លោក ហួត ហាក់ (ស្ដាំ) និងលោកស្រី Alissar Chaker ចាប់ដៃគ្នាកាលពីថ្ងៃទី ២៩ ខែវិច្ឆិកា ឆ្នាំ ២០២៣។ UNDP Cambodia
ភ្នំពេញៈ ក្រសួងអធិការកិច្ច និងកម្មវិធីអភិវឌ្ឍន៍អង្គការសហប្រជាជាតិប្រចាំនៅកម្ពុជា (UNDP Cambodia) ឯកភាពចុះអនុស្សរណៈនៃការយោគយល់គ្នា ក្នុងវិស័យអភិបាលកិច្ចល្អ តាមរយៈគម្រោងផ្តល់វគ្គបណ្តុះបណ្តាល និងលើកកម្ពស់សមត្ថភាពជំនាញរបស់មន្ត្រី ក៏ដូចជាផ្តល់ជំនួយបច្ចេកទេសដល់កម្ពុជាជាដើម។
ការឯកភាពនេះ ធ្វើឡើងនៅក្នុងជំនួបពិភាក្សាការងាររវាងលោក ហួត ហាក់ រដ្ឋមន្ត្រីក្រសួងអធិការកិច្ច និងលោកស្រី Alissar Chaker អ្នកតំណាងប្រចាំប្រទេសនៃកម្មវិធីអភិវឌ្ឍន៍អង្គការសហប្រជាជាតិប្រចាំនៅកម្ពុជា កាលពីថ្ងៃទី ២៩ ខែវិច្ឆិកា ឆ្នាំ ២០២៣។ នេះបើតាមសេចក្តីប្រកាសព័ត៌មានស្តីពីលទ្ធផលនៃជំនួបនោះ។
ក្នុងឱកាសនោះលោក ហួត ហាក់ បានថ្លែងអំណរគុណដល់អង្គការ UNDP ប្រចាំនៅកម្ពុជា ចំពោះការផ្ដល់ជំនួយជាច្រើនដល់ប្រទេសកម្ពុជានាពេលកន្លងមក និងកិច្ចសហប្រតិបត្តិការដ៏ល្អប្រសើរលើគ្រប់វិស័យ ដែលមានជាអាទិ៍ ថាមពល បរិស្ថាន ការដោះមីន សិទិ្ធមនុស្ស អប់រំ និងសង្គមកិច្ច។
ជាពិសេសលើការងារលុបបំបាត់ភាពក្រីក្រ ការដឹកនាំតាមបែបប្រជាធិបតេយ្យ នីតិរដ្ឋ និងបរិយាបន្ន ព្រមទាំងការជួយជ្រោមជ្រែងប្រទេសកម្ពុជាដើម្បីឈានទៅសម្រេចនូវគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិឆ្នាំ ២០៣០។
លោកស្រីអ្នកតំណាងប្រចាំប្រទេសអង្គការ UNDP ប្រចាំនៅកម្ពុជា បានថ្លែងអំណរគុណយ៉ាងជ្រាលជ្រៅជូនចំពោះលោករដ្ឋមន្ត្រី ដែលបានឆ្លៀតពេលវេលាដ៏មមាញឹកអនុញ្ញាតឱ្យក្រុមការងារចូលជួបពិភាក្សា និងរាយការណ៍អំពីបេសកកម្ម និងសកម្មភាពការងាររបស់អង្គការ UNDP ប្រចាំនៅកម្ពុជា នាពេលកន្លងមក។
សេចក្តីប្រកាសព័ត៌មាននេះបានឱ្យដឹងថា៖ «ភាគីទាំង ២ ឯកភាពចុះអនុស្សរណៈនៃការយោគយល់គ្នា ក្នុងវិស័យអភិបាលកិច្ចល្អ ដើម្បីចាប់ផ្ដើមកិច្ចសហប្រតិបត្តិការរវាងស្ថាប័នទាំង ២ ដោយចាត់តាំងក្រុមការងារនៃភាគីទាំង ២ ពិភាក្សាលម្អិតលើផ្នែកបច្ចេកទេសក្នុងពេលវេលាឆាប់ៗខាងមុខនេះ»។
ភាគីទាំង ២ ក៏បានឯកភាព ពិនិត្យលទ្ធភាពក្នុងការផ្តល់វគ្គបណ្តុះបណ្តាលដើម្បីពង្រឹង និងលើកកម្ពស់សមត្ថភាពជំនាញរបស់មន្ត្រី និងជំនួយបច្ចេកទេស ជាពិសេសអ្នកជំនាញបច្ចេកទេសដើម្បីជួយក្នុងការរៀបចំសេចក្តីព្រាងច្បាប់ស្តីពី អធិការកិច្ច និងលិខិតបទដ្ឋានគតិយុត្តពាក់ព័ន្ធផ្សេងៗទៀតដែលក្រសួងកំពុងរៀបចំ។
ឆ្លៀតក្នុងឱកាសនោះដែរ លោករដ្ឋមន្ដ្រី បានជម្រាបជូនអំពីស្ថានភាពនយោបាយដែលមានសភាពល្អប្រសើរលើគ្រប់ទិដ្ឋភាពរួមមាន នយោបាយ សង្គម សេដ្ឋកិច្ច ដែលបង្កបរិយាកាសអនុគ្រោះ និងអំណោយផលដល់ការអភិវឌ្ឍ សង្គមជាតិ និងទាក់ទាញការវិនិយោគផ្ទាល់ពីបរទេស។
លោក ហួត ហាក់ ថ្លែងថា៖ «យុទ្ធសាស្ត្របញ្ចកោណដំណាក់កាលទី១ នៃរដ្ឋាភិបាលអាណត្តិថ្មីបានផ្តោតលើការកែទម្រង់ ការពង្រឹងអភិបាលកិច្ច និងការធ្វើទំនើបកម្មស្ថាប័នរដ្ឋឱ្យក្លាយជារដ្ឋបាលសាធារណៈដែលប្រកបដោយសមត្ថភាពខ្ពស់ ខ្លាំង វៃឆ្លាត និងស្អាតស្អំ»។
លោករដ្ឋមន្ត្រី ក៏បានបង្ហាញពីផែនការសកម្មភាពចំនួន ៤ របស់ក្រសួងអធិការកិច្ច រួមមាន ការពង្រឹងសមត្ថភាពស្ថាប័ន ការកសាង និងពង្រឹងមូលធនមនុស្សការរៀបចំច្បាប់ និងលិខិតបទដ្ឋានគតិយុត្តនៅក្នុងសមត្ថកិច្ចក្រសួងដែលរាជរដ្ឋាភិបាលប្រគល់ជូន និងការថែរក្សាបរិយាកាសសុខដុមនីយកម្មនៅក្នុងក្រសួងនិងអង្គភាពចំណុះទាំងនៅថ្នាក់ជាតិ និងថ្នាក់ក្រោមជាតិ៕
