ក្រសួងអប់រំ រៀបចំវេទិការថ្នាក់ជាតិ ដើម្បីកំណត់បញ្ហាប្រឈមសំដៅលើកកម្ពស់វិស័យអប់រំប្រកបដោយបរិយាបន្ន។ ក្រសួងអប់រំ
ក្រសួងអប់រំ យុវជន និងកីឡា រៀបចំវេទិកាថ្នាក់ជាតិលើកទី១១ ស្តីអំពីការអប់រំបរិយាបន្ន ក្នុងគោលដៅកំណត់បញ្ហាប្រឈមពីផ្នែកពាក់ព័ន្ធក្នុងវិស័យអប់រំ ក៏ដូចជាកៀរគរធនធានសម្រាប់អនុវត្តគោលនយោបាយពង្រឹងគុណភាពអប់រំឱ្យកាន់តែប្រសើរនៅថ្នាក់ជាតិ និងថ្នាក់ក្រោមជាតិ ដើម្បីធានាការអប់រំប្រកបដោយគុណភាព សមធម៌ និងបរិយាបន្ន។
វេទិកាអប់រំបរិយាបន្នលើកទី១១ នេះធ្វើឡើងនៅមន្ទីរអប់រំ យុវជន និងកីឡាខេត្តកំពត នៅថ្ងៃទី២៩ ខែធ្នូ ឆ្នាំ២០២៣ ក្រោមការដឹកនាំដោយលោក សេរី ជំនះ រដ្ឋលេខាធិការក្រសួងអប់រំ និងជាតំណាងលោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ ក្រោមការរៀបចំដោយនាយកដ្ឋានអប់រំពិសេស សហការជាមួយអង្គការដៃគូអភិវឌ្ឍន៍នានា។
ក្រសួងអប់រំបានឱ្យដឹងថា វេទិកានេះធ្វើឡើងក្រោមប្រធានបទ «កៀរគរធនធាន និងពង្រឹងយន្តការអប់រំពីថ្នាក់ជាតិដល់ថ្នាក់ក្រោមជាតិ ដើម្បីបរិវត្តកម្មអប់រំប្រកបដោយបរិយាបន្ន» ដែលធ្វើឡើងតាមបែបចម្រុះពោលគឺមានសិក្ខាកាមចូលរួមដោយផ្ទាល់ និងតាមរយៈប្រព័ន្ធវីដេអូអនឡាញ ពីគ្រប់បណ្តារាជធានី-ខេត្ត ប្រមាណជាង ២០០រូប។
វេទិការថ្នាក់ជាតិនេះ ធ្វើឡើងក្នុងគោលដៅកំណត់បញ្ហាប្រឈមរបស់ផ្នែកពាក់ព័ន្ធក្នុងវិស័យអប់រំ តួយ៉ាង គ្រូបង្រៀន គណៈគ្រប់គ្រងសាលារៀន ការិយាល័យអប់រំ មន្ទីរអប់រំ ក្រសួងអប់រំ សហគមន៍ និងឪពុកម្តាយ អាណាព្យាបាល ដើម្បីផ្តល់បរិយាកាសអប់រំមួយប្រកបដោយគុណភាព និងដោយបរិយាបន្ន ទាំងសម្រាប់សិស្សមានពិការភាពផង។
ជាពិសេសឈ្វេងយល់ពីយន្តការក្នុងការកៀរគរធនធានសម្រាប់អនុវត្តគោលនយោបាយ និងផែនការសកម្មភាពទាំងកម្រិតថ្នាក់ជាតិ និងថ្នាក់ក្រោមជាតិ។
ថ្លែងក្នុងវេទិកានោះលោក សេរី ជំនះ មានប្រសាសន៍ថា ក្រោមកិច្ចសហការល្អ និងស្មារតីទទួលខុសត្រូវខ្ពស់របស់ភាគីពាក់ព័ន្ធបានជួយដោះស្រាយការលំបាក និងសេចក្តីត្រូវការពិសេសរបស់កុមារ សិស្ស និស្សិតក្នុងការសិក្សារៀនសូត្រនាំឱ្យមានការរីកចម្រើនគួរឱ្យកត់សម្គាល់ក្នុងការអនុវត្តការអប់រំបរិយាបន្ន។
លោកគូសបញ្ជាក់ថា៖«រដ្ឋាភិបាលមិនទាន់អនុវត្តបានពេញលេញនៅឡើយទេ ក្នុងការឆ្លើយតបចំពោះគោលដៅទី១ របស់ខ្លួនលើការធានាការអប់រំប្រកបដោយគុណភាព សមធម៌ និងបរិយាបន្ន។
ទោះជាយ៉ាងណា រដ្ឋាភិបាលជាពិសេសក្រសួងអប់រំត្រូវពង្រឹងយន្តការ ដើម្បីពង្រឹងការអនុត្តគោលនយោបាយពីថ្នាក់ជាតិដល់ថ្នាក់ក្រោមជាតិ និងពង្រឹងយន្តការអប់រំពីថ្នាក់ជាតិទៅថ្នាក់ក្រោមជាតិដូចគ្នា ដើម្បីបរិវត្តកម្មអប់រំដោយបរិយាបន្ន»។
ជុំវិញបញ្ហានេះ លោក ឈត ប៊ុនថង មន្ត្រីផ្នែកស្រាវជ្រាវផ្នែកទំនាក់ទំនង អប់រំ ទេសចរណ៍ និងវប្បធម៌ នៃរាជបណ្ឌិត្យសភាកម្ពុជា បានចាត់ទុកវេទិកាថ្នាក់ជាតិនេះ ជាវេទិកាសំខាន់ដែលស្របនឹងយុទ្ធសាស្ត្រជាតិក្នុងការជំរុញការកសាងធនធានមនុស្ស ក្នុងគោលដៅសម្រាំងគុណភាពធនធានមនុស្សដែលបានដុសខាត់ចេញពីប្រព័ន្ធអប់រំជាតិមានគុណភាព សីលធម៌ ជំនាញរឹង និងទន់ ផ្អែកតាមយន្តការធានាការផ្តល់ការអប់រំដោយសមធម៌ មិនគិតមាន ក្រ ទាំងជនពិកា នៅទូទាំងប្រទេស។
លោកបន្តថា៖«នេះជាវេទិកាសំខាន់ដើម្បីដាស់ស្មារតីដល់តួអង្គពាក់ព័ន្ធទាំងអស់ និងជំរុញស្តង់ដានៃការអប់រំមួយដែលអាចរួមចំណែកសម្រេចចក្ខុវិស័យរបស់រដ្ឋាភិបាលដែលចង់ប្រែក្លាយកម្ពុជាទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលកម្រិតខ្ពស់នៅឆ្នាំ២០៥០»។
សម្រាប់លោក ឈត ប៊ុនថង ឧបសគ្គចម្បងៗដែលរារាំងដល់ការសម្រេចផែនការ ការអប់រំបរិយាបន្ននេះ គឺទី១ ពាក់ព័ន្ធនឹងការមិនទាន់អាចបញ្ជ្រាបស៊ីជម្រៅដល់តួអង្គពាក់ព័ន្ធពីផែនការ និងយុទ្ធសាស្ត្រល្អរបស់រដ្ឋាភិបាល។ ទី២ កម្ពុជានៅមានកម្រិតធនធានមនុស្សវិស័យអប់រំដើម្បីអនុវត្តផែនការខ្លួននិង ទី៣ កម្ពុជានៅមានកម្រិតលើសម្ភារអប់រំ និងហិរញ្ញវត្ថុ បើទោះបីមានធនធានមនុស្ស និងរចនាសម្ព័ន្ធដឹកនាំល្អក្តី។
ជាមួយគ្នានេះ លោកស្នើឱ្យរដ្ឋាភិបាល ជាពិសេសក្រសួងអប់រំ យុវជន និងកីឡា ព្យាយាមពិនិត្យយន្តការ និងត្រួតពិនិត្យដល់សកម្មភាពនៃការអនុវត្តជាប្រចាំ ដើម្បីធានាដល់ការសម្រេចចក្ខុវិស័យរបស់ខ្លួនចំពោះការពង្រឹងគុណភាពវិស័យអប់រំប្រកបដោយគុណភាព សមធម៌ និងបរិយាបន្ននេះ៕
