លោក ជាម យៀប ប្រធានរដ្ឋសភាស្ដីទី ជួបពិភាក្សាជាមួយ លោក Fang Chunming សមាជិកសភាចិន ខេត្តក្វាងស៊ី។ រូបថត NA
ភ្នំពេញៈ លោក ជាម យៀប ប្រធានរដ្ឋសភាស្ដីទីនៃកម្ពុជាបានចាត់ទុកដំណើរទស្សនកិច្ចរបស់លោក FANG Chunming អនុប្រធានគណៈកម្មាធិការអចិន្ត្រៃយ៍នៃសភាប្រជាជនខេត្តក្វាងស៊ី នៃសាធារណរដ្ឋប្រជាមានិតចិន មកកម្ពុជា គឺជាការពង្រឹងសាមគ្គីភាព និងកិច្ចសហប្រតិបត្តិការ ក៏ដូចជាការផ្លាស់ប្តូរទស្សនៈទៅវិញទៅមកនៃសភាប្រជាជនចិន និងរដ្ឋសភាកម្ពុជា។
លោក ជាម យៀប លើកឡើងដូចនេះ តាមរយៈសេចក្តីប្រកាសព័ត៌មានរបស់រដ្ឋសភា នាថ្ងៃទី៥ ខែធ្នូ ឆ្នាំ២០២៣ បន្ទាប់ពីលោកអនុញ្ញាតឱ្យគណៈប្រតិភូគណៈកម្មាធិការកណ្ដាលសភាប្រជាជនខេត្តក្វាងស៊ី នៃសាធារណរដ្ឋប្រជាមានិតចិន ដឹកនាំដោយ លោក FANG Chunming ជួបសម្តែងការគួរសម នាវិមានរដ្ឋសភា។
លោកបានថ្លែងថា ៖ «ដំណើរទស្សនកិច្ចរបស់លោក FANG Chunming មកកម្ពុជានាពេលនេះ ក៏ជាសក្ខីភាពបង្ហាញឱ្យឃើញកាន់តែច្បាស់ថែមទៀត ពីសារៈសំខាន់នៃទំនាក់ទំនង និងកិច្ចសហប្រតិបត្តិការរបស់ស្ថាប័ននីតិប្បញ្ញត្តិនៃប្រទេសទាំង២ ដែលមហាមិត្តចិនជាប្រទេសដៃគូយុទ្ធសាស្ត្រគ្រប់ជ្រុងជ្រោយ និងជាមិត្តដែកថែបរបស់កម្ពុជា»។
នាឱកាសនោះដែរ លោក ជាម យៀប ក៏បានបង្ហាញនូវក្តីរីករាយបំផុត ដែលប្រទេសកម្ពុជា និងមិត្តចិនមានចំណងមិត្តភាពកាន់តែរឹងមាំ និងស៊ីជម្រៅឈានឡើងមួយកម្រិតពីមិត្តភាពដែកថែប ទៅជាមិត្តភាពក្នុងក្របខ័ណ្ឌនៃកិច្ចសហប្រតិបត្តិការត្បូងពេជ្រ និងយល់ចិត្តថ្លើមគ្នា ដោយរដ្ឋាភិបាលនៃប្រទេសទាំង២ បានប្ដេជ្ញាខិតខំរួមគ្នាជំរុញការកសាងសហគមន៍ជោគវាសនាតែមួយ និងជំរុញការបង្កើនទំហំពាណិជ្ជកម្មទ្វេភាគីឱ្យកាន់តែកើនឡើងថែមទៀតក្នុងបណ្តាឆ្នាំខាងមុខ។
ជាការឆ្លើយតប លោក FANG Chunming លើកឡើងដែរថា កន្លងមកថ្នាក់ដឹកនាំកំពូលនៃប្រទេសទាំង២ បានជំរុញលើកកម្ពស់ ចំណងមិត្តភាពនិងកិច្ចសហប្រតិបត្តិការនៃប្រទេសទាំង២ កាន់តែរឹងមាំ និងស៊ីជម្រៅ ដោយរដ្ឋាភិបាលកម្ពុជា-ចិន បានប្ដេជ្ញាខិតខំរួមគ្នាក្នុងការជំរុញការកសាងសហគមន៍ជោគវាសនាតែមួយផងដែរ។
បន្ថែមពីនេះ លោក FANG Chunming ក៏បានថ្លែងឱ្យដឹងផងដែរពីកិច្ចសហប្រតិបត្តិការ លើវិស័យពាណិជ្ជកម្ម រវាងចិន និងកម្ពុជា ដែលមានការរីកចម្រើនឡើងជាលំដាប់ ហើយថ្នាក់ដឹកនាំនៃប្រទេសទាំង២ បានចុះអនុស្សរណៈស្តីពីការកសាងសួនឧស្សាហកម្មកម្ពុជា-ចិន នៅទីក្រុងប៉េកាំងផងដែរ។
ឆ្លៀតក្នុងឱកាសនោះដែរ លោក FANG Chunming បានអញ្ជើញ លោក ជាម យៀប ដឹកនាំគណៈប្រតិភូទៅបំពេញទស្សនកិច្ចនៅប្រទេសចិន តាមពេលវេលាសមស្របណាមួយ នាពេលខាងមុខ។
ពាក់ព័ន្ធនឹងបញ្ហានេះដែរ លោក ជាម យៀប បានឆ្លើយតបផងដែរថា ៖ «រដ្ឋសភាកម្ពុជា បានត្រៀមខ្លួនជាស្រេចក្នុងការធ្វើការយ៉ាងជិតស្និទ្ធជាមួយសភាប្រជាជនចិនទូទាំងប្រទេស ក៏ដូចជាមួយនឹងសភាប្រជាជនខេត្តក្វាងស៊ីដោយផ្ទាល់ ដើម្បីបន្តថែរក្សា និងជំរុញមិត្តភាពជាប្រពៃណី ដែលត្រូវបានកសាងយ៉ាងរឹងមាំ ដោយថ្នាក់ដឹកនាំជំនាន់មុនៗឱ្យកាន់តែប្រសើរឡើង និងស្ថិតស្ថេរយូរអង្វែងតទៅទៀត»។
ជាមួយគ្នានោះ លោក ជាម យៀប បានស្នើដល់ខេត្តក្វាងស៊ីជួយគាំទ្រកម្ពុជា ក្នុងការបង្កើតមជ្ឈមណ្ឌលទិន្នន័យ មួយសម្រាប់គ្រប់គ្រងធនធានធម្មជាតិ ដើម្បីជំរុញ ច្រករបៀងមច្ឆានិងអង្ករ ព្រោះខេត្តក្វាងស៊ីជាខេត្តមួយ ដែលមានប្រព័ន្ធ គ្រប់គ្រងទិន្នន័យយ៉ាងល្អសម្រាប់ពាណិជ្ជកម្ម និងភ័ស្តុភារកម្មជាមួយអាស៊ីអាគ្នេយ៍៕
.jpg)
