មន្ត្រីអប់រំផ្សព្វផ្សាយ ការយល់ដឹងពីជំងឺអេដស៍ដល់សិស្ស។ រូបថត CRC
ភ្នំពេញៈ កាកបាទក្រហមកម្ពុជា និងក្រុមការងារឥស្សរជនឆ្នើមថ្នាក់ជាតិ បានបន្តអប់រំផ្សព្វផ្សាយឱ្យយល់ដឹងពីជំងឺអេដស៍ ទៅកាន់សិស្ស-និស្សិត ដើម្បីឈានឆ្ពោះទៅប្រារព្ធទិវាពិភពលោកប្រយុទ្ធនឹងជំងឺអេដស៍ ១ធ្នូ ២០២៣ ក្រោមប្រធានបទ «សហគមន៍តែមួយ ដឹកនាំឆ្ពោះទៅបញ្ចប់ជំងឺអេដស៍»។
លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានថ្លែងកាលពីថ្ងៃទី១៤ ខែវិច្ឆិកា នាឱកាសលោកស្រីចូលរួមអប់រំផ្សព្វផ្សាយដល់និស្សិតនៃសាកលវិទ្យាល័យប៊ែលធីអន្តរជាតិ ប្រមាណ ៣៦០ នាក់ ថា វគ្គផ្សព្វផ្សាយនេះគឺជាដំណើរឈានឆ្ពោះការប្រារព្ធទិវាពិភពលោកប្រយុទ្ធនឹងជំងឺអេដស៍ ១ធ្នូ ២០២៣ ក្រោមប្រធានបទ «សហគមន៍តែមួយ ដឹកនាំឆ្ពោះទៅបញ្ចប់ជំងឺអេដស៍»។
តាមរយៈហ្វេសប៊ុកកាកបាទក្រហមកម្ពុជា លោកស្រីបានលើកឡើងទៀតថា វគ្គផ្សព្វផ្សាយនេះ ត្រូវបានកាកបាទក្រហមកម្ពុជា និងក្រុមការងារឥស្សរជនឆ្នើមថ្នាក់ជាតិ បាននិងកំពុងចុះអនុវត្តនៅតាមបណ្តាគ្រឹះស្ថានឧត្តមសិក្សាមួយចំនួនក្នុងរាជធានីភ្នំពេញ។
លោកស្រីថ្លែងថា៖ «ការងារអប់រំផ្សព្វផ្សាយនេះដើរតួនាទីយ៉ាងសំខាន់ ក្នុងនោះមានការអប់រំផ្សព្វផ្សាយខាងផ្នែកសុខភាពស្ត្រីនិងកុមារ សុខភាពមនុស្សចាស់ ជំងឺឆ្លងរាតត្បាតនានា ជំងឺមហារីកសុដន់ ជំងឺមហារីកមាត់ស្បូន និងជាពិសេសបញ្ហា ជំងឺអេដស៍កាមរោគសុខភាពផ្លូវភេទ និងការថែទាំសុខភាពបឋម»។
លោកស្រី ម៉ែន នារីសោភ័គ បានបន្តថា៖ «គោលបំណងដែលយើងជ្រើសរើសយុវជន ក្នុងវគ្គផ្សព្វផ្សាយនេះ ដោយហេតុផលថា យុវជនជាទំពាំងស្នងឫស្សី យុវជនជាអ្នកបន្តវេន ហើយដែលបញ្ហានៃការឆ្លងមេរោគអេដស៍នេះ ភាគច្រើនកើតឡើងក្នុងចំណោមយុវជន។ ដូច្នេះយុវជនត្រូវលើកកម្ពស់ការយល់ដឹងដើម្បីបង្ការខ្លួនពីមេរោគអេដស៍»។
លោកស្រីក៏បានបង្ហាញពីការជឿជាក់ផងដែរថា ចំណេះដឹងដែលបានផ្តល់ជូនសិស្ស-និស្សិតនាពេលនេះ ពិតជាមានគុណតម្លៃ ហើយពួកគេនឹងក្លាយជាមិត្តអប់រំមិត្តដ៏ល្អ គឺជាគំរូសម្រាប់ធ្វើការអប់រំផ្សព្វផ្សាយបន្តដល់មិត្តភក្តិដទៃទៀត និងក្រុមគ្រួសាររបស់ពួកគេផងដែរ។
លោក ឈឹម ឃិនដារ៉េត អគ្គលេខាធិការនៃអាជ្ញាធរជាតិប្រយុទ្ធនឹងជំងឺអេដស៍ បានថ្លែងនៅថ្ងៃទី១៥ ខែវិច្ឆិកាថា ការចូលរួមរបស់កាកបាទក្រហមកម្ពុជា ក៏ដូចជាអ្នកពាក់ព័ន្ធផ្សេងទៀត ក្នុងការអប់រំផ្សព្វផ្សាយលើកកម្ពស់ការយល់ដឹងពីជំងឺអេដស៍ទៅដល់សិស្ស-និស្សិត វាពិតជាល្អមែនទែន។ ទន្ទឹមនឹងនេះ អាជ្ញាធរជាតិប្រយុទ្ធនឹងជំងឺអេដស៍ ក៏កំពុងធ្វើការប្រយុទ្ធប្រឆាំងនឹងជំងឺអេដស៍ ខណៈដែលស្ថានភាពជំងឺអេដស៍បច្ចុប្បន្ននេះ ទទួលបានលទ្ធផលជោគជ័យជាបន្តបន្ទាប់ទាំងថ្នាក់ជាតិ ថ្នាក់តំបន់ ហើយនិងអន្តរជាតិ។
ស្របពេលដែលទទួលបានផលជោគជ័យលើការងារប្រយុទ្ធប្រឆាំងនឹងជំងឺអេដស៍ ក៏មានឧបសគ្គរាំងស្ទះខ្លះលើការងារនេះផងដែរ ក្នុងនោះទាក់ទងលើក្រុមប្រជាជនគន្លឹះរួមមាន៖ ក្រុមបុរសរួមភេទជាមួយបុរស ក្រុមបំប្លែងភេទ ក្រុមអ្នកប្រើប្រាស់ និងចាក់គ្រឿងញៀន ក្រុមស្ត្រីបម្រើការងារក្នុងគ្រឹះស្ថានកម្សាន្តសប្បាយ និងក្រុមយុវវ័យទាំងក្នុងប្រព័ន្ធ និងក្រៅប្រព័ន្ធផងដែរ។ លោក ឈឹម ឃិនដារ៉េត បានបន្ថែម។
លោកបានបញ្ជាក់ថា៖ «ដូច្នេះការជំរុញការផ្សព្វផ្សាយឱ្យមានការយល់ដឹងពីជំងឺអេដស៍ វាជារឿងធំ ទៅកាន់ស្រទាប់យុវវ័យរបស់យើង ខណៈដែលគោលដៅសកម្មភាពរបស់យើង ក៏នឹងធ្វើការអប់រំផ្សព្វផ្សាយពីជំងឺអេដស៍នៅគ្រប់កម្មវិធីបុណ្យជាតិធំៗដែរ»។
លោកបន្ថែមថា សកម្មភាពផ្សព្វផ្សាយរបស់កាកបាទក្រហមកម្ពុជា ក៏ដូចជាស្ថាប័នពាក់ព័ន្ធផ្សេងទៀត គឺជាការរួមចំណែកបោះជំហានមួយឆ្ពោះទៅកាន់គោលដៅបញ្ចប់ជំងឺអេដស៍ត្រឹមឆ្នាំ២០២៥។
យោងតាមការសិក្សាស្រាវជ្រាវរបស់អាជ្ញាធរជាតិប្រឆាំងនឹងជំងឺអេដស៍ បានឱ្យដឹងថា គិតត្រឹមចុងឆ្នាំ២០២២ កម្ពុជាមានមនុស្សប្រមាណ ៧៦០០០ នាក់ កំពុងផ្ទុកមេរោគអេដស៍ ក្នុងនោះ ៧៤ ០០០ នាក់ ជាមនុស្សពេញវ័យ ដែលមានអាយុចាប់ពី ១៥ ឆ្នាំ ឡើងទៅ និងប្រហែលជា ២ ០០០ នាក់ ជាកុមារ។
ប្រភពដដែលបន្តថា ក្នុងចំណោមមនុស្សប្រមាណ ៧៦ ០០០ នាក់នោះ មានអ្នកឆ្លងថ្មីចំនួន ១ ៤០០ នាក់ បើគិតក្នុង ១ ថ្ងៃមានអ្នកឆ្លងជំងឺអេដស៍ចំនួន ៤ នាក់៕
