រូបថត ស្ថានទូតជប៉ុន ប្រចាំកម្ពុជា
នៅក្នុងអំឡុងខែវិច្ឆិកា ឆ្នាំ ២០២៣ នេះ ជប៉ុនបានផ្តល់ថវិកាប្រមាណជាង ១ លានដុល្លារហើយដល់កម្ពុជា ក្រោមគ្រោងការណ៍សហប្រតិបត្តិការសេដ្ឋកិច្ចជប៉ុន ដែលជាជំនួយឥតសំណងសម្រាប់គម្រោងទ្រង់ទ្រាយ តូចសន្តិសុខមនុស្សជាតិ (គូសាណូណិ)។
ជំនួយឥតសំណងដល់កម្ពុជាទាំង៣លើក ដែលមានទឹកប្រាក់សរុបជាង ១ លានដុល្លារនោះរួមមាន ដោយលើកទីមួយ បានផ្តល់ថវិកាសរុបចំនួន ៣៤៨ ៩១៩ ដុល្លារ ដែលជាជំនួយឥតសំណង សម្រាប់វិស័យអប់រំ និងទឹកស្អាត ដល់ខេត្តចំនួន ៣ រួមមាន កំពង់ស្ពឺ កំពង់ធំ និងមណ្ឌលគិរី, លើកទីពីរ ផ្តល់ថវិកាសរុបចំនួន ៤២៤ ៩០៧ ដុល្លារ សម្រាប់ការស្ដារប្រព័ន្ធធារាសាស្ត្រ និងការសាងសង់ស្ពាន ក្នុងខេត្តចំនួន ៣ ដល់ខេត្តចំនួន ៣ រួមមាន ខេត្តឧត្តរមានជ័យ, ខេត្តកំពង់ឆ្នាំង និងខេត្តស្ទឹងត្រែង។
ចំណែកលើកទី៣ គឺនៅរសៀលថ្ងៃទី ១៧ ខែវិច្ឆិកា ឆ្នាំ ២០២៣ នេះ នៅស្ថានទូតជប៉ុន រដ្ឋាភិបាលជប៉ុនបានឯកភាពផ្តល់ថវិកាសរុបចំនួន ២៥២ ១៣៦ ដុល្លារ ដល់ស្ថាប័នទទួលជំនួយចំនួនពីរ គឺមជ្ឈមណ្ឌលស្តារលទ្ធភាពពលកម្មកាយសម្បទាខេត្តព្រៃវែង សម្រាប់គម្រោងសាងសង់អគារស្នាក់នៅ និងដំឡើងឧបករណ៍ នៅមជ្ឈមណ្ឌលស្តារលទ្ធភាពពលកម្មកាយសម្បទាខេត្តព្រៃវែង និងគម្រោងលទ្ធកម្មបរិក្ខារពេទ្យនៅមន្ទីរពេទ្យកុមារអង្គរ ក្នុងខេត្តសៀមរាប សម្រាប់មន្ទីរពេទ្យកុមារអង្គរ។
នាពិធីចុះហត្ថលេខាលើកិច្ចសន្យាផ្តល់ជំនួយ នៅស្ថានទូតជប៉ុនប្រចាំកម្ពុជា លោក តានិណៃ អ៊ិឈិតុម៉ុ ឧបទូតនៃស្ថានទូតជប៉ុនប្រចាំកម្ពុជា បានថ្លែងថា នៅក្នុងរយៈពេលជាង ៣០ ឆ្នាំចុងក្រោយនេះ ស្ថានទូតជប៉ុន បានចូលរួមចំណែកក្នុង គម្រោងចំនួន ៦៨១ នៅទូទាំងប្រទេសកម្ពុជា តាមរយៈគ្រោងការណ៍ជំនួយឥតសំណងគូសាណូណិ។
លោកបានបញ្ជាក់ទៀតថា៖ «យើងមានសេចក្តីសោមនស្សរីករាយដែលគម្រោងទាំងនេះ បានចូលរួមចំណែកដោយផ្ទាល់ក្នុងការកែលម្អគុណភាពជីវិតរបស់ប្រជាជនកម្ពុជានៅកម្រិតមូលដ្ឋាន។ ទោះយ៉ាងណា លោកក៏ទទួលស្គាល់ថានៅតែមានបញ្ហាប្រឈមមួយចំនួនដែលត្រូវដោះស្រាយ ដើម្បីកែលម្អគុណភាពជីវិតរបស់ប្រជាជន។ ជប៉ុន នឹងបន្តចូលរួមចំណែកក្នុងការដោះស្រាយបញ្ហាប្រឈមទាំងនោះ តាមរយៈគ្រោងការជំនួយអភិវឌ្ឍន៍ផ្លូវការផ្សេងៗ រួមទាំង ជំនួយគូសាណូណិផងដែរ»។
សូមជម្រាបថា ចាប់តាំងពីឆ្នាំ ១៩៩១ បន្ថែមលើគម្រោងឥណទាននិងជំនួយឥតសំណងខ្នាតធំ រដ្ឋាភិបាលជប៉ុន បាននិងកំពុងអនុវត្តគម្រោងគូសាណូណិនៅកម្ពុជា ដើម្បីជួយដោយផ្ទាល់ដល់អាជ្ញាធរមូលដ្ឋាន និងអង្គការក្រៅរដ្ឋាភិបាលនានា ក្នុងការអនុវត្តគម្រោងរបស់ពួកគាត់។ គូសាណូណិ មានន័យថា «ឬសស្មៅ» ក្នុងភាសាជប៉ុន៕
