ពលរដ្ឋផ្តិតមេដៃជាមួយអាជ្ញាធរកន្លងមក។ រូបថត អាជ្ញាធរជាតិអប្សរា
សៀមរាបៈ ក្រុមការងារសណ្តាប់ធ្នាប់នៃអាជ្ញាធរជាតិអប្សរាបានសម្រេចផ្អាកជាបណ្តោះអាសន្នក្នុងការរុះរើសំណង់«ខុសច្បាប់»ដែលស្ថិតនៅភូមិសណ្ដាន់ សង្កាត់ទឹកវិល ក្រុងសៀមរាប ក្រោយពីមានការតវ៉ា ខណៈអាជ្ញាធរ នឹងបន្តខិតខំដោះស្រាយដោយសន្តិវិធិ និងស្នើឱ្យពលរដ្ឋរុះរើដោយស្ម័គ្រចិត្តចៀសវាងប៉ះពាល់ដល់តម្លៃវប្បធម៌នៅបរិវេណអង្គរវត្ត។
សូមរំឭកថា កាលពីពេលថ្មីៗនេះ ក្រុមការងារសណ្តាប់ធ្នាប់នៃអាជ្ញាធរជាតិអប្សរា បានចុះរុះរើសំណង់«ខុសច្បាប់»ដែលបានសាងសង់នៅតំបន់អង្គរនៅទីតាំងខាងលើ ក្រោយពីពលរដ្ឋមួយចំនួនបានផ្តិតមេដៃ និងស្ម័គ្រចិត្តរុះរើសំណង់។ ប៉ុន្តែលុះដល់ថ្ងៃកំណត់ ពលរដ្ឋមិនព្រមរុះរើសំណង់ និងបានលើកគ្នាមកតវ៉ាចំពោះវិធានការរបស់អាជ្ញាធរមានសមត្ថកិច្ច។
យោងសេចក្តីបំភ្លឺព័ត៌មានរបស់អាជ្ញាធរជាតិអប្សរា ចុះថ្ងៃទី២៧ ខែធ្នូ ឆ្នាំ២០២៣ បានឱ្យដឹងថា សំណង់ដែលជាកម្មវត្ថុនៃការរុះរើ គឺជាប្រភេទសំណង់មិនស្របច្បាប់ដែលសាងសង់គ្មានការអនុញ្ញាត កើតឡើងតាំងពីខែឧសភា ឆ្នាំ២០២៣ មកម្ល៉េះ។ អាជ្ញាធរជាតិអប្សរាបញ្ជាក់ថា៖«វិធានការទប់ស្កាត់ ក្រុមការងារបានប្រគល់លិខិតជូនដំណឹងតម្រូវឱ្យម្ចាស់រុះរើចេញវិញដោយខ្លួនឯង ក្នុងនោះបានទុកពេលវេលាចំនួន៣ថ្ងៃ គិតចាប់ពីថ្ងៃទី ២៥ដល់ទី២៧ ខែឧសភា ឆ្នាំ២០២៣ ជាកំហិត។ កិច្ចការនេះមានលោកមេភូមិសណ្តាន់ បានដឹងឮផងដែរ»។
បើតាមសេចក្តីបំភ្លឺដដែលនេះ ក្រោយពីមានការស្នើសុំពីម្ចាស់សំណង់ខាងលើ ថានឹងរុះរើសំណង់ទាំងនេះដោយខ្លួនឯង ក្រុមការងារទប់ស្កាត់សំណង់មិនស្របច្បាប់បានឱ្យម្ចាស់សំណង់ចុះកិច្ចសន្យារុះរើដោយស្ម័គ្រចិត្ត ដោយទុកពេលវេលា ចំនួន៣ថ្ងៃ គិតចាប់ពីថ្ងៃទី ១០ដល់ថ្ងៃទី១២ ខែវិច្ឆិកា ឆ្នាំ២០២៣។ ក្រោយមកទៀត អាជ្ញាធរជាតិអប្សរាបានទុកពេលវេលាសមស្រប សម្រាប់ម្ចាស់សំណង់ធ្វើការរុះរើដោយខ្លួនឯងអស់រយៈពេលជាច្រើនខែមកហើយ រហូតដល់មានចំណាត់ការតាមផ្លូវច្បាប់។
អ្នកនាំពាក្យអាជ្ញាធរជាតិអប្សរាលោក ឡុង កុសល បានថ្លែងនៅថ្ងៃទី២៧ ខែធ្នូថា សំណង់មិនស្របច្បាប់កើតឡើងជាហូរហែ ដោយសារតែប្រជាជនមួយចំនួនរំលោភលើការសាងសង់ដោយគ្មានការអនុញ្ញាត។
លោកបានប្រាប់ថា៖«អ៊ីចឹងហើយ! បានជាយើងត្រូវការទប់ស្កាត់ ដោយសារវាមានផលប៉ះពាល់ទាំងតម្លៃខាងផ្នែកវប្បធម៌ និងសង្គម ព្រោះសំណង់ខុសច្បាប់ដែលអាជ្ញាធរចុះរុះរើនោះស្ថិតនៅតំបន់រមណីយដ្ឋានអង្គរ»។
យ៉ាងណាក្តីលោក ឡុង កុសល បានបញ្ជាក់ថា ដោយសារតែមានការតវ៉ាពីប្រជាពលរដ្ឋ អាជ្ញាធរក៏បានសម្រេចផ្អាករុះរើសំណង់ជាបណ្តោះអាសន្នសិន ដោយប្រកាន់ខ្ជាប់នូវអាក្បបកិរិយាទន់ភ្លន់ក្នុងការដោះស្រាយការងារជាមួយប្រជាពលរដ្ឋ ប៉ុន្តែសំណង់របស់ពលរដ្ឋទាំងនោះ នៅតែជាសំណង់មិនស្របច្បាប់ ហើយអាជ្ញាធរជាតិអប្សរានឹងនៅតែសហការជាមួយពលរដ្ឋ អាជ្ញាធរមូលដ្ឋាន ដើម្បីឱ្យគាត់ធ្វើការរុះរើចេញ។
លោកបន្តថា៖«ការពិតពួកគាត់បានស្ម័គ្រចិត្តរុះរើហើយ ក៏ប៉ុន្តែយើងមិនដឹងថា មានអ្វីនៅពីក្រោយនោះទេ ក្រោយពីគាត់បានផ្តិតមេដៃធ្វើការស្ម័គ្រចិត្តរុះរើសំណង់ដោយខ្លួនឯង តែគាត់បែរជាប្រកាន់ជំហរមិនរុះរើចេញវិញ ហើយមានការកៀរគរអ្នកតវ៉ាទៀតផង»។
សូមជម្រាបថា កាលពីថ្ងៃទី២៦ ខែធ្នូ ឆ្នាំ ២០២៣ មានការផ្សព្វផ្សាយព័ត៌មាននៅលើបណ្តាញសង្គមជុំវិញចំណាត់ការរបស់អាជ្ញាធរចុះរុះរើសំណង់នៅភូមិសណ្ដាន់ សង្កាត់ទឹកវិល ក្រុងសៀមរាប ដោយក្នុងការផ្សព្វផ្សាយនោះបានចោទថា អាជ្ញាធរចុះរុះរើសំណង់ដោយបង្ខំ។ ក្នុងវីដេអូដែលត្រូវបានផ្សព្វផ្សាយអំឡុងពេលអាជ្ញាធរចុះអនុវត្តច្បាប់ មានស្រ្តីម្នាក់បានយំសោក និងស្នើសុំអាជ្ញាធរកុំរុះរើផ្ទះរបស់ខ្លួន។
បន្ទាប់ពីមានការផ្សព្វផ្សាយនេះអាជ្ញាធរជាតិអប្សរាបានបំភ្លឺជូនសាធារណជនថា ការផ្សព្វផ្សាយទាំងនេះគឺបានផ្ទុយពីការពិតជាក់ស្តែង បង្កើតឱ្យមានការយល់ច្រឡំពីសាធារណជន មកលើអាជ្ញាធរជាតិអប្សរា ខណៈចំណាត់ការរបស់អាជ្ញាធរនាពេលនោះ គឺចុះរុះរើសំណង់ដែលមកតាំងលំនៅមិនស្របច្បាប់។
សេចក្តីបំភ្លឺដដែលចាត់ទុកថា៖«ទង្វើរបស់ជននេះ ពិតជាមានបំណងបង្កាច់បង្ខូចកិត្តិយសមន្ត្រីអាជ្ញាធរជាតិអប្សរា ក្នុងសកម្មភាពទប់ស្កាត់ សំណង់មិនស្របច្បាប់ ដើម្បីអភិរក្សរមណីយដ្ឋានអង្គរ មរតកដូនតាព្រលឹងជាតិខ្មែរ។ សកម្មភាពនេះពិតណាស់ ធ្វើឡើងដើម្បីប្រយោជន៍បុគ្គលខ្លួនឯងផ្ទាល់ និងបានធ្វើឱ្យប៉ះពាល់ផងដែរដល់សន្តិសុខ និងសណ្តាប់ធ្នាប់សាធារណៈ»។
ចំណែកបុគ្គលម្នាក់ដែលបានយំសោកក្នុងព័ត៌មានផ្សព្វផ្សាយតាមបណ្តាញសង្គមនោះ មិនមែនជាម្ចាស់ផ្ទះទាំងនោះឡើយ។
ជុំវិញការផ្សព្វផ្សាយព័ត៌មាននេះដែរលោក ឡុង កុសល ក៏បានប្រាប់ដែរថា៖«ចំពោះសារព័ត៌មានមួយចំនួនដែលធ្វើការផ្សព្វផ្សាយ ដោយពុំមានការបញ្ជាក់ច្បាស់ពីអាជ្ញាធរមានសមត្ថកិច្ច ខ្ញុំយល់ថា ជាការផ្តល់ព័ត៌មានមិនឆ្លុះបញ្ចាំងពីទិដ្ឋភាពជាក់ស្តែងនៅក្នុងសង្គម ប៉ុន្តែជាការបង្កឱ្យមានភាពញុះញង់ បង្កើតទៅជាជម្លោះដែលធ្វើឱ្យសង្គមមានភាពវឹកវរ»។
ជាមួយគ្នានេះ លោកបានស្នើឱ្យអ្នកសារព័ត៌មានមួយចំនួន មុននឹងធ្វើការផ្សព្វផ្សាយព័ត៌មាន គួរសិក្សា ស្រាវជ្រាវរកប្រភពឱ្យច្បាស់លាស់ និងសួរបញ្ជាក់បន្ថែមពីអាជ្ញាធរមានសមត្ថកិច្ចឱ្យបានត្រឹមត្រូវដែរ៕
