រូបថត ក្រសួងប្រៃសណីយ៍
ក្រសួងប្រៃសណីយ៍ និងទូរគមនាគមន៍ (ក.ប.ទ.) បានបើកការដ្ឋានសាងសង់មជ្ឈមណ្ឌលបច្ចេកវិទ្យាសហគមន៍ ( ម.ប.ស.) នៅតាមវិទ្យាល័យសាធារណៈក្នុងខេត្តតាកែវ ដើម្បីលើកកម្ពស់ដំណើរការអភិវឌ្ឍមូលធនមនុស្សឌីជីថល ការលើកកម្ពស់អក្ខរកម្មឌីជីថល និងការកាត់បន្ថយគម្លាតឌីជីថលជាដើម។ ពិធីបើកការដ្ឋាននេះ ត្រូវបានប្រព្រឹត្តឡើងកាលពីថ្ងៃទី១០ខែវិច្ឆិកា ឆ្នាំ ២០២៣ នៅវិទ្យាល័យ ប៊ុនរ៉ានី ហ៊ុនសែន បាទី ដោយមានការអញ្ជើញចូលរួមពីលោក ជា វ៉ន់ដេត រដ្ឋមន្តីក្រសួងប្រៃសណីយ៍និងទូរគមនាគមន៍ (ក.ប.ទ.) លោក សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា លោក អ៊ូច ភា អភិបាលខេត្តតាកែវ ថ្នាក់ដឹកនាំនិងមន្ដ្រីរាជការ ក.ប.ទ. គណៈអភិបាលក្រុង-ស្រុកទូទាំងខេត្តតាកែវ តំណាងមន្ទីរ និងការិយាល័យ អប់រំ យុវជន និងកីឡា លោកគ្រូ អ្នកគ្រូ សិស្សានុសិស្ស និងប្រជាពលរដ្ឋ សរុបប្រមាណ ២០៦៨នាក់។ បើតាមសេចក្តីប្រកាសព័ត៌មានស្តីពីពិធីបើកការដ្ឋាននេះ លោក ជា វ៉ានដេត បានឱ្យថ្លែងថា បន្ទាប់ពីទទួលបានគោលការណ៍ឯកភាពពីរាជរដ្ឋាភិបាល ក.ប.ទ. បានជ្រើសរើសវិទ្យាល័យនៅតាមក្រុង-ស្រុក ទូទាំងខេត្តតាកែវ ជាទីតាំងដំបូងសម្រាប់សាងសង់ ម.ប.ស.។ ដោយ ម.ប.ស. មានមុខងារចម្បងចំនួន៤ គឺ (១) ផ្តល់បន្ទប់កុំព្យូទ័រ (Computer Lab) សម្រាប់បណ្តុះបណ្តាលជំនាញបច្ចេកវិទ្យាឌីជីថល ផ្តល់ការអប់រំតាមប្រព័ន្ធបង្រៀនពីចម្ងាយ ដល់សិស្សវិទ្យាល័យ សាធារណៈ និងជាសាលប្រជុំ ព្រមទាំងជាសាលបណ្តុះបណ្តាលគ្រូបង្រៀនតាមប្រព័ន្ធបង្រៀនពីចម្ងាយ ។ (២) ផ្តល់បន្ទប់ បណ្តុះបណ្តាល (Training Room) សម្រាប់បណ្តុះបណ្តាលជំនាញបច្ចេកវិទ្យាឌីជីថលដល់អាជ្ញាធរមូលដ្ឋាន និង ប្រជាពលរដ្ឋក្នុងសហគមន៍ ដែលមានបំណងចង់ប្រើប្រាស់ប្រព័ន្ធបច្ចេកវិទ្យាក្នុងគោលដៅផ្សេងៗ។ (៣) ផ្តល់ទីតាំង ជាប៉ុស្តិ៍ប្រៃសណីយ៍ (Post Office) សម្រាប់ផ្តល់សេវាទទួល និងផ្ញើកញ្ចប់អីវ៉ាន់ ព្រមទាំងផ្តល់សេវាផ្សេងៗដល់ពាណិជ្ជករ អាជីវករ និងប្រជាពលរដ្ឋនៅសហគមន៍ និង (៤) ផ្តល់បន្ទប់អ៊ីនធឺណិតកាហ្វេ (Internet Café) ជូនប្រជាជននៅ សហគមន៍អាចចូលប្រើប្រាស់ ដើម្បីស្វែងរកព័ត៌មានពាក់ព័ន្ធនឹងកសិកម្ម អាជីវកម្ម និងព័ត៌មានផ្សេងទៀតពាក់ព័ន្ធនឹងតម្រូវការជាក់ស្ដែងរបស់ប្រជាពលរដ្ឋនៅសហគមន៍នីមួយៗ។ លោករដ្ឋមន្ត្រី មានសង្ឃឹមជឿជាក់ប្រកបដោយសុទិដ្ឋិនិយមថា នៅពេលដាក់ឱ្យដំណើរការ ម.ប.ស. នឹងក្លាយជាសមិទ្ធផលថ្មីមួយដ៏មានសារៈសំខាន់ ទាន់ពេល និងចំគោលដៅ ដែលគាំទ្រដល់ដំណើរអភិវឌ្ឍន៍ការអប់រំ ឌីជីថល ប្រកបដោយស្មារតីបុរេសកម្ម និងគំនិតបើកទូលាយចំពោះបេសកកម្មបរិវត្តកម្មរដ្ឋាភិបាលឌីជីថល សំដៅរួមចំណែកដល់ការអនុវត្តប្រកបដោយប្រសិទ្ធភាព ស្របតាមក្របខ័ណ្ឌគោលនយោបាយសេដ្ឋកិច្ចនិងសង្គមឌីជីថល កម្ពុជា និងគោលនយោបាយរដ្ឋាភិបាលឌីជីថលកម្ពុជា ដើម្បីឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០។ ជាមួយគ្នានេះលោក សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា បានថ្លែងអំណរគុណដល់ ក.ប.ទ. ក្រោមកិច្ចសហការជាមួយភាគីពាក់ព័ន្ធ ដែលបានបង្កើត ម.ប.ស. ដើម្បីរួមចំណែកដល់ការលើកកម្ពស់អក្ខរកម្ម និងបំណិនឌីជីថល និងការធ្វើសមាហរណកម្មបច្ចេកវិទ្យាអប់រំ ដែលផ្សារភ្ជាប់ទំនាក់ទំនង និងភាពជាដៃគូរវាងរដ្ឋនិង សហគមន៍ ដើម្បីការអប់រំឌីជីថលនៅក្នុងថ្នាក់រៀន សាលារៀន និងសហគមន៍ទាំងមូល។ ទន្ទឹមនឹងនេះ លោក អ៊ូច ភា ក៏បានលើកទឹកចិត្ត លោកគ្រូ អ្នកគ្រូ សិស្សានុសិស្ស និងប្រជាពលរដ្ឋ ចូលរួមថែរក្សានិងប្រើប្រាស់មជ្ឈមណ្ឌលនេះ ឱ្យអស់សក្តានុពល៕
