កីឡាករ ពុទ្ធ សំបូរ (ស្ដាំ)។ រូបថត សហការី
ភ្នំពេញៈ អ្នកគ្រប់គ្រងកម្មវិធីប្រដាល់ នៅសង្វៀនប៉ុស្តិ៍លេខ ៥ លោក សេង កដិកា បានអះអាងថា ការរៀបចំឱ្យមានការប្រកួត «ជើងឯកគុនខ្មែរប៉ុស្តិ៍លេខ ៥» គឺដើម្បីជំរុញ និងលើកទឹកចិត្តឱ្យកីឡាករក្នុងស្រុក ខំប្រឹងប្រកួតគ្នាឱ្យអស់ពីសមត្ថភាព ដើម្បីអាចក្លាយជាធនធានកីឡាករ ដែលមានសមត្ថភាព សម្រាប់ចូលរួមប្រកួតអន្តរជាតិធំៗ តំណាងឱ្យកម្ពុជា។
លោក សេង កដិកា បានប្រាប់ថា៖ «ការរៀបចំឱ្យមានការប្រកួតជើងឯកគុនខ្មែរប៉ុស្តិ៍លេខ ៥ នេះ យើងចង់ឱ្យកីឡាករកម្ពុជា កាន់តែខិតខំប្រឹងប្រែងប្រកួតគ្នាអស់ពីសមត្ថភាព ជាមួយការប្រើក្បាច់ និងបច្ចេកទេសថ្មីៗ ស្របតាមក្បួនខ្នាតនៃក្បាច់គុនដូនតារបស់យើង ហេតុនេះហើយទើបខាងម្ចាស់ឧបត្ថម្ភរបស់យើង មានការឧបត្ថម្ភទឹកប្រាក់បន្ថែមទៅដល់កីឡាកររូបណា ដែលបានផ្តួលគូប្រកួតឱ្យសន្លប់ ដោយប្រើក្បាច់ពិសេស»។
ការលើកឡើងបែបនេះរបស់ លោក សេង កដិកា ដោយសារតែសង្វៀនប៉ុស្តិ៍លេខ ៥ ទើបតែចាប់ផ្តើមរៀបចំឱ្យមានការប្រកួត «ជើងឯកគុនខ្មែរប៉ុស្តិ៍លេខ៥» ប្រចាំសប្តាហ៍ទី១ កាលពីថ្ងៃទី១២ ខែវិច្ឆិកា ដោយអ្នកផ្គូផ្គងប្រចាំសង្វៀន ដែលមានអាយុកាលយូរជាងគេមួយនេះ បានសម្រេចដាក់កីឡាករ ពុទ្ធ សំបូរ ឱ្យប្រកួតជាមួយអ្នកជំនាញប្រើកែង ធ្លាប់មានប្រវត្តិខ្លាំង រឿម វណ្ណៈ។
តែទោះបីជាយ៉ាងណា ការព្យាយាមវាយសម្រុកគ្នា តាំងពីដើមទី ធ្វើឱ្យជំនួបរបស់អ្នកទាំង២នេះ បានបញ្ចប់ត្រឹម ១ ទឹកទេ ដោយ ពុទ្ធ សំបូរ បានប្រើកណ្តាប់ដៃម៉ាត់ឱ្យ រឿម វណ្ណៈ សន្លប់នៅចុងទឹក បន្ទាប់ពីបានវាយឱ្យអាជ្ញាកណ្តាលរាប់ចំនួន២លើក ហើយការចាញ់យ៉ាងផុយស្រួយនេះ បានធ្វើឱ្យអ្នកទស្សនាមួយចំនួនធំមិនអស់ចិត្តសោះ ចំណែក លោក សេង កដិកា ក៏បានបង្ហាញការសោកស្តាយចំពោះលទ្ធផលនេះផងដែរ។
លោកបានថ្លែងថា៖ «ដូចយើងបានដឹងហើយថា ទាំង ពុទ្ធ សំបូរ និង រឿម វណ្ណៈ សុទ្ធតែជាកីឡាករមានឈ្មោះបោះសំឡេង ស្ថិតក្នុងកម្រិតល្អមួយ នៅក្នុងស្រុកយើង ដែលយើងរំពឹងថា នឹងប្រកួតគ្នាយ៉ាងស្វិតស្វាញដល់ ៥ ទឹក ប៉ុន្តែវាជារឿងដ៏គួរឱ្យសោកស្តាយ ដែលការប្រកួតនេះ បានត្រឹម ១ ទឹក ដោយសារតែការប្រកួតនេះអ្នកទាំង ២ នេះ បានផ្តោតខ្លាំងទៅលើការវាយសម្រុក ក្នុងបំណងផ្តួលគ្នាឱ្យសន្លប់ដូចគ្នា ដើម្បីក្លាយជាម្ចាស់ជើងឯក»។
តាមរយៈការផ្តួលកីឡាករជើងចាស់ រឿម វណ្ណៈ ឱ្យសន្លប់ ដោយប្រើពេលមិនដល់៣នាទីនេះ បានជួយឱ្យ ពុទ្ធ សំបូរ ទទួលបានប្រាក់រង្វាន់ចំនួន ១,២លានរៀល បន្ថែមទៅលើប្រាក់តម្លៃខ្លួន ហើយរូបគេក៏នឹងទទួលបានឱកាសប្រកួតអន្តរជាតិ ដែលរៀបចំដោយសង្វៀនប៉ុស្តិ៍លេខ ៥ នៅថ្ងៃទី ២៦ ខែវិច្ឆិកា ជាមួយការទទួលបានតម្លៃខ្លួនកាន់តែខ្ពស់ផងដែរ ចំណែកអ្នកចាញ់ រឿម វណ្ណៈ ក៏ទទួលបានប្រាក់រង្វាន់ចំនួន ១ លានរៀលផងដែរ។
ចំពោះទិសដៅទៅមុខទៀត លោក សេង កដិកា បញ្ជាក់ថា៖ «យើងនឹងបន្តរៀបចំឱ្យមានការប្រកួតជើងឯកគុនខ្មែរប៉ុស្តិ៍លេខ ៥ ជារៀងរាល់សប្តាហ៍ ដោយយើងនឹងផ្តល់ឱកាសឱ្យទាំងកីឡាករជើងថ្មី និងជើងចាស់ បានប្រកួតគ្នា ដើម្បីពង្រឹងសមត្ថភាពរបស់ពួកគេឱ្យកាន់តែល្អ ហើយក៏ដើម្បីបណ្តុះធនធានកីឡាករគុនខ្មែរល្អៗ ឱ្យបានកាន់តែច្រើនផងដែរ ព្រោះអ្នកដែលទទួលបានជ័យជម្នះ ក្នុងការប្រកួតជើងឯកនេះ មិនត្រឹមតែទទួលបានប្រាក់រង្វាន់បន្ថែមប៉ុណ្ណោះទេ ប៉ុន្តែក៏ទទួលបានឱកាសប្រកួតអន្តរជាតិ នៅលើសង្វៀនរបស់យើង ជាមួយនឹងការផ្តល់តម្លៃខ្លួនខ្ពស់ជាងមុនផងដែរ»។
ដោយឡែកសម្រាប់ការប្រកួតមិត្តភាពអន្តរជាតិកម្ពុជា-ថៃ ដែលត្រូវបានធ្វើឡើង នៅលើសង្វៀនប៉ុស្តិ៍លេខ ៥ ព្រែកកំពឹស នាថ្ងៃទី ១២ ខែវិច្ឆិកា នោះដែរ កីឡាករជើងថ្មីរបស់កម្ពុជា ធន់ តុបផេង បានស្មើពិន្ទុជាមួយអ្នកប្រដាល់ជើងចាស់របស់ថៃ Toun Pe បន្ទាប់ពីអ្នកទាំង ២ នេះ បានប្រកួតគ្នាយ៉ាងស្វិតស្វាញចំនួន ៥ ទឹកពេញ។
ចំណែកអ្នកប្រដាល់គុនខ្មែរ រិទ្ធី សុផាត មកពីក្លិប Super Fight បានប្រកួតចាញ់ពិន្ទុអ្នកប្រដាល់ថៃ Ba Bou ដោយការប្រកួតក្នុងទម្ងន់ ៦៣,៥គីឡូក្រាមនេះ Ba Bou មានប្រៀបលើ សុផាត ស្ទើរគ្រប់ទឹកតែម្ដង។ ប៉ុន្តែម្ចាស់មេដាយសំរឹទ្ធស៊ីហ្គេម វ៉ាន់ វឿន បានព្យាយាមវាយសង្គ្រប់ទៅលើកីឡាករថៃ Ram Bo ចំនួន ៥ ទឹកពេញ ហើយក៏មានប្រៀបស្ទើរគ្រប់ទឹក ជាមួយការម៉ាត់ ទាត់ វាយកែង និងបុកជង្គង់ដ៏ល្អរបស់គេផងដែរ ដើម្បីទទួលបានជ័យជម្នះលើថៃ ដោយពិន្ទុដាច់៕
