លោក កើត រិទ្ធ រដ្ឋមន្ត្រីក្រសួងយុត្តិធម៌ ប្រគល់វិញ្ញាបនបត្រជំនាញវិជ្ជាជីវៈបណ្ដោះអាសន្នដល់យុវជនស្ដារនីតិសម្បទាពីញៀនគ្រឿងញៀន។ រូបថត ក្រសួងយុត្តិធម៌
ភ្នំពេញៈ យុវជន យុវតី ដែលរងគ្រោះដោយសារគ្រឿងញៀន សរុបចំនួន ១៣០ នាក់ នៅមជ្ឈមណ្ឌលបន្សាប ព្យាបាល និងស្តារនីតិសម្បទាអ្នកញៀនគ្រឿងញៀន កែ ស៊ីនួន ខេត្តបាត់ដំបង បានទទួលវិញ្ញាបនបត្របណ្តោះអាសន្នបញ្ជាក់ការបណ្តុះបណ្តាលជំនាញវិជ្ជាជីវៈ សម្រាប់យកទៅបម្រើការងារ និងចិញ្ចឹមជីវិត បន្ទាប់ពីចាកចេញពីមណ្ឌលទៅរស់នៅក្នុសហគមន៍របស់ខ្លួនវិញ។
ពិធីប្រគល់វិញ្ញាបនបត្របណ្តោះអាសន្នបញ្ជាក់ការបណ្តុះបណ្តាលជំនាញវិជ្ជាជីវៈដល់ជនរងគ្រោះដោយសារគ្រឿងញៀននេះ បានធ្វើឡើងនាថ្ងៃទី១៩ ខែធ្នូ ឆ្នាំ២០២៣ ក្រោមអធិបតីភាព លោក កើត រិទ្ធ រដ្ឋមន្ត្រីក្រសួងយុត្តិធម៌ និងជាអនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន រួមនឹងមន្ត្រីជាច្រើនរូបទៀត។
យោងតាមហ្វេសប៊ុកក្រសួងយុត្តិធម៌ បានឱ្យដឹងថា ជនរងគ្រោះដោយសារគ្រឿងញៀនទាំង ១៣០ នាក់ ត្រូវបានបណ្តុះបណ្តាលដោយជោគជ័យលើផ្នែកដំឡើងបណ្តាញអគ្គិសនីក្នុងអគារចំនួន ២៨ នាក់, ផ្នែកថែទាំនិងជួសជុលរថយន្តចំនួន ១៦ នាក់, ផ្នែកសេវាកម្មកុំព្យូទ័រចំនួន ២២ នាក់, ផ្នែកកែច្នៃបន្លែនិងផ្លែឈើចំនួន ៣៩ នាក់ និងផ្នែកបសុព្យាបាលចំនួន ២៥ នាក់។
នាពិធីនោះ លោក កើត រិទ្ធ បានថ្លែងកោតសរសើរ និងអបអរសាទរចំពោះជនរងគ្រោះដោយសារគ្រឿងញៀនទាំងអស់ ដែលមានភាពក្លាហាន ពិសេស ការតាំងចិត្ត និងការប្តេជ្ញាចិត្តខ្ពស់ក្នុងការយកឈ្នះខ្លួនឯង ការយកឈ្នះរាល់ឧបសគ្គ និងការលំបាកទាំងអស់ ក្នុងការផ្តាច់គ្រឿងញៀន ដើម្បីចាប់យកឱកាសថ្មីសម្រាប់កសាងជីវិតថ្មីនៅក្នុងសង្គមជាតិ និងដើម្បីក្លាយខ្លួនជាកូនល្អ និងពលរដ្ឋល្អចូលរួមចំណែកក្នុងការអភិវឌ្ឍសង្គមជាតិ។
លោកបានថ្លែងថា៖«ប្អូនៗដែលមានឱកាសមកដល់ទីនេះ និងបានជាសះស្បើយពីគ្រឿងញៀន ហើយមានវិជ្ជាជីវៈជំនាញច្បាស់លាស់ពេលចេញទៅវិញត្រូវកែប្រែខ្លួន ធ្វើសមាហរណកម្មទៅក្នុងសហគមន៍ ដើម្បីក្លាយខ្លួនជាកូនល្អ និងប្រជាពលរដ្ឋល្អបាន»។
រាជរដ្ឋាភិបាលបានចាត់ទុកអ្នកប្រើប្រាស់គ្រឿងញៀនទាំងអស់ គឺជាជនរងគ្រោះនៃគ្រឿងញៀនមិនមែនជាជនល្មើសនៃគ្រឿងញៀន។
ជាមួយគ្នានោះ លោក កើត រិទ្ធ បានលើកទឹកចិត្ត និងជំរុញឱ្យអ្នកប្រើប្រាស់គ្រឿងញៀនទាំងអស់ត្រូវបានបញ្ជូនទៅកន្លែងបន្សាប ព្យាបាល និងស្តារនីតិសម្បទា នៅតាមមជ្ឈមណ្ឌលបន្សាប ព្យាបាល និងស្តារនីតិសម្បទាទាំង ១៩ មជ្ឈមណ្ឌលនៅទូទាំងប្រទេស។
លោក កែ ស៊ីនួន នាយកមជ្ឈមណ្ឌលបន្សាបព្យាបាល និងស្តារនីតិសម្បទាគ្រឿងញៀន កែ ស៊ីនួន ខេត្តបាត់ដំបង បានឱ្យដឹងដែរថា ក្នុងរយៈពេលពេញ១ឆ្នាំ បន្ទាប់ពីមជ្ឈមណ្ឌលនេះត្រូវបានបង្កើតឡើង បានរួមចំណែកយ៉ាងសំខាន់ ជាមួយរាជរដ្ឋាភិបាលកម្ពុជា ក្នុងការជួយដល់ជនរងគ្រោះដោយសារគ្រឿងញៀន ដែលមកទទួលសេវារបស់មជ្ឈមណ្ឌល តាមរយៈការអប់រំផ្លូវចិត្ត ការបន្សាបព្យាបាល និងការបណ្តុះបណ្តាលផ្នែកជំនាញវិជ្ជាជីវៈ ដើម្បីឱ្យជនរងគ្រោះដោយសាគ្រឿងញៀនទាំងនេះ អាចមានឱកាសថ្មីនៅក្នុងជីវិត ដើម្បីក្លាយខ្លួនជាកូនល្អ និងជាពលរដ្ឋល្អ រួមចំណែកនៅក្នុងការអភិវឌ្ឍសង្គមជាតិរបស់យើង។
លោកបានបញ្ជាក់ថា គិតត្រឹមថ្ងៃទី១៩ ខែធ្នូ ឆ្នាំ២០២៣នេះ មជ្ឈមណ្ឌលទទួលបានយុវជនដែលញៀនគ្រឿងញៀនមកទទួលសេវាបន្សាប ព្យាបាលនិងស្តារនីតិសម្បទា សរុបចំនួន ៥៥៩ នាក់ ក្នុងនោះគ្រួសារ ឬអាណាព្យាបាលបានបញ្ជូនមកផ្ទាល់ចំនួន៣២០នាក់ តុលាការបង្គាប់ឱ្យមកទទួលការព្យាបាល មានចំនួន២១០នាក់ និងមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្តបាត់ដំបង ចំនួន២៩នាក់។
លោកបន្ថែមថា ជាលទ្ធផលការងាររបស់មជ្ឈមណ្ឌល ជនរងគ្រោះដោយសារគ្រឿងញៀន ចំនួន២៦៥នាក់ ក្នុងស្រី១៥នាក់ បានធ្វើសមាហរណកម្មបានដោយជោគជ័យចូលទៅក្នុងសហគមន៍ដើម្បីទៅរួមរស់ជាមួយក្រុមគ្រួសារវិញ។
លោក អំ សំអាត នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ បានប្រាប់ឱ្យដឹងដែរថា បញ្ហាគ្រឿងញៀនជាបញ្ហាមួយដែលញាំញីយុវជនជាច្រើនឱ្យរងគ្រោះដោយសារឥទ្ធិពលគ្រឿងញៀន ហើយជនជាប់ឃុំក្នុងពន្ធនាគារភាគច្រើនក៏ជាបទល្មើសគ្រឿងញៀន។
លោកបានបន្តថា ដូច្នេះយុវជន និងជនរងគ្រោះដោយសារការប្រើប្រាស់គ្រឿងញៀនគឺត្រូវការទទួលការព្យាបាល និងការស្តារយុវនីតិសម្បទាឡើងវិញ ដូចជាការព្យាបាលបន្សាបគ្រឿងញៀន ការបណ្តុះបណ្តាលវិជ្ជាជីវៈ នៅពេលពួកគេវិលត្រឡប់ទៅរស់នៅក្នុងសហគមន៍ និងគ្រួសារពួកគេយកជំនាញនេះទៅប្រើប្រាស់ប្រកបរបរចិញ្ចឹមជីវិត និងចាកឆ្ងាយផុតពីឥទ្ធិពលគ្រឿងញៀន»។
លោកបានបញ្ជាក់ថា ៖ «ដូច្នេះការបណ្តុះបណ្តាលវិជ្ជាជីវៈដល់អ្នករងគ្រោះជារឿងសំខាន់ ប៉ុន្តែយើងជាអង្គការធ្វើការលើការលើកកម្ពស់សិទ្ធិមនុស្សចង់ឃើញមណ្ឌលព្យាបាលនិងបន្សាបគ្រឿងញៀនទាំងអស់គឺជាមណ្ឌលព្យាបាល បន្សាបគ្រឿងញៀន និងមានការបណ្តុះបណ្តាលវិជ្ជាជីវៈសម្រាប់ពួកគាត់ ព្រោះកន្លងមកមានមណ្ឌលមួយចំនួនរងការរិះគន់ថាជាមណ្ឌលមានការប្រើប្រាស់ហិង្សា និងធ្វើទារុណ្ឌកម្មដល់ជនរងគ្រោះដោយសារគ្រឿងញៀនមួយចំនួន»៕
