អង្គការយូនីសេហ្វ នឹងសហការជាមួយរដ្ឋាភិបាល ដើម្បីធ្វើឱ្យធ្លាក់ចុះនូវអត្រាជំងឺមិនឆ្លងនៅកម្ពុជា។ រូបអគ្គលេខាដ្ឋានប្រឹក្សាស្តារអភិវឌ្ឍន៍វិស័យកសិកម្ម និងជនបទ
លោកស្រី ដេបូរ៉ា កូមីនី (Debora Comini) ប្រធានប្រចាំតំបន់អាស៊ីខាងកើត និងប៉ាស៊ីហ្វិកនៃអង្គការយូនីសេហ្វ បានលើកឡើងថា អង្គការយូនីសេហ្វ នឹងសហការជាមួយរាជរដ្ឋាភិបាល ដើម្បីជំរុញធ្វើឱ្យធ្លាក់ចុះនូវអត្រាជំងឺមិនឆ្លង ការធាត់ជ្រុល និងជំងឺស្គមស្គាំងរបស់កុមារនៅកម្ពុជា។
ការលើកឡើងរបស់ប្រធានអង្គការយូនីសេហ្វដូច្នេះ ត្រូវបានធ្វើឡើងក្នុងឱកាសលោកស្រី ដេបូរ៉ា កូមីនី ដឹកនាំគណៈប្រតិភូចូលជួបសម្តែងការគួរសម និងពិភាក្សាការងារជាមួយលោក អ៊ុក រ៉ាប៊ុន ទេសរដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាប្រធានគណៈកម្មាធិការជាតិ ជំរុញចលនាភូមិ១ផលិតផល១ នៅទីស្តីការគណៈរដ្ឋមន្ត្រី កាលរសៀលថ្ងៃទី៧ ខែធ្នូ ឆ្នាំ២០២៣។
នាឱកាសនោះ លោកស្រី ដេបូរ៉ា កូមីនី បានស្នើដល់ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ឱ្យជួយជំរុញការបំបៅកូនដោយទឹកដោះម្តាយ និងស្នើសុំជួយអន្តរាគមន៍ ក្នុងការពន្យារមាតុភាពរហូតដល់ ១៨៣ថ្ងៃ។ ជាមួយគ្នានេះ លោកស្រី ក៏បានស្នើឱ្យយកចិត្តទុកដាក់បន្ថែមទៀត ដល់អាហារប៉ះពាល់ដល់សុខភាព ដូចជា បារី ស្រា ភេសជ្ជៈផ្អែមជាដើម និងស្នើឱ្យបង្កើនពន្ធលើផលិតផលទាំងនេះផងដែរ។
តំណាងអង្គការយូនីសេហ្វបានបញ្ជាក់ទៀតថា៖« អង្គការយូនីសេហ្វ នឹងសហការជាមួយរាជរដ្ឋាភិបាល ក្នុងការធ្វើឱ្យធ្លាក់ចុះនូវអត្រាជំងឺមិនឆ្លង ការធាត់ជ្រុល និងជំងឺស្គមស្គាំងរបស់កុមារ»។
ឆ្លៀតក្នុងឱកាសនោះដែរ លោកស្រី ក៏បានស្នើសុំធ្វើការសិក្សាទៅលើការចំណាយ ដើម្បីឆ្លើយបត នឹងភាពស្គមស្គាំង របស់ កុមារ ខណៈលោកស្រី ក៏សូមឱ្យកម្ពុជាគិតគូរពីការផ្តល់អាហារសុខភាពដល់កុមារ និងការផ្គត់ផ្គង់ទឹកស្អាត និងអនាម័យ។ មួយវិញទៀត លោកស្រី ថែមទាំងជំរុញការផ្លាស់ប្តូរឥរិយាបថរបស់កសិករ ដែលប្រើប្រាស់ជីគីមីមិនបានត្រឹមត្រូវ ធ្វើឱ្យមានបម្រែបម្រួលអាកាសធាតុ និងហូរចូលទៅប្រភពទឹក ធ្វើឱ្យប៉ះពាល់ដល់ការផ្គត់ផ្គង់ទឹកស្អាត សម្រាប់ពលរដ្ឋប្រើប្រាស់ថែមទៀត។
ជាការឆ្លើយតបវិញ លោកទេសរដ្ឋមន្ត្រី អ៊ុក រ៉ាប៊ុន បានឯកភាព ចំពោះការលើកឡើងរបស់អង្គការយូនីសេហ្វ និងបានបញ្ជាក់ថា លោកនឹងស្នើទៅវិទ្យាស្ថានស្រាវជ្រាវ និងអភិវឌ្ឍន៍កម្ពុជា ដើម្បីធ្វើការសិក្សាពីការចំណាយ សម្រាប់កែលម្អភាពស្គាំងស្គមរបស់កុមារ ព្រោះតាមតួលេខនៅមានអត្រាខ្ពស់នៅឡើយ។
យ៉ាងណាមិញ លោកបានស្នើអង្គការយូនីសេហ្វ បន្តជួយដល់ក្រុមការងារសន្តិសុខស្បៀង និងអាហារូបត្ថម្ភថ្នាក់ខេត្ត និងជួយលើវិស័យទឹកស្អាត និងអនាម័យ សុខាភិបាល ការគាំពារសង្គម និងវិស័យអប់រំ ដើម្បីរួមចំណែកសម្រេចបានជោគជ័យ នូវយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល»។
ពាក់ព័ន្ធនឹងជំងឺមិនឆ្លងនេះដែរ ថ្លែងក្នុងទិវាជំងឺទឹកនោមផ្អែមពិភពលោក កាលថ្ងៃទី២០ ខែវិច្ឆិកា ឆ្នាំ២០២៣ លោក ឈាង រ៉ា រដ្ឋមន្ត្រីក្រសួងសុខាភិបាល បានបញ្ជាក់ថា ជំងឺមិនឆ្លង ពិសេសជំងឺទឹកនោមផ្អែមនៅកម្ពុជា គឺជាជំងឺរ៉ាំរ៉ៃមួយ និងជាបញ្ហាប្រឈមផ្នែកសុខភាពដ៏ចម្បងមួយចំពោះបុគ្គល គ្រួសារ និងប្រព័ន្ធសុខាភិបាល។ លោកថា ជំងឺទឹកនោមផ្អែម អាចបង្កផលវិបាកដូចជាជំងឺគាំងបេះដូង គ្រោះថ្នាក់សរសៃឈាមខួរក្បាល ពិការភ្នែក ខ្សោយតម្រងនោម និងពិការអវៈយវៈជាដើម។
លោករដ្ឋមន្រ្តី បានអះអាងថា កត្តាហានិភ័យនៃជំងឺមិនឆ្លង គឺបណ្តាលមកពីទម្លាប់នៃការទទួលទានអាហារមិនល្អសម្រាប់ការទ្រទ្រង់សុខភាព និងទម្លាប់មិនបានបញ្ចេញពលកម្ម ឬធ្វើលំហាត់ប្រាណគ្រប់គ្រាន់ជាប់ជាប្រចាំ ខណៈលោកក៏បានជំរុញដល់ពលរដ្ឋកម្ពុជាទាំងអស់ យកចិត្តទុកដាក់លើសុខភាពផ្ទាល់ខ្លួន ពិសេសលើរបបអាហារប្រចាំថ្ងៃ ដើម្បីកាត់បន្ថយហានិភ័យដែលបង្កឱ្យមានជំងឺទឹកនោមផ្អែម និងជំងឺមិនឆ្លងផ្សេងៗទៀត៕
