រូបថត ក្រសួងប្រៃសណីយ៍
អគ្គនាយកដ្ឋានគ្រប់គ្រងធនធានវិសាលគមន៍ហ្វ្រេកង់ស៍វិទ្យុនៃក្រសួងប្រៃសណីយ៍ និងទូរគមនាគមន៍ ក.ប.ទ. សហការជាមួយក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈ ក.ប.ទ. បានរៀបចំសិក្ខាសាលាផ្សព្វផ្សាយអនុក្រឹត្យស្តីពីការរៀបចំ ការគ្រប់គ្រង និងការបែងចែកវិសាលគមន៍ហ្វ្រេកង់ស៍វិទ្យុ ដើម្បីពង្រឹងការគ្រប់គ្រងនិងការប្រើប្រាស់ធនធានកម្ររបស់ជាតិ។
វិសាលគមន៍ហ្វ្រេកង់ស៍វិទ្យុ គឺជាធនធានរបស់រដ្ឋដែលពុំត្រូវធ្វើជាកម្មវត្ថុនៃការលក់ទិញ ប៉ុន្តែអាចធ្វើជាកម្មវត្ថុនៃការជួល ឬការផ្តល់សិទ្ធិប្រើប្រាស់តាមរយៈការផ្តល់អាជ្ញាបណ្ណ ស្របតាមបទប្បញ្ញត្តិនៃច្បាប់នេះ និងបទប្បញត្តិផ្សេងទៀត ដែលស្ថិតនៅក្រោម ក.ប.ទ។ ក.ប.ទ មានតួនាទីរៀបចំផែនការជាតិវិសាលគមន៍ហ្វ្រេកង់ស៍វិទ្យុ ដោយត្រូវកំណត់ចំណុចមួយចំនួនជាអាទិ៍ គឺការរៀបចំតារាងបែងចែកហ្វ្រេកង់ស៍វិទ្យុ និងការប្រើប្រាស់បន្ទោរ ហ្វ្រេកង់ស៍វិទ្យុ និងវិធានការទប់ស្កាត់ការឆ្លងរំខានការទទួលស៊ីញ៉ាល់ជាដើម។
សិក្ខាសាលាខាងលើត្រូវបានរៀបចំឡើង កាលពីថ្ងៃទី ១៦ ខែវិច្ឆិកា ឆ្នាំ ២០២៣ នៅខេត្តសៀមរាប ដោយមានការចូលរួមពីលោក ជា វ៉ាន់ដេត រដ្ឋមន្ត្រី ក.ប.ទ. និងមានការអញ្ជើញចូលរួមពីសមាជិកក្រុមប្រឹក្សាខេត្តសៀមរាប ប្រធានអង្គភាពនិងមន្ត្រីរាជការក្រោមឱវាទ ក.ប.ទ. ព្រមទាំងមន្ទីរប្រៃសណីយ៍និងទូរគមនាគមន៍ខេត្តទាំង ២៤ សរុបប្រមាណ ១២៧ នាក់។
ក្រសួងប្រៃសណីយ៍ បានឱ្យដឹងថា សិក្ខាសាលានេះរៀបចំឡើងដើម្បីផ្សព្វផ្សាយអនុក្រឹត្យខាងលើ ដែលអនុក្រឹត្យនេះ មានគោលដៅកំណត់អំពីគោលការណ៍ វិធាន និងសមត្ថកិច្ចនៃការគ្រប់គ្រងវិសាលគមន៍ហ្វ្រេកង់ស៍វិទ្យុ និងបន្ទារហ្វ្រេកង់ស៍វិទ្យុសម្រាប់ផ្កាយរណបនិងគន្លងផ្កាយរណប។
ការកំណត់នេះដែរ ក្នុងគោលបំណងរៀបចំ បែងចែក និងប្រើប្រាស់ហ្វ្រេកង់ស៍វិទ្យុឱ្យមានប្រសិទ្ធភាពនិងស័ក្តិសិទ្ធភាព ដើម្បីពង្រឹងការគ្រប់គ្រងនិងការប្រើប្រាស់ធនធានកម្ររបស់ជាតិ ការចូលរួមប្រកួតប្រជែងដោយស្មោះត្រង់និងស្របច្បាប់ និងការរួមចំណែកដល់ការកៀរគរចំណូលជាតិ។
នៅក្នុងឱកាសនោះ លោក ជា វ៉ាន់ដេត បានចែករំលែកពីបញ្ហាប្រឈម និងកិច្ចខិតខំប្រឹងប្រែងរបស់ក្រសួងព្រមទាំងសារ:សំខាន់ក្នុងការអភិវឌ្ឍហេដ្ឋារចនាសម្ព័ន្ធទូរគមនាគមន៍នៅតាមបណ្តាបុរីក្នុងទីក្រុងភ្នំពេញ និងតាមបណ្តាខេត្ត ក្នុងគោលបំណងពង្រឹង និងពង្រីកហេដ្ឋារចនាសម្ព័ន្ធតភ្ជាប់ឌីជីថល និងគុណភាពសេវាទូរគមនាគមន៍ឱ្យកាន់តែប្រសើរឡើង ដើម្បីឆ្លើយតបទៅនឹងកំណើនដ៏ខ្លាំងក្លានៃតម្រូវការរបស់ប្រជាពលរដ្ឋក្នុងការប្រើប្រាស់សេវាអ៊ីនធឺណិត ជាពិសេសអ៊ីនធឺណិតតាមទូរស័ព្ទចល័ត។
ជាមួយគ្នានេះ លោកបានថ្លែងថា៖ «វិសាលគមន៍ហ្វ្រេកង់ស៍វិទ្យុជាធនធានកម្ររបស់ជាតិមួយដែលត្រូវមានការយកចិត្តទុកដាក់ខ្ពស់ក្នុងការគ្រប់គ្រងដើម្បីធ្វើយ៉ាងណាឱ្យការប្រើប្រាស់ធនធានកម្រមួយនេះមានប្រសិទ្ធភាព ស័ក្តិសិទ្ធភាព ផ្តល់ចំណូលជាតិ និងចូលរួមចំណែកក្នុងការជំរុញកំណើនសេដ្ឋកិច្ចជាអតិបរមា»។
លោកបានរំលេចថា ធនធានកម្ររបស់ជាតិនេះនឹងចូលរួមចំណែកយ៉ាងសំខាន់ក្នុងការអភិវឌ្ឍហេដ្ឋារចនាសម្ព័ន្ធទូរគមនាគមន៍ ដែលគាំទ្រយ៉ាងសកម្មដល់ការធ្វើបរិវត្តកម្មឌីជីថល តាមរយៈការប្រើប្រាស់ធនធានដ៏មានសារៈសំខាន់នេះក្នុងការពង្រីកវិសាលភាពគ្របដណ្តប់នៃសេវាទូរស័ព្ទ និងអ៊ីនធឺណិតល្បឿនលឿន គាំទ្រដល់ការប្រើប្រាស់បច្ចេកវិទ្យាឌីជីថល ដែលជាយន្តការសំខាន់ក្នុងការធ្វើបរិវត្តកម្មឌីជីថលនៃក្នុងព្រះរាជាណាចក្រកម្ពុជា។
លើសពីនេះទៅទៀតលោករដ្ឋមន្ត្រី បានបញ្ជាក់ថា ដើម្បីជំរុញការអនុវត្តអនុក្រឹត្យនេះឱ្យមានប្រសិទ្ធភាព ទាមទារឱ្យមន្ត្រីរបស់ក្រសួងទាំងថ្នាក់ជាតិនិងថ្នាក់ក្រោមជាតិដែលពាក់ព័ន្ធទាំងអស់យល់ច្បាស់ពីខ្លឹមសារសំខាន់ៗនៃអនុក្រឹត្យនេះ។ លោកក៏សង្ឈឹមថាគ្រប់តួអង្គពាក់ព័ន្ធបានយល់ក្នុងរូបភាពតែមួយអំពីខ្លឹមសារអនុក្រឹត្យ ងាយស្រួលត្រៀមខ្លួនចូលរួមអនុវត្តន៍និងសហការ អនុវត្តទទួលបានប្រសិទ្ធភាពខ្ពស់ជាអតិបរមា៕
