សមាសភាពគណៈកម្មាធិការជាតិរៀបចំការបោះឆ្នោតប្រកាសចូលកាន់តំណែង កាលពីថ្ងៃទី១៤ ខែធ្នូ ឆ្នាំ២០២៣។ រូប គ.ជ.ប
អ្នកនាំពាក្យ គណៈកម្មាធិការជាតិរៀបចំការបោះឆ្នោត (គ.ជ.ប) បញ្ជាក់ពីជំហរឥតងាករេ និងការប្តេជ្ញារបស់ខ្លួនក្នុងការរៀបចំ ចាត់ចែង និងគ្រប់គ្រងការបោះឆ្នោតនៅក្នុងឆ្នាំ ២០២៤ ខាងមុខ ឱ្យទទួលបានជោគជ័យ ពិសេសស្របទៅតាមច្បាប់កំណត់ជាធរមាន ដើម្បីបន្តលើកកម្ពស់លទ្ធិប្រជាធិបតេយ្យ សេរីពហុបក្ស នីតិរដ្ឋ សន្តិភាព និងការអភិវឌ្ឍប្រទេសជាតិតាមរយៈការបោះឆ្នោតនៅកម្ពុជា។
សេក្តីប្រកាសព័ត៌មានរបស់អ្នកនាំពាក្យរបស់គ.ជ.ប នៅថ្ងៃទី១៥ ខែធ្នូ ឆ្នាំ ២០២៣បានបញ្ជាក់ថា បន្ទាប់ពីបានប្រកាសចូលកាន់តំណែង កាលពីថ្ងៃទី១៤ ខែធ្នូ ឆ្នាំ២០២៣ សមាសភាពគណៈកម្មាធិការជាតិរៀបចំការបោះឆ្នោតថ្មី ត្រូវបន្តបេសកកម្មរបស់ខ្លួន ស្របតាមរដ្ឋធម្មនុញ្ញនៃកម្ពុជា ក្នុងការរៀបចំចាត់ចែង និងគ្រប់គ្រងការបោះឆ្នោតអសកលចំនួនពីរនៅក្នុងឆ្នាំ២០២៤ ខាងមុខនេះ គឺការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ និងការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤ ស្របតាមការកំណត់នៃច្បាប់។
ប្រភពដដែលនេះ បញ្ជាក់បន្ថែមថា៖«ដោយការប្ដេជ្ញាចិត្តរបស់សមាសភាពគណៈកម្មាធិការជាតិរៀបចំការបោះឆ្នោតអាណត្តិថ្មីនេះ រួមនឹងថ្នាក់ដឹកនាំនៃអគ្គលេខាធិការដ្ឋាន គ.ជ.ប និងមន្រ្តីជំនាញគ្រប់លំដាប់ថ្នាក់ ដែលជាសេនាធិការលើការងារបច្ចេកទេស ប្រកបដោយបទពិសោធន៍ យើងមានជំនឿយ៉ាងមុតមាំថា យើងនឹងរៀបចំការបោះឆ្នោតអសកលទាំងពីរនេះ ប្រកបដោយជោគជ័យ ដូចការសន្យារបស់លោក ប្រាជ្ញ ចន្ទ ប្រធាន គ.ជ.ប នាឱកាសប្រកាសចូលកាន់តំណែង»។
គជប ឱ្យដឹងថា៖«ពិតមែនហើយ បើទោះបីជាចន្លោះពីឆ្នាំ២០២៤ ដល់ឆ្នាំ២០២៦ ពុំមានការបោះឆ្នោតជាសកលយ៉ាងណាក្តី ក៏ គ.ជ.ប នៅបំពេញភារកិច្ច តួយ៉ាងការធ្វើបច្ចុប្បន្នភាពបញ្ជីបោះឆ្នោតប្រចាំឆ្នាំ ពង្រឹងស្ថាប័ន ការងារអភិបាលកិច្ច និងការបង្កើនសមត្ថភាពដល់មន្រ្តីជំនាញគ្រប់លំដាប់ថ្នាក់ ឱ្យបានសមស្របតាមតម្រូវការការងារ និងការរីកចម្រើននៃបច្ចេកវិទ្យាឌីជីថលនៃឧស្សាហកម្ម ៤.០ ដើម្បីឆ្លើយតបទៅនឹងសភាពការណ៍បច្ចុប្បន្ន ក៏ដូចជាទៅអនាគត សំដៅឆ្ពោះទៅការរៀបចំការបោះឆ្នោតជាសកល ដើម្បីជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧ និងការបោះឆ្នោតជ្រើសតាំងតំណាងរាស្រ្ត នីតិកាលទី៨ ឆ្នាំ២០២៨»។
លោក សោម សូរីដា សមាជិក គ.ជ.ប អាណត្តិថ្មី នៅថ្ងៃទី១៦ ខែធ្នូនេះ ថ្លែងបញ្ជាក់បន្ថែមថា៖«ការរប្រកាសជំហរ និងការប្តេជ្ញាចិត្តរបស់គ.ជ.ប នេះ សំដៅដល់ការរៀបចំ ចាត់ចែង និងនិងគ្រប់ការបោះឆ្នោត ប្រកបដោយសេរី ត្រឹមត្រូវ និងយុត្តិធម៌ស្របតាមគោលការណ៍លទ្ធិប្រជាធិបតេយ្យសេរី ពហុបក្ស ហើយ កិច្ចការទាំងអស់ យើងតម្រូវឱ្យមានការចូលរួមពីភាគីពាក់ព័ន្ធ និងលើកទឹកចិត្តឱ្យមានការចូលរួមជាមួយគ.ជ.ប»។
លោក សំ គន្ធាមី នាយកអង្គការឃ្លាំមើលការបោះឆ្នោតនិកហ្វិក នៅថ្ងៃទី១៦ ខែធ្នូនេះ បានស្វាគមន៍ចំពោះការប្តេជ្ញា និងបញ្ជាក់ជំហររបស់គជបថ្មីនេះ ព្រោះជាអ្វីដែលប្រជាពលរដ្ឋ គណបក្សនយោបាយ និងអង្គការសង្គមស៊ីវិល ចង់បាន និងចង់ឃើញបំផុត។ លោកថា៖«ប៉ុន្តែ បើសិនជាគជបថ្មីនេះ ធ្វើមិនបានដូចការប្តេជ្ញាចិត្ត និងជំហររបស់ខ្លួនទេ គេនឹងអស់ជំនឿលើស្ថាប័នកំពូលមួយនេះ»។
ក្រោយពីការបោះឆ្នោតជ្រើសតាំងសភាធម្មនុញ្ញ ឆ្នាំ១៩៩៣ ដែលរៀបចំដោយអាជ្ញាធរបណ្តោះអាសន្ននៃអង្គការសហប្រជាជាតិប្រចាំនៅកម្ពុជា ដែលហៅកាត់ថា “អ៊ុនតាក់” កម្ពុជាបានប្តេជ្ញាចិត្តរៀបចំ ចាត់ចែង និងគ្រប់គ្រងការបោះឆ្នោតដោយខ្លួនឯងផ្ទាល់ សំដៅធានាឯករាជ្យ អធិបតេយ្យ សន្តិភាព អព្យាក្រឹត ស្របតាមគោលការណ៍នៃលទ្ធិប្រជាធិបតេយ្យ សេរីពហុបក្ស ដូចមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា។
យោងតាមស្មារតីនេះ គណៈកម្មាធិការជាតិរៀបចំការបោះឆ្នោត ដែលជាស្ថាប័នឯករាជ្យមួយត្រូវបានបង្កើតឡើងនៅថ្ងៃទី៣០ ខែមករា ឆ្នាំ១៩៩៨ ដើម្បីរៀបចំចាត់ចែង និងគ្រប់គ្រងការបោះឆ្នោតនានានៅកម្ពុជា។ គិតមកដល់ពេលនេះ គជប បានរៀបចំចាត់ចែង និងគ្រប់គ្រងការបោះឆ្នោតទាំងសកល ទាំងអសកល បានចំនួន ១៧ លើក រួចមកហើយ ដោយមានការចូលរួមរបស់ប្រជាពលរដ្ឋដែលមានសិទ្ធិបោះឆ្នោតយ៉ាងច្រើនលើសលប់ បើប្រៀបធៀបទៅនឹងប្រទេសប្រជាធិបតេយ្យក្នុងតំបន់ និងពិភពលោក។
លទ្ធផលនេះ សបញ្ជាក់ឱ្យឃើញនូវឆន្ទៈ និងជម្រើសរបស់ប្រជាពលរដ្ឋកម្ពុជា ដែលជាម្ចាស់ជោគវាសនានៃប្រទេសជាតិរបស់ខ្លួន។ នេះបើតាមសេចក្តីប្រកាសដដែលខាងលើ៕
