បុរសម្នាក់ត្រូវឃាត់ខ្លួន ក្រោយយកដំបងឈើវាយសម្លាប់សត្វឈ្លូស ១ ក្បាល។ រូបថត នគរបាល
ភ្នំពេញៈ ក្រសួងបរិស្ថាន បានប្រកាសថ្កោលទោសបុរសម្នាក់ ដែលបានយកដំបងឈើវាយសម្លាប់សត្វឈ្លូស ១ ក្បាល ជាប្រភេទសត្វព្រៃ ដែលត្រូវអភិរក្ស និងស្នើឱ្យអាជ្ញាធរមានសមត្ថកិច្ចស្វែងរកជនប្រព្រឹត្តបទល្មើសយកផ្តន្ទាទោសតាមច្បាប់ដោយគ្មានការលើកលែង។
ការថ្កោលទោសនេះ បន្ទាប់ពីបុរសម្នាក់យកដំបងឈើវាយសម្លាប់សត្វឈ្លូសដែលប្រឹងហែលក្នុងទឹកសមុទ្រឡើងលើគោក នៅឆ្នេរកុកហាវ ភូមិពាមកាយ ឃុំកោះស្តេច ស្រុកគិរីសាគរ ខេត្តកោះកុង កាលពីថ្ងៃ២៥ ខែតុលា ឆ្នាំ២០២៣។
សេចក្តីប្រកាសព័ត៌មានក្រសួងបរិស្ថាន ចុះថ្ងៃទី១ ខែវិច្ឆិកា បានធ្វើការថ្កោលទោសយ៉ាងដាច់អហង្ការចំពោះបុគ្គលដែលបានវាយសម្លាប់សត្វឈ្លូស ១ក្បាល ជាប្រភេទសត្វព្រៃដែលត្រូវអភិរក្ស ដោយសង្កត់ធ្ងន់ថា គឺជាទង្វើល្មើសច្បាប់។
ជាមួយគ្នានេះ ក្រសួងបរិស្ថាន ស្នើឱ្យអាជ្ញាធរមានសមត្ថកិច្ចស្វែងរកជនប្រព្រឹត្តបទល្មើសយកផ្តន្ទាទោសតាមច្បាប់ស្ដីពី តំបន់ការពារធម្មជាតិ ដោយគ្មានការលើកលែង។
ក្រសួងបរិស្ថាន ក៏បន្តអំពាវនាវដោយទទូចដល់ប្រជាពលរដ្ឋគ្រប់គ្នា កុំសម្លាប់ កុំជួញដូរ និងកុំបរិភោគសត្វព្រៃ ដោយត្រូវ ចូលរួមថែរក្សា ការពារ អភិរក្សធនធានធម្មជាតិ និងសត្វ ដែលជាសម្បត្តិធម្មជាតិ សម្រាប់កូនចៅជំនាន់ក្រោយ។
លោក ហ៊ុន ម៉ារ៉ាឌី ប្រធានមន្ទីរបរិស្ថានខេត្តកោះកុង និងលោក គង់ មនោ ស្នងការនគរបាលខេត្តកោះកុង មិនទាន់អាចសុំការអត្ថាធិប្បាយបានទេនៅត្រឹមថ្ងៃទី២ ខែវិច្ឆិកានេះ។
យ៉ាងណាមិញបើយោងតាមហ្វេសប៊ុករបស់លោកស្រី មិថុនា ភូថង អភិបាលខេត្តកោះកុង បានឱ្យដឹងថា មុខសញ្ញាសង្ស័យ ដែលបានវាយសម្លាប់សត្វឈ្លូសកំពុងហែលទឹក នៅឆ្នេរកុកហាវ ត្រូវសមត្ថកិច្ចឃាត់ខ្លួនបានហើយ។ ជនសង្ស័យឈ្មោះ តាន់ អូខុង ហៅក្រៅ អូខុង ភេទប្រុស អាយុ ២៣ឆ្នាំ ជនជាតិខ្មែរ សញ្ជាតិខ្មែរ មានស្រុកកំណើត ឃុំស្វាយលួង ស្រុកកណ្ដៀង ខេត្តពោធិ៍សាត់ និងមានមុខរបរ សន្តិសុខ ។
ជាមួយគ្នានេះលោកស្រី បានកោតសរសើរដល់កម្លាំងសមត្ថកិច្ច និងអ្នកពាក់ព័ន្ធទាំងអស់ ដែលបានខិតខំប្រឹងប្រែងបំពេញភារកិច្ចកំណត់មុខសញ្ញារហូតឈានដល់ការឃាត់ខ្លួនជនសង្ស័យ ដើម្បីកសាងសំណុំរឿងតាមនីតិវិធី។
មុនឈានដល់កំណត់មុខសញ្ញានេះ អភិបាលខេត្តកោះកុង បានប្រកាសលើកទឹកចិត្តជាថវិកាចំនួន ៤លានរៀល ដល់អ្នកដែលបានផ្តល់ព័ត៌មាន អត្តសញ្ញាណ របស់ជនដែលបានប្រព្រឹត្តអំពើអមនុស្សធម៌ នេះ ហើយចំពោះអ្នកដែលបានផ្តល់ព័ត៌មាននេះនឹងរក្សាទុកជាការសម្ងាត់។
លោកស្រីបានសង្កត់ធ្ងន់ថា៖«ពាក់ព័ន្ធករណីជនដែលបានប្រព្រឹត្តអំពើមិនគប្បី ខ្វះសីលធម៌ អគតិធ្វើឱ្យប៉ះពាល់ធ្ងន់ធ្ងរដល់សង្គមគួរឱ្យស្អប់ខ្ពើមបំផុត បានយកដំបងជ្រុងវាយសំពងក្បាលកូនឈ្លូសដែលកំពុងហែលទឹកទៅរកដីគោក បណ្តាលឱ្យស្លាប់បាត់បង់ជីវិតនៅហ្នឹងកន្លែង»។
នាយកអង្គការមូលនិធិសកលសម្រាប់ធម្មជាតិ (WWF) លោក សេង ទៀក នៅថ្ងៃទី២ ខែវិច្ឆិកានេះ បានថ្លែងប្រាប់ដោយចាត់ទុកថានេះគឺជាទង្វើអសីលធម៌ចំពោះសត្វព្រៃ។ លោកថា៖«គ្នាអត់មានផ្លូវនឹងត្រូវទៅ ខំប្រឹងហែលទឹកដើម្បីរួចជីវិតស្រាប់តែទៅវាយគ្នានៅក្នុងទឹកដែលគ្នាគ្មានសិទ្ធិទៅមុខក៏មិនកើត ថយក្រោយក៏មិនកើត។ ខ្ញុំក៏សូមធ្វើការថ្កោលទោសផងដែរ ចំពោះទង្វើនេះ»។
លោក សេង ទៀក ដែលបានចំណាយពេលជាង ២៥ឆ្នាំចូលរួមលើការងារអភិរក្សសត្វព្រៃ ធនធានជាតិនៅកម្ពុជា បានអំពាវនាវដល់ពលរដ្ឋត្រូវចេះស្រឡាញ់ និងការពារសត្វព្រៃ ព្រោះជាមរតកធម្មជាតិសម្រាប់កូនចៅជំនាន់ក្រោយ និងបញ្ឈប់ជាបន្ទាន់នូវទង្វើអមនុស្សធម៌បែបនេះ ទាំងការដាក់អន្ទាក់ ការជួញដូរ និងបរិភោគសាច់សត្វព្រៃនៅទូទាំងប្រទេស៕
