យុវសិស្សស្រាវជ្រាវចំណេះដឹងតាមទូរស័ព្ទកាលពីកន្លងទៅ។ ហុង មិនា
ភ្នំពេញៈ «ខ្ញុំគិតថាខ្ញុំគាំទ្រចំណាត់ការនេះព្រោះឃើញក្មេងៗមួយចំនួនធំគាត់ប្រើទូរស័ព្ទ ប្រើឧបករណ៍អេឡិចត្រូនិកហ្នឹងគឺខួរក្បាលរបស់គាត់មួយចំនួនរាងស្ពឹក ហេតុនេះបើកាត់បន្ថយបានអាចនឹងធ្វើឱ្យខួរក្បាលគាត់សកម្មវិញ»។
នេះគឺជាការលើកឡើងរបស់អ្នកអាណាព្យាបាលសិស្សម្នាក់នៅខេត្ដបន្ទាយមានជ័យដែលបានគាំទ្រលើការណែនាំរបស់ក្រសួងអប់រំ យុវជននិងកីឡា។
កាលពីថ្មីៗនេះ ក្រសួងអប់រំយុវជន និងកីឡាបានប្រកាសហាមសិស្សប្រើប្រាស់ទូរស័ព្ទដៃឬឧបករណ៍អេឡិចត្រូនិក ដែលមិនបម្រើឱ្យសកម្មភាពសិក្សានៅក្នុងគ្រឹះស្ថានសិក្សាសាធារណៈ ដើម្បីជំរុញការពង្រឹងវិន័យតាមសាលារៀន និងបង្កើនប្រសិទ្ធភាពនៃការប្រើឧបករណ៍ទាំងនោះឱ្យត្រូវតាមបរិបទនៃការអប់រំឌីជីថល សម្រាប់បម្រើដល់ការបង្រៀន ការរៀន និងការស្រាវជ្រាវ។
ការប្រកាសណែនាំនេះបានធ្វើឱ្យមាតាបិតា ឬអាណាព្យាបាល គ្រូបង្រៀន សិស្សានុសិស្ស មានការពេញចិត្តច្រើន ថ្វីបើមានអ្នកខ្លះយល់ឃើញផ្សេង ខណៈអ្នកតាមដានការអប់រំបានជំរុញបន្ថែមឱ្យការប្រើប្រាស់ទូរស័ព្ទរបស់សិស្សានុសិស្សបានចំគោលដៅសិក្សា ការការពារខ្លួនពីការឆបោកតាមប្រព័ន្ធឌីជីថល ហើយដើរទាន់សម័យកាលបច្ចេកវិទ្យាថ្មីនេះ។
លោក ហត្ថា វាត ប្រជាពលរដ្ឋនៅខេត្តបន្ទាយមានជ័យដែលមានកូនតូចកំពុងសិក្សាបានប្រាប់ ភ្នំពេញ ប៉ុស្តិ៍ថា លោកគាំទ្រចំពោះការណែនាំរបស់ក្រសួងអប់រំ ដែលជំរុញបន្ថែមកុំឱ្យសិស្សប្រើទូរស័ព្ទខុសកម្មវិធីសិក្សានៅសាលា ព្រោះការប្រើប្រាស់ទូរស័ព្ទ ឬឧបករណ៍អេឡិចត្រូនិក មានទាំងផលល្អ និងផលមិនល្អ ប៉ុន្តែជាក់ស្តែងសិស្សខ្លះ បានប្រើប្រាស់ខុសកម្មវិធីសិក្សា បែរជាចូលចិត្តលេងហ្គេម ឬប្រើបណ្តាញសង្គមផ្សេងៗនាំឱ្យខាតពេល និងការសិក្សាធ្លាក់ចុះ។
លោកថា៖ «អ្វីដែលក្រសួងហាម គឺហាមតែក្នុងពេលកំពុងសិក្សាក្នុងថ្នាក់រៀន និងនៅទីធ្លាសាលាជាដើមប៉ុណ្ណោះ។ «ខ្ញុំគិតថា ខ្ញុំគាំទ្រចំណាត់ការនេះ ព្រោះឃើញក្មេងៗមួយចំនួនធំ គាត់ប្រើទូរស័ព្ទ ប្រើឧបករណ៍អេឡិចត្រូនិកហ្នឹង គឺខួរក្បាលរបស់គាត់ មួយចំនួនរាងស្ពឹក ហេតុនេះបើកាត់បន្ថយបានអាចនឹងធ្វើឱ្យខួរក្បាលគាត់សកម្មវិញ»។
យ៉ាងណាក្ដី លោក ហត្ថា វាត ថ្លែងថា ការជំរុញឱ្យកូនៗប្រើទូរស័ព្ទឱ្យចំគោលដៅក្នុងកម្មវិធីសិក្សាអាចមានការលំបាកគ្រប់គ្រង ព្រោះជាក់ស្តែងចាស់ៗខ្លះហាក់ដូចជាញៀនក្នុងការប្រើទូរស័ព្ទដែរដោយមិនបានធ្វើជាគំរូដល់កូនៗក្នុងការចាប់អានសៀវភៅឡើយ។
យល់ផ្ទុយពីនេះបន្តិច លោក អ៊ូច ធា ប្រជាពលរដ្ឋនៅរាជធានីភ្នំពេញ បានលើកឡើងថា សេចក្តីណែនាំក្រសួងអប់រំ ហាក់មិនទាន់ត្រឹមត្រូវ ១០០ ភាគរយទេ ពីព្រោះសម័យបច្ចេកវិទ្យាឌីជីថលការប្រើទូរស័ព្ទ ឬឧបករណ៍អេឡិចត្រូនិកផ្សេងៗទៀតក្នុងការសិក្សាស្រាវជ្រាវ គឺធ្វើឱ្យសិស្សបានលូតលាស់ទាន់សម័យនិងមានប្រាជ្ញាវាងវៃ ទោះបីជាពេលខ្លះពួកគេត្រូវមើលការកម្សាន្តម្ដងម្កាលក៏ដោយ។
លោកថា៖ «បើតាមគំនិតខ្ញុំ ការណែនាំរបស់ក្រសួងអប់រំ គឺមិនត្រឹមត្រូវ ១០០ ភាគរយទេ ពីព្រោះសម័យនេះ គឺជាសម័យបច្ចេកកវិទ្យា ជាក់ស្តែងកូនខ្ញុំរៀនថ្នាក់ទី៦ តែគាត់អាចប្រើទូរស័ព្ទឆែករកព័ត៌មានក្នុងពិភពលោកដឹងគ្រប់ដែលខ្ញុំមិននឹកស្មានដល់»។
ក៏ប៉ុន្ដែលោក សយ ចន្ថា ប្រជាពលរដ្ឋម្នាក់ទៀតនៅរាជធានីភ្នំពេញបានគាំទ្រខ្លាំងចំពោះការណែនាំរបស់ក្រសួងអប់រំ។ លោកថា ក្នុងសម័យបច្ចុប្បន្ន ពលរដ្ឋមានទូរស័ព្ទ Smart Phone ប្រើស្ទើរគ្រប់ដៃ ហើយគេអាចមើលទូរស័ព្ទបានគ្រប់ពេល គ្រប់ទីកន្លែង ហេតុនេះក្នុងនាមជាសិស្សមិនចាំបាច់យកទូរស័ព្ទទៅលេងក្នុងម៉ោងសិក្សាទេ ព្រោះជាពេលក្រេបយកចំណេះដឹងពីគ្រូផ្ទាល់។
លោកបានបញ្ជាក់ថា៖ «ទូរស័ព្ទវាមានសារៈសំខាន់ច្រើនណាស់។ ទំនាក់ទំនងវាគ្រាន់តែជាផ្នែកដ៏តូចមួយប៉ុណ្ណោះសម្រាប់ខ្ញុំ។ ក្នុងទូរស័ព្ទមានបណ្តុំមេរៀនជាច្រើនទាំងការសិក្សា ការរស់នៅក្នុងសង្គម អាជីវកម្មជាដើម សុទ្ធសឹងជាមេរៀនដែលសិស្សគួររៀនបន្ថែមក្រៅពីសិក្សាផ្ទាល់ជាមួយគ្រូ»។
លោក ប៉ែន ទូច គ្រូបង្រៀនសាលាអនុវិទ្យាល័យអង្គជោតិ នៅឃុំចំប៉ី ស្រុកអង្គរជ័យ ខេត្តកំពត បានថ្លែងថា ការណែនាំរបស់ក្រសួងអប់រំជារឿងល្អ ប្រៀបដូចជាដាវអាជ្ញាសឹកផ្តល់អំណាចបន្ថែមឱ្យការអនុវត្តតាមសាលាកាន់តែមានប្រសិទ្ធភាព។
លោកប្រាប់ថា ចំពោះបញ្ហាការប្រើទូរស័ព្ទខុសកម្មវិធីសិក្សា ក្នុងសាលាកន្លងមក គឺគ្រូបានក្រើនរំឭកដល់សិស្សជាបន្តបន្ទាប់ដើម្បីកុំឱ្យការសិក្សារបស់សិស្សចុះខ្សោយ រៀនយឺតដោយសារការលេងទូរស័ព្ទ ប៉ុន្តែការពង្រឹងនេះធ្វើបានតែក្នុងសាលារៀនប៉ុណ្ណោះ។
លោកថា ជាក់ស្តែងពេលម៉ោងសម្រាកសិស្សមួយចំនួននៅតែនាំគ្នាលេងហ្គេមតាមទូរស័ព្ទដោយចេញឱ្យផុតពីទីធ្លាសាលាទៅលេងនៅតាមវត្ត ដែលជះឥទ្ធិពលអវិជ្ជមានដល់ការសិក្សារបស់ពួកគេ។
លោកថា៖ «ក្នុងនាមខ្ញុំជាគ្រូបង្រៀន បើកាលណាសិស្សធ្លាក់ចុះខ្សោយក្នុងការសិក្សា ក៏ពិបាកដែរ ព្រោះយើងចង់ផ្ទេរ ចង់ផ្តល់ចំណេះដឹងទាំងអស់ទៅសិស្សឱ្យចេះដូចយើង ប៉ុន្តែជាទូទៅនៅក្នុងថ្នាក់រៀន ឬតាមកន្លែងផ្សេងៗមានទំនើបកម្មពេកទៅ បែរជា សិស្សមិនផ្តោតលើការសិក្សាគិតតែទូរស័ព្ទ។ខ្ញុំចង់ឱ្យសិស្សផ្អាកសកម្មភាពនោះ ហើយពង្រឹងការសិក្សាឡើងវិញ»។
ចំណែកលោក ទ្រី សារ៉ាត់ គ្រូបង្រៀននៅវិទ្យាល័យ ហ៊ុន សែន ព្រៃនប់ ខេត្តព្រះសីហនុ បានលើកឡើងថា ការប្រើទូរស័ព្ទក្នុងសាលា គួរតែហាមក្មេងៗនៅថ្នាក់បឋមសិក្សា ព្រោះសិស្សកម្រិតនេះភាគច្រើនប្រើទូរស័ព្ទមិនចំគោលដៅ គឺលេងហ្គេមតែម្តង ព្រោះគ្មានមុខងារអ្វីសំខាន់សម្រាប់ពួកគេសិក្សាស្រាវជ្រាវទេ។ លោកបន្តថា ទោះបីយ៉ាងនេះក្ដីបើឪពុកម្តាយចេះ ណែនាំ ឬបង្រៀនកូនឱ្យមើលតាមបណ្តាញសង្គម ទាក់ទងនឹងមេរៀនដែលគេសិក្សាគឺជារឿងល្អ។
លោក ទ្រី សារ៉ាត់ បានបន្ដថា ក៏ប៉ុន្ដែចំពោះសិស្សនៅតាមអនុវិទ្យាល័យ ឬវិទ្យាល័យ គឺចាំបាច់ត្រូវតែប្រើទូរស័ព្ទ ព្រោះគេត្រូវការស្រាវជ្រាវមេរៀនឬចំណេះដឹងផ្សេងៗតាមអ៊ីនធឺណិត ហើយមានឯកសារខ្លះ គេត្រូវចែករំលែកគ្នាតាមបណ្តាញសង្គម។
លោកថា៖ «ប្រសិនបើសិស្សប្រើទូរស័ព្ទលេងហ្គេម មតិខ្ញុំ គឺមិនគាំទ្រដាច់ខាត ចំពោះសិស្សប្រើខុសមុខងាររៀនសូត្រ ប៉ុន្តែប្រើត្រូវតាមផ្លូវការ គឺប្រើក្នុងវិស័យស្រាវជ្រាវឯកសារឬដោះស្រាយលំហាត់ ស្វែងរកចំណេះដឹងបន្ថែមគឺល្អ»។
លោក តូច កន្តាល់ នាយកសាលាវិទ្យាល័យបាក់ទូក បានថ្លែងថា ការប្រកាសរបស់ក្រសួងអប់រំ យុវជន និងកីឡា ជាច្បាប់ទម្លាប់ពេញលេញ ១ បន្ថែមទៀត ដើម្បីឱ្យសាលាអនុវត្តបានកាន់តែខ្លាំង ព្រោះការណែនាំកុំឱ្យសិស្សប្រើទូរស័ព្ទខុសពីកម្មវិធីសិក្សា គឺសាលាបានអនុវត្តតាំងពីមុនមានការប្រកាសណែនាំរបស់ក្រសួងអប់រំម្ល៉េះ។
លោកបានឱ្យដឹងថា ការអនុវត្តនេះ មិនមានសិស្សឬអាណាព្យាបាលសិស្សប្រតិកម្មសម្តែងការមិនពេញចិត្ត ឬមិនគាំទ្រឡើយ។ រីឯការអនុវត្តវិញសាលាមានវិធីសាស្ត្រធ្វើឱ្យបានសមល្មម មិនឱ្យសិស្សគិតថា តឹងពេក តែក៏មិនធូរពេកដែរ។
លោកថ្លែងថា៖ «បើសិនបើរកឃើញថា សិស្សអនុវត្តផ្ទុយពីការណែនាំ យើងប្រជុំគាត់ ប្រជុំឪពុកម្តាយគាត់ឱ្យយល់ទាំងអស់គ្នាសិន។ អ្វីដែលយើងធ្វើគឺយកច្បាប់មកដាក់ហើយប្រជុំឪពុកម្តាយផ្សព្វផ្សាយឱ្យដឹងសិនហើយទើបយើងអនុវត្តច្បាប់ក្នុងកម្រិតណាមួយ»។
លោកបានថ្លែងថា សិស្សប្រើទូរស័ព្ទមានផល ២ យ៉ាង ទី១- ប្រើដើម្បីជាប្រយោជន៍ ដែលសិស្សអាចចូលមើលក្នុងបណ្ណាល័យអេឡិចត្រូនិក មានមេរៀនឯកសារស្រាវជ្រាវកម្រងឯកសារវិញ្ជាសាប្រឡងនិងចំណេះដឹងផ្សេងៗដែលក្រសួងអប់រំបានដាក់បញ្ចូល។ ទី២- ការប្រើទូរស័ព្ទដោយឥតប្រយោជន៍ វង្វេងក្នុងបណ្តាញសង្គមដែលមិនទាក់ទងមេរៀននឹងរំខានដល់ការសិក្សាសិស្ស។
យុវតី វេត ម៉ីម៉ី សិស្សថ្នាក់ទី១០ នៃវិទ្យាល័យ ហ៊ុន សែន ព្រៃនប់ ខេត្តព្រះសីហនុ បាននិយាយថា នៅសាលានាងកំពុងរៀនមិនទាន់ឃើញគ្រូផ្សព្វផ្សាយពីការណែនាំរបស់ក្រសួងនៅឡើយទេ ប៉ុន្តែយុវតីរូបនេះបញ្ជាក់ថា បើមានការណែនាំបែបនេះជារឿងល្អ និងគួរតែអនុវត្តឱ្យបានតឹងរ៉ឺង។
ម៉ីម៉ី ប្រាប់ថា សកម្មភាពសិស្សលេងហ្គេមតាមទូរស័ព្ទ ក្នុងវិទ្យាល័យដែលនាងរៀន មានច្រើនគួរសម ប៉ុន្តែការលេងនោះមានតែក្នុងម៉ោងចេញលេងទេ។
កញ្ញាប្រាប់ថា៖ «សាលាខ្ញុំ ពេលម៉ោងរៀន គាត់រៀនស្ងប់ស្ងាត់ធម្មតាតាមថ្នាក់នីមួយៗ ព្រោះអីក្នុងសាលារៀនក៏មានវិន័យត្រឹមត្រូវដែរ តែបើម៉ោងចេញលេង អ្នកខ្លះគាត់ចូលចិត្តលេងហ្គេម ទោះអ៊ីចឹងក៏ដោយ បើមានបញ្ជាពីលោកគ្រូនាយកមកថា អត់ឱ្យលេងហ្គេមក្នុងសាលាវារញ៉េរញ៉ៃ អ៊ីចឹងក៏ពួកគាត់ធ្វើតាមដែរ»។
ចំណែកសិស្សវិទ្យាល័យម្នាក់ទៀត គឺយុវតី ដួង ច័ន្ទចរណៃ ជាសិស្សថ្នាក់ទី១១ នៅសាលាវិទ្យាល័យ ហ៊ុន សែន ប្រមាយ ស្រុកវាលវែង ខេត្តពោធិ៍សាត់ ក៏បានគាំទ្រចំពោះការណែនាំរបស់ក្រសួងអប់រំដែរ។ យុវតី ឱ្យដឹងថា រាល់ថ្ងៃនាងមិនដែលយកទូរស័ព្ទទៅសាលាទេ ព្រោះបើយកទៅទូរស័ព្ទទៅសាលាចង់បង្អួតសម្ញែងការលេងហ្គេមដោយទូរស័ព្ទទំនើបនោះជារឿងមិនសមរម្យ។ ច័ន្ទចរណៃ បានបន្ថែមថា ពេលចេញលេង ឬពេលអវត្តមានគ្រូ មានសិស្សខ្លះចូលចិត្តប្រើទូរស័ព្ទលេងហ្គេម ខ្លះមើលហ្វេសប៊ុក មានតិចតួចទេ ព្រោះលោកគ្រូអ្នកគ្រូតែងតែក្រើនរំឭកជាបន្តបន្ទាប់។
លោក ឈត ប៊ុនថង ប្រធានវិទ្យាស្ថានទំនាក់ទំនងវប្បធម៌ អប់រំ និង ទេសចរណ៍ នៃរាជបណ្ឌិត្យសភាកម្ពុជា បានបង្ហាញពីការពេញចិត្តចំពោះការណែនាំរបស់ក្រសួងអប់រំ ដែលរឹតបន្តឹងការប្រើទូរស័ព្ទក្នុងសាលា តែចង់លើកកម្ពស់ការប្រើប្រាស់ឧបករណ៍ទាំងនោះឱ្យមានប្រសិទ្ធភាព ក្នុងការរៀនសូត្រនិងដើរទាន់សម័យកាលបច្ចេកវិទ្យាថ្មី។
លោកថ្លែងថា៖ «ខ្ញុំក្នុងនាមជាអ្នកតាមដាន និងក្នុងនាមជាឪពុកម្តាយម្នាក់ពេញចិត្តការណែនាំរបស់ក្រសួង ព្រោះការប្រើប្រាស់អ៊ីនធឺណិត ទូរស័ព្ទ ឬក៏ឧបករណ៍អេឡិចត្រូនិកដទៃទៀតដែលយើងអាចឆែកមើលព័ត៌មានឬក៏ការផ្សាយផ្សេងៗជាអាវុធមុខ ២ អ៊ីចឹងដើម្បីកាត់បន្ថយមុខអវិជ្ជមាន ត្រូវតែមានការរឹតបន្តឹង មានការតម្រង់ទិសហ្នឹងគឺជារឿងត្រឹមត្រូវ»។
លោកបន្ថែមថា ក្នុងសម័យបច្ចេកវិទ្យាថ្មីនេះ សិស្សត្រូវការចេះប្រើឧបករណ៍ឆ្លាតវៃ ដូចជាស្មាតហ្វូន លែបថបឬឧបករណ៍ផ្សេងទៀត ហេតុនេះនៅតាមសាលា គួរតែមានការកំណត់ម៉ោងរៀនសូត្រអំពីឧបករណ៍ឆ្លាតវៃឱ្យបានចេះដឹងត្រឹមត្រូវ និងប្រើបានជាប្រយោជន៍ ព្រមទាំងនៅឆ្ងាយពីការឆបោកតាមប្រព័ន្ធបច្ចេកវិទ្យាផងដែរ។
លោកថ្លែងថា៖ «ប្រើប្រាស់ទូរស័ព្ទទំនើប ឧបករណ៍អេឡិចត្រូនិកទំនើបៗនេះ មិនមែនមានន័យថា សុទ្ធតែអាក្រក់ទេ ប៉ុន្តែសូមប្រើប្រាស់ឱ្យបានត្រឹមត្រូវ ប្រើប្រាស់ឱ្យជាប្រយោជន៍ កុំឱ្យការប្រើប្រាស់នោះទៅជាធ្វើឱ្យការសិក្សា ការរៀន និងការបង្រៀន ឬគុណភាពអប់រំថយចុះទៅវិញ ដោយសារការប្រើប្រាស់មិនបានត្រឹមត្រូវ»។
តាមរយៈ ភ្នំពេញ ប៉ុស្តិ៍ លោក ឈត ប៊ុនថង បានផ្ញើសារទៅក្រុមយុវជនត្រូវប្រើប្រាស់ស្មាតហ្វូន ឬឧបករណ៍អេឡិចត្រូនិកផ្សេង ដោយប្រុងប្រយ័ត្ន ព្រោះវាជាអាវុធមុខ ២ ក្នុងនោះ ទី១ គេអាចប្រើបានជាប្រយោជន៍ក្នុងការស្វែងរកចំណេះដឹងព័ត៌មាន ការរកចំណូលបន្ថែម និងអាចដឹងពីការវិវឌ្ឍនៃពិភពលោកបាន ចំណែកទី២ គឺការប្រើខុស ដូចជា លេងហ្គេមរហូតដល់ញៀនលែងចង់រៀនសូត្រ លែងចង់ជួយការងារផ្ទះ និងការងារស្នូលផ្សេងៗ។
លោកថា៖ «ប្រសិនបើ ប្រើប្រាស់មិនបានត្រឹមត្រូវទេវាខាតប្រយោជន៍ជួនកាលក៏ប៉ះពាល់ដល់កិត្តិយស សេចក្តីថ្លៃថ្នូរ ខាតបង់ទ្រព្យសម្បត្តិជាដើមពីការប្រើប្រាស់ឧបករណ៍ស្មាតហ្វូន ទូរស័ព្ទដៃ...អ៊ីចឹងត្រូវធ្វើយ៉ាងណាឱ្យការប្រើប្រាស់ហ្នឹងបានប្រយោជន៍ ហើយអាចការពារខ្លួនបាន»៕
