មន្ត្រីរាជរដ្ឋាភិបាល និងអ្នកចូលរួមពីវិស័យឯកជន។ រូបថត STPM
ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត ចង់ឃើញវិស័យឯកជនដើរតួនាទីយ៉ាងសកម្មក្នុងការចូលរួមជាមួយរដ្ឋាភិបាលដើម្បីជួយជំរុញការចូលរួមអនុលោមភាព ដោយលោកបញ្ជាក់ថា បើមិនមានអនុលោមភាពទេប្រព័ន្ធសេដ្ឋកិច្ចទីផ្សារកម្ពុជានឹងបាត់បង់នូវសេចក្ដីទុកចិត្តហើយក៏នឹងមិនអាចធានានូវភាពប្រកួតប្រជែងដោយស្មើ
ភាពផងដែរ។
លោកបញ្ជាក់ថា រាជរដ្ឋាភិបាលយល់ច្បាស់អំពីបន្ទុកអនុលោមភាព (Compliant burden) ដែលកន្លងមកវិស័យឯកជនតែងតែលើកឡើង។ បន្ទុកអនុលោមភាពមួយចំនួនដែលជាបន្ទុកមិនចាំបាច់រាជរដ្ឋាភិបាលត្រូវដាក់ចេញវិធានការលុបបំបាត់ឬកែសម្រួល។
ប៉ុន្តែប្រការនេះមិនមែនមានន័យថា វិស័យឯកជនមិនត្រូវរងនូវបន្ទុកអនុលោមភាពណាមួយសោះនោះទេព្រោះបន្ទុកអនុលោមភាពនេះហើយជាស្តង់ដាអប្បបរមា ដែលវិស័យឯកជនត្រូវអនុវត្តតាមដើម្បីបង្កើននូវជំនឿទុកចិត្តអតិថិជនរបស់ខ្លួនក៏ដូចជាការជំរុញឱ្យដំណើរការរបស់ខ្លួនច្បាស់លាស់ និងអាចលូតលាស់ដោយចីរភាព។
ក្នុងវេទិកា រាជរដ្ឋាភិបាលផ្នែកឯកជន នាថ្ងៃទី ១៣ ខែវិច្ឆិកា ឆ្នាំ ២០២៣ លោកបានលើកឡើងពីគុណសម្បត្តិនៃការចូលរួមក្នុងអនុលោមភាពដែលជួយពង្រឹងតម្លាភាពការងារ ការប្រកួតប្រជែងស្មើភាព និងភាពទុកចិត្តគ្នារវាងរាជរដ្ឋាភិបាល និងវិស័យឯកជនផងដែរ ដោយលោកពន្យល់ថា បន្ទុកអនុលោមភាពនេះគឺជាកាតាលីករដែលនឹងជំរុញឱ្យមានភាពប្រកួតប្រជែងដោយស្មើភាព ដែលជាខែលការពារក្រុមហ៊ុនពីសកម្មភាពផ្លូវច្បាប់ណាមួយ នៅពេលមានបណ្តឹងផងដែរ។
ជាពិសេសសម្រាប់រយៈពេលវែងវិស័យឯកជនតែងតែចង់បាននូវបរិស្ថានមួយដែលប្រាកដប្រជា ដែលស្មើភាពហើយងាយស្រួលនៅក្នុងការធ្វើផែនការដែលមានភាពច្បាស់លាស់។
លោក ហ៊ុន ម៉ាណែត បន្តថា៖ «ផ្ទុយទៅវិញបើគ្មានអនុលោមភាពប្រព័ន្ធសេដ្ឋកិច្ចទីផ្សាររបស់យើងនឹងក្លាយជាសេដ្ឋកិច្ចអនាធិបតេយ្យបាត់បង់សេចក្ដីទុកចិត្ត ហើយក៏នឹងមិនអាចធានាភាពប្រកួតប្រជែងដោយស្មើភាពផងដែរ។ នៅក្នុងន័យនេះខ្ញុំបានលើកឡើងនៅក្នុងវេទិកាសាធារណៈ ជាច្រើន។ ពេលជួបជាមួយវិស័យឯកជនក៏ដូចជាជួបជាលក្ខណៈឯកជនជាមួយថ្នាក់ដឹកនាំវិស័យឯកជនខ្ញុំចង់ឃើញវិស័យឯកជនដើរតួនាទីយ៉ាងសកម្មនៅក្នុងការចូលរួមជាមួយរដ្ឋាភិបាលដើម្បីជួយជំរុញការចូលរួមអនុលោមភាព។ បានន័យថា វិស័យឯកជនដើរតួនាទីជាប៉ូលិសផង។ រាជរដ្ឋាភិបាលស្ថាប័នរដ្ឋមិនចាំបាច់ មិនត្រូវការឬមួយក៏មិនចង់ដើរតួនាទីតែឯងនោះទេ ព្រោះកិច្ចការជាច្រើននៅក្នុងការជំរុញអនុលោមភាពបានន័យថា collective responsibility (ការរួមគ្នាទទួលខុសត្រូវ)»។
លោកបន្ថែមថា ប្រសិនជាវិស័យឯកជនដើរតួនាទីកាន់តែសកម្ម និងមានប្រសិទ្ធភាពក្នុងការគ្រប់គ្រង និងជំរុញអនុលោមភាពក្នុងវិស័យឯកជន រដ្ឋនឹងបានធូរមួយកម្រិត ហើយស្ថាប័នរដ្ឋក៏អាចដើរឈាននៅខាងក្រោយសម្រាប់គាំទ្រទៅវិញ។
លោកចង់បង្កើនតួនាទីឱ្យវិស័យឯកជនដើរតួនាទីជាអ្នកជួយជំរុញអនុលោមភាពនៅក្នុងវិស័យឯកជន។ លោកអំពាវនាវដល់វិស័យឯកជនព្យាយាមឱ្យអស់ពីសមត្ថភាពក្នុងការឆ្លើយតបទៅនឹងអនុលោមភាព ដោយមិនត្រូវចាត់ទុកអនុលោមភាពជារបាំងឧបសគ្គឡើយ ហើយថា រាជរដ្ឋាភិបាលនឹងផ្តល់នូវកិច្ចសម្របសម្រួលគ្រប់បែបយ៉ាងដើម្បីកាត់បន្ថយបន្ទុកអនុលោមភាពនេះ។
ជាមួយនឹងការចូលរួមពីគ្រប់តួអង្គរាជរដ្ឋាភិបាលនឹងបង្កើតឡើងនូវប្រព័ន្ធអេកូឡូស៊ីដែលជំរុញការលើកស្ទួយកិច្ចសហការរួមគ្នានៅក្នុងចីរភាពនៃប្រព័ន្ធតួអង្គតែមួយសម្រាប់ការអភិវឌ្ឍប្រកបដោយចីរភាពនៃសេដ្ឋកិច្ចកម្ពុជា។
លោកនាយករដ្ឋមន្ត្រីក៏បានលើកឡើងពីគោលដៅនៃការគាំទ្ររបស់រាជរដ្ឋាភិបាលដើម្បីបង្កើនភាពប្រកួតប្រជែងនៃសេដ្ឋកិច្ចរបស់កម្ពុជាទាំងមូលនិងសុខុមាលភាពរបស់ប្រជាជនជារួមសំដៅរក្សាបានទីផ្សារ និងការងារដែលមានស្រាប់ និងបង្កើតទីផ្សារការងារឱ្យបានកាន់តែច្រើននៅក្នុងឧស្សាហកម្មសក្តានុពលថ្មីៗបន្ថែមទៀតជាមួយនឹងការបង្កើនចំណូល និងជំនាញដល់ប្រជាពលរដ្ឋ។
ក្រៅពីនេះ លោកក៏បានលើកឡើងពីភាពចាំបាច់ដែលត្រូវខិតខំចៀសវាងឱ្យបាននូវសតិអារម្មណ៍នៃស្ថានភាពដែលថា «ពេលខាតរដ្ឋចេញ ពេលចំណេញ ឯកជនយក» ដោយលោកបន្ថែមថា ភាពចាំបាច់នៃកិច្ចការកែទម្រង់ គឺមានទាំងសងខាងទាំងសម្រាប់រាជរដ្ឋាភិបាល និងទាំងសម្រាប់វិស័យឯកជន ហើយការផ្ដល់កិច្ចសហការគាំទ្រក៏មិនមែនជាកាតព្វកិច្ចតែម្ខាងរបស់រាជរដ្ឋាភិបាលនោះដែរ។
វិស័យឯកជនក៏មានកាតព្វកិច្ចបង្ហាញពីសមត្ថកម្មជាក់ស្ដែងដែលខ្លួនសម្រេចបានបន្ទាប់ពីទទួលបានការគាំទ្រណាមួយពីរាជរដ្ឋាភិបាលផងដែរ។
លោក ថុង ម៉េងដាវិត ប្រធានផ្នែកស្រាវជ្រាវនៃវិទ្យាស្ថានចក្ខុវិស័យអាស៊ី (AVI) បានប្រាប់ ភ្នំពេញប៉ុស្តិ៍ នៅថ្ងៃទី ១៣ ខែវិច្ឆិកា ថា ការលើកកម្ពស់ និងគាំទ្រសកម្មភាពវិស័យឯកជន គឺជាកត្តាចាំបាច់មួយដ៏សំខាន់នៅក្នុងរដ្ឋាភិបាលនីតិកាលទី ៧ នេះ ដែលវិស័យឯកជនគឺជាមុំ ១ និងការកាតាលីករក្នុងការសម្រេចបានកំណើនសេដ្ឋកិច្ចកម្ពុជាប្រកបដោយបរិយាបន្ន និងនិរន្តរភាព។
វិស័យឯកជនគឺជាឆ្អឹងខ្នង និងជាសរសៃឈាមសេដ្ឋកិច្ចជាតិ និងជាតួអង្គសំខាន់ក្នុងការកសាងប្រព័ន្ធសេដ្ឋកិច្ចមួយដែលមានលក្ខណៈប្រកួតប្រជែងក្នុងប្រព័ន្ធសេដ្ឋកិច្ចទីផ្សារសេរី ស្ថិរភាព និងនវានុវត្តន៍។
លោកបន្ថែមថា៖ «ចំណុចគន្លឹះដែលរដ្ឋាភិបាលនីតិកាលទី ៧ គួរពិចារណា និងពង្រឹងឱ្យមានប្រសិទ្ធភាពគឺវិស័យច្បាប់ លិខិតរដ្ឋបាល វិស័យឌីជីថល និងនវានុវត្តន៍ ការកសាងធនធានមនុស្សមានជំនាញច្បាស់លាស់ និងការលុបបំបាត់អំពើពុករលួយ ដើម្បីកសាងបរិយាកាសធុរកិច្ចល្អ ជំរុញការវិនិយោគក្នុងស្រុក និងបរទេស បង្កើនទំនុកចិត្តអ្នកធុរកិច្ច និងលើកកម្ពស់ការកសាងសមត្ថភាព និងបណ្តុះបណ្តាលវិជ្ជាជីវៈបន្ថែមទៀតសម្រាប់កម្លាំងពលកម្មក្នុងស្រុក»។
លោកថ្លែងថា កម្ពុជាមានភូមិសាស្ត្រល្អ នយោបាយមានស្ថិរភាព និងសេដ្ឋកិច្ចនឹងនរ ប្រព័ន្ធហេដ្ឋារចនាសម្ព័ន្ធល្អ និងមានកម្លាំងពលកម្មមានវិជ្ជាជីវៈ និងចំណេះដឹងខ្ពស់ កម្លាំងពលកម្មមានតម្លៃសមរម្យ និងប្រជាជនក្មេងច្រើន។ កត្តាទាំងអស់នេះជាចំណុចដែលស្ថាប័នរដ្ឋ និងវិស័យឯកជនគួរផ្តោតសំខាន់ និងគាំទ្រគ្នាទៅវិញ-ទៅមកក្នុងការកសាងគោលនយោបាយសេដ្ឋកិច្ចជាតិ៕
