ពិធីចុះហត្ថលេខារវាងសមាគមទេសចរណ៍កម្ពុជា និងមន្ទីរទេសចរណ៍ក្រុងឆាងសារ កាលពីសប្ដាហ៍មុន ។ រូបថត CATA
ភ្នំពេញៈកម្ពុជា-ចិន បានចុះអនុស្សរណៈយោគយល់គ្នាក្នុងការជួយផ្សព្វផ្សាយទេសចរណ៍វប្បធម៌ ទៅវិញទៅមករវាងខេត្តសៀមរាប និងទីក្រុងឆាងសារ ដើម្បីជំរុញឱ្យវិស័យទេសចរណ៍នៃប្រទេសទាំង២មានការកើនឡើង។
ការចុះអនុស្សរណៈយោគយល់គ្នា រវាងមន្ទីរទេសចរណ៍ វិទ្យុ ភាពយន្ត និងទូរទស្សន៍ក្រុងឆាងសារ នៃប្រទេសចិន ជាមួយសមាគមទេសចរណ៍កម្ពុជា គឺដើម្បីជួយផ្សព្វផ្សាយទេសចរណ៍វប្បធម៌ទៅវិញទៅមករវាងខេត្តសៀមរាប និងទីក្រុងឆាងសារ ដែលបានធ្វើឡើងកាលពីចុងសប្តាហ៍កន្លងទៅ។ នេះបើយោងតាមហ្វេសប៊ុករបស់មន្ទីរព័ត៌មានខេត្តសៀមរាប ដែលបានផ្សព្វផ្សាយនៅថ្ងៃទី៦ ខែវិច្ឆិកា ឆ្នាំ២០២៣។
យោងតាមមន្ទីរព័ត៌មានខេត្តសៀមរាបបានឱ្យដឹងថា លោក ប្រាក់ ផាន់ណារ៉ា រដ្ឋលេខាធិការក្រសួងទេសចរណ៍ បានលើកឡើងថា លោកបានស្នើឱ្យភាគីចិន ជួយផ្សព្វផ្សាយទេសចរណ៍កម្ពុជា ឱ្យកាន់ទូលំទូលាយ ជាពិសេសជំរុញទេសចរណ៍ក្នុងខេត្តហ៊ូណាន មកកម្ពុជា ឱ្យបានកាន់តែច្រើនជាងមុន តាមរយៈការលើកទឹកចិត្តដល់ក្រុមហ៊ុនទេសចរណ៍ ខេត្តហ៊ូណាន សហការជាមួយក្រុមហ៊ុនទេសចរណ៍កម្ពុជា រៀបចំដំណើរទេសចរណ៍ប្រកបដោយផាសុកភាព និងភាពទាក់ទាញ។
លោកបានបញ្ជាក់ថា៖ «យើងបានស្នើឱ្យរដ្ឋបាលទីក្រុងឆាងសារ ក៏ដូចជាខេត្តហ៊ូណាន ទាំងមូល គាំទ្រក្នុងការផ្សព្វផ្សាយពីកម្ពុជាឱ្យបានទូលំទូលាយ ជាពិសេសតំបន់ទេសចរណ៍វប្បធម៌ និងធម្មជាតិ តំបន់ឆ្នេរសមុទ្រជាដើមទៅកាន់ប្រជាជនខេត្តហ៊ូណាន»។
ជាមួយគ្នានេះ លោក យុន លីនណេ អភិបាលរងខេត្តសៀមរាប ក៏បានថ្លែងនាឱកាសនោះដែរថា ទំនាក់ទំនង និងកិច្ចសហប្រតិបត្តិការរវាងកម្ពុជា និងប្រទេសដៃគូសម្ព័ន្ធមេត្រីភាព ពិសេសប្រទេសចិន ត្រូវបានលើកកម្ពស់មួយកម្រិតដ៏ធំថែមទៀតរហូតប្រសិទ្ធនាមថា «ភាពជាដៃគូយុទ្ធសាស្ត្រគ្រប់ជ្រុងជ្រោយ» ជាមិត្តដែកថែប ហើយកម្ពុជាតែងប្រកាន់ជំហគាំទ្រគោលនយោបាយការបរទេសចិន ជាពិសេសគោលនយោបាយចិនតែ១ និងគំនិតផ្តួចផ្តើមស្តីពី ខ្សែក្រវាត់១និងផ្លូវ១។
លោកបានបញ្ជាក់ថា៖ «ជាការពិតណាស់ទិវាផ្សព្វផ្សាយ និងដោះដូរទេសចរណ៍វប្បធម៌ រវាងក្រុងឆាងសារ និងខេត្តសៀមរាបនាពេលនេះគឺជាការចូលរួមចំណែកជំរុញឱ្យមានការរីកចម្រើនលើវិស័យទេសចរណ៍ក្នុងខេត្តសៀមរាបក៏ដូចជាវិស័យទេសចរណ៍ទូទាំងកម្ពុជាផងដែរ»។
ដោយឡែក លោកស្រី វូ ហ្កីយីង (Wu Guiying) ជាសមាជិកអចិន្ត្រៃយ៍នៃគណៈកម្មាធិការបក្សខេត្តហ៊ូណាននិងជាលេខាធិការគណៈកម្មាធិការបក្សក្រុងឆាងសារ បានលើកឡើងថា វេទិកាផ្សព្វផ្សាយនេះ គឺជាព្រឹត្តិការណ៍ដ៏សំខាន់មួយក្នុងកិច្ចសហប្រតិបត្តិការក្រៅស្រុកនៃឧស្សាហកម្មទេសចរណ៍ក្រុងឆាងសារ តាមរយៈការផ្សព្វផ្សាយនិងផ្លាស់ប្តូរនេះ វានឹងជំរុញទំនាក់ទំនងឧស្សាហកម្ម ទស្សនកិច្ចទៅវិញទៅមក។
លោកស្រីបានបញ្ជាក់ថា៖ «កិច្ចសហប្រតិបត្តិការរវាងទីក្រុងឆាងសារ និងប្រទេសកម្ពុជា គឺនឹងជំរុញ និងលើកទឹកចិត្តដល់ភ្ញៀវទេសចរនៅក្រុងឆាងសារកាន់តែច្រើនមកកម្សាន្តប្រទេសកម្ពុជាដើម្បីស្វែងយល់ពីភាពទាក់ទាញនៃវប្បធម៌ល្អឯករបស់ប្រទេសមួយនេះ»។
ទាក់ទងរឿងនេះ លោក ម៉ម រិទ្ធី ប្រធានសហព័ន្ធសហជីពវិស័យទេសចរណ៍ និងសេវាកម្មកម្ពុជា បានឱ្យដឹងនៅថ្ងៃទី៦ ខែវិច្ឆិកាថា គ្រប់យុទ្ធសាស្ត្រដែលភាគីពាក់ព័ន្ធជួយលើកស្ទួយវិស័យទេសចរណ៍គឺលោកគាំទ្រជានិច្ច ព្រោះជាការធ្វើដើម្បីប្រយោជន៍ និងការផ្សព្វផ្សាយពីវប្បធម៌ អរិយធម៌ និងប្រពៃណីរបស់ប្រទេសកម្ពុជាឱ្យប្រទេសផ្សេងបានស្គាល់។
លោកបន្តថា ប៉ុន្តែអ្វីដែលកម្ពុជា បានផ្សព្វផ្សាយទៅនោះ តើវាមានអ្វីដែលប្លែកដែលជាសក្តានុពលទេសចរណ៍ក្នុងខេត្តសៀមរាបបច្ចុប្បន្នដែលធ្វើឱ្យអន្តរជាតិ ចាប់អារម្មណ៍ចង់ដឹងចង់ស្គាល់កម្ពុជា ឬគ្រាន់តែជាសក្ដានុពលដែលមានកាលពី១០ឆ្នាំមុននោះទេ ដែលយកផ្សព្វផ្សាយទៅកាន់អន្តរជាតិ។
លោកថ្លែងថា៖ «ឥឡូវយើងចុះអនុស្សរណៈជាមួយចិនហើយ យើងគួរតែធ្វើអ្វីមួយប្លែកដើម្បីឱ្យមានការចាប់អារម្មណ៍ និងដើម្បីឱ្យគេយល់ពីយើងហើយគេចង់មកលេងប្រទេសយើងដើម្បីស្គាល់ខេត្តសៀមរាបឬទីក្រុងភ្នំពេញ និងខេត្តព្រះសីហនុ ជាដើម»។
ដើម្បីផ្សព្វផ្សាយពីសក្ដានុពលទេសចរណ៍ឱ្យប្លែក និងមានការចាប់អារម្មណ៍កម្ពុជាគួរតែមានការអភិវឌ្ឍតំបន់ខេត្តទេសចរណ៍ ជាក់ស្ដែងខេត្តសៀមរាបក្រៅពីការអភិវឌ្ឍផ្លូវគឺត្រូវមានការអភិវឌ្ឍសេវាកម្មទេសចរណ៍តាំងពីកន្លែងស្នាក់នៅ ការធ្វើដំណើរ រហូតដល់ម្ហូបអាហារ ជាពិសេសត្រូវធ្វើយ៉ាងណាឱ្យភ្ញៀវអន្តរជាតិគិតថា ក្នុងខេត្តសៀមរាប ក្រៅពីប្រាសាទអង្គរវត្ត នៅមានកន្លែងកម្សាន្តជាច្រើនទៀតផងដែរ។នេះបើតាមការបន្ថែមពីលោក ម៉ម រិទ្ធី៕
