អជ្ញាធរឈរជើងនៅប្រសាទព្រះវិហារ នាពេលកន្លងទៅ។ ហេង ជីវ័ន
ភ្នំពេញៈ អ្នកនាំពាក្យរាជរដ្ឋាភិបាលកម្ពុជាលោក ប៉ែន បូណា បានឱ្យដឹងថា ច្រកព្រំដែនកម្ពុជា-ថៃ ត្រង់ចំណុចប្រាសាទព្រះវិហារ ដែលជាកន្លែងមានវិវាទនឹងគ្នាហើយបានបិទកាលពីឆ្នាំ ២០០៨ នៅមិនទាន់មានការសម្រេចបើកឡើងវិញនៅឡើយទេ ខណៈមានការលើកឡើងពីការស្នើឱ្យបើកច្រកនេះឡើងវិញពីភាគីថៃ។
លោក ប៉ែន បូណា បានថ្លែងប្រាប់បែបនេះបន្ទាប់ពីសមាជិកសភាចំនួន ៧ នាក់ មកពីបក្សភឿថៃ បានដាក់ញត្តិទៅនាយករដ្ឋមន្ត្រីថៃ លោក សេដ្ឋា ថាវីស៊ីន ដើម្បីឱ្យលោកធ្វើការជជែកជាមួយរាជរដ្ឋាភិបាលកម្ពុជាលើសំណើបើកច្រកព្រំដែនក្បែរប្រាសាទព្រះវិហារឡើងវិញ។ នេះបើតាមការចុះផ្សាយរបស់កាសែតបាងកកបុស្តិ៍ជាភាសាអង់គ្លេស។
លោក ប៉ែន បូណា បានថ្លែងនៅថ្ងៃទី ២១ ខែធ្នូថា «កម្ពុជាបាននិងកំពុងពិចារណាយ៉ាងហ្មត់ចត់» លើកត្តាសន្តិសុខព្រំដែន ផលប្រយោជន៍ទេសចរ និងផលប៉ះពាល់នានាជុំវិញការស្នើបើកច្រកព្រំដែនត្រង់ចំណុចប្រាសាទព្រះវិហារនេះ។ ក៏ប៉ុន្តែទោះយ៉ាងណាកម្ពុជាមិនទាន់មានការសម្រេចចិត្តបែបណានោះទេ ហើយច្រកនេះនៅតែបន្តបិទ។
លោកថា៖ «បញ្ហាស្នើឱ្យបើកច្រកនេះខ្ញុំមិនដឹងទេថា នឹងអាចលើកយកមកពិភាក្សាក្នុងដំណើរទស្សនកិច្ចរបស់សម្តេចនាយករដ្ឋមន្ត្រី ទៅប្រទេសថៃនាពេលខាងមុខនោះទេ ពីព្រោះខ្ញុំមិនទាន់បានដឹងពីរបៀបវារៈ ហើយមកទល់ពេលនេះ រាជរដ្ឋាភិបាលកម្ពុជាពុំទាន់ទទួលបានការស្នើសុំជាផ្លូវការណាមួយពីភាគីថៃនោះដែរ ឮតែតាមសារព័ត៌មានបានចុះផ្សាយ»។
បើតាមកាសែតបាងកកបុស្តិ៍លោក Sutin Klungsang រដ្ឋមន្ត្រីក្រសួងការពារជាតិថៃបានលើកឡើងថា សមាជិកសភាចំនួន ៧ នាក់ មកពីបក្សភឿថៃ បានដាក់ញត្តិទៅកាន់លោកនាយករដ្ឋមន្ត្រីថៃ សេដ្ឋា ថាវីស៊ីន ដើម្បីឱ្យលោកធ្វើការជជែកជាមួយរាជរដ្ឋាភិបាលកម្ពុជា លើសំណើសុំបើកច្រកព្រំដែននៅក្បែរប្រាសាទព្រះវិហារឡើងវិញបន្ទាប់ពីលោកបានធ្វើដំណើរទៅកាន់ខេត្តក្បែរព្រំដែនប្រាសាទព្រះវិហារកាលពីសប្តាហ៍មុន ដែលជាកន្លែងមានវិវាទនឹងគ្នាកាលពីឆ្នាំ ២០០៨។
លោករដ្ឋមន្ត្រីក្រសួងការពារជាតិថៃរូបនេះក៏បានលើកឡើងផងដែរថា ចំនួនអ្នកទេសចរក៏ជាកត្តាមួយដែលនឹងជំរុញសកម្មភាពសេដ្ឋកិច្ចតាមព្រំដែនផងដែរ ជាពិសេសវានឹងធ្វើឱ្យកាន់តែប្រសើរឡើង នៃទំនាក់ទំនងរវាងប្រទេសទាំង ២។
លោកឧត្តមសេនីយ៍ Nut SriIn មេបញ្ជាការយោធាថៃក៏បានលើកឡើងផងដែរថា ការបើកព្រំដែនរវាងប្រទេសទាំង ២ ត្រង់ចំណុចប្រាសាទព្រះវិហារមិនធ្វើឱ្យប៉ះពាល់ដល់បញ្ហាសន្តិសុខព្រំដែនទេ ហើយការសម្រេចចិត្តរបស់រាជរដ្ឋាភិបាលកម្ពុជាគឺជាអ្វីដែលភាគីថៃត្រូវការបំផុត។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានមើលឃើញថា ការបើក ឬបិទជាសិទ្ធិផ្តាច់មុខរបស់រាជរដ្ឋាភិបាលកម្ពុជាតែមួយគត់ ពីព្រោះប្រាសាទព្រះវិហារជារបស់កម្ពុជា និងស្ថិតនៅលើដែនអធិបតេយ្យភាពរបស់កម្ពុជា។ លោកយល់ថា ការស្នើនោះវាគ្រាន់តែជាសិទ្ធិរបស់សមាជិកសភានៃបក្សនយោបាយថៃតែប៉ុណ្ណោះ។
លោកសង្កត់ធ្ងន់ថា៖ «រាជរដ្ឋាភិបាលកម្ពុជាគួរតែកុំប្រញាប់យកបញ្ហានេះមកពិភាក្សាពេក ដោយសារជាបទពិសោធន៍យើងធ្លាប់មានរឿងជាមួយថៃយូរមកហើយ។ ដូច្នេះជាទស្សនៈ ខ្ញុំមិនយល់ស្របក្នុងការបើកច្រកនេះឡើងវិញទេ ពីព្រោះស្ថិតក្នុងកាលៈទេសៈមិនសមស្របឡើយសម្រាប់កម្ពុជា»។
លោកបន្ថែមថា កម្ពុជាមានច្រកព្រំដែនច្រើនណាស់ជាមួយភាគីថៃ ដូច្នេះបើទាក់ទង និងផលប្រយោជន៍ទេសចរណ៍ ពួកគេអាចមកតាមច្រកនានាបាន ហើយបន្តមកទស្សនាប្រាសាទព្រះវិហារ នេះជាវិធីមួយដ៏ល្អហើយសុវត្ថិភាពសម្រាប់កម្ពុជា៕
វង្ស ដារាវ៉ាឌី
