លោកនាយករដ្ឋមន្ត្រី ហ៊ុន ម៉ាណែត ថ្លែងកាលពីថ្ងៃម្សិលមិញ។ រូបថត STPM
ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត បានលើកឡើងថា រដ្ឋាភិបាលមិនចេះតែអាចធ្វើអន្តរាគមន៍បានគ្រប់រឿងឡើយ ជាក់ស្តែងដូចបញ្ហាតម្លៃផលិតផលក្នុងវិស័យកសិកម្មជាដើម ដើម្បីចៀសវាងធ្វើឱ្យប៉ះពាល់ទៅដល់ច្បាប់ប្រកួតប្រជែង និងស្មារតីនៃសេដ្ឋកិច្ចទីផ្សារសេរី ដែលត្រូវបានធានាដោយរដ្ឋធម្មនុញ្ញ។
លោក ហ៊ុន ម៉ាណែត លើកឡើងដូច្នេះ នៅក្នុងពិធីប្រកាសដាក់ឱ្យអនុវត្តជាផ្លូវការនូវកម្មវិធីនយោបាយអាទិភាពទី៥ និងទី៦ របស់រាជរដ្ឋាភិបាលនីតិកាលទី៧ នៃរដ្ឋសភា ពាក់ព័ន្ធនឹងវិស័យកសិកម្ម នាថ្ងៃទី ២០ ខែវិច្ឆិកា ឆ្នាំ ២០២៣ ដែលជាកម្មវិធីនយោបាយអាទិភាពចុងក្រោយ។
លោក ហ៊ុន ម៉ាណែត បានថ្លែងថា៖«រដ្ឋាភិបាលចូលធ្វើអន្តរាគមន៍ទៅលើកិច្ចការដែលចាំបាច់ និងមានកំហិតលើវិស័យមួយចំនួន ជាពិសេសទៅលើជំនួយផ្នែកបច្ចេកទេស កិច្ចការហេដ្ឋារចនាសម្ព័ន្ធ ក្នុងចក្ខុវិស័យរយៈពេលវែង ហើយបន្តធ្វើការតាមដាន ហើយត្រូវមានរូបមន្តចូលរួមពីសមាសភាព ទាំងរដ្ឋ និងវិស័យឯកជនផងដែរ»។
សម្រាប់ក្នុងវិស័យកសិកម្ម លោកថា រដ្ឋាភិបាលបានជួយអន្តរាគមន៍ដល់ការផ្តល់ឥណទាន តែធានាមិនឱ្យប៉ះពាល់ដល់គោលការណ៍ទីផ្សារសេរី ហើយកម្ពុជាជាសមាជិកនៃអង្គការពាណិជ្ជកម្មមួយចំនួន ដែលការជួយអន្តរាគមន៍មួយចំនួនអាចប៉ះពាល់ដល់ច្បាប់នៃការប្រកួតប្រជែង និងអាចបាត់បង់ទីផ្សារផងដែរ។
លោកបានមានប្រសាសន៍ថា៖ «អ្វីដែលសំខាន់គឺការពង្រឹងខ្លួនយើង ហើយអាចម្ចាស់ការខ្លួនឯងជាពិសេសសម្រាប់វិស័យឯកជន។ យើងមិនអាចទៅអន្តរាគមន៍តម្លៃរហូតបានទេ។ រដ្ឋអាចធ្វើអន្តរាគមន៍តម្លៃបានតែក្នុងលក្ខខណ្ឌចាំបាច់ និងជាអាទិភាពបំផុតទេ។ រដ្ឋធម្មនុញ្ញក៏មានចែងពីការធានាសេដ្ឋកិច្ចទីផ្សារសេរីដែរ ហើយក៏មានគោលដៅកាត់បន្ថយការលូកដៃរបស់រដ្ឋផងដែរ»។
លោកនាយករដ្ឋមន្ត្រីបន្តថា៖ «ជាក់ស្តែង កិច្ចអន្តរាគមន៍រដ្ឋធ្វើឡើងនៅក្នុងដំណាក់កាលមានវិបត្តិកើតឡើង ប៉ុន្តែជាក់ស្តែងក្នុងបញ្ហាកសិកម្ម រដ្ឋធ្វើអន្តរាគមន៍ក្នុងរយៈពេលជាក់លាក់ ក្នុងគោលដៅជួយពង្រឹងវិស័យកសិកម្ម»។
ជាមួយគ្នានេះលោកនាយករដ្ឋមន្ត្រីក៏បានស្នើដល់ក្រសួងកសិកម្ម និងផ្នែកពាក់ព័ន្ធត្រូវធានាយ៉ាងណាលុបបំបាត់ចោលនូវសកម្មភាពទាំងឡាយណាដែលរារាំងទៅដល់ការប្រកួតប្រជែងដោយស្មើភាពគ្នាចំពោះកសិករ និងវិស័យឯកជន។ជុំវិញបញ្ហានេះ
លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជាយល់ថា ការលើកឡើងរបស់លោកនាយករដ្ឋមន្ត្រីជារឿងត្រឹមត្រូវ ដោយសាររបបគ្រប់គ្រងក្នុងប្រទេសប្រជាធិបតេយ្យប្រកាន់យកសេដ្ឋកិច្ចទីផ្សារសេរី គឺជាទូទៅរដ្ឋាភិបាលមិនជ្រៀតជ្រែកកិច្ចការងារ ឬការជួញដូរពាណិជ្ជកម្មនោះទេ។
ប៉ុន្តែទោះជាយ៉ាងណា រដ្ឋអាចធ្វើការអន្តរាគមន៍ក្នុងករណីចាំបាច់បំផុតដើម្បីឱ្យមានតុល្យភាពក្នុងដំណាក់កាលប៉ះពាល់ដល់ប្រយោជន៍ជាតិ។
លោកបានថ្លែងថា៖ «រដ្ឋអន្តរាគមន៍លុះត្រាករណីចាំបាច់ជាក់ស្តែងពេលដល់រដូវប្រមូលផលស្រូវ កសិករពិបាករកទីផ្សារសឹងមិនបាន មានឈ្មួញកណ្តាលកូរតម្លៃស្រូវឱ្យទាបមែនទែនទៅ រដ្ឋចៀសមិនផុតទេ ត្រូវមានអន្តរាគមន៍សម្របសម្រួលចូលដោះស្រាយ ហើយមានគោលនយោបាយទិញស្រូវក្នុងតម្លៃសមរម្យដើម្បីជួយទ្រទ្រង់កសិករ»។
យ៉ាងណាមិញ លោក ប៉ា ចន្ទរឿន ក៏បានស្នើឱ្យរដ្ឋាភិបាលបង្កើនការយកចិត្តទុកដាក់តាមដានដំណើរសេដ្ឋកិច្ចទីផ្សារ ដើម្បីអាចមើលឃើញពីការរងគ្រោះពីវិស័យណាមួយ ឬចន្លោះប្រហោងក្នុងវិស័យណាមួយដែលរដ្ឋអាចដាក់ចេញវិធានការ ឬអាចចូលទៅអន្តរាគមន៍ភ្លាមៗ ដើម្បីធ្វើឱ្យមានតុល្យភាពជាតិ បើទោះបីរដ្ឋធានាការកាត់បន្ថយកិច្ចអន្តរាគមន៍ក្តី៕
