កុមារជិត ២,៩ លាននាក់ បានប្រឈមមុខនឹងគ្រោះមហន្តរាយទាក់ទងនឹងអាកាសធាតុ។ រូប Save the Children Cambodia
កុមារជិត ២,៩ លាននាក់ នៅក្នុងប្រទេសកម្ពុជា បានប្រឈមមុខនឹងគ្រោះមហន្តរាយទាក់ទងនឹងអាកាសធាតុយ៉ាងខ្លាំង រួមមានទឹកជំនន់ ខ្យល់ព្យុះ ការបំពុលខ្យល់ កង្វះទឹក និងរលកកម្ដៅជារៀងរាល់ឆ្នាំ។ នេះបើយោងតាមការវិភាគទិន្នន័យថ្មីដោយអង្គការ Save the Children មុនពេលកិច្ចប្រជុំសន្និសីទកំពូលនៃបណ្ដាភាគីអនុសញ្ញាសហប្រជាជាតិ ស្ដីពីការប្រែប្រួលអាកាសធាតុ លើកទី២៨។
អង្គការនេះបានឱ្យដឹងទៀតថា៖«ស្ទើរតែ ៥០% នៃកុមាររបស់យើង ប្រឈមនឹងវិបត្តិ៤ប្រភេទ ឬច្រើនជាងនេះ។ ពលរដ្ឋកម្ពុជាម្នាក់ក្នុងចំណោមបីនាក់ ដែលរស់នៅក្នុងភាពក្រីក្រគឺជាកុមារដែលមានអាយុក្រោម ១៥ឆ្នាំ។ កត្តានេះ កំពុងនាំឱ្យមានវិបត្តិសិទ្ធិកុមារយ៉ាងស្ងៀមស្ងាត់»។
ដោយឡែកពាក់ព័ន្ធកុមារជាសកលវិញ អង្គការ Save the Children បានឱ្យដឹងថា កុមារជាង ២៧លាននាក់ ត្រូវបានទាញចូលក្នុងភាពអត់ឃ្លាន និងកង្វះអាហារូបត្ថម្ភដោយសារព្រឹត្តិការណ៍អាកាសធាតុធ្ងន់ធ្ងរនៅក្នុងប្រទេស ដែលរងផលប៉ះពាល់យ៉ាងខ្លាំងដោយវិបត្តិអាកាសធាតុក្នុងឆ្នាំ២០២២ ដែលជាការកើនឡើង ១៣៥% ពីឆ្នាំមុន។
អង្គការនេះបន្តទៀតថា ជាមួយនឹងដែនកំណត់នៃការប្តេជ្ញាចិត្តជាសកល នាពេលបច្ចុប្បន្ននេះ ការកើនឡើងសីតុណ្ហភាព ១.៥ អង្សាសេ គឺមិនអាចសម្រេចបានជាមួយនឹងគោលនយោបាយ និងការប្តេជ្ញាចិត្តផ្នែកហិរញ្ញវត្ថុរបស់ពិភពលោកនាពេលបច្ចុប្បន្ន និងប្រទេសនានានោះទេ។ ដើម្បីឆ្លើយតបទៅនឹងការប្តេជ្ញាចិត្តក្នុងការរួមចំណែកថ្នាក់ជាតិរបស់ខ្លួននៅឆ្នាំ២០៣០ កម្ពុជា ត្រូវកៀរគរថវិកាចំនួន ៨ពាន់លានដុល្លារនៅក្នុងហិរញ្ញប្បទានអាកាសធាតុ។ យើង ត្រូវការសកម្មភាព និងការគាំទ្រជាសកលសម្រាប់រឿងនេះ។
លោក ហុង រស្មី នាយកប្រចាំប្រទេសនៃអង្គការ Save the Children International Cambodia មានប្រសាសន៍ថា៖ «កុមារមានទំនួលខុសត្រូវតិចបំផុតក្នុងការបង្កឱ្យមានការប្រែប្រួលអាកាសធាតុ ប៉ុន្តែពួកគេងាយរងគ្រោះបំផុតចំពោះផលប៉ះពាល់»។
លោកបានបន្ថែមថា៖«អង្គការ Save the Children អំពាវនាវឱ្យអ្នកបង្កើតគោលនយោបាយ និងអ្នកពាក់ព័ន្ធទាំងអស់ស្តាប់សំឡេងរបស់កុមារ និងចាត់វិធានការជាក់ស្តែង និងភ្លាមៗ ដើម្បីកសាងភាពធន់សម្រាប់កុមារចំពោះការប្រែប្រួលអាកាសធាតុ» ។
នៅក្នុងកិច្ចប្រជុំសន្និសីទកំពូលនៃបណ្ដាភាគីអនុសញ្ញាសហប្រជាជាតិ ស្ដីពីការប្រែប្រួលអាកាសធាតុ លើកទី២៨ កាលពីថ្ងៃទី ២ ខែធ្នូ ឆ្នាំ២០២៣ មូលនិធិអាកាសធាតុបៃតង និងភាពជាដៃគូសកលសម្រាប់ការអប់រំ (GPE) និងអង្គការ Save the Children បានចាប់ផ្តើមការវិនិយោគ ៧០ លានដុល្លារអាមេរិកដែលមិនធ្លាប់មានពីមុនមក ដើម្បីបង្កើតសាលារៀនដែលធន់នឹងអាកាសធាតុនៅក្នុងប្រទេសដែលងាយរងគ្រោះ។ អង្គការ Save the Children ប្រចាំកម្ពុជា កំពុងប្តេជ្ញាផ្តល់អាទិភាពដល់កម្មវិធីរបស់ខ្លួនទាក់ទងនឹងអាកាសធាតុ ដើម្បីកសាងភាពធន់របស់កុមារ និងកម្មវិធីបៃតង។
ជាមួយគ្នានេះ Save the Children ប្រចាំកម្ពុជា កំពុងអំពាវនាវឱ្យមេដឹកនាំពិភពលោកធ្វើឱ្យកិច្ចប្រជុំសន្និសីទកំពូលនៃបណ្ដាភាគីអនុសញ្ញាសហប្រជាជាតិ ស្ដីពីការប្រែប្រួលអាកាសធាតុ លើកទី២៨ នេះក្លាយជាចំណុចរបត់មួយ ហើយធ្វើឱ្យប្រព័ន្ធហិរញ្ញវត្ថុសកលដំណើរការសម្រាប់កុមារ តាមរយៈការវិនិយោគលើកុមារ។
ពាក់ព័ន្ធកុមារនេះដែរ អង្គការយូនីសេហ្វ នឹងសហការជាមួយរដ្ឋាភិបាល ដើម្បីជំរុញធ្វើឱ្យធ្លាក់ចុះនូវអត្រាជំងឺមិនឆ្លង ការធាត់ជ្រុល និងជំងឺស្គមស្គាំងរបស់កុមារនៅកម្ពុជា៕
