USAID ប្រកាសគម្រោងលើកកម្ពស់គុណភាពសេវាថែទាំសុខភាពប្រជាពលរដ្ឋកម្ពុជាមានតម្លៃ $៣៥ លាន។ EQHA
ភ្នំពេញៈ ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) នាថ្ងៃទី ២៣ ខែវិច្ឆិកានេះ បានប្រកាសគម្រោងថ្មីមួយឈ្មោះថា “គម្រោងលើកកម្ពស់គុណភាពសេវាថែទាំសុខភាព ជំហានទី២ (EQHA II)” ដែលមានរយៈពេល ៥ ឆ្នាំ ដើម្បីបន្តគាំទ្រដល់កិច្ចខិតខំប្រឹងប្រែងលើកកម្ពស់គុណភាពសេវាសុខាភិបាលសាធារណៈ និងឯកជនសម្រាប់ប្រជាជនកម្ពុជា។
គម្រោងលើកកម្ពស់គុណភាពសេវាថែទាំសុខភាពជំហានទី២ (EQHA II) ត្រូវបានបង្កើតឡើងដោយផ្អែកលើភាពជោគជ័យយ៉ាងសំខាន់ ដែលសម្រេចបានតាមរយៈគម្រោងលើកកម្ពស់ គុណភាពសេវាថែទាំសុខភាពជំហាន ទី១ (EQHA) ដែលបានអនុវត្ត រយៈពេល ៥ ឆ្នាំ (២០១៨ ដល់ ២០២៣) របស់USAID ក្នុងការពង្រឹងប្រព័ន្ធសុខាភិបាលជាតិ ដើម្បីលើកកម្ពស់ការទទួល បានអាជ្ញាប័ណ្ណ និងការទទួលស្គាល់គុណភាពដែលនាំឱ្យមានការកែលម្អ នូវគណនេយ្យភាពរបស់អ្នកផ្តល់សេវាសុខាភិបាលនៅទូទាំងប្រទេសកម្ពុជា។ នេះបើយោងតាមសេចក្តីប្រកាសព័ត៌មានរបស់USAID។
គម្រោងជំហានទី២ ដែលមានតម្លៃ ៣៥ លានដុល្លារសហរដ្ឋអាមេរិករបស់ USAID នេះ នឹងត្រូវអនុវត្តដោយ អង្គការ FHI 360 ជាអង្គការអន្តរជាតិ ដែលសហការជាមួយប្រទេសកម្ពុជា និងជាដៃគូធ្វើការជាមួយ USAID នៅក្នុងប្រទេសកម្ពុជាអស់រយៈពេលជាង ២៥ ឆ្នាំ។
លោកស្រី Kerry Pelzman តំណាង USAID ប្រចាំប្រទេសកម្ពុជា បានថ្លែងក្នុងសេចក្តីប្រកាសថា៖ “USAID កំពុងបន្តផ្តល់ការប្តេជ្ញាចិត្តដ៏យូរអង្វែងរបស់យើងចំពោះប្រជាជនកម្ពុជា តាមរយៈការគាំទ្រ ដល់ប្រព័ន្ធសុខាភិបាលនៅប្រទេសកម្ពុជា រួមទាំងអ្នកផ្តល់សេវាសុខាភិបាល ទាំងផ្នែកសាធារណៈ និងឯកជន ដើម្បីលើកកម្ពស់គុណភាពសេវាសុខាភិបាល”។
លោកស្រីបានបញ្ជាក់បន្ថែមថា៖ “ការងារនេះមានសារៈសំខាន់ណាស់សម្រាប់កម្ពុជា ក្នុងការបន្តឱ្យមានភាពរីកចម្រើន នៃវិស័យសុខភាពសាធារណៈ ដែលសម្រេចបានរយៈពេលមួយទសវត្សរ៍កន្លងមកនេះ”។
ជំនួយរបស់USAID តាមរយៈគម្រោង EQHA II និងការសម្របសម្រួលជាមួយក្រសួងសុខាភិបាលនឹងគាំទ្រប្រទេសកម្ពុជាក្នុងការជំរុញ និងពន្លឿនប្រព័ន្ធសម្រាប់ធានា ត្រួតពិនិត្យ និងបង្កើនស្តង់ដាគុណភាពតាមរយៈប្រព័ន្ធសុខាភិបាលជាតិ។
គម្រោងនេះ ក៏ជួយកម្ពុជាក្នុងការពន្លឿនវឌ្ឍនភាព និងនិរន្តរភាពដោយដោះស្រាយបញ្ហាប្រឈម សុខភាពសាធារណៈអាទិភាព។ ក្នុងនោះរួមមាន ការកាត់បន្ថយករណីឆ្លងថ្មីនៃជំងឺអេដស៍ និងរបេង កាត់បន្ថយមរណភាពមាតា និងទារក លើកកម្ពស់សុខភាពបន្តពូជ និងពង្រឹងការត្រៀមខ្លួន និងឆ្លើយតបទៅនឹង ការគំរាមកំហែងនៃជំងឺឆ្លងថ្មី។
វិស័យសំខាន់ៗដែលត្រូវផ្តោតរួមមាន ការធ្វើឱ្យប្រសើរឡើងនូវសមាហរណកម្មសេវាសុខភាពសាធារណៈ ដើម្បីបង្កើននូវប្រសិទ្ធភាព និងប្រសិទ្ធផល លើកកម្ពស់ប្រព័ន្ធនិយ័តកម្ម និងការទទួលស្គាល់គុណភាព និងការពង្រឹងសមត្ថភាពស្ថាប័នរបស់ប្រព័ន្ធសុខាភិបាល ដើម្បីដោះស្រាយអាទិភាពសុខភាពជាតិនានា។ វិធីសាស្ត្រគ្រប់ជ្រុងជ្រោយនេះធានាបាននូវការឆ្លើយតបដ៏រឺងមាំ ចំពោះតម្រូវការសុខភាពដែលកំពុងវិវត្តរបស់ប្រទេសកម្ពុជា៕
