណឹងដល់អ្នកទទួលសាច់ប្រាក់ នៅកម្រិតសហគមន៍ ឬនៅតាមភូមិអំពីកាលបរិច្ឆេទបើកផ្តល់សាច់ប្រាក់,ចាំបាច់ត្រូវមានការបង្កើនចំណេះដឹងហិរញ្ញវត្ថុក្នុងចំណោមអ្នកទទួលបានប្រាក់ឧបត្ថម្ភ, និងការផ្សព្វផ្សាយព័ត៌មាន និងការបង្កើនការយល់ដឹងអំពីអត្ថប្រយោជន៍នៃបណ្ណក្រីក្រ ដូចជាការផ្តល់សេវាថែទាំសុខភាពដោយមិនគិតថ្លៃជាដើម៕
