លោក ទៀ សីហា រដ្ឋមន្ត្រីការពារជាតិកម្ពុជា និង លោក ហ្វាម មិញជិញ នាយករដ្ឋមន្ត្រីវៀតណាម និងមន្ត្រីទាំង២ភាគី។ រូបថត ក្រសួងការពារជាតិ
ភ្នំពេញៈ ឧបនាយករដ្ឋមន្ត្រីនិងជារដ្ឋមន្ត្រីការពារជាតិលោក ទៀ សីហា បានលើកឡើងថា ដំណើរទស្សនកិច្ចផ្លូវការដំបូងរបស់លោកនៅវៀតណាមបង្ហាញពីការបន្តពង្រឹងកិច្ចសហប្រតិបត្តិការរវាងប្រទេសទាំង២ ទៅលើវិស័យនយោបាយ សន្តិសុខ និងសង្គម ដើម្បីកសាងសហគមន៍កម្ពុជា-វៀតណាម ខណៈភាគីវៀតណាមថា ទំនាក់ទំនងប្រទេសទាំង២ បានវិវត្តមកល្អប្រសើរឡើងនៅរយៈពេលប៉ុន្មានឆ្នាំចុងក្រោយ។
ការលើកឡើងរបស់លោក ទៀ សីហា បែបនេះនាជំនួបពិភាក្សាការងាររបស់លោកជាមួយលោក ហ្វាម មិញជីញ នាយករដ្ឋមន្ត្រីវៀតណាម កាលពីថ្ងៃទី១៣ ខែវិច្ឆិកា ឆ្នាំ២០២៣ អំឡុងពេលប្រមុខការពារជាតិកម្ពុជារូបនេះរួមជាមួយគណៈប្រតិភូក្រសួងការពារជាតិ ទៅបំពេញទស្សនកិច្ចផ្លូវការនៅវៀតណាមចាប់ពីថ្ងៃទី១២ ដល់ថ្ងៃទី១៤ ខែវិច្ឆិកា។ នេះបើយោងតាមខ្លឹមសារដែលបានផ្សព្វផ្សាយដោយហ្វេសប៊ុកក្រសួងការពារជាតិនៅថ្ងៃទី១៤ ខែវិច្ឆិកា។
តាមរយៈក្រសួងដដែលលោក ហ្វាម មិញជីញ បានលើកឡើងថា ទំនាក់ទំនងកម្ពុជា-វៀតណាម ជាទំនាក់ទំនងប្រវត្តិសាស្ត្រដ៏យូរលង់ ហើយធ្លាប់រួមសាមគ្គីគ្នា តស៊ូរួមគ្នា ព្រមទាំងមានកិច្ចសហប្រតិបត្តិការគ្នា ក្នុងគោលដៅអភិវឌ្ឍន៍ប្រទេសរៀងៗខ្លួន។
ក្នុងទំនាក់ទំនងយោធា លោកនាយករដ្ឋមន្ត្រីវៀតណាម ក៏បានបញ្ជាក់ដែរថា កងទ័ពនៃប្រទេសទាំង២ បានសហការគ្នាយ៉ាងល្អនៅក្នុងរយៈពេលកន្លងមកនេះ ដោយឈរលើស្មារតីមិត្តភាព និងភាពជាបងប្អូន។
លោក ហ្វាម មិញជីញ បន្តថា៖ «សម្តេចពិជ័យសេនា ទៀ បាញ់ អតីតឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ សម្តេចបានចូលរួមចំណែកយ៉ាងច្រើន ក្នុងការពង្រឹងទំនាក់ទំនងប្រទេសទាំង២ កងទ័ពទាំង២ ដែលយើងត្រូវតែថែរក្សាពូនជ្រំកសាងឱ្យបានរឹងមាំបន្ថែមទៀតក្នុងកិច្ចសហប្រតិបត្តិការលើវិស័យការពារជាតិ»។
នាជំនួបនោះដែរ លោក ទៀ សីហា ក៏បានថ្លែងឡើងដែរថា ដំណើរទស្សនកិច្ចរបស់លោកនៅវៀតណាម ជាលើកដំបូងនេះ ជាប្រវត្តិសាស្ត្រដើម្បីបន្តស្មារតីពង្រឹងទំនាក់ទំនង កិច្ចសហប្រតិបត្តិការផ្នែកនយោបាយ សន្តិសុខ និងសង្គម ដើម្បីកសាងសហគមន៍រួមគ្នាកម្ពុជា-វៀតណាម។
លោកក៏បានអរគុណដល់រដ្ឋាភិបាល កងទ័ព និងប្រជាជនវៀតណាម ដែលតែងគាំទ្រដល់កងយោធពលខេមរភូមិន្ទ និងប្រជាជនកម្ពុជាលើវិស័យនានា ជាពិសេសនៅក្នុងដំណាក់កាលកូវីដ១៩ កន្លងទៅ ដែលវៀតណាមបានជួយកម្ពុជាទាំងសម្ភារ និងស្មារតី ដែលបង្ហាញយ៉ាងច្បាស់ពីចំណងមិត្តភាព សាមគ្គីភាព និងមនោសញ្ចេតនារវាងកងទ័ពនិងប្រជាជនរវាងប្រទេសទាំង២។
ពាក់ព័ន្ធនឹងបញ្ហានេះ លោកស៊ឺន សម អ្នកជំនាញផ្នែកទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានប្រាប់ឱ្យដឹងថា ដំណើរទស្សនកិច្ចរបស់ប្រមុខការពារជាតិកម្ពុជាទៅកាន់វៀតណាមជារឿងសំខាន់ ដោយសារកម្ពុជានិងវៀតណាមជាប្រទេសភូមិផងរបងជាមួយ ហើយជាអ្នកជិតខាងដែលមានទំនាក់ទំនងល្អ ហើយដើម្បីពង្រឹងកិច្ចសហប្រតិបត្តិការផង។
លោកបានថ្លែងថា៖ «ទំនាក់ទំនងល្អរវាងប្រទេសទាំង២ សំខាន់ដើម្បីរក្សានូវសន្តិភាព ស្ថិរភាព ជាពិសេសកិច្ចសហប្រតិបត្តិការតាមបណ្តោយព្រំដែន»។
ទោះជាយ៉ាងណា លោកក៏បានស្នើឱ្យភាគីទាំង២ បង្កើនការស្វែងយល់ពីគ្នាថែមទៀត គោរពគ្នាទៅវិញទៅមកក្នុងស្មារតីគោរពផលប្រយោជន៍រៀងៗខ្លួន ជាពិសេសគោរពនិងអនុវត្តតាមកិច្ចព្រមព្រៀងរួមគ្នាដែលបានព្រាងទុក ដើម្បីឆ្លើយតបនឹងទំនាក់ទំនងក្នុងភាពជាបងប្អូន។
លោកលោក ថុង ម៉េងដាវីត ប្រធានផ្នែកស្រាវជ្រាវនៅវិទ្យាស្ថានចក្ខុវិស័យអាស៊ី (AVI) បានប្រាប់ឱ្យដឹងដែរថា វៀតណាមមិនខុសពីចិនឡើយ ដែលជាដៃគូយុទ្ធសាស្ត្រក្នុងកិច្ចសហប្រតិបត្តិការផ្នែកយោធាសម្រាប់កម្ពុជាក៏ដូចជាម្ចាស់ជំនួយផង សម្រាប់ផ្តល់ជំនួយយុទ្ធោបករណ៍ ជំនួយបច្ចេកទេស និងការហ្វឹកហ្វឺនយោធា ហើយកិច្ចសហការកន្លងមកមានទាំងសមយុទ្ធយោធារួមគ្នា ការការពារព្រំដែន ជាដើម។
លោកបានថ្លែងថា៖ «ដំណើរទស្សនកិច្ចទៅវៀតណាមរបស់ឯកឧត្តម ទៀ សីហា គឺដើម្បីបង្កើនចំណងមិត្តភាព និងពិភាក្សាការងារក្នុងនោះសង្កត់ធ្ងន់លើកិច្ចសហប្រតិបត្តិការព្រំដែននិងការជួញដូរខុសច្បាប់ ការដោះដូរព័ត៌មាន ការកសាងសមត្ថភាពយោធាជាដើម ដែលទាំងនេះគឺជាកិច្ចសហប្រតិបត្តិការប្រពៃណីរវាងកងទ័ពទាំង២»។
លោក ថុង ម៉េងដាវីត បានបន្ថែមថា យោធានៃប្រទេសទាំង២ ត្រូវបង្កើនការយកចិត្តទុកដាក់លើការពង្រឹងកិច្ចសហប្រតិបត្តិការទ្វេភាគីនិងតំបន់ និងបង្កើនការសិក្សារួមគ្នាទៅលើការប្រែប្រួលសន្តិសុខតំបន់ និងពិភពលោក តួយ៉ាងសង្គ្រាមសម័យទំនើប ការប្រឆាំងភេរវកម្ម និងសន្តិសុខសាយប៊័រ ជាដើម៕
