លោក ហ៊ុន ម៉ាណែត និងលោក ហឺ វ័យទុង អនុប្រធានគណៈកម្មាធិការយោធាមជ្ឈិមចិន ក្នុងជំនួបនៅវិមានសន្តិភាព នៅថ្ងៃទី៤ ខែធ្នូ។ រូបថត
ភ្នំពេញៈ កម្ពុជា និងចិន បន្តគាំទ្រសកម្មភាពនៃទំនាក់ទំនងកិច្ចសហប្រតិបត្តិការយោធារវាងប្រទេសទាំង ២ តាមរយៈការឯកភាពគ្នារវាងក្រសួងការពារជាតិប្រទេសទាំង ២ ទៅលើការហ្វឹកហ្វឺនបណ្តុះបណ្តាលធនធានមនុស្ស ការដោះមីននិងយុទ្ធភណ្ឌមិនទាន់ផ្ទុះ ស្របនឹងការប្តេជ្ញាចិត្តពង្រឹងទំនាក់ទំនងទ្វេភាគីកាន់តែរឹងមាំបន្ថែមទៀត ក្នុងក្របខ័ណ្ឌកិច្ចសហប្រតិបត្តិការត្បូងពេជ្រ។
ការបង្ហាញការគាំទ្រនិងប្តេជ្ញាចិត្តនៃប្រទេសទាំង២ ធ្វើឡើងតាមរយៈជំនួបពិភាក្សាការងាររវាងលោកនាយករដ្ឋមន្ត្រីហ៊ុន ម៉ាណែត និងលោកហឺ វ័យទុង (He Weidong) អនុប្រធានគណៈកម្មាធិការយោធាមជ្ឈិមចិន នៅថ្ងៃទី៤ ខែធ្នូ ឆ្នាំ២០២៣ នាវិមានសន្តិភាព។
យោងតាមខ្លឹមសារនៃជំនួបដែលបានផ្សព្វផ្សាយតាមរយៈតេឡេក្រាម លោក ហ៊ុន ម៉ាណែត បានឱ្យដឹងថា លោក ហឺ វ័យទុង បានលើកឡើងពីទំនាក់ទំនងយ៉ាងរឹងមាំជាលក្ខណៈប្រវត្តិសាស្ត្ររវាងកម្ពុជានិងចិន និងការប្តេជ្ញាចិត្តបន្តជំរុញទំនាក់ទំនងនេះលេចចេញជាសកម្មភាព ស្របតាមកិច្ចសហប្រតិបត្តិការត្បូងពេជ្រ។
លោក វ័យទុង ថ្លែងថា៖ «ក្រោមការដឹកនាំប្រកបដោយគតិបណ្ឌិតរបស់ សម្តេចធិបតីនាយករដ្ឋមន្ត្រី ចំណងកិច្ចសហប្រតិបត្តិការរវាងប្រទេស២ នឹងកាន់តែមានភាពរឹងមាំថែមទៀត សំដៅឆ្ពោះទៅសម្រេចបានសហគមន៍ជោគវាសនារួមកម្ពុជា-ចិន ប្រកៀកស្មាគ្នាឆ្ពោះទៅមុខក្នុងដំណើរថ្មី»។
ជាមួយគ្នានេះ លោក ហ៊ុន ម៉ាណែត បានលើកឡើងដែរថា លោកប្រធានាធិបតី និងនាយករដ្ឋមន្ត្រីចិនតែងយកចិត្តទុកដាក់លើទំនាក់ទំនងគ្រប់កម្រិតជាមួយកម្ពុជា ខណៈឆ្នាំ២០២៣ ជាគម្រប់ខួប៦៥ឆ្នាំ នៃទំនាក់ទំនងល្អរវាងប្រទេសទាំង២ តាំងពីសម័យដែលដឹកនាំដោយសម្តេចព្រះបរមរតនកោដ្ឋ មកដល់សម័យលោកហ៊ុន សែន និងសម័យកាលលោកផងដែរ។
លោក ហ៊ុន ម៉ាណែត ក៏បានរំឭកដែរថា កាលពីលោកនៅជាមេបញ្ជាការកងទ័ពជើងគោក នៃកងយោធពលខេមរភូមិន្ទ លោកបានផ្តួចផ្តើមជំរុញការពង្រឹងកិច្ចសហប្រតិបត្តិការកងទ័ពជើងគោកប្រទេសទាំង២ រហូតមានការចុះអនុស្សរណៈយោគយល់គ្នា ដែលជាច្រកទៅរកទំនាក់ទំនងរវាងអង្គភាព និងអង្គភាព ការហ្វឹកហ្វឺនបណ្តុះបណ្តាល ដើម្បីលើកកម្ពស់សមត្ថភាពកងទ័ពជើងគោកកម្ពុជា។
តាមរយៈខ្លឹមសារនៃជំនួបដដែលនេះ បានបន្តថា ភាគីទាំង២ បានបន្តគាំទ្រដល់សកម្មភាពទំនាក់ទំនងនិងកិច្ចសហប្រតិបត្តិការនានា ដែលក្រសួងការពារជាតិប្រទេសទាំង២ បានឯកភាព ដូចជា ការហ្វឹកហ្វឺនបណ្តុះបណ្តាលធនធានមនុស្ស ការដោះមីន និងយុទ្ធភណ្ឌមិនទាន់ផ្ទុះ ជាដើម។
នៅថ្ងៃដដែលនោះដែរ លោក ហឺ វ័យទុង ក៏បានជួបពិភាក្សាការងារជាមួយលោកហ៊ុន សែន អតីតនាយករដ្ឋមន្ត្រីកម្ពុជា និងជាប្រធានគណបក្សប្រជាជនកម្ពុជា ផងដែរនាវិមាន៧មករា។ នេះបើយោងតាមខ្លឹមសារដែលផ្សាយដោយហ្វេសប៊ុកគណបក្សប្រជាជនកម្ពុជា។
ប្រភពដដែលបានឱ្យដឹងថា លោក ហ៊ុន សែន បានលើកឡើងថា តាំងពីដើមរៀងមក គណបក្សប្រជាជនកម្ពុជា រាជរដ្ឋាភិបាលកម្ពុជា តែងប្រកាន់ខ្ជាប់នូវនយោបាយចិនតែមួយ គាំទ្រចិន និងតួនាទីរបស់ចិន នៅលើឆាកអន្តរជាតិ ដើម្បីជាផលប្រយោជន៍តំបន់ និងពិភពលោកទាំងមូល។ ការរីកចម្រើនរបស់ចិន មិនត្រឹមតែជួយធ្វើឱ្យចិនខ្លួនឯងរឹងមាំប៉ុណ្ណោះទេ ប៉ុន្តែថែមទាំងជួយដល់ការរីកចម្រើនរបស់តំបន់ និងបណ្ដាប្រទេសផ្សេងៗទៀតផងដែរ។
លោកហ៊ុន សែន សង្កត់ធ្ងន់ថា ៖ «កម្ពុជានិងចិន ត្រូវតែបន្តពង្រឹងនិងពង្រីកភាពជាដៃគូយុទ្ធសាស្ត្រគ្រប់ជ្រុងជ្រោយ មិត្តភាពដែកថែប កិច្ចសហប្រតិបត្តិការត្បូងពេជ្រ និងជំរុញច្រករបៀងឧស្សាហកម្ម បច្ចេកវិទ្យា និងច្រករបៀងអង្ករ និងមច្ឆា ដើម្បីរួមគ្នាកសាងសហគមន៍ជោគវាសនារួមកម្ពុជា-ចិន ទៅថ្ងៃអនាគត»។
ពាក់ព័ន្ធនឹងបញ្ហានេះ លោកគិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានយល់ថា ទំនាក់ទំនងកម្ពុជា-ចិន បានឈានដល់លក្ខណៈល្អខ្លាំងដែលពុំធ្លាប់មានក្នុងប្រវត្តិសាស្ត្រ ខណៈភាគីទាំង២ បន្តប្តេជ្ញាចិត្តពង្រឹងបន្ថែមទៀត។
លោកថា ប្រទេសទាំង២ មានកិច្ចសហប្រតិបត្តិការល្អស្ទើរគ្រប់វិស័យទាំងទិដ្ឋភាពសេដ្ឋកិច្ច ទាំងទំនាក់ទំនងប្រជាជននិងប្រជាជន ទាំងក្របខ័ណ្ឌទ្វេភាគី និងពហុភាគី។
លោក គិន ភា ថ្លែងថា៖ «ទំនាក់ទំនងល្អរវាងចិននិងកម្ពុជានេះ ជាឆន្ទៈទ្វេទិស ហើយជាតម្រូវការគ្នាទៅវិញទៅមក ទាំងនយោបាយ ភូមិសាស្ត្រ និងភូមិសាស្ត្រនយោបាយ»។
លោកបានបន្ថែមថា ទំនាក់ទំនងល្អរវាងកម្ពុជា និងចិន មិនគួរក្លាយទៅជាបញ្ហាប្រឈមចំពោះទំនាក់ទំនងរវាងប្រទេសកម្ពុជាជាមួយបណ្តាប្រទេសនានាទៀតឡើយ ខណៈកម្ពុជាមិនដែលបិទទ្វារការទូតជាមួយប្រទេសណាមួយ ហើយតែងធ្វើពិពិធកម្មនយោបាយការបរទេស សេដ្ឋកិច្ច ទីផ្សាររបស់ខ្លួន សំដៅដល់នយោបាយការបរទេសផ្កាចម្រុះពណ៌៕
