មន្ត្រីគណៈកម្មាធិការសិទ្ធិកុមាររបស់ UN ពេលជួបលោក ស សុខា កាលពីថ្ងៃទី៧ វិច្ឆិកា ។ រូបថត ក្រសួងមហាផ្ទៃ
ភ្នំពេញៈលោកស្រី Ann Marie SKELTON ប្រធានគណៈកម្មាធិការសិទ្ធិកុមាររបស់អង្គការសហប្រជាជាតិបានកោតសរសើរដល់រដ្ឋាភិបាលកម្ពុជា លើការលើកកម្ពស់សិទ្ធិកុមារ សុខុមាលភាពប្រជាជន ក៏ដូចជាកំណែទម្រង់វិមជ្ឈការ និងសហវិមជ្ឈការសំដៅលើកកម្ពស់ប្រជាធិបតេយ្យតាមមូលដ្ឋាននិងរដ្ឋបាលថ្នាក់ក្រោមជាតិ។
ការកោតសរសើររបស់មន្ត្រីជាន់ខ្ពស់ UN នេះធ្វើឡើងក្នុងជំនួបពិភាក្សាការងាររវាងលោកស្រី និងលោកស សុខា រដ្ឋមន្ត្រីក្រសួងមហាផ្ទៃ រួមមានទាំងវត្តមាន លោក Will Parks នាយកប្រចាំប្រទេសកម្ពុជារបស់អង្គការ UNICEF ផងដែរ កាលពីថ្ងៃទី៧ ខែវិច្ឆិកា ឆ្នាំ២០២៣។
យោងតាមហ្វេសប៊ុកក្រសួងមហាផ្ទៃ នៅក្នុងជំនួបនោះ លោកស សុខា បានលើកឡើងពីសារៈសំខាន់ដែល UNICEF បានជួយលើកកម្ពស់សេវាសង្គមនៅរដ្ឋបាលថ្នាក់ក្រោមជាតិ សុខុមាលភាពប្រជាជន កិច្ចការពារកុមារ ដែលកំពុងអនុវត្តជាមួយក្រសួងមហាផ្ទៃ។ លោកថា កិច្ចការទាំងនេះ ស្របតាមមុំទី៣ នៃយុទ្ធសាស្ត្រទី១ នៃយុទ្ធសាស្ត្របញ្ចកោណរបស់រដ្ឋាភិបាលអាណត្តិទី៧។
លោកបានថ្លែងថា៖ «រាជរដ្ឋាភិបាលនិងក្រសួងមហាផ្ទៃ តែងតែយកចិត្តទុកដាក់ខិតខំប្រឹងប្រែងអនុវត្តសន្ធិសញ្ញារបស់អង្គការសហប្រជាជាតិពាក់ព័ន្ធនឹងសិទ្ធិកុមារ ក្នុងគោលបំណងគាំពារ និងលើកកម្ពស់សិទ្ធិកុមារ តាមរយៈគោលនយោបាយជាតិនិងលិខិតបទដ្ឋានគតិយុត្តផ្សេងៗក៏ដូចជាកិច្ចសហការភាពជាដៃគូជាមួយអង្គការសង្គមស៊ីវិលនានា»។
បន្ថែមពីនេះ លោកស សុខា ក៏បានស្នើ UNICEF ជួយកម្ពុជាបន្ថែមទៀត ជាពិសេសកិច្ចសហប្រតិបត្តិការជាមួយក្រសួងមហាផ្ទៃលើការលើកកម្ពស់សុខុមាលភាពប្រជាជនកម្ពុជា រួមទាំងកុមារដែលកំពុងរងគ្រោះ,ការ
ប្រឆាំងការជួញដូរកុមារ, កសាងសមត្ថភាពមន្ត្រីជំនាញកម្ពុជាតាមរយៈការបណ្ដុះបណ្តាលនានា ដែល UNICEF កំពុងធ្វើជាមួយក្រសួងមហាផ្ទៃស្រាប់ជាដើម។
បើតាមប្រភពដដែល លោកស្រី Ann Marie SKELTON ក៏បានកោតសរសើររបស់រដ្ឋាភិបាលនិងក្រសួងមហាផ្ទៃលើកិច្ចខិតខំលើកកម្ពស់ការគាំពារកុមារ និងការបន្តយកចិត្តទុកដាក់ចំពោះកំណែទម្រង់វិមជ្ឈការ និងវិសហមជ្ឈការ ហើយលោកស្រីគាំទ្រនិងលើកទឹកចិត្តដល់រដ្ឋាភិបាលកម្ពុជាឱ្យខិតខំប្រឹងប្រែងបន្តទៀត។
យោងតាមសេចក្តីប្រកាសព័ត៌មានរបស់អង្គការ UNICEF នៅថ្ងៃទី៨ ខែវិច្ឆិកា ស្តីពីប្រធានគណៈកម្មាធិការសិទ្ធិកុមារនៃអង្គការសហប្រជាជាតិ(UNCRC) បានបញ្ចប់ដំណើរទស្សនកិច្ចរយៈពេល២ថ្ងៃនៅកម្ពុជា ដើម្បីតស៊ូមតិសម្រាប់ការអនុវត្តអនុសាសន៍របស់ខ្លួនដែលបានធ្វើឡើងកាលពីឆ្នាំ២០២២ ក្នុងគោលបំណងលើកកម្ពស់សុខុមាលភាពកុមារ និងយុវជននៅក្នុងប្រទេសកម្ពុជា។
សេចក្តីប្រកាសព័ត៌មានបានលើកឡើងថា នៅក្នុងកិច្ចពិភាក្សាទាំងនោះអ្នកជំនាញទាំង២រូបបានទទួលស្គាល់សមិទ្ធផលដែលសម្រេចបានដោយរាជរដ្ឋាភិបាលកម្ពុជាពីឆ្នាំ២០១១ ដល់ឆ្នាំ២០២៣ ក្នុងកិច្ចការពារ និងបំពេញសិទ្ធិកុមារ ហើយក៏បានលើកឡើងផងដែរពីចំណុចនានាដែលគួរឱ្យព្រួយបារម្ភ។
ជាមួយគ្នានោះ លោកស្រី Ann Marie SKELTONបានថ្លែងអំណរគុណដល់រាជរដ្ឋាភិបាលកម្ពុជា និងគ្រប់ភាគីពាក់ព័ន្ធទាំងអស់ សម្រាប់ការទទួលស្វាគមន៍ និងការផ្លាស់ប្តូរយោបល់ប្រកបដោយផ្លែផ្កានៅក្នុងដំណើរទស្សនកិច្ចនេះ។
លោកស្រីបានបញ្ជាក់ថា៖«ប្រទេសកម្ពុជាបានសម្រេចវឌ្ឍនភាពគួរឱ្យកត់សម្គាល់ក្នុងការអនុវត្តអនុសញ្ញាស្តីពីសិទ្ធិកុមារ។ យើងសង្ឃឹមថា រាជរដ្ឋាភិបាលនឹងធានាលើការអនុម័តច្បាប់ស្ដីពីកិច្ចការពារកុមារ និងការអនុវត្តច្បាប់នេះ»។
លោកស្រីបានបន្តថា៖«យើងក៏សូមលើកទឹកចិត្តដល់រាជរដ្ឋាភិបាលក្នុងការបំពេញការប្ដេជ្ញាចិត្តរបស់ខ្លួនទាក់ទងនឹងសិទ្ធិកុមារដោយអនុម័តពិធីសារបន្ថែមទី៣នៃអនុសញ្ញាស្ដីពីសិទ្ធិកុមារដែលបង្កើតយន្តការជាតិដើម្បីអនុញ្ញាតឱ្យកុមារអាចស្វែងរកសំណងពីការរំលោភបំពានលើសិទ្ធិរបស់ពួកគេ ហើយនៅពេលប្រព័ន្ធច្បាប់របស់ពួកគេមិនអាចផ្តល់ដំណោះស្រាយឱ្យបាន»។
អ្នកជំនាញទាំង២រូបក៏បានសង្កត់ធ្ងន់លើសារៈសំខាន់នៃការហាមប្រាមការដាក់ទណ្ឌកម្មលើរាងកាយនៅគ្រប់បរិបទទាំងអស់ និងការបន្តប្រយុទ្ធប្រឆាំងនឹងអំពើហិង្សា និងការកេងប្រវ័ញ្ចផ្លូវភេទលើកុមារ។
ចំណែកលោក Will Parks ក៏បានថ្លែងដែរថា៖ «តាមរយៈដំណើរទស្សនកិច្ចនេះ សមាជិកទាំង២នៃគណៈកម្មាធិការសិទ្ធិកុមារ បានរួមចំណែកចែករំលែកចំណេះដឹងនិងទស្សនៈទាក់ទងនឹងសិទ្ធិដល់កិច្ចខិតខំប្រឹង
ប្រែងរបស់រាជរដ្ឋាភិបាល ក្នុងការលើកស្ទួយសិទ្ធិកុមារនៅក្នុងប្រទេសកម្ពុជា»។
លោកបានបន្តថា អាជ្ញាធរជាតិកំពុងធ្វើការត្រឹមត្រូវក្នុងការអនុវត្តតាមអនុសាសន៍ភាគច្រើនបំផុតដែលបានលើកឡើងដោយគណៈកម្មាធិការសិទ្ធិកុមារកាលពីឆ្នាំ២០២២។
លោកបានបន្ថែមថា UNICEF បន្ត ប្តេជ្ញាចិត្តគាំទ្ររាជរដ្ឋាភិបាលកម្ពុជាទាំងនៅថ្នាក់ជាតិ និងថ្នាក់ក្រោមជាតិ ដើម្បីសម្រេចបានសិទ្ធិកុមារ និងបង្កើតអនាគតមួយដែលកុមារទាំងអស់អាចចម្រើនលូតលាស់ រៀនសូត្រ លេងកម្សាន្ត អភិវឌ្ឍ និងរីកចម្រើនប្រកបដោយសេចក្ដីថ្លៃថ្នូរនៅក្នុងគ្រួសារ និងបរិស្ថានសហគមន៍របស់ខ្លួន។
ពាក់ព័ន្ធនឹងបញ្ហានេះ លោកស៊ឺន សម អ្នកជំនាញផ្នែកទំនាក់ទំនងអន្តរជាតិបានថ្លែងថា បើតាមការកត់សម្គាល់ កន្លងមករដ្ឋាភិបាលកម្ពុជាតែងយកចិត្តទុកដាក់ខ្ពស់ដល់សុខុមាលភាព ក៏ដូចជាលើកកម្ពស់សិទ្ធិកុមារ។ តួយ៉ាងទៅលើវិស័យអប់រំដែលមានភាពលេចធ្លោជាងគេ ប៉ុន្តែទោះជាយ៉ាងណា លោកថា នៅមានកម្រិតដែលទាមទាររដ្ឋាភិបាលបង្កើនការយកចិត្តដាក់បន្ថែម ជាពិសេសទៅលើកុមារងាយរងគ្រោះ។
លោកលើកទឹកចិត្តឱ្យរដ្ឋាភិបាលផ្តល់ការសម្របសម្រួលនិងកិច្ចសហប្រតិបត្តិការពេញលេញជាមួយដៃគូអន្តរជាតិ តួយ៉ាងអង្គការសហប្រជាជាតិជាដើម ដើម្បីឱ្យអង្គការទាំងនោះមានលទ្ធភាពខ្ពស់លើកិច្ចការងារពាក់ព័ន្ធកុមារ បូករួមការបើកបរិយាកាសល្អដល់អង្គការក្រៅរដ្ឋាភិបាលក្នុងប្រទេស ដែលជាភារកិច្ចរបស់ក្រសួងមហាផ្ទៃផ្ទាល់។
សម្រាប់លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុកវិញ បានថ្លែងថា បើតាមសង្កេតឃើញថានៅមានកម្សោយលើគុណភាពជាមួយវិស័យអប់រំពាក់ព័ន្ធកុមារនៅតាមមូលដ្ឋានដែលមានអត្រាបោះបង់ការសិក្សាច្រើន ដោយសារវិបត្តិគ្រួសារដែលចេញពីបញ្ហាសេដ្ឋកិច្ច ខណៈសិទ្ធិទទួលបានការអប់រំជារឿងអាទិភាព។
លោកបានបន្ថែមថា ជាការកត់សម្គាល់មួយទៀតឃើញថា បញ្ហាការបៀតបៀនពាក់ព័ន្ធការរំលោភបំពានលើកុមារ ជាពិសេសពាក់ព័ន្ធការលេចឡើងរូបភាព វីដេអូអាសអាភាសរបស់កុមារនៅលើបណ្តាញសង្គមដែលទាមទារឱ្យរដ្ឋាភិបាលធ្វើការជាបន្ទាន់៕
