ទិដ្ឋភាពថ្ងៃប្រារព្ធខួប ២៥ ឆ្នាំនៅវិមានឈ្នះឈ្នះ។ ហុង មិនា
ភ្នំពេញៈ លោក ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្របានសរសេរថា៖«នយោបាយ ឈ្នះឈ្នះ គឺជាយុទ្ធសាស្ត្រគោលការណ៍ទាំងឡាយណា ដែលបាននាំមកនូវការធានា ដល់សន្តិសុខសង្គម ការបង្រួបបង្រួមជាតិ ឯកភាពជាតិ សនិ្តភាព ការធានាដល់បូរណភាពដែនដី អធិបតេយ្យ និងការអភិវឌ្ឍសេដ្ឋកិច្ចនយោបាយសង្គមប្រកបដោយចីរភាព»។
លោកអតីតនាយករដ្ឋមន្ត្រី បានថ្លែងសារបែបនេះ ដើម្បីអបអរសាទរខួប ២៥ ឆ្នាំ នៃការបញ្ចប់សង្គ្រាមនៅកម្ពុជា ក្រោមនយោបាយឈ្នះឈ្នះ តាមរយៈបណ្តាញសង្គមហ្វេសប៊ុករបស់លោកកាលពីថ្ងៃទី ២៩ ធ្នូ។
ពិធីប្រារព្ធខួបដែលត្រូវបានធ្វើឡើងនៅវិមានឈ្នះឈ្នះនេះ គឺមានការកម្សាន្តផ្សេងៗរួមមានការទស្សនាស្តង់ពិព័រណ៍សមិទ្ធផលរយៈពេល ២៥ ឆ្នាំ របស់ក្រសួង-ស្ថាប័ន ពិព័រណ៍ផលិតផលទូទៅ និងម្ហូបអាហារ ការប្រគំតន្ត្រីសម័យ ការតុបតែងលម្អ និងការសម្តែងរបាំប្រពៃណីបុរាណ ព្រមទាំងការអុជកាំជ្រួចដែលត្រូវបានធ្វើឡើងរយៈពេល ៣ ថ្ងៃពីថ្ងៃទី ២៩ ដល់ថ្ងៃទី ៣១ ខែធ្នូ ដើម្បីអបអរការប្រារព្ធខួបលើកទី ២៥ នៃការបញ្ចប់សង្គ្រាមស៊ីវិលនិងការអនុវត្តដោយជោគជ័យនយោបាយឈ្នះឈ្នះ និងខួប ៥ ឆ្នាំនៃការកសាងវិមានឈ្នះឈ្នះ។
នៅក្នុងពិធីបើកការប្រារព្ធខួបនោះ កាលពីថ្ងៃទី ២៩ ខែធ្នូ លោកនាយករដ្ឋមន្ត្រី ហ៊ុន ម៉ាណែត ក៏បានលើកឡើងផងដែរថា ការប្រារព្ធខួបលើកទី ២៥ នៃការបញ្ចប់សង្គ្រាមស៊ីវិល និងការអនុវត្តដោយជោគជ័យនយោបាយឈ្នះឈ្នះ និងខួប ៥ ឆ្នាំនៃការកសាងវិមានឈ្នះឈ្នះ ជាពិធីមានអត្ថន័យជាប្រវត្តិសាស្ត្រ ដោយរំឭកពីការបញ្ចប់សង្គ្រាមស៊ីវិលដ៏រ៉ាំរ៉ៃនៅកម្ពុជា និងការទទួលបានសុខសន្តិភាពពេញលេញមិនធ្លាប់មានក្នុងរយៈពេល ៥០០ ឆ្នាំមកនេះ។
សមិទ្ធផលដែលបានកសាងនៅក្នុងបរិវេណជុំវិញវិមានឈ្នះឈ្នះ គឺជាតឹកតាងនៃការបង្ហាញពីភាពសុខុដុមនីយកម្មពីអតីតកាលរហូតមកដល់បច្ចុប្បន្នកាល ប៉ុន្តែត្រូវឆ្លងកាត់ដំណាក់កាលវេទនាជាច្រើនទម្រាំបានដូចសព្វថ្ងៃនេះ។ លោកថ្លែងថា៖«ជាតឹកតាងយ៉ាងហោចណាស់ ឱ្យអ្នកមើលនៅទីនេះមើលតែមួយភ្លែត បានដឹងថា កម្ពុជាយើងបានឆ្លងកាត់ស្អីខ្លះ ទម្រាំយើងបានប៉ុណ្ណេះហើយឱ្យស្គាល់តម្លៃនៃសន្តិភាពកាន់តែមាំ»។
លោកថា៖«ស្គាល់តម្លៃសន្តិភាព ទាល់តែមើលឃើញនៅពេលបាត់សន្តិភាពវេទនាយ៉ាងណា។ គ្រាន់តែទិន្នន័យគ្រាប់បែកដែលសម្លាប់មនុស្ស និងយុទ្ធោបករណ៍ដែលធ្លាប់សម្លាប់គ្នានេះ ក៏អាចបញ្ជាក់ឱ្យយើងកូនខ្មែរជំនាន់ក្រោយដឹងថា សង្គ្រាមមិនមែនជាអ្វីដែលយើងចង់បានទេ»។
លោកលើកឡើងថា ទីតាំងវិមានឈ្នះឈ្នះទាំងមូលគឺជាឃ្លាំងនៃចំណេះដឹង ឯកសារប្រវត្តិសាស្ត្រ ហើយការកសាងវិមានឈ្នះឈ្នះនេះ មិនមែនដើម្បីលើកតម្កើងនរណាម្នាក់នោះទេ ថ្វីបើអតីតនាយករដ្ឋមន្ត្រីលោក ហ៊ុន សែន ជាស្ថាបនិកមគ្គុទេសក៍ឯកក្នុងការដាក់ចេញនូវយុទ្ធសាស្ត្រនយោបាយឈ្នះឈ្នះ ប៉ុន្តែលោកម្នាក់ឯងមិនអាចធ្វើបានទេបើគ្មានប្រតិបត្តិករចូលរួម។ ហេតុនេះការកសាងវិមានឈ្នះឈ្នះគឺដើម្បីជានិមិត្តរូបនៃខ្មែរទាំងអស់គ្នាទទួលបានសន្តិភាព។
លោកទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ថ្លែងក្នុងពិធីនោះថា នៅថ្ងៃទី ២៩ ខែធ្នូ ដែលជាថ្ងៃប្រារព្ធពិធីនេះ មានភ្ញៀវជាតិ និងអន្តរជាតិ ចូលរួមប្រមាណជាង ៨ ពាន់នាក់។
រយៈពេល ៣ ថ្ងៃនៃកម្មវិធីនេះ គណៈកម្មាធិការអន្តរក្រសួងបានរៀបចំដាក់តាំងពិព័រណ៍ សមិទ្ធផលស្នាដៃ គ្រប់ក្រសួងស្ថាប័ន រួមទាំងបណ្តាខេត្តផង ព្រមទាំង មានការតាំងពិព័រណ៍ទូទៅ និងម្ហូបអាហារ និងបើកឱ្យចូលទស្សនាសមិទ្ធផលថ្មីៗទើបកសាងបាននៅវិមានឈ្នះឈ្នះ ផងដែរ។
លោកថ្លែងថា៖«គណៈកម្មាធិការកសាងវិមានឈ្នះឈ្នះបានបន្តដំណើរការរៀបចំសួនតេជោសន្តិភាព សួនខឿនការពារជាតិ សួនសណ្តាប់ធ្នាប់ សុវត្ថិភាព សន្តិសុខសាធារណៈ សួនរក្សាសន្តិភាពអង្គការសហប្រជាជាតិ និងដោះមីន និងសួនប្រវត្តិការស្ថាបត្យកម្មសាងសង់វិមានឈ្នះ-ឈ្នះ»។
លោកថា ចំពោះសមិទ្ធផលថ្មីនៅវិមានឈ្នះឈ្នះគណៈកម្មាធិការអន្តរក្រសួង ក៏បានសាងសង់អគារដ្ឋបាល និងព័ត៌មាន ជណ្ដើរជម្រាលសម្រាប់ជនពិការ ជួសជុលប្រាសាទទាំង ៤ ក្នុងសួនសុខុដុមនីយកម្មប្រវត្តិសាស្ត្រខ្មែរ រូបចម្លាក់បាក់បែក និងកសាងប្រព័ន្ធទឹក ភ្លើង ព្រមទាំងចម្លាក់ព្រឹត្តិការណ៍ប្រវត្តិសាស្ត្រក្នុងបរិបទថ្មីដែលប្រទេសជាតិបានឆ្លងកាត់។
លោក វង្ស សារិទ្ធ អាយុ ៧២ ឆ្នាំមកពីខេត្តកណ្តាលបានលើកឡើងថា លោកធ្លាប់បានឆ្លងកាត់សម័យសង្គ្រាមដែលមានការទម្លាក់គ្រាប់បែកបានឃើញការរងទុក្ខវេទនាដោយសារសង្គ្រាម ការបែកបាក់គ្រួសារជាដើម ហេតុនេះឆ្លៀតក្នុងកម្មវិធីខួបវិមានឈ្នះឈ្នះនេះ លោកបាននាំកូនចៅមកទស្សនាឱ្យបានដឹងថា ទម្រាំបានសុខសាន្តដូចសព្វថ្ងៃនេះ មិនមែនជាការងាយស្រួលនោះទេ។ «ខ្ញុំនាំកូនចៅមកលេង ហើយប្រាប់ពីរឿងហ្នឹង ឱ្យវាថតទុកជាអនុស្សាវរីយ៍ទៅថ្ងៃក្រោយឱ្យដឹងថា របស់ដែលគេតាំងហ្នឹងហើយ ដែលបញ្ជាក់ថា កម្ពុជាយើងធ្លាប់ជួបសង្គ្រាមពិតប្រាកដមែន ទម្រាំបានមកដល់សព្វថ្ងៃនេះឆ្លងកាត់ការឈឺចាប់ច្រើនណាស់»៕
