មន្ត្រីអគ្គនាយកដ្ឋានអន្តោប្រវេសន៍ចូលធ្វើការនៅព្រលានយន្តហោះអន្តរជាតិសៀមរាប-អង្គរ នាពេលកន្លងទៅ។ រូបថត អគ្គនាយកដ្ឋានអន្តោប្រវេសន៍
ភ្នំពេញៈ អគ្គនាយកដ្ឋានអន្តោប្រវេសន៍នឹងធ្វើតេស្តរកសារធាតុជាតិញៀនលើមន្ត្រីក្រោមឱវាទទាំងអស់របស់ស្ថាប័ននេះចាប់ពីសប្តាហ៍ក្រោយទៅ ដោយក្នុងនោះរាល់មន្ត្រីទាំងឡាយណាដែលរកឃើញមានសារធាតុញៀន និងពាក់ព័ន្ធគ្រឿងញៀននឹងត្រូវចាត់វិធានការដោយបណ្តេញចេញពីក្របខ័ណ្ឌ និងអនុវត្តទៅតាមនីតិវិធីច្បាប់ជាធរមាន។
យោងតាមសេចក្តីប្រកាសព័ត៌មាន ដែលចុះហត្ថលេខាដោយលោក ណុប វី អគ្គនាយកអន្តោប្រវេសន៍ នៃអគ្គនាយកដ្ឋានអន្តោប្រវេសន៍ ចុះនៅថ្ងៃទី ២២ ខែធ្នូ ឆ្នាំ ២០២៣ វិធានការនេះអនុវត្តតាមការណែនាំរបស់ លោក ស សុខា រដ្ឋមន្ត្រីក្រសួងមហាផ្ទៃ។
លោក ណុប វី បានលើកឡើងតាមរយៈសេចក្តីប្រកាសដដែលថា ការអនុវត្តតាមខ្លឹមសារណែនាំ និងមានវិធានការម៉ឺងម៉ាត់ ចំពោះមន្ត្រីនគរបាលអន្តោប្រវេសន៍ ដែលមានការពាក់ព័ន្ធនឹងការប្រើប្រាស់គ្រឿងញៀននេះដើម្បីធានាភាពស្អាតស្អំរបស់មន្ត្រីក្រោមឱវាទលើបញ្ហាគ្រឿងញៀន។
លោកបញ្ជក់ថា៖ «ដូច្នេះហើយការធ្វើតេស្តគ្រឿងញៀនដល់មន្ត្រីទាំងអស់គឺស្របតាមការណែនាំរបស់ថ្នាក់លើ។ ដោយឡែក ចំពោះពេលវេលា និងទីកន្លែងច្បាស់លាស់ អគ្គនាយកដ្ឋានអន្ដោប្រវេសន៍ នឹងជម្រាបជូនតាមក្រោយ»។
លោក ទូច សុខៈ អ្នកនាំពាក្យរងក្រសួងមហាផ្ទៃ បានប្រាប់ឱ្យដឹងនៅថ្ងៃទី ២៤ ខែធ្នូថា មកទល់ពេលនេះមានមន្ត្រីក្រោមឱវាទក្រសួងមហាផ្ទៃចំនួន ១២ រូបហើយ ដែលត្រូវបានបណ្តេញចេញបន្ទាប់ពីរកឃើញមានសារធាតុញៀន ហើយតួលេខនេះ មិនច្រើនរហូតក្លាយជាក្តីកង្វល់ធ្ងន់ធ្ងរទេ។ ដោយឡែកការធ្វើតេស្តរកសារធាតុញៀនលើមន្ត្រីអន្តោប្រវេសន៍ នឹងចាប់អនុវត្តនៅសប្តាហ៍ក្រោយនេះតែម្តង។
លោកបន្ថែមថា ការធ្វើតេស្តរកសារធាតុញៀនរបស់ក្រសួងមហាផ្ទៃលើមន្ត្រីក្រោមឱវាទរបស់ខ្លួននេះគឺជាគោលនយោបាយមួយរបស់រដ្ឋមន្ត្រីក្រសួងមហាផ្ទៃនាអាណត្តិទី៧ នេះហើយការធ្វើតេស្តនឹងត្រូវបន្តធ្វើ ដើម្បីកម្ចាត់ចោលឱ្យអស់មន្ត្រីទាំងឡាយណាដែលប្រើប្រាស់គ្រឿងញៀននិងពាក់ព័ន្ធគ្រឿងញៀន។
លោក ទូច សុខៈ បញ្ជាក់ថា៖ «យើងធ្វើប្រកបដោយការទទួលខុសត្រូវ មានការប្តេជ្ញាចិត្តខ្ពស់ និងលទ្ធផល ហើយយន្តការធ្វើតេស្តរកសារធាតុញៀនលើមន្ត្រីក្រសួងមហាផ្ទៃនេះក៏ស្របតាមពាក្យស្លោករបស់សម្តេចនាយករដ្ឋមន្ត្រី «បោសសម្អាតផ្ទះយើង»។ ក្នុងន័យនេះ ប្រសិនបើគ្មានភាពស្អាតស្អំលើបញ្ហាគ្រឿងញៀនសម្រាប់មន្ត្រីអនុវត្តច្បាប់ នោះមិនមែនជាគំរូល្អសម្រាប់មហាជននិងយុវជននោះទេ។ ជាពិសេសនោះមានការលំបាកដល់ការអនុវត្តច្បាប់និងការបង្ក្រាបបទល្មើសគ្រឿងញៀន»។
សូមរំឭកផងដែរថា នៅក្នុងពិធីបិទសន្និបាតបូកសរុបការងារ ឆ្នាំ ២០២៣ និងលើកទិសដៅការងារ ឆ្នាំ ២០២៤ របស់ក្រសួងបរិស្ថាន នារសៀលថ្ងៃទី ២១ ខែធ្នូ លោកនាយករដ្ឋមន្ត្រី ហ៊ុន ម៉ាណែត បានសង្កត់ធ្ងន់ថា ក្រសួងមហាផ្ទៃក្រសួងការពារជាតិ និងអគ្គស្នងការដ្ឋាននគរបាលជាតិ ត្រូវចាត់វិធានលើមន្ត្រីក្រោមឱវាទណាដែលរកឃើញ និងធ្វើការពាក់ព័ន្ធនឹងគ្រឿងញៀនដោយត្រូវតែបណ្តេញចេញពីក្របខ័ណ្ឌ និងវិធានការច្បាប់នានាដាច់ខាត។
លោក ហ៊ុន ម៉ាណែត បញ្ជាក់ថា៖ «ប្រសិនបើយើងមិនធ្វើបន្សុទ្ធលើកងកម្លាំងប្រដាប់អាវុធយើងទេនោះ វានឹងយ៉ាប់ហើយ។ នៅសាលាទាហានអីក៏ដោយឱ្យតែមានត្រូវតែបណ្តេញចេញ មិនថាគ្រូមិនថាអ្វីក៏ដោយ។ រដ្ឋាភិបាលអាណត្តិនេះបានដាក់អភិក្រមទាំងមូលនេះតែម្តង គឺចាប់ផ្តើមពីកងកម្លាំងប្រដាប់អាវុធនេះតែម្តង អ្នកដែលប្រើប្រាស់គ្រឿងញៀននឹងត្រូវបណ្តេញចេញ»៕
វង្ស ដារាវ៉ាឌី
