មន្ត្រី និងអ្នកជំនាញវិជ្ជាជីវៈ និងបច្ចេកទេស។ រូបថត ក្រសួងការងារ
ភ្នំពេញៈ អ្នកជំនាញសេដ្ឋកិច្ច នៅកម្ពុជាបានមើលឃើញថា គោលនយោបាយបណ្តុះបណ្តាលបច្ចេកទេសនិងវិជ្ជាជីវៈមិនត្រឹមតែអាចពង្រីកកម្លាំងជំនាញក្នុងស្រុកប៉ុណ្ណោះទេតែជាយុទ្ធសាស្ត្រចាប់យកអ្នកវិនិយោគខាងវិស័យឧស្សាហកម្មធំ-តូច និង មធ្យមដែលកំពុងហូរចេញពីបណ្តាប្រទេសអភិវឌ្ឍន៍មកកាន់ប្រទេសកំពុងអភិវឌ្ឍន៍។
អ្នកជំនាញសេដ្ឋកិច្ចលោក គី សេរីវឌ្ឍន៍ បានថ្លែងឱ្យដឹងថា មូលធនមនុស្សគឺជាសរសរស្តម្ភមួយនៃយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជាអាណត្តិទី៧នេះហើយការដាក់ឱ្យមានគោលនយោបាយជាតិស្តីពីការបណ្តុះបណ្តាលជំនាញបច្ចេកទេសនិងវិជ្ជាជីវៈគឺជាយុទ្ធសាស្ត្រមួយក្នុងចំណោមកិច្ចការអាទិភាពនានារបស់ខ្លួន។
លោកបានថ្លែងថា៖«ប្រទេសសិង្ហបុរីគេបានអនុវត្តលើគោលនយោបាយបណ្តុះបណ្តាលជំនាញបច្ចេកទេស និងវិជ្ជាជីវៈនេះបានជិត៤០ឆ្នាំហើយដោយឡែកកម្ពុជាក៏បានចាប់ផ្តើមលើគោលនយោបាយថ្នាក់ជាតិមួយនេះដែរ។នេះគឺជាការចាប់ផ្តើមមួយដ៏សំខាន់ណាស់ជាការចាប់ផ្តើមថ្មីមួយដើម្បីជំរុញសេដ្ឋកិច្ចជាតិមួយដ៏ចាំបាច់តាមរយៈការបង្កើនកម្លាំងជំនាញលើការផលិតក្នុងស្រុក»។
អ្នកជំនាញសេដ្ឋកិច្ចរូបនេះ ក៏បានបញ្ជាក់ផងដែរថា ការដាក់ចេញគោលនយោបាយថ្នាក់ជាតិលើការបណ្តុះបណ្តាលជំនាញបច្ចេកទេសនេះក៏ជាយន្តការផ្តល់ផលប្រយោជន៍ និង ជំរុញសេដ្ឋកិច្ចរយៈពេលវែងមួយដែរ។
លោក គី សេរីវឌ្ឍន៍ មើលឃើញថា យន្តការនេះអាចទាក់ទាញអ្នកវិនិយោគពីក្រៅប្រទេសនិងលើកកម្ពស់លើវិស័យឧស្សាហកម្មនិងវិស័យផលិតកម្មលើសហគ្រាសធុនតូចនិងមធ្យមនៅកម្ពុជានាពេលអនាគតទៀតផង។
លោកបានបញ្ជាក់ថា៖«កាលណាយើងពុំមានកម្លាំងជំនាញទេគឺយើងមិនអាចទាញការវិនិយោគធំៗពីក្រៅប្រទេសបានទេបើទោះបីរាជរដ្ឋាភិបាលលើកលែងពន្ធឬក៏ផ្តល់ការលើកទឹកចិត្តផ្សេងៗដល់ការវិនិយោគក៏ដោយ ក៏វានៅតែពិបាកដដែលព្រោះយើងខ្វះកម្លាំងពលកម្មជំនាញ»។
គោលនយោបាយថ្នាក់ជាតិលើការបណ្តុះបណ្តាលជំនាញវិជ្ជាជីវៈនេះអាចជាយុទ្ធសាស្ត្ររបស់រាជរដ្ឋាភិបាលអាណត្តិថ្មីក្នុងការត្រៀមខ្លួនស្វាគមន៍វិនិយោគខាងវិស័យឧស្សាហកម្មពីបណ្តាប្រទេសអភិវឌ្ឍន៍មកកាន់កម្ពុជា និងកត្តានេះហើយដែលរាជរដ្ឋាភិបាលបានដាក់គោលដៅដុតដៃដុតជើងក្នុងការពង្រីកកម្លាំងជំនាញឬក៏មូលធនមនុស្សនេះ។លោក គី សេរីវឌ្ឍន៍បានបញ្ជាក់បន្ថែមដូច្នេះ។
លោកបានបន្តថា៖«លំហូរវិនិយោគលើវិស័យឧស្សាហកម្មមកពីប្រទេសចិនឥណ្ឌា រុស្សី និងបណ្តាប្រទេសអភិវឌ្ឍន៍ បាននិងកំពុងហូរចូលមកកាន់បណ្តាប្រទេសកំពុងអភិវឌ្ឍន៍ដូច្នេះកម្ពុជាត្រូវចេះឆ្លៀតឱកាសនេះលើការទាក់ទាញការវិនិយោគនិងលំហូរសេដ្ឋកិច្ចទាំងនេះតាមរយៈការពង្រីកសមត្ថភាពជំនាញរបស់ពលរដ្ឋ»។
លោកក៏បានអំពាវនាវឱ្យពលរដ្ឋក្រីក្រនិងងាយរងគ្រោះក៏ដូចជាពលរដ្ឋទូទៅ ឱ្យមកទទួលយកវគ្គបណ្តុះបណ្តាលនេះដើម្បីបង្កើនសមត្ថភាពរបស់ខ្លួនឯងពីអតិពលកម្មមកជាកម្លាំងជំនាញវិញដើម្បីមានឱកាសវិវឌ្ឍខ្លួនមកចាប់យកឱកាសការងារនៅវិស័យធំៗដែលមានប្រាក់ចំណូលខ្ពស់ជាងមុន។
ចំណែក នាយកនៃមជ្ឈមណ្ឌលនវានុវត្តន៍ផ្នែកអភិបាលកិច្ចនិងប្រជាធិបតេយ្យនៃវិទ្យាស្ថានចក្ខុវិស័យអាស៊ីលោក ឆេង គឹមឡុង ក៏បានថ្លែងឱ្យដឹងដែរថាការបណ្តុះបណ្តាលបច្ចេកទេស និងវិជ្ជាជីវៈគឺមានសារៈសំខាន់ណាស់សម្រាប់ពលរដ្ឋក្រីក្រនិងងាយរងគ្រោះព្រោះពួកគាត់អាចមានជំនាញហើយអាចឆ្លើយតបទៅនឹងលក្ខខណ្ឌការងារនៅក្នុងស្រុកបាននិងមានចំណូលខ្ពស់ជាងមុន។
លោកបានឱ្យដឹងថា៖ «ការលើកកម្ពស់កម្លាំងជំនាញបច្ចេកទេសនិងវិជ្ជាជីវៈគឺជាផ្នែកមួយដែលធ្វើឱ្យពលរដ្ឋឆ្លើយតបទៅនឹងវិបត្តិផ្សេងៗឆ្លើយតបក្នុងន័យថាពួកគាត់ទទួលបានចំណេះជំនាញថ្មីៗសមស្របទៅនឹងស្ថានភាពការងារបច្ចុប្បន្ន»។
លោកបានបន្តថា ការបណ្តុះបណ្តាលបច្ចេកទេសនិងវិជ្ជាជីវៈនេះមានទិសដៅ៣សំខាន់ គឺបណ្តុះបណ្តាលជំនាញដែលមានស្រាប់, បណ្តុះបណ្តាលជំនាញថ្មីៗនិងបណ្តុះបណ្តាលជំនាញបន្ថែម (Reskill)។ ទាំងនេះសុទ្ធសឹងតែជាទិសដៅសំខាន់ៗក្នុងយន្តការជាតិនេះដែលរាជរដ្ឋាភិបាលគួរតែយកចិត្តទុកដាក់និងផ្តោតលើការបណ្តុះបណ្តាលនាពេលខាងមុខ។
លោកឆេង គឹមឡុង ថ្លែងថា៖«កាលណាកម្ពុជាជោគជ័យលើការបណ្តុះបណ្តាលនេះកម្ពុជានឹងក្លាយជាប្រទេសដែលមានភាពទាក់ទាញ។មានន័យថាទាក់ទាញការវិនិយោគពីខាងក្រៅមកហើយយើងអ្នកនៅក្នុងស្រុកបានត្រៀមខ្លួនរួចជាស្រេចលើកម្លាំងជំនាញដែលយើងមាន»។
កាលពីពេលថ្មីៗកន្លងទៅនេះ លោកនាយករដ្ឋមន្ត្រី ហ៊ុន ម៉ាណែត បានលើកឡើងថា រាជរដ្ឋាភិបាលអាណត្តិថ្មីនេះបានដាក់ចេញគោលនយោបាយលើការបណ្តុះបណ្តាលជំនាញបច្ចេកទេស និង វិជ្ជាជីវៈលើគ្រួសារក្រីក្រនិងងាយរងហានិភ័យឱ្យបាន ១,៥ លាននាក់ ហើយលោកផ្ទាល់នឹងប្រកាសដាក់ឱ្យអនុវត្តវគ្គបណ្តុះបណ្តាលនេះជាផ្លូវការ នៅថ្ងៃទី១៤ ខែ វិច្ឆិកាឆ្នាំ ២០២៣ ខាងមុខនេះ។
ទាក់ទងនឹងការបណ្តុះបណ្តាលជំនាញនេះដែរ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានថ្លែង កាលពីថ្ងៃទី៧ ខែវិច្ឆិកាថា ការបណ្តុះបណ្តាលជំនាញបច្ចេកទេសវិជ្ជាជីវៈ ដល់យុវជនមកពីគ្រួសារក្រីក្រ គ្រួសារងាយរងហានិភ័យ និងកម្មករនិយោជិតប្រមាណ១,៥លាននេះ គឺក្រសួងបានបញ្ចប់ និងត្រៀមលក្ខណសម្បត្តិជាមួយស្ថាប័ន និងដៃគូពាក់ព័ន្ធកំណត់យន្តការ មុខសញ្ញា វិធីសាស្ត្រ ចុះឈ្មោះសិស្ស កម្មវិធីសិក្សា និងសេចក្តីជូនដំណឹងនានាផងដែរ។
លោកបានថ្លែងថា៖ «ក្រសួងបានជ្រើសរើសវិស័យចំនួន១០ និងជំនាញអាទិភាពចំនួន៣៨មុខជំនាញ សម្រាប់ជំហានដំបូង ដែលទីផ្សារការងារកំពុងមានតម្រូវការខ្ពស់ និងបានបញ្ចប់ការធ្វើវិក្រឹតការគ្រូបច្ចេកទេសចំនួន២៤៨នាក់រួចហើយ កាលពីថ្ងៃទី៤ ខែវិច្ឆិកា»៕
