ក្រុមកីឡាករ ដែលត្រូវប្រកួតនៅតាកែវនាថ្ងៃទី៣០ ធ្នូ ។ រូបថត KKIF
ភ្នំពេញៈកីឡាករជើងខ្លាំងរបស់កម្ពុជា សុខ ធី ត្រូវបានដាក់ឱ្យប្រកួតដណ្តើមខ្សែក្រវាត់ជាមួយអ្នកប្រដាល់របស់ចិនQing Fuhengនៅក្នុងព្រឹត្តិការណ៍ Cambodia Kun Khmer KKIF ដែលនឹងធ្វើនៅសួនច្បារមាត់បឹងខេត្តតាកែវ សង្កាត់រកាក្នុង ក្រុងដូនកែវ ខេត្តតាកែវ នាព្រលប់ថ្ងៃទី៣០ ខែធ្នូ ចំណែក ចាន់ ប៊ុនហឿន ដែលទើបឈ្នះបានខ្សែក្រវាត់ថ្មីថ្មោង ក៏បានបង្ហាញពីទឹកចិត្តមោះមុត ក្នុងការប្រកួតជាមួយម្ចាស់ខ្សែក្រវាត់មកពីប្រទេសថៃ KritsanaSrisangក្នុងពេលនោះដែរ។
សម្រាប់ការបង្ហាញវត្តមាននៅលើទឹកដីដ៏ចំណាស់ជាងគេរបស់ប្រទេសកម្ពុជានេះ សុខ ធី ត្រូវដាក់ឱ្យប្រកួតដណ្តើមខ្សែក្រវាត់ក្នុងប្រភេទទម្ងន់៦០គីឡូក្រាមជាមួយកីឡាករចិន Qing Fuheng ហើយនេះជាខ្សែក្រវាត់ទី២ ដែលអ្នករៀបចំកម្មវិធី Cambodia Kun Khmer KKIF ដាក់ឱ្យប្រកួតដណ្តើម បន្ទាប់ពីបានដាក់ខ្សែក្រវាត់ទី១ ឱ្យប្រកួតដណ្តើមនៅមាត់ទន្លេក្រុងតាខ្មៅ ខេត្តកណ្តាលកាលពីថ្ងៃទី១៦ ខែធ្នូ ហើយ ចាន់ ប៊ុនហឿន ជាអ្នកឈ្នះ បន្ទាប់ពីរូបគេបានបុកកែងឆ្វេងចូលមុខកីឡាករថៃ SakunthaiAphichet បណ្តាលឱ្យសន្លប់ធំត្រឹមទឹកទី១។
ចំពោះការប្រកួតដណ្តើមខ្សែក្រវាត់លើកនេះ លោក ស្រ៊ឺ ស្រេង អ្នកផ្គូផ្គងកីឡាករក្នុងកម្មវិធី Cambodia Kun Khmer KKIF បានប្រាប់កាលពីរសៀលថ្ងៃទី២៧ ខែធ្នូថា៖ «ជាធម្មតាកីឡាករបរទេសដែលយើងបាននាំយកមកប្រកួត គឺយើងបានផ្ចិតផ្ចង់យកអ្នកមានសមត្ថភាពល្អៗ ចំណែកកីឡាករចិន ដែលត្រូវប្រកួតដណ្តើមខ្សែក្រវាត់ជាមួយ សុខ ធី គឺគាត់មិនធ្លាប់ដណ្តើមបានខ្សែក្រវាត់ទេ ប៉ុន្តែគាត់ជាជើងឯកម្នាក់នៅចិន ដែលមានសមត្ថភាពល្អ ហើយក៏ធ្លាប់បានមកប្រកួតនៅថៃច្រើនលើកផងដែរ ហេតុនេះការប្រកួតនេះអាចនឹងមានភាពតានតឹង និងល្អមើល»។
ជាមួយគ្នានេះ ម្ចាស់ខ្សែក្រវាត់ទម្ងន់ ៦៥ គីឡូក្រាមរបស់ Cambodia Kun Khmer KKIF ចាន់ ប៊ុនហឿន បាននិងកំពុងបង្ហាញការអន្ទះសាខ្លាំងក្នុងការប្រកួតជាមួយ KritsanaSrisang។ បើទោះបីជាកីឡាករថៃម្នាក់នេះ មានសមត្ថភាពខ្លាំង និងមានជំនាញវាយដៃទទេ ហើយជាម្ចាស់ខ្សែក្រវាត់BKFC របស់ថៃក្ដីប៉ុន្តែ ប៊ុនហឿន មិនបានបង្ហាញការខ្លាចរអានោះទេ ចំពោះការប្រកួតលើកនេះ។
កីឡាករ ចាន់ ប៊ុនហឿន បាននិយាយថា៖ «សម្រាប់ខ្ញុំដូចជាអត់មានភ័យឬបារម្ភអ្វីនោះទេ គឺបន់ឱ្យតែដល់ថ្ងៃប្រកួត។ បើទោះបីជាគេមានខ្សែក្រវាត់ ២ ទៅ ៣ ខ្សែ ហើយជាកីឡាករល្អលំដាប់អ្វីក៏ដោយ គឺឱ្យតែគីឡូប៉ុនគ្នា ខ្ញុំវ៉ៃជូនឱ្យទាំងអស់ ព្រោះការប្រកួតមួយច្រកម្នាក់ទេ! បើមិនគេ គឺយើង»។
ប៊ុនហឿន បានបន្ថែមថា៖ «បើយើងខ្លាច យើងភ័យ គ្រាន់តែគេមានខ្សែក្រវាត់ ២ ទៅ ៣ គឺមិនចាំបាច់ធ្វើជាអ្នកប្រដាល់ទេ ហើយខ្ញុំពេលនេះក៏មិនដូចមុនដែរ។ខ្ញុំបានហ្វឹកហាត់ដិតដល់ អ៊ីចឹងបើគ្មានករណីភ្លាត់ស្នៀតកើតឡើងទេ ខ្ញុំវ៉ៃឱ្យបងប្អូនមើល ហើយការជួបគេល្អបែបនេះ ក៏ជារឿងល្អមួយដែរ ដើម្បីយើងអាចដឹងពីសមត្ថភាពពិតរបស់យើងថា វាឈានទៅដល់កម្រិតណាឱ្យប្រាកដ ព្រោះបើវ៉ៃតែជាមួយអ្នកធម្មតាៗ យើងនៅតែមិនដឹងសមត្ថភាពពិតរបស់ខ្លួនឯងដដែលហ្នឹង»។
ទន្ទឹមនឹងនេះ កីឡាករលំដាប់ជើងខ្លាំងរបស់កម្ពុជាចំនួន ៦ នាក់ទៀត ក៏ត្រូវបានដាក់ឱ្យប្រកួតមិត្តភាពអន្តរជាតិ ក្នុងកម្មវិធី Cambodia Kun Khmer KKIF នៅទីរួមខេត្តតាកែវនៅយប់ថ្ងៃសៅរ៍នោះដែរ ក្នុងនោះអ្នកលេងកណ្តាប់ដៃឆ្វេង រឿង សោភ័ណ្ឌ ត្រូវជួបកីឡាកររបស់ម៉ារ៉ុក Oussama El Kouche ក្នុងទម្ងន់ ៦៩ គីឡូក្រាម រីឯ ធន់ រិទ្ធី ត្រូវប៉ះអ៊ីរ៉ង់ Mohammad Rahmani ក្នុងទម្ងន់ ៧៣ គីឡូក្រាម។
ចំណែកម្ចាស់មេដាយមាសស៊ីហ្គេម ឃីម បូរ៉ា ត្រូវប្រកួតជាមួយកីឡាករឡាវ Ananthasak ក្នុងទម្ងន់ ៦០ គីឡូក្រាម ហើយជើងថ្មីកំពុងល្បីឈ្មោះ សំអឿន សុផា ត្រូវជួបអ៊ីរ៉ង់ Seyedshaho ក្នុងទម្ងន់ ៦៧ គីឡូក្រាម រីឯ ឃន សុនី ត្រូវប៉ះកីឡាកររបស់កាមេរូន Mbang Hen Eric ក្នុងទម្ងន់ ៦៣,៥ គីឡូក្រាម ខណៈនៅ វ៉ាន់ថង ត្រូវតទល់នឹងកីឡាករ ArashShafaei ក្នុងទម្ងន់៥៤ គីឡូក្រាម ដោយកីឡាករបរទេសទាំង២នេះ បានហ្វឹកហាត់នៅក្លិប Kun Khmer International Fight Gym (KKIF) របស់លោក ស្រី ចាន់ថន៕
