បុគ្គលិកស៊ីម៉ាក់ កំពុងដោះមីននៅខេត្តដាច់ស្រយាល១កន្លងមក។ រូបថត អាជ្ញាធរមីន
ភ្នំពេញៈ រដ្ឋាភិបាលជប៉ុន បានសម្រេចផ្តល់ជំនួយបន្ថែមចំនួន១ ៣៩០ ១១៧ ដុល្លារអាមេរិក ដល់គម្រោងចំនួន២ របស់ អង្គការ JMAS ក្នុងការបោសសម្អាតគ្រាប់បែកចង្កោម និងគ្រាប់មីននៅក្នុងខេត្តស្ទឹងត្រែង និងខេត្តបន្ទាយមានជ័យ ខណៈដែលគម្រោងនេះបានអនុវត្តដល់ឆ្នាំទី៣ហើយ។
នៅក្នុងពិធីចុះហត្ថលេខាលើកិច្ចសន្យាផ្តល់ជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុន កាលពីថ្ងៃទី១៩ ខែធ្នូ ឆ្នាំ២០២៣ លោក អ៊ូអិណុ អាត់ស៊ូស៊ីឯកអគ្គរាជទូតជប៉ុនប្រចាំកម្ពុជា បានឱ្យដឹងថា នៅក្នុងឆ្នាំទី៣ នៃការអនុវត្តគម្រោងនេះ ដូចក្នុងឆ្នាំទី១ និងទី២ដែរ បន្ថែមលើការបោសសម្អាតគ្រាប់បែកចង្កោមក្នុងខេត្តស្ទឹងត្រែង និងគ្រាប់មីននិងយុទ្ធភណ្ឌមិនទាន់ផ្ទុះក្នុងខេត្តបន្ទាយមានជ័យ អង្គការ JMAS នឹងបន្តផ្តល់ការអប់រំអំពីការជៀសវាងពីគ្រោះថ្នាក់ និងផ្តល់ជំនួយផ្នែកកសិកម្ម។
លោកបានថ្លែងថា ៖«យើងសង្ឃឹមថា គម្រោងទាំង២ដែលបានចុះហត្ថលេខានៅថ្ងៃនេះ នឹងកាត់បន្ថយការរងទុក្ខរបស់មនុស្សដែលបណ្តាលមកពីគ្រាប់មីននិងយុទ្ធភណ្ឌមិនទាន់ផ្ទុះ ធ្វើឱ្យការរស់នៅរបស់ប្រជាជនក្នុងតំបន់រងគ្រោះ មានសុខសន្តិភាពនិងភាពប្រសើរជាងមុន ព្រមទាំងរួមចំណែកក្នុងការសម្រេចបាននូវការបោសសម្អាតគ្រាប់មីនប្រឆាំងមនុស្សឱ្យបានរួចរាល់ទាំងស្រុង នៅត្រឹមឆ្នាំ២០២៥ ដែលជាគោលដៅរបស់រាជរដ្ឋាភិបាលកម្ពុជា»។
រដ្ឋាភិបាលជប៉ុន បាននិងកំពុងផ្តល់ជំនួយឥតសំណងដល់អង្គការក្រៅរដ្ឋាភិបាលជប៉ុន ចាប់តាំងពីឆ្នាំ២០០២ ដើម្បីគាំទ្រគម្រោងអភិវឌ្ឍន៍សេដ្ឋកិច្ច និងសង្គម ដែលត្រូវបានអនុវត្តនៅក្នុងប្រទេស ឬតំបន់កំពុងអភិវឌ្ឍន៍។ ក្នុងរយៈពេល២០ឆ្នាំចុងក្រោយនេះ ស្ថានទូតជប៉ុនបានផ្តល់ជំនួយជាង ១៥០ គម្រោងនៅក្នុងប្រទេសកម្ពុជាតាមរយៈកម្មវិធីនេះ ហើយគម្រោងទាំងនេះបានចូលរួមចំណែកដោយផ្ទាល់ក្នុងការកែលម្អគុណភាពជីវិតរបស់ប្រជាជនកម្ពុជា។
លោកឯកអគ្គរដ្ឋទូតបញ្ជាក់បន្ថែមថា ៖ «ខ្ញុំមានសេចក្តីសោមនស្សរីករាយដោយសង្កេតឃើញថា នាពេលថ្មីៗនេះ ប្រទេសកម្ពុជាបាននិងកំពុងអភិវឌ្ឍយ៉ាងឆាប់រហ័ស។ ទោះយ៉ាងណា ខ្ញុំក៏ទទួលស្គាល់ថា នៅតែមានបញ្ហាប្រឈមមួយចំនួនដែលត្រូវដោះស្រាយ ដើម្បីកែលម្អគុណភាពជីវិតរបស់ប្រជាជន។ រដ្ឋាភិបាលជប៉ុន នឹងបន្តសហការជាមួយអង្គការក្រៅរដ្ឋាភិបាលអន្តរជាតិរបស់ជប៉ុននានា និងគាំទ្រការងាររបស់ពួកគេក្នុងការដោះស្រាយបញ្ហានានា»។
ជាមួយគ្នានោះដែរ តំណាងស្ថាប័នទទួលជំនួយ លោក ការឹបិ ម៉ាសាកាហ៊្សូ ប្រធានតំណាងអង្គការ JMAS ប្រចាំប្រទេសកម្ពុជា បានថ្លែងនាពិធីនោះថា ចាប់តាំងពីឆ្នាំ២០០២មក អង្គការ JMAS បានចូលរួមក្នុងសកម្មភាពគាំទ្រការបោសសម្អាតមីន និងយុទ្ធភណ្ឌមិនទាន់ផ្ទុះនៅកម្ពុជា ក្រោមកិច្ចសហប្រតិបត្តិការជាមួយមជ្ឈមណ្ឌលសកម្មភាពកំចាត់មីនកម្ពុជា (CMAC)។
គម្រោងដែលស្ថានទូតជប៉ុនជួយនៅពេលមាននេះ ជាគម្រោងគាំទ្រការស្ថាបនាឡើងវិញជាមួយការបោសសម្អាតគ្រាប់បែកចង្កោមនៅខេត្តស្ទឹងត្រែង ហៅកាត់ថា គម្រោង RSCS (ឆ្នាំទី៣)។
លោកការឹបិ ម៉ាសាកាហ៊្សូបានបញ្ជាក់ទៀតថា៖ «នៅក្នុងគម្រោងនេះ អង្គការ JMAS នឹងបោសសម្អាតតំបន់ដែលមានគ្រាប់បែកចង្កោមចំនួន ៤៧០ ហិកតា និងបង្រៀនមជ្ឈមណ្ឌលសកម្មភាពកំចាត់មីនកម្ពុជា (CMAC) អំពីវិធីសាស្ត្រដែលមានស័ក្តិសិទ្ធិភាព និងសុវត្ថិភាព ក្នុងការបោសសម្អាតគ្រាប់បែកចង្កោម។ មិនតែប៉ុណ្ណោះ គម្រោងនេះ នឹងផ្តល់ការអប់រំពីការចៀសវាងពីហានិភ័យនៃគ្រាប់មីន ដល់ប្រជាជនមូលដ្ឋាន និងបណ្តុះបណ្តាលកសិករពីការគ្រប់គ្រង និងបច្ចេកវិទ្យាកសិកម្ម»។
ដោយឡែកគម្រោងទី២ លោកបានឱ្យដឹងដែរថា ជាគម្រោងគាំទ្រការស្ថាបនាឡើងវិញ ជាមួយការបោសសម្អាតមីននៅខេត្តបន្ទាយមានជ័យ ហៅកាត់ថា គម្រោង RSDB (ឆ្នាំទី៣)។
លោកបានថ្លែងដែរថា៖«នៅក្នុងគម្រោងនេះ អង្គការ JMAS នឹងបោសសម្អាតតំបន់ដែលមានគ្រាប់មីន និងយុទ្ធភណ្ឌមិនទាន់ផ្ទុះចំនួន ១៨០ ហិកតា និងផ្ទេរវិធីសាស្ត្រដែលមានស័ក្តិសិទ្ធិភាព និងសុវត្ថិភាព ក្នុងការបោសសម្អាតគ្រាប់មីន និងយុទ្ធភណ្ឌមិនទាន់ផ្ទុះ ទៅដល់ CMAC»។
បើតាមលោក ការឹបិ ម៉ាសាកាហ៊្សូ គម្រោងទីពីរនេះ ក៏នឹងផ្តល់ការអប់រំពីការចៀសវាងពីហានិភ័យនៃគ្រាប់មីនផងដែរ។ បន្ថែមពីនេះ កសិករនឹងទទួលបានឱកាសសិក្សាអំពីបច្ចេកទេសដាំដុះស្រូវ និងបង្កើតកសិដ្ឋានគំរូនៅលើទីតាំងដីដែលបោសសម្អាតមីនរួចរាល់។
សូមជម្រាបថា ចាប់តាំងពីឆ្នាំ២០០២ មក រដ្ឋាភិបាលជប៉ុន បានផ្តល់ថវិកាជាង ៥២ លានដុល្លារអាមេរិក ដល់គម្រោងចំនួន ១៥៤ ដែលផ្ដោតសំខាន់ទៅលើវិស័យអប់រំនៅកម្រិតបឋមសិក្សា វិស័យសុខាភិបាល វិស័យកសិកម្ម និងសកម្មភាពបោសសម្អាតមីនក្នុងប្រទេសកម្ពុជា៕
