គូប្រកួតដែលគ្រោងធ្វើនៅយប់ថ្ងៃទី១០ ធ្នូ ។ រូបថត ហ្វេសប៊ុក
ភ្នំពេញៈ ការប្រកួតប្រដាល់កម្រិតអន្តរជាតិថ្មីមួយទៀត គឺCambodia Kun Khmer KKIF នឹងត្រូវរៀបចំឱ្យមានឡើងជាលើកដំបូងដោយក្លិបប្រដាល់គុនខ្មែរអន្តរជាតិ Kun Khmer International Fight Gym (KKIF) ហើយព្រឹត្តិការណ៍នេះនឹងត្រូវធ្វើនៅបរិវេណមុខផ្សារទំនើបជីបម៉ុង 271 មេហ្គាម៉ល នៅម៉ោង ៧ យប់ នាថ្ងៃទី ១០ ខែធ្នូ ឆ្នាំ ២០២៣។
សម្រាប់ការចាប់ផ្តើមបង្កើតឱ្យមានការប្រកួត Cambodia Kun Khmer KKIF ជាលើកដំបូងនេះ លោក ស្រ៊ឺ ស្រេង ហៅសំណព្វ ដែលជាអ្នកផ្គូផ្គងកីឡាបានឱ្យដឹងថា កីឡាករជើងខ្លាំងកម្រិត A មកពី ៦ ប្រទេសត្រូវបានសម្រិតសម្រាំងយកមកប្រកួតជាមួយជើងខ្លាំងលំដាប់ៗនៅកម្ពុជា ហើយអ្វីដែលពិសេសបំផុតនោះគឺការប្រកួតនេះ អាចនឹងមានការផ្សាយចេញទៅកាន់ ១៩២ ប្រទេស នៅគ្រប់ទ្វីបទាំងអស់។
លោកនិយាយថា៖ «បើមិនមានអ្វីប្រែប្រួលនោះទេ ការប្រកួតCambodia Kun Khmer KKIF នៅថ្ងៃទី ១០ ខែធ្នូនេះ យើងនឹងមានការផ្សាយចេញទៅកាន់ប្រទេសចំនួន ១៩២ នៅលើពិភពលោក គ្រប់ទ្វីបទាំងអស់ ហើយការផ្សព្វផ្សាយធំបែបនេះ ស្រុកខ្មែរយើងមិនធ្លាប់មានទេវាជាលើកទី១ ក្នុងប្រវត្តិសាស្ត្រដែលគុនខ្មែររបស់យើង ផ្សាយចេញទៅកាន់ ១៩២ ប្រទេស ដែលជាដៃគូសហការរបស់យើង»។
ជាមួយគ្នានេះ លោក ស្រី ចាន់ថន ប្រធានក្លិប KKIF បានបង្ហោះនៅលើហ្វេសប៊ុករបស់លោកថា ការប្រកួត Cambodia Kun Khmer KKIF នៅថ្ងៃទី១០ ខែធ្នូនេះ មិនមានការលក់សំបុត្រនោះទេ គឺអ្នកគាំទ្រអាចចូលរួមទស្សនាដោយសេរី ចំណែកសមាសភាពកីឡាករបរទេសទាំង៦នាក់មកពី៦ប្រទេសផ្សេងៗគ្នានេះ សុទ្ធតែជាជើងខ្លាំង និងជាម្ចាស់ខ្សែក្រវាត់ ដែលត្រូវតតាំងជាមួយកីឡាករលំដាប់ៗនៅកម្ពុជា។
សម្រាប់ការប្រកួតនេះ ម្ចាស់មេដាយមាសស៊ីហ្គេម សុខ រិទ្ធ នឹងត្រូវប្រកួតមុនគេ ជាមួយកីឡាករជម្រើសជាតិ ២ សម័យកាលរបស់ប្រទេសយេម៉ែន ZahranAbdulraoebក្នុងទម្ងន់ ៥៤ គីឡូក្រាម។ បន្ទាប់មកជាការជួបគ្នារវាង សូត្រ ខេវិន ជាមួយអតីតកីឡាករជម្រើសជាតិអ៊ីតាលី Alex Gabriel ក្នុងទម្ងន់៦៥គីឡូក្រាម ហើយគូទី៣ ជាការជួបគ្នារវាង អ៊ុង វិរៈ និងថៃ P.Nikhomដែលសុទ្ធតែធ្លាប់បានសាងភាពល្បី កាលពីអតីតកាល តែពេលនេះ អ្នកទាំង២បានឡើងទម្ងន់ដល់ ៨០ គីឡូក្រាមហើយ។
ចំណែកម្ចាស់មេដាយមាសស៊ីហ្គេម បឺត សង្ឃឹម និងជាជើងខ្លាំងទម្ងន់ ៥៧ គីឡូក្រាមរបស់កម្ពុជា ត្រូវប្រកួតជាមួយកីឡាករអាជីពជាម្ចាស់មេដាយមាស៣សម័យកាលរបស់ ម៉ាឡេស៊ី Muhamm Ad Shaiful រីឯជើងខ្លាំង សុខ ធី របស់កម្ពុជាត្រូវប្រឈមជាមួយកីឡាករជំនាញវ៉ៃឃីកបុកស៊ីង និងវាយដាក់ទ្រុងរបស់ហ្វីលីពីន CasipeSalvadico Rhino ក្នុងទម្ងន់ ៦០ គីឡូក្រាម ហើយម្ចាស់មេដាយមាសស៊ីហ្គេម ឈឿង ល្វៃ ត្រូវវ៉ៃជាមួយអតីតជើងខ្លាំងលំដាប់លេខ ៣ របស់ពិភពលោក និងជាជើងឯករង ២ សម័យកាលប្រចាំនៅប្រេស៊ីល Victor Camargo ក្នុងទម្ងន់ ៧២ គីឡូក្រាម។
សម្រាប់ការប្រកួតអន្តរជាតិទាំង ៦ គូនេះ ត្រូវបានលោក សំណព្វ បញ្ជាក់ថា ត្រូវធ្វើឡើងតាមបទបញ្ជាប្រកួតគុនខ្មែរ ហើយដោយសារការផ្គូផ្គង ត្រូវបានធ្វើឡើងរយៈពេល ១ ខែមកហើយនោះ លោកបានអះអាងថា កីឡាករបរទេសទាំង ៦ នាក់នេះ បានស្គាល់ និងយល់ពីរបៀបប្រកួតគុនខ្មែររួចហើយ ហើយការប្រកួតនេះ នឹងត្រូវធ្វើឡើងដោយយុត្តិធម៌ គឺមិនផ្តោតខ្លាំងទៅលើការលទ្ធផលឈ្នះពេកនោះទេ។
អតីតអ្នកគ្រប់គ្រងប្រដាល់ប្រចាំនៅសង្វៀន PNN លោក ស្រ៊ឺ ស្រេង បានបញ្ជាក់ថា៖ «អ្វីដែលក្រុមការងាររបស់KKIFនិងលោកប្រធានឧកញ៉ាស្រី ចាន់ថន ផ្តោតខ្លាំងលើការប្រកួតនេះគឺការផ្សព្វផ្សាយគុនខ្មែរទៅកាន់ពិភពលោក ដោយយើងត្រូវប្រកួតឱ្យអស់ពីលទ្ធភាព និងកាត់សេចក្តីដោយយុត្តិធម៌ ព្រោះបើយើងចាញ់អ្នកខ្លាំងដ៏ពិតប្រាកដនោះក៏ជាមេរៀនដ៏ល្អ តែបើយើងឈ្នះ យើងនឹងឈានទៅជួបកីឡាករលំដាប់កាន់តែខ្លាំងថែមទៀត»។
ជាមួយការដាក់គោលដៅយ៉ាងច្បាស់លាស់នេះ លោក សំណព្វ បានបញ្ជាក់ពីគោលជំហររបស់ក្លិប KKIF ថា៖ «កីឡាករលំដាប់ណាក៏ដោយរបស់ពិភពលោក ឱ្យតែគេចង់មកវ៉ៃនៅស្រុកខ្មែរ គឺតម្លៃខ្លួនប៉ុន្មានក៏យើងយកមកបានដែរ ហើយការនិយាយបែបនេះ មិនមែនយើងអួតនោះទេ ប៉ុន្តែសំខាន់យើងចង់ធ្វើឱ្យល្អ និងឱ្យមានភាពល្បីល្បាញទាំងនៅក្នុងស្រុក និងនៅក្រៅប្រទេស»។
លោក សំណព្វ បានបន្ថែមថា៖ «តាមពិតយើងចង់រៀបចំព្រឹត្តិការណ៍នេះ នៅក្រៅប្រទេសមុន ដោយចាប់ផ្តើមចេញពីអាមេរិក ប៉ុន្តែដោយសារឱកាស និងកត្តាអំណោយផលល្អ ទើបយើងរៀបចំនៅស្រុកខ្មែរមុនវិញ ហើយបើព្រឹត្តិការណ៍លើកទី១ នេះ ទទួលបានការគាំទ្រខ្លាំងពីអ្នកគាំទ្រ គឺយើងនឹងរៀបចំការប្រកួតអន្តរជាតិបែបនេះ ឱ្យមានជាបន្តបន្ទាប់ទៀត ទាំងនៅក្នុងស្រុក និងក្រៅស្រុក ដើម្បីផ្សព្វផ្សាយគុនខ្មែររបស់យើង ឱ្យបានកាន់តែខ្លាំងថែមទៀត ទៅកាន់ពិភពលោក»៕
