ភ្នំពេញៈ រដ្ឋមន្ត្រីក្រសួងទេសចរណ៍ លោក សុខ សូកេន និងលោក ម៉ាខាស ប៊ីលី (Markus Buerli) នាយកផ្នែកសហប្រតិបត្តិការនៃ ទីភ្នាក់ងារស្វ៊ីសសម្រាប់ការអភិវឌ្ឍ និងសហប្រតិបត្តិការ (SDC) បានជួបពិភាក្សាគ្នាពីកាលានុវត្តភាព សម្រាប់ពង្រឹងកិច្ចសហប្រតិបត្តិការទេសចរណ៍ កាលពីថ្ងៃទី១០ ខែមករា ឆ្នាំ២០២៤នេះ។
ការពង្រឹងកិច្ចសហប្រតិបត្តិការទេសចរណ៍នោះត្រូវបានធ្វើឡើងតាមរយៈគម្រោងអភិវឌ្ឍន៍ជំនាញ(SDP) ដែលអនុវត្តដោយអង្គការស្វ៊ីសខន់ថាក់ និង គម្រោងបង្កើតឱកាសការងារសមរម្យដល់យុវជន(DEY) ដែលអនុវត្តដោយអង្គការអន្តរជាតិខាងការងារ (ILO)។ គោលដៅនៃគម្រោងទាំងនោះ គឺ ដើម្បីចូលរួមលើកកម្ពស់ជំនាញវិជ្ជាជីវៈទេសចរណ៍នៅកម្ពុជា ការពង្រឹងគុណភាពសេវាកម្មទេសចរណ៍ ស្របតាមស្តង់ដា ជាតិ និងអាស៊ាន ជាពិសេសចូលរួមចំណែកយ៉ាងសកម្មដល់យុទ្ធសាស្ត្របណ្តុះបណ្តាលបច្ចេកទេស និងវិជ្ជាជីវៈដល់យុវជនចំនួន១,៥លាននាក់ របស់រាជរដ្ឋាភិបាលអាណត្តិទី៧។ នេះបើយោងតាមសេចក្តីប្រកាសព័ត៌មានស្តីពីលទ្ធផលនៃជំនួបទ្វេភាគីនេះរបស់ក្រសួងទេសចរណ៍។
ក្នុងឱកាសនោះ លោករដ្ឋមន្ត្រី ក៏បានបង្ហាញពីគំនិតផ្តួចផ្តើមយុទ្ធសាស្ត្ររួមរបស់ក្រសួងទេសចរណ៍ក្នុងការប្រែក្លាយកម្ពុជាជាគោលដៅទេសចរណ៍ ប្រកបដោយភាពរស់រវើក ការប្រកួតប្រជែង ចីរភាព និងបរិយាបន្ន ដោយផ្តោតលើសសរស្តម្ភយុទ្ធសាស្ត្រចំនួន៥ ហៅកាត់ថា “បង្កើន ៥-Build" ព្រមទាំងមានសមាសធាតុគាំទ្រចំនួន៣ ហៅកាត់ថា «អភិវឌ្ឍ៣-3Ds។ ក្នុងនោះរួមមាន កត្តាធនធានមនុស្ស គឺជាអាទិភាពគន្លឹះរបស់ក្រសួងទេសចរណ៍ ដែលគម្រោងរបស់ទីភ្នាក់ងារស្វ៊ីសសម្រាប់ការអភិវឌ្ឍ និងសហប្រតិបត្តិការ បានចូលរួមចំណែកយ៉ាងសកម្មនាពេលកន្លងមក៕
