យុទ្ធនាការ «បើកប៊ូតុងសុវត្ថិភាព» ត្រូវបានបង្កើតឡើងដើម្បីលុបបំបាត់ការបៀតបៀននៅតាមទីសាធារណៈ។ រូបថត នារី - NEARY
ភ្នំពេញៈ អង្គការភ្លែនអន្តរជាតិប្រចាំកម្ពុជា បានផ្ដួចផ្តើមបង្កើតយុទ្ធនាការ «បើកប៊ូតុងសុវត្ថិភាព» ក្នុងគោលបំណងលើកកម្ពស់ការយល់ដឹងរបស់សាធារណជន ដើម្បីលុបបំបាត់ការបៀតបៀនក្មេងស្រី និងស្ដ្រីនៅតាមទីសាធារណៈ។
លោក យី គឹមថាន នាយករងប្រចាំប្រទេសនៃអង្គការភ្លែនអន្តរជាតិប្រចាំកម្ពុជាបានឱ្យដឹងនៅថ្ងៃទី ៧ ខែធ្នូថា ការផ្ដួចផ្ដើមយុទ្ធនាការ «បើកប៊ូតុងសុវត្ថិភាព» វាជាផ្នែកមួយនៃយុទ្ធនាការ ១៦ ថ្ងៃ ដើម្បីបញ្ឈប់អំពើហិង្សាលើស្ត្រី និងក្មេងស្រី ដែលតែងតែធ្វើជារៀងរាល់ឆ្នាំនៅទូទាំងពិភពលោក ខណៈដែលប្រទេសកម្ពុជាក៏តែងតែធ្វើយុទ្ធនាការនេះជារៀងរាល់ឆ្នាំផងដែរ។
ការបើកយុទ្ធនាការ «ប៊ូតុងសុវត្ថិភាព» គឺជាយុទ្ធនាការមួយដែលបង្កើនការយល់ដឹងរបស់សាធារណជនរួមមានឪពុកម្ដាយ អាជ្ញាធរ ក៏ដូចជាប្រជាពលរដ្ឋទាំងមូល ចូលរួមធ្វើឱ្យក្មេងស្រី និងស្ដ្រី មានសុវត្ថិភាពដូចជាក្មេងប្រុស និងបុរសដែរ។ ពោលនៅពេលដែលស្ត្រីធ្វើដំណើរតាមដងផ្លូវសាធារណៈ ឬក៏និយាយតាមសាធារណៈ និងតាមអនឡាញផ្សេងៗនឹងមិនត្រូវទទួលរងការបៀតបៀនឡើយ។
យុទ្ធនាការនេះ ក៏ធ្វើឡើងក្នុងគោលបំណង ដើម្បីលុបបំបាត់ការបៀតបៀន និងការមាក់ងាយនៅតាមទីសាធារណៈទៅលើក្មេងស្រី និងស្ត្រីផងដែរ។
ដោយឡែកលោកស្រី ស ស៊ីណែត អគ្គនាយករង នៃអគ្គនាយកដ្ឋានអភិវឌ្ឍន៍សង្គម នៃក្រសួងកិច្ចការនារី បានថ្លែងឱ្យដឹងដែរថា អ្វីដែលអង្គការផ្សេងៗកំពុងតែធ្វើនេះគឺវាមានគោលបំណងតែ ១ គត់ គឺដើម្បីធ្វើយ៉ាងណាចូលរួមទប់ស្កាត់ និងលុបបំបាត់រាល់ទម្រង់នៃអំពើហិង្សាទាក់ទងនឹងយេនឌ័រនៅក្នុងប្រទេសកម្ពុជា។
លោកស្រីថ្លែងថា៖ «សកម្មភាពពួកគាត់ដែលកំពុងធ្វើហ្នឹង គឺបានបញ្ជាក់ពីការចូលរួមអបអរសាទរនៃយុទ្ធនាការ ១៦ ថ្ងៃ ដើម្បីបញ្ឈប់អំពើហិង្សាលើស្ត្រី និងក្មេងស្រី ដែលយើងតែងតែធ្វើជារៀងរាល់ឆ្នាំ»៕
យុទ្ធនាការ «បើកប៊ូតុងសុវត្ថិភាព» ត្រូវបានបង្កើតឡើងដើម្បីលុបបំបាត់ការបៀតបៀននៅតាមទីសាធារណៈ។ រូបថត នារី - NEARY
