សកម្មភាព«រត់ដើម្បីកុមារកម្ពុជា» កាលពីថ្ងៃទី២៣ ធ្នូ ។រូបថត CSX
ភ្នំពេញ : ផ្សារមូលបត្រកម្ពុជា (CSX) សហការជាមួយក្រុមហ៊ុន ប៉េង ហួត គ្រុប បានរៀបចំដោយជោគជ័យនូវព្រឹត្តិការណ៍ CSX FUN RUN 2023 កាលពីថ្ងៃសៅរ៍សប្ដាហ៍មុន ក្រោមប្រធានបទ «រត់ដើម្បីកុមារកម្ពុជា»។
ព្រឹត្តិការណ៍នេះជាការបោះជំហានយ៉ាងសំខាន់នៅក្នុងយុទ្ធនាការប្រចាំឆ្នាំរបស់ CSX ស្ដីពីបរិស្ថាន សង្គម និងអភិបាលកិច្ច (ESG) ដោយបានទាក់ទាញអ្នកចូលរួមជាង៧០០នាក់មកពីវិស័យផ្សេងៗ រួមទាំងមន្ត្រីរដ្ឋាភិបាល អ្នកដឹកនាំធុរកិច្ច និងអ្នកវិនិយោគអន្តរជាតិ។
ការជួបជុំនេះមានគោលបំណងជំរុញគោលបំណងសំខាន់ៗចំនួន៤ ដូចជា ការលើកកម្ពស់កីឡា និងសប្បុរសធម៌ ការរៃអង្គាសថវិកាសម្រាប់មូលនិធិគន្ធបុប្ផា ការបង្កើតឱកាសបណ្តាញ និងផ្សព្វផ្សាយព័ត៌មានអំពីទីផ្សារមូលបត្រ។
ពិធីនេះមានការចូលរួមពីសំណាក់ លោកស៊ូ សុជាតិ អគ្គនាយកនៃនិយតករមូលបត្រកម្ពុជា លោកហុង សុហួរ អគ្គនាយក CSX និងលោក គី សិទ្ធី តំណាងឱ្យមូលនិធិគន្ធបុប្ផាកម្ពុជា។
លោក សុហួរ ដែលបានធ្វើជាអធិបតីក្នុងកម្មវិធី Fun Run 2023 នៅប៉េងហួតបឹងស្នោបានថ្លែងនៅថ្ងៃទី២៣ ខែធ្នូថា៖
«ខ្ញុំជឿជាក់ថា អ្នកដែលចូលរួមនៅទីនេះសុទ្ធសឹងតែជាអ្នកស្រឡាញ់កីឡា ស្រឡាញ់សុខភាពនិង មានបេះដូងសប្បុរសធម៌»។
លោកបានបន្ដថា អ្នកចូលរួមសុទ្ធតែមានចំណែកក្នុងការជួយផ្លាស់ប្តូរជីវិតកុមារកម្ពុជាជាច្រើនរូបដែលកំពុងតែជួបប្រទះនូវបញ្ហាសុខភាពផ្សេងៗ ក៏ដូចជាមានចំណែកជួយធ្វើឱ្យមានការផ្លាស់ប្តូរនៅក្នុងសេដ្ឋកិច្ចសង្គមកម្ពុជាឱ្យកាន់តែមានភាពប្រសើរឡើងពីព្រោះការកសាងអនាគតរបស់ប្រទេសជាតិត្រូវការចាំបាច់នូវធនធានដែលមានសមត្ថភាព និងសុខភាពល្អ។
លោក សុហួរ បានពន្យល់ថា ក្រុមហ៊ុនផ្សារមូលបត្រនិយាយដោយសាមញ្ញ ទីផ្សារភាគហ៊ុន គឺជាគ្រឹះស្ថានសាធារណៈ។ លោកបានពន្យល់លម្អិតអំពីតួនាទី២របស់ខ្លួន ទី១-ការជួយក្រុមហ៊ុននានាក្នុងការបង្កើនដើមទុនពីសាធារណជនសម្រាប់ការពង្រីកអាជីវកម្ម និងទី២-ការជួយសាធារណជនឱ្យទទួលបានប្រាក់ចំណូលបន្ថែមតាមរយៈការវិនិយោគភាគហ៊ុន។
លោកបានបន្ថែមថា តួនាទីដ៏សំខាន់របស់ផ្សារហ៊ុនក្នុងការគាំទ្រនិងបំផុសចលនាបរិស្ថាន សង្គម និងអភិបាលកិច្ច (ESG) ដើម្បីជំរុញការអភិវឌ្ឍប្រកបដោយចីរភាព។
លោក សុហួរ បានថ្លែងថា៖ «ការលេងកីឡាគឺជាការវិនិយោគលើសុខភាព ការបរិច្ចាគគឺជាការវិនិយោគលើការកែប្រែសង្គមឱ្យល្អប្រសើរ ឯការទិញភាគហ៊ុន គឺជាការវិនិយោគដើម្បីសេរីភាពហិរញ្ញវត្ថុនៅពេលអនាគត»។
សមិទ្ធផលដ៏គួរឱ្យសរសើរនៃព្រឹត្តិការណ៍ CSX FUN RUN 2023 នេះគឺការប្រមូលថវិកាចំនួន ៧ ៧៧៧ ដុល្លារ ដែលនឹងបរិច្ចាគដល់មូលនិធិគន្ធបុប្ផា ជាសក្ខីភាពបង្ហាញពីទឹកចិត្តសប្បុរស និងការប្តេជ្ញាចិត្តរបស់អ្នកចូលរួម។
អ្នកចូលរួមក៏ទទួលបានកាដូ រួមទាំងរង្វាន់ និងវត្ថុអនុស្សាវរីយ៍ចំនួន៥៥រង្វាន់ និងឱកាសបើកគណនីជួញដូរភាគហ៊ុនដោយឥតគិតថ្លៃថែមទៀត។
បន្ថែមពីលើនេះ លោក ស៊ូ សុជាតិ បានកត់សម្គាល់ពីការរីកចម្រើននៃទីផ្សារមូលបត្រកម្ពុជាដែលប្រៀបធៀបនឹងព្រឹត្ដិការណ៍រត់ម៉ារ៉ាតុងដើម្បីសម្បុរសធម៌នេះ។
លោកបានបញ្ជាក់ថា៖ «ទីផ្សារមូលបត្រកម្ពុជាបាននិងកំពុងមានភាពប្រសើរឡើងគួរឱ្យកត់សម្គាល់ ពោលគឺបានផ្លាស់ប្តូរពីការបោះជំហានដើរបន្តិចម្ដងទៅជាការចាប់ផ្តើមរត់ដែលមានភាពស្រដៀងគ្នាទៅនឹងព្រឹត្តិការណ៍ម៉ារ៉ាតុងនេះផងដែរ ហើយនិយតករមូលបត្រកម្ពុជា នឹងបន្តគាំទ្រ ផ.ម.ក ដើម្បីពង្រីកយុទ្ធនាការស្ទួយបរិស្ថាន និងសង្គមក៏ដូចជាបង្កើតការយល់ដឹងជាសាធារណៈចំពោះវិស័យមូលបត្រនៅកម្ពុជាផងដែរ»។
CSX Fun Run 2023 ជាព្រឹត្ដិការណ៍កីឡាសម្បុរសធម៌ដែលអាជីវកម្មសប្បុរសធម៌និងសហគមន៍អាចរួមគ្នាសម្រាប់បុព្វហេតុកាន់តែច្រើនដោយបង្ហាញពីឥទ្ធិពលនៃកិច្ចខិតខំប្រឹងប្រែងរួមគ្នាក្នុងការធ្វើឱ្យមានភាពខុសគ្នាជាវិជ្ជមានក្នុងសង្គម៕
