អ្នកចូលរួមក្នុងពិធីចុះហត្ថលេខាផ្តល់និងទទួលជំនួយ កាលពីថ្ងៃទី១៤ វិច្ឆិកា។ រូបថត ស្ថានទូតជប៉ុន
ភ្នំពេញៈ រដ្ឋាភិបាលជប៉ុន សម្រេចផ្ដល់ថវិកាសរុបចំនួន ៤២៤ ៩០៧ ដុល្លារអាមេរិក សម្រាប់ការស្ដារប្រព័ន្ធធារាសាស្ត្រ និងការសាងសង់ស្ពាន ក្នុងខេត្តចំនួន ៣ រួមមាន ខេត្តឧត្តរមានជ័យ, ខេត្តកំពង់ឆ្នាំង និងខេត្តស្ទឹងត្រែង ដែលថវិកាទាំងនេះជាជំនួយឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ។
សេចក្តីប្រកាសព័ត៌មានរបស់ស្ថានទូតជប៉ុនប្រចាំកម្ពុជា ចុះថ្ងៃទី ១៤ ខែវិច្ឆិកា បានឱ្យដឹងថា រដ្ឋាភិបាលជប៉ុន បានផ្តល់ថវិកាក្នុងការអនុវត្តគម្រោងស្តារប្រព័ន្ធធារាសាស្ត្រ ថ្នល់ដាច់ ក្នុងខេត្តឧត្តរមានជ័យ ចំនួន ១១៩ ៤២៤ ដុល្លារ, គម្រោងសាងសង់ស្ពានក្នុងស្រុកកំពង់លែង ខេត្តកំពង់ឆ្នាំង ក្នុងថវិកាចំនួន ១៣៧ ២០៧ ដុល្លារ និងគម្រោងសាងសង់ស្ពានក្នុងឃុំអូរម្រះ ស្រុកសៀមបូក ខេត្តស្ទឹងត្រែង ចំនួន ១៦៨ ២៧៦ ដុល្លារ។
លោក តានិណ អ៊ិឈិតុម៉ុ ភារធារីស្ដីទីនៃស្ថានទូតជប៉ុនប្រចាំកម្ពុជា បានថ្លែងនាពិធីចុះហត្ថលេខាលើកិច្ចសន្យាផ្តល់ជំនួយឥតសំណងសម្រាប់គម្រោងទ្រង់ទ្រាយតូចសនិ្តសុខមនុស្សជាតិថា គម្រោងនេះនឹងផ្តល់អត្ថប្រយោជន៍ដល់ប្រជាជនមូលដ្ឋានប្រមាណ ១០ ០០០ នាក់ តាមរយៈការផ្តល់លទ្ធភាពក្នុងការធ្វើដំណើរប្រកបដោយសុវត្ថិភាព និងការដឹកជញ្ជូនកសិផលបានពេញ ១ឆ្នាំ។
លោកបានបញ្ជាក់ថា៖«ខ្ញុំមានសេចក្តីសោមនស្សរីករាយ ដោយសង្កេតឃើញថា នាពេលថ្មីៗនេះ ប្រទេសកម្ពុជា បាននិងកំពុងអភិវឌ្ឍយ៉ាងឆាប់រហ័ស។ ទោះជាយ៉ាងណា ខ្ញុំក៏ទទួលស្គាល់ថា នៅតែមានបញ្ហាប្រឈមមួយចំនួន ដែលត្រូវដោះស្រាយ ដើម្បីកែលម្អគុណភាពជីវិត។ ជប៉ុននឹងបន្តចូលរួមចំណែកក្នុងការដោះស្រាយបញ្ហាប្រឈមទាំងនោះ តាមរយៈគ្រោងការសហប្រតិបត្តិការសេដ្ឋកិច្ច និងអភិវឌ្ឍន៍ផ្សេងៗ រួមទាំង គូសាណូណិ ផងដែរ»។
ជាមួយគ្នានោះដែរ លោកលោក ញឺន កួន ប្រធានមន្ទីរធនធានទឹក និងឧតុនិយម ខេត្តឧត្តរមានជ័យ បានលើកឡើងថា ជំនួយនេះនឹងត្រូវបានប្រើប្រាស់ដើម្បីស្តារប្រព័ន្ធធារាសាស្ត្រមានស្រាប់ ដែលមានមុខងារជាអាងស្តុកទឹក។ មិនតែប៉ុណ្ណោះ ដោយសារសមត្ថភាពស្តុកទឹកមិនគ្រប់គ្រាន់ តំបន់នេះជារឿយៗ តែងរងផលប៉ះពាល់ដោយទឹកជំនន់។ ផ្លូវតភ្ជាប់ពីប្រព័ន្ធធារាសាស្ត្រនេះ ទៅតំបន់ដែលប្រជាជនរស់នៅ មានស្ថានភាពយ៉ាប់យ៉ឺន ដែលដាក់បន្ទុកយ៉ាងធ្ងន់ដល់កសិករ។
លោកបានប្រាប់ឱ្យដឹងថា៖ «យើងរំពឹងថា គម្រោងនេះ នឹងផ្តល់អត្ថប្រយោជន៍ ដល់ប្រជាជនមូលដ្ឋានប្រមាណ ១ ០០០ នាក់ តាមរយៈការកែលម្អប្រព័ន្ធធារាសាស្ត្រ ដើម្បីធានាការផ្គត់ផ្គង់ទឹក សម្រាប់កសិកម្មប្រកបដោយស្ថិរភាពពេញ ១ឆ្នាំ។ លើសពីនេះ យើងរំពឹងថា កម្រិតជីវភាពរស់នៅ និងប្រាក់ចំណូលរបស់ប្រជាជន នឹងមានភាពប្រសើរឡើង ដោយសារមានការកើនឡើងនៃបរិមាណស្រូវដែលផលិតបាននៅក្នុងតំបន់នេះ»។
ចំណែក លោក ឆាយ លាភា ប្រធានមន្ទីរសាធារណការ និងដឹកជញ្ជូនខេត្តកំពង់ឆ្នាំង បានឱ្យដឹងដែរថា ជំនួយនេះនឹងត្រូវបានប្រើប្រាស់ដើម្បីសាងសង់ស្ពានបេតុងថ្មីមួយ ជំនួសឱ្យស្ពានបច្ចុប្បន្ន ដែលមានសភាពទ្រុឌទ្រោម។ ទោះបីមានការកើនឡើងនៃចំនួនប្រជាជនដែលធ្វើដំណើរទៅសាលារៀន និងកន្លែងធ្វើការជារៀងរាល់ថ្ងៃ ស្ពានចាស់នេះ មានកន្លែងធ្លុះធ្លាយ ចេញដែកមកខាងក្រៅ ដែលគំរាមកំហែងដល់សុវត្ថិភាពអ្នកធ្វើដំណើរ។
លោកបញ្ជាក់ថា៖ «យើងរំពឹងថា គម្រោងនេះ នឹងផ្តល់អត្ថប្រយោជន៍ដល់ប្រជាជនមូលដ្ឋានប្រមាណ ១០ ០០០នាក់ តាមរយៈការផ្ដល់លទ្ធភាពក្នុងការធ្វើដំណើរប្រចាំថ្ងៃប្រកបដោយសុវត្ថិភាព។ មិនតែប៉ុណ្ណោះ យើងរំពឹងថា តាមរយៈការផ្ដល់លទ្ធភាពក្នុងការដឹកជញ្ជូនកសិផល ប្រាក់ចំណូល របស់ប្រជាជន នឹងមានការកើនឡើង»។
ជាមួយគ្នានោះដែរ ប្រធានមន្ទីរអភិវឌ្ឍន៍ជនបទ ខេត្តស្ទឹងត្រែង លោក ព្រំ ចាន់ថា ថ្លែងថា ជំនួយនេះនឹងត្រូវបានប្រើប្រាស់ដើម្បីសង់ស្ពានបេតុងថ្មីមួយ ជំនួសឱ្យស្ពានឈើពុកផុយបច្ចុប្បន្ន ខណៈដែលប្រជាជនមូលដ្ឋានជាច្រើន តែងតែឆ្លងកាត់ស្ពាននេះដើម្បីទៅសាលារៀន កន្លែងធ្វើការ និងមន្ទីរពេទ្យ ព្រមទាំងដឹកជញ្ជូនកសិផល។ ស្ពាននេះបានរងការខូចខាត និងគ្មានសុវត្ថិភាព ជាពិសេសសម្រាប់កុមារ និងមនុស្សចាស់។
លោកបានបន្ថែមថា ដោយសារចំនួនរថយន្តធុនធ្ងន់ ត្រូវបានរំពឹងថា នឹងមានការកើនឡើងស្ពានបច្ចុប្បន្ននេះ ប្រហែលមិនអាចទ្រាំទ្របានទេ ហើយថែមទាំងអាចនឹងមានការបាក់ស្រុត។
លោកបញ្ជាក់ថា៖ «យើងរំពឹងថា គម្រោងនេះ នឹងផ្តល់អត្ថប្រយោជន៍ដល់ប្រជាជន ក្នុងភូមិចំនួន ៤ តាមរយៈការធានា បាននូវផ្លូវធ្វើដំណើរប្រកបដោយសុវត្ថិភាពទៅសាលារៀន ផ្សារ និងមណ្ឌលសុខភាពដែលនៅជិតបំផុតពេញ ១ ឆ្នាំ។ ការសាងសង់ស្ពានថ្មីក៏នឹងជួយសម្រួលដល់ការដឹកជញ្ជូនកសិផលផងដែរ ដែលយើងរំពឹងថា នឹងកែលម្អកម្រិតជីវភាពរស់នៅរបស់ប្រជាជន និងបង្កើនប្រាក់ចំណូលកសិកម្ម»។
សូមជម្រាបថា ជំនួយឥតសំណងគូសាណូណិរបស់ជប៉ុន បានចាប់ផ្តើមនៅប្រទេសកម្ពុជា នៅឆ្នាំ១៩៩១ ដើម្បីគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការអភិវឌ្ឍ និងស្ថាបនាប្រទេសឡើងវិញ នៅតាមកម្រិតមូលដ្ឋាន។ ជំនួយឥតសំណងនេះ មានទិសដៅការពារជនងាយរងគ្រោះពីកត្តាមួយចំនួនដូចជា ភាពក្រីក្រ ឬភាពអកុសលនានា ដែលអាចគំរាមកំហែងដោយផ្ទាល់ដល់អាយុជីវិត ជីវភាពរស់នៅ និងសេចក្តីថ្លៃថ្នូររបស់ពួកគេ ក៏ដូចជា ជួយជំរុញភាពម្ចាស់ការលើខ្លួនឯងរបស់ប្រជាសហគមន៍។
ចាប់តាំងពីឆ្នាំ១៩៩១ រដ្ឋាភិបាលជប៉ុនបានផ្ដល់ថវិកាជាង ៦៨ លានដុល្លារ អាមេរិក ដល់អាជ្ញាធរមូលដ្ឋាន និងអង្គការក្រៅរដ្ឋាភិបាល ដើម្បីអនុវត្តគម្រោងគូសាណូព៌ា ចំនួន ៦៨៤ គម្រោង នៅទូទាំងប្រទេសកម្ពុជា៕
