លោក អ៊ាង សុផល្លែត នៅក្នុងពិធីបិទសិក្ខាសាលានៅថ្ងៃទី ៦ ធ្នូ។ រូបថត ក្រសួងបរិស្ថាន
ភ្នំពេញៈ លោកអ៊ាង សុផល្លែតរដ្ឋមន្ត្រីក្រសួងបរិស្ថានបានជំរុញនិងលើកទឹកចិត្តដល់ថ្នាក់ដឹកនាំ មន្ត្រីរាជការ និងមន្ត្រីឧទ្យានុរក្សទាំងអស់ឱ្យបន្តពង្រឹង និងពង្រីកកិច្ចសហប្រតិបត្តិការជាមួយដៃគូពាក់ព័ន្ធក្នុងការគ្រប់គ្រងតំបន់ការពារធនធានធម្មជាតិ និងការអភិរក្សជីវចម្រុះឱ្យកាន់តែមានប្រសិទ្ធភាពថែមទៀត។
យោងតាមហ្វេសប៊ុកក្រសួងបរិស្ថានបានឱ្យដឹងថា ការជំរុញរបស់លោក អ៊ាង សុផល្លែត បានធ្វើឡើងនៅក្នុងពិធីបិទសិក្ខាសាលាស្តីពី «ការត្រួតពិនិត្យការងារឆ្នាំ២០២៣ និងការរៀបចំផែនការសកម្មភាពជាយុទ្ធសាស្ត្រសម្រាប់គ្រប់គ្រងតំបន់ការពារធម្មជាតិ ឆ្នាំ ២០២៤-២០២៨» កាលទី ៦ ខែធ្នូ ឆ្នាំ ២០២៣។
នាឱកាសនោះ រដ្ឋមន្ត្រីក្រសួងបរិស្ថានបានលើកឡើងថា ការរួមគ្នាគ្រប់គ្រងធនធានធម្មជាតិនិងអភិរក្សជីវចម្រុះ សម្រេចឱ្យបានជោគជ័យថ្មីៗបន្ថែមទៀតគឺជាបេសកកម្មសុក្រឹតកម្មបរិស្ថានកិច្ច។ លោកក៏បានលើកទឹកចិត្តដល់ថ្នាក់ដឹកនាំ មន្ត្រីរាជការ និងមន្ត្រីឧទ្យានុរក្សទាំងអស់ឱ្យបន្តខិតខំអនុវត្តកាន់តែប្រសើរថែមទៀតនូវរាល់តួនាទីភារកិច្ចរបស់ខ្លួន និងចូលរួមដោះស្រាយបញ្ហាប្រឈមនានា ប្រកបដោយភាពម្ចាស់ការ មនសិការវិជ្ជាជីវៈ ការទទួលខុសត្រូវ និងភាពច្នៃប្រឌិត។
លោកបានបន្តថា៖ «សូមឱ្យមន្ត្រីទាំងអស់បន្តពង្រឹង និងពង្រីកកិច្ចសហប្រតិបត្តិការក្នុងការគ្រប់គ្រងធនធានធម្មជាតិ និងការអភិរក្សជីវចម្រុះជាមួយដៃគូពាក់ព័ន្ធ ដៃគូអភិវឌ្ឍន៍ វិស័យឯកជន និងប្រជាសហគមន៍នៅមូលដ្ឋានទាំងអស់ដើម្បីរួមគ្នាសម្រេចឱ្យបានជោគជ័យថ្មីៗបន្ថែមទៀតក្នុងបេសកកម្មសុក្រឹតកម្មបរិស្ថានកិច្ច ដោយមានយុទ្ធសាស្ត្រចក្រាវិស័យបរិស្ថាន ២០២៣-២០២៨»។
ជាមួយគ្នានេះលោករដ្ឋមន្ត្រី អ៊ាង សុផល្លែត បានចាត់ទុកយុទ្ធសាស្ត្រចក្រាវិស័យបរិស្ថានថា ជាផែនទីបង្ហាញផ្លូវក្នុងការដឹកនាំតម្រង់ទិសសម្រាប់ការអនុវត្តសកម្មភាពវិស័យបរិស្ថាន ពិសេសការគ្រប់គ្រងធនធានធម្មជាតិ និងការអភិរក្សជីវចម្រុះឱ្យសម្រេចបានជោគជ័យជូនរាជរដ្ឋាភិបាល និងសង្គមជាតិ។
ឆ្លៀតក្នុងឱកាសនេះដែរ លោកបានជំរុញឱ្យអគ្គនាយដ្ឋានតំបន់ការពារធម្មជាតិពង្រឹងប្រសិទ្ធភាព និងទំនើបកម្មការងាររបស់អង្គភាពចំណុះ និងជំរុញការគ្រប់គ្រងតំបន់ការពារធម្មជាតិដោយអនុលោមតាមក្រមបរិស្ថាន និងធនធានធម្មជាតិ និងយុទ្ធសាស្ត្រចក្រាវិស័យបរិស្ថានព្រមទាំងលើកកម្ពស់ការសិក្សាស្រាវជ្រាវ ការអភិរក្សជីវចម្រុះ បេតិកភណ្ឌធម្មជាតិ និងវប្បធម៌ នៅតាមតំបន់ការពារធម្មជាតិផងដែរ។
ជុំវិញរឿងនេះដែរ លោកស្រី ផ្លឹក ភីរុំ អ្នកសម្របសម្រួលបណ្តាញជនជាតិដើមភាគតិចប្រចាំខេត្តមណ្ឌលគិរីបានថ្លែងនៅថ្ងៃទី ៧ ខែធ្នូ ថា ការជំរុញរបស់ក្រសួងបរិស្ថានបែបនេះគឺជារឿងល្អ ប៉ុន្ដែបើតាមលោកស្រី ដើម្បីឱ្យកិច្ចការនេះសម្រេចបានជោគជ័យ គឺក្រសួងត្រូវតែជជែក និងពិភាក្សាជាមួយប្រជាសហគមន៍ពីព្រោះតំបន់ការពារធនធានធម្មជាតិភាគច្រើនគឺមានសហគមន៍ជនជាតិដើមភាគតិចជាអ្នកការពារ។
លោកស្រីបញ្ជាក់ថា៖«ខ្ញុំគិតថា ក្រសួងបរិស្ថានគួរតែពិគ្រោះយោបល់ជាមួយជនជាតិដើមភាគតិចដែលកំពុងការពារនៅតំបន់ធនធានធម្មជាតិទាំងអស់នោះ អ៊ីចឹងខ្ញុំជឿថា ការងារនឹងមានប្រសិទ្ធភាព។ ប៉ុន្តែបើក្រសួងធ្វើតែម្នាក់ឯងអាចនឹងធ្វើឱ្យជនជាតិដើមភាគតិចជួបបញ្ហាណាមួយ ហេតុនេះខ្ញុំសូមឱ្យរាជរដ្ឋាភិបាលសហការជាមួយសហគមន៍ និងជនជាតិដើមភាគតិចមុននឹងរៀបចំផែនការអភិវឌ្ឍន៍ និងគ្រប់គ្រងនៅតំបន់ការពារធនធានធម្មជាតិណាមួយ»។
បើតាមក្រសួងបរិស្ថាន គិតមកទល់បច្ចុប្បន្ន នៅកម្ពុជាតំបន់ការពារធម្មជាតិបានកើនឡើងពីចំនួន ២៣ តំបន់ ដែលមានផ្ទៃដីសរុបប្រមាណ ៣,៣ លានហិកតា ស្មើនឹង ១៨ ភាគរយនៃផ្ទៃដីប្រទេសក្នុងឆ្នាំ ១៩៩៣ ដល់ចំនួន ៧៣ តំបន់ ដែលមានផ្ទៃដីសរុបជាង ៧ លានហិកតាស្មើនឹង ៤០ ភាគរយនៃផ្ទៃប្រទេស។
តំបន់ទាំងនេះត្រូវបានបែងចែកជាប្រភេទ តំបន់ការពារធម្មជាតិ មានជាអាទិ៍ តំបន់ឧទ្យានជាតិ តំបន់ឧទ្យានជាតិសមុទ្រ តំបន់ដែនជម្រកសត្វព្រៃ តំបន់ ការពារទេសភាព តំបន់ប្រើប្រាស់ច្រើនយ៉ាង តំបន់រ៉ាមសារ តំបន់ស្នូលនៃឋបនីយជីវមណ្ឌលបឹងទន្លេសាប និងតំបន់បេតិកភណ្ឌធម្មជាតិស្ថិតក្នុងដែនយុត្ដាធិការរបស់ក្រសួងបរិស្ថាន៕
