ជំនួបរវាងលោកស្រី ឃួន សុដារី និង លោក Zaheeruddin Babar Thaheem កាលពីថ្ងៃទី១០ មករា ។ រូបថត រដ្ឋសភា
ភ្នំពេញៈកម្ពុជានិងប៉ាគីស្ថានជំរុញឱ្យមានការចុះអនុស្សរណៈយោគយល់គ្នា(MOU)រវាងស្ថាប័នរដ្ឋសភានៃប្រទេសទាំង២ដើម្បីជំរុញកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅ ខណៈប្រមុខរដ្ឋសភាកម្ពុជាមានសុទិដ្ឋនិយមក្នុងចំណងមិត្តភាពជាមួយប៉ាគីស្ថានដើម្បីបម្រើប្រយោជន៍ សន្តិសុខ ការអភិវឌ្ឍដល់គ្នាទៅវិញទៅមក និងសម្រាប់តំបន់ និងពិភពលោកទាំងមូល។
ការជំរុញចុះ MOU នៃស្ថាប័នរដ្ឋសភាទាំង២ ធ្វើឡើងនៅក្នុងជំនួបពិភាក្សាការងាររវាងលោកស្រី ឃួន សុដារី ប្រធានរដ្ឋសភាកម្ពុជានិងលោកហ្សាហៀរូឌីន បាបា ថាហ៊ីម (Zaheeruddin Babar Thaheem) ឯកអគ្គរដ្ឋទូតប៉ាគីស្ថានប្រចាំកម្ពុជាកាលពីថ្ងៃទី១០ ខែមករា ឆ្នាំ២០២៤ នៅវិមានរដ្ឋសភា។ នេះបើយោងតាមសេចក្ដីប្រកាសរបស់រដ្ឋសភាកម្ពុជា។
នៅក្នុងជំនួបនោះលោកហ្សាហៀរូឌីន បាបា ថាហ៊ីម បានសាទរចំពោះការបោះឆ្នោតរបស់កម្ពុជាកាលពីខែកក្កដា ឆ្នាំ២០២៣ កន្លងទៅ ដោយលោកអះអាងថា ប៉ាគីស្ថានជាប្រទេសសាក្សីមួយក្នុងការបោះឆ្នោតនោះហើយចាត់ទុកថាជាការបោះឆ្នោតដោយសេរីយុត្តិធម៌ និងគ្មានអំពើហិង្សា ហើយបានសាទរចំពោះលោកស្រីឃួន សុដារី ជាស្ត្រីដំបូងគេដែលសភាបោះឆ្នោតជាប់ជាប្រធានរដ្ឋសភានីតិកាលទី៧។
លោកបញ្ជាក់ប្រាប់ភាគីកម្ពុជាថា៖ «នៅក្នុងកុម្ភៈខាងមុខ ប៉ាគីស្ថាននឹងរៀបចំការបោះឆ្នោតសភា។ បន្ទាប់ពីការបោះឆ្នោតបង្កើតរដ្ឋសភាថ្មីហើយនោះ ប៉ាគីស្ថាននឹងលើកទឹកចិត្តជំរុញដល់ការបង្កើតអនុស្សរណៈយោគយល់គ្នាស្តីពីកិច្ចសហប្រតិបត្តិការរវាងរដ្ឋសភាប៉ាគីស្ថាននិងកម្ពុជាក្នុងការពង្រឹងពង្រីកកិច្ចសហប្រតិបត្តិការរដ្ឋសភាប្រទេសទាំង២ឱ្យកាន់តែរឹងមាំ គ្រប់ជ្រុងជ្រោយ ទាំងក្នុងក្របខ័ណ្ឌទ្វេភាគី និងពហុភាគី»។
ឯកអគ្គរដ្ឋទូតរូបនេះ បង្ហាញសុទិដ្ឋិនិយមថា នៅពេលស្ថានទូតកម្ពុជាប្រចាំប៉ាគីស្ថានបង្កើតជាផ្លូវការហើយ នោះនឹងនាំឱ្យមានការពង្រីកកិច្ចសហប្រតិបត្តិការលើគ្របវិស័យសម្រាប់ប្រទេសទាំង២ ខណៈសព្វថ្ងៃស្ថានទូតប៉ាគីស្ថាននៅកម្ពុជា កំពុងធ្វើការយ៉ាងជិតស្និទ្ធជាមួយក្រសួងពាណិជ្ជកម្មកម្ពុជា ក្រុមប្រឹក្សាអភិវឌ្ឍន៍កម្ពុជា(CDC) ដើម្បីឱ្យចេញកិច្ចព្រមព្រៀងវិស័យពាណិជ្ជកម្មមួយក្នុងពេលឆាប់ៗ។
សម្រាប់ភាគីកម្ពុជាវិញ លោកស្រី ឃួន សុដារី បានគាំទ្រការលើកឡើងពីភាគីប៉ាគីស្ថាន ដោយលោកស្រីបានអះអាងថាបំណងរបស់កម្ពុជាគឺចង់ពង្រឹងនិងពង្រីកកិច្ចសហប្រតិបត្តិការរវាងស្ថាប័នរដ្ឋសភានៃប្រទេសទាំង២ ឱ្យកាន់តែរឹងមាំ សកម្ម និងគ្រប់ជ្រុងជ្រោយ។
លោកស្រីបានបញ្ជាក់ថា៖ «កិច្ចសហប្រតិបត្តិការរដ្ឋសភាក៏ដូចជារដ្ឋាភិបាលប្រទេសទាំង២មិនត្រឹមតែបម្រើផលប្រយោជន៍សុខសន្តិភាព ស្ថិរភាពនិងការអភិវឌ្ឍរបស់កម្ពុជានិងប៉ាគីស្ថានប៉ុណ្ណោះទេតែនឹងបម្រើដល់ផលប្រយោជន៍រួម ជាការចូលរួមថែរក្សាសុខសន្តិភាព និងស្ថិរភាព ក្នុងតំបន់និងសកលលោកទាំងមូល»។
នៅក្នុងវិស័យការទូតសភា លោកស្រីបានកោតសរសើរពីការចូលរួមយ៉ាងសកម្មរបស់សភាប៉ាគីស្ថាន លើវេទិកាអន្តរសភានានាក្នុងគោលដៅសន្តិភាព និងមនុស្សធម៌ ជាពិសេសគណៈប្រតិភូរដ្ឋសភាប៉ាគីស្ថានដែលតែងចូលរួមកិច្ចប្រជុំឬមហាសន្និបាត វេទិកាអន្តរសភា ដែលរដ្ឋសភាកម្ពុជាធ្វើជាម្ចាស់ផ្ទះកន្លងទៅ ហើយបង្ហាញការគាំទ្រគ្នានៅក្នុងក្របខ័ណ្ឌពហុភាគីផង ដូចជា APA, IPU, APPF, ASEP និងAIPA ជាដើម។
ជាមួយគ្នានេះ លោកស្រីប្រធានរដ្ឋសភាកម្ពុជា បានអរគុណដល់សមភាគីប៉ាគីស្ថានដែលតែងគាំទ្រដល់ការអភិវឌ្ឍរបស់កម្ពុជា និងបានស្នើដល់ភាគីប៉ាគីស្ថានពិនិត្យលទ្ធភាពពង្រីកការវិនិយោគ និងធ្វើពាណិជ្ជកម្មនៅកម្ពុជាផងដែរ។លើសពីនេះការកែច្នៃកសិផលផ្នែកអាហារហាឡាល់“Halal” , ជំរុញការបង្កើតជើងហោះហើរត្រង់រវាងប្រទេសទាំង២ និងការភ្ជាប់ទំនាក់ទំនងរវាងប្រជាជននិងប្រជាជនក្នុងវិស័យទេសចរណ៍។
លោកគិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថា តាមការកត់សម្គាល់ឃើញថាទំនាក់ទំនងទ្វេភាគីរវាងកម្ពុជានិងប៉ាគីស្ថានលើផ្នែកនយោបាយនិងយុទ្ធសាស្ត្រតែងតែគាំទ្រគ្នាទៅវិញទៅមកលើឆាកអន្តរជាតិ និងតំបន់ ហើយប៉ាគីស្ថានក៏ជាប្រទេសមានទំនាក់ទំនងល្អជាមួយចិន មិនខុសពីកម្ពុជាទេ។លោកក៏មានសុទិដ្ឋនិយមខ្ពស់ផងដែរចំពោះការពង្រឹងទំនាក់ទំនងស្ថាប័នរដ្ឋសភារវាងប្រទេសទាំង២។
លោកបានបញ្ជាក់ថា៖«ការចុះMOUរវាងស្ថាប័នរដ្ឋសភានៃប្រទេសទាំង២ជាតម្លៃបន្ថែមសម្រាប់ជំរុញទំនាក់ទំនងនិងលើកកម្ពស់និងកិច្ចសហប្រតិបត្តិការប្រទេសទាំង២ ជាពិសេសស្ថាប័ននីតិប្បញ្ញត្តិដែលដើរតួនាទីសំខាន់ដល់ការអនុវត្តគោលនយោបាយនានានៃរដ្ឋាភិបាលប្រទេសទាំង២»។
លោកគិន ភា បានបន្តថា រដ្ឋាភិបាលកម្ពុជាអាណត្តិថ្មីកំពុងព្យាយាមធ្វើពិពិធកម្មការទូតនេះ ហើយទំនាក់ទំនងកម្ពុជា-ប៉ាគីស្ថាននឹងមាននិន្នាការល្អប្រសើរ ដោយសារការប្តេជ្ញាចិត្តមុតមាំរបស់ថ្នាក់ដឹកនាំប្រទេសទាំង២។
តែទោះជាយ៉ាងលោកថា ការវិនិយោគរបស់ប៉ាគីស្ថានទំនងមិនមានជាដុំកំភួនឡើយនៅកម្ពុជា ហើយគម្រោងដែលថ្នាក់ដឹកនាំចង់មានជើងហោះហើរត្រង់ទៅមកជំរុញវិស័យទេសចរណ៍នោះក៏មិនសូវជាមានទំនោរដែរ ព្រោះបើគេពិនិត្យជាទូទៅ ការធ្វើដំណើរទៅមករវាងប្រជាជនប្រទេសទាំង២ មិនសូវមានច្រើនឡើយ ហើយតម្រូវការទីផ្សារនៃប្រទេសទាំង២ក៏មិនសូវហុចផលដល់គ្នាច្រើនដែរ៕
