លោក ហ៊ុន សែន ប្រធានគណបក្សប្រជាជនកម្ពុជា។ រូបថត SPM
ភ្នំពេញៈ លោក ហ៊ុន សែន ប្រធានគណបក្សប្រជាជនកម្ពុជា និងជាអតីតនាយករដ្ឋមន្ត្រីកាលពីថ្ងៃទី ១៣ ខែមករា ឆ្នាំ ២០២៤ បានឆ្លើយសារតាមបណ្ដាញសង្គមហ្វេសប៊ុកបែបចំអកទៅកាន់មន្ត្រីនៃអតីតគណបក្សសង្គ្រោះជាតិដែលកំពុងនិរទេសខ្លួនដោយខ្លួនឯងបានបង្ហាញសារនៅក្នុងបណ្ដាញសង្គមនេះដែរចំពោះបុគ្គលនយោបាយបក្សប្រឆាំងគួរលាឈប់បើខ្លាចការគំរាមកំហែងពីបក្សកាន់រដ្ឋាភិបាល។
សាររបស់លោក ហ៊ុន សែន បានបង្ហាញថា៖ «តបលេងបន្តិចចុះ ដើម្បីកុំឱ្យមនុស្សភ្លេចខ្លួន និងជាន់កែងខ្លួនឯង។ ម្នាក់នេះខំស្រែក ពីអាមេរិកប្រាប់បក្សប្រឆាំងក្នុងស្រុកថា កុំខ្លាចការគំរាមរបស់ក្រសួងមហាផ្ទៃ។ ចុះបើក្លាហានបែបហ្នឹង ម៉េចរត់ចោលស្រុកកាលពីឆ្នាំ២០១៧ នៅពេល ដែលខ្លួនអត់មានរឿងត្រូវជាប់ខ្នោះសោះ។ ខំរត់រកងាប់អីកាលពេលនោះ និងមកក្លាហានអី នៅពេលនេះ?»។
លោក អេង ឆៃអ៊ាង មន្ត្រីជាន់ខ្ពស់នៃអតីតគណបក្សសង្គ្រោះជាតិ បានបង្ហាញសារលើហ្វេសប៊ុកកាលពីថ្ងៃទី១២ ខែមករា ឱ្យអ្នកនយោបាយប្រឆាំងនៅក្នុងប្រទេសកម្ពុជាលាឈប់ពីនយោបាយ បើសិនជាភ័យខ្លាចការគំរាមកំហែងរបស់ក្រសួងមហាផ្ទៃ។
លោក អេង ឆៃអ៊ាង សរសេរថា៖«សូមជូនយោបល់ទៅមេដឹកនាំនយោបាយប្រឆាំងនៅក្នុងប្រទេសកម្ពុជា ប្រសិនបើ ភ័យខ្លាចការគំរាមរបស់ក្រសួងមហាផ្ទៃ គួរលាឈប់ពីនយោបាយបក្សប្រឆាំង ព្រោះប្រជាពលរដ្ឋនឹងមិនបោះឆ្នោតឱ្យគណបក្សដែលមានមេដឹកនាំភ័យខ្លាចនោះទេ»។
លោក ស៊ឺន សម អ្នកជំនាញវិទ្យាសាស្ត្រនយោបាយនៃរាជបណ្ឌិត្យសភាកម្ពុជា បានថ្លែងថា ការឆ្លើយតបរបស់លោក ហ៊ុន សែន ទៅកាន់លោក អេង ឆៃអ៊ាង គឺជារឿងជាក់ស្តែងដែលបានកើតឡើនៅក្នុងសង្គមកម្ពុជា ហើយលោក អេង ឆៃអ៊ាង នៅក្រៅប្រទេស មកប្រាប់គណបក្សប្រឆាំងនៅក្នុងប្រទេសមិនឱ្យធ្វើតាមការណែនាំក្រសួងមហាផ្ទៃ គឺមិនត្រឹមត្រូវនោះទេ។
លោក ស៊ឺន សម បានប្រាប់ថា៖«សមាជិកគណបក្សប្រឆាំងសព្វថ្ងៃ គឺគេគោរពទៅតាមច្បាប់ មានន័យថា គេគោរពក្រសួងមហាផ្ទៃ គឺគោរពច្បាប់ ដោយសារតែស្ថាប័នក្រសួងមហាផ្ទៃ ជាអ្នកអនុវត្តច្បាប់សម្រាប់គណបក្សនយោបាយនៅក្នុងប្រទេសកម្ពុជា។ អ៊ីចឹង! សព្វថ្ងៃ គេជាអ្នកគោរពច្បាប់ ហើយខ្លួនមិនគោរពច្បាប់ បែរជាប្រាប់គេមិនឱ្យខ្លាចច្បាប់។ វាអត់ត្រូវទេ»។
លោក ស៊ឺន សម ថ្លែងថា ការលើកឡើងរបស់លោក អេង ឆៃអ៊ាង នេះ គឺសម្រាប់អ្នកដែលរត់ចោលសង្វៀនការប្រកួតតែប៉ុណ្ណោះ ដែលការឆ្លើយតបរបស់លោកហ៊ុន សែន គឺជារឿងសមស្របមួយហើយលោក អេង ឆៃអ៊ាង ក៏គ្មានតម្លៃ សម្រាប់ធ្វើនយោបាយនៅក្នុងប្រទេសព្រោះជាអ្នកនយោបាយប្រឆាំងនៅក្រៅសង្វៀន។
គណបក្សភ្លើងទៀននៅថ្ងៃទី១៣ ខែមករា ឆ្នាំ២០២៤ បានចេញសេចក្តីថ្លែងការណ៍ប្រកាសបដិសេធ មិនពាក់ព័ន្ធជាមួយបុគ្គលទាំងឡាយណា ដែលជាទណ្ឌិតជាប់ទោសពីបទឧក្រិដ្ឋ ឬបទមជ្ឈិមឡើយ។
សេចក្តីថ្លែងការណ៍ បានឱ្យដឹងថា៖«គណបក្ស ភ្លើងទៀន បានដំណើរការការងារ និងធ្វើសេចក្តីសម្រេចចិត្តនានា ដោយមានការទទួលខុសត្រូវក្នុងអធិបតេយ្យភាពពេញលេញរបស់ខ្លួន ស្របតាមលក្ខន្តិកៈគណបក្ស ដោយមិនស្ថិតនៅក្រោមការបង្គាប់បញ្ជា ដោយផ្ទាល់ ឬប្រយោល ពីបុគ្គល ឬគណបក្សនយោបាយណាមួយឡើយ»។
ក្រសួងមហាផ្ទៃកាលពីថ្ងៃទី១២ ខែមករា បានចេញសេចក្តីប្រកាសព័ត៌មានព្រមានទុកជាមុនចំពោះគណបក្សនយោបាយដែលបានចុះឈ្មោះចូលរួមការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ដែលនឹងប្រព្រឹត្តទៅនាថ្ងៃទី២៥ ខែកុម្ភៈ ឆ្នាំ២០២៤ ខាងមុខនេះ ឱ្យបញ្ឈប់ជាបន្ទាន់រាល់សកម្មភាពដែលបំពានច្បាប់ស្តីពីគណបក្សនយោបាយ ដែលបានចែងអំពីសកម្មភាពដែលត្រូវបានហាមឃាត់ចំពោះគណបក្សនយោបាយ។
ការចេញមុខព្រមានរបស់ក្រសួងមហាផ្ទៃនេះ ធ្វើឡើងបន្ទាប់ពីក្រសួងសង្កេតឃើញនាពេលថ្មីៗនេះ លោក សម រង្ស៊ី ដែលកំពុងនិរទេសខ្លួននៅក្រៅប្រទេស បានចេញសេចក្តីអំពាវនាវដល់គណបក្សនយោបាយចំនួន ៣ ឱ្យអនុវត្តសកម្មភាពផ្សេងៗ និងធ្វើការបង្គាប់បញ្ជាផ្ទុយពីស្មារតីនៃច្បាប់ ដើម្បីបម្រើដល់ផលប្រយោជន៍ និងមហិច្ឆតានយោបាយរបស់ខ្លួន៕
