លោក ហេង រតនា បង្ហាញពីសំណល់គ្រាប់ដល់ភាគីចិន កាលពីថ្ងៃទី១៥ មករា ។ រូបថត CMAC
ភ្នំពេញៈអាជ្ញាធរមីន និងភាគីចិន គ្រោងចុះអនុស្សរណៈយោគយល់គ្នា ដើម្បីបន្តផ្ដល់ជំនួយទាំងហិរញ្ញវត្ថុការបណ្ដុះបណ្ដាលធនធានមនុស្ស និងផ្ដល់សម្ភារបច្ចេកទេស សម្រាប់ជួយដល់កម្ពុជា លើសកម្មភាពបោសសម្អាតមីននៅដើមឆ្នាំ២០២៤ នេះ។
លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានឱ្យដឹងនៅថ្ងៃទី១៦ ខែមករាថា គណៈប្រតិភូសាធារណរដ្ឋប្រជាមានិតចិនកំពុងមកធ្វើទស្សនកិច្ចនៅសារមន្ទីរមីន និងបានពិភាក្សាការងារលើវិស័យសកម្មភាពមីនជាមួយខាងអង្គភាពស៊ីម៉ាក់។
ទន្ទឹមនឹងនេះ លោកបានឱ្យដឹងដែរថា បន្ទាប់ពីបញ្ចប់ទស្សនកិច្ចនេះ ភាគីចិនគ្រោងនឹងចុះអនុស្សរណៈយោគយល់គ្នាជាមួយអាជ្ញាធរមីនកម្ពុជានៅថ្ងៃទី១៨ ខែមករា ដើម្បីបន្តជួយគាំទ្រការងារបោសសម្អាតមីនក្នុងឆ្នាំនេះ។
លោកបានឱ្យដឹងទៀតថា ក្នុងកិច្ចការងារជួយគាំទ្រកម្ពុជាក្នុងឆ្នាំ២០២៤នេះ ភាគីចិន នឹងបន្តផ្ដល់ជំនួយទាំងហិរញ្ញវត្ថុ ការបណ្ដុះបណ្ដាលធនធានមនុស្សលើជំនាញដោះគ្រាប់ ក៏ដូចជាការផ្ដល់សម្ភារបច្ចេកទេសសម្រាប់ការងារបោសសម្អាតមីនផងដែរ។ រាល់ការផ្ដល់ជំនួយទាំងអស់នេះ ប្រទេសមិត្តចិនតែងតែបានអនុវត្តជារៀងរាល់ឆ្នាំសម្រាប់ជួយកម្ពុជា ជាពិសេសគឺការផ្ដល់វគ្គបណ្ដុះបណ្ដាលលើការងារបោសសម្អាតមីនទៅដល់មន្ត្រីពាក់ព័ន្ធរបស់កម្ពុជា។
លោក លី ធុជ បានបញ្ជាក់ថា៖«ជំនួយនេះ បានចូលរួមចំណែកយ៉ាងសំខាន់ ដោយសារយើងបានយកជំនួយទៅជួយសង្គ្រោះជីវិតពលរដ្ឋខ្មែរពីគ្រោះថ្នាក់ដោយសារគ្រាប់រំសេវនៅក្នុងទឹកដីរបស់យើង ហើយជំនួយពីប្រទេសមហាមិត្តចិនហ្នឹង ក៏រួមចំណែកក្នុងការកាត់បន្ថយភាពក្រីក្រដល់ប្រជាជនយើងដែរតាមរយៈការផ្ដល់ដីសុវត្ថិភាពសម្រាប់ធ្វើកសិកម្ម»។
បើតាមលោក លី ធុជ ការចុះអនុស្សរណៈយោគយល់គ្នានេះក៏ជាឯកសារមួយសំខាន់ដែលបញ្ជាក់ពីឆន្ទៈដ៏មោះមុតរបស់ប្រជាជននិងរាជរដ្ឋាភិបាលចិនក្នុងការចូលរួមជាមួយកម្ពុជាដើម្បីធ្វើឱ្យកម្ពុជាចាកផុតពីសម័យសំណល់ជាតិផ្ទុះពីសង្គ្រាម។ ក្រៅពីនេះនៅក្នុងអនុស្សរណៈយោគយល់គ្នា មិត្តចិនក៏នឹងផ្ទេរសម្ភារមួយចំនួនផងដែរ រួមមាន តង់ សម្ភារការិយាល័យ និងសម្ភារជួយដល់ការងារបោសសម្អាតមីនជាដើមមកជូនកម្ពុជា។
ប្រទេសចិនបានចាប់ផ្ដើមផ្ដល់ជំនួយជួយដល់កម្ពុជាលើការងារបោសសម្អាតមីនចាប់តាំងពីឆ្នាំ២០១៥មក រហូតមកដល់ពេលនេះបានជួយសង្គ្រោះជីវិតប្រជាជនកម្ពុជាជាង១លាននាក់ និងបានរកឃើញគ្រាប់មីន និងសំណល់ជាតិផ្ទុះពីសង្គ្រាមផ្សេងទៀតជាច្រើនម៉ឺនគ្រាប់ ក៏ដូចជាបានរួមចំណែកកាត់បន្ថយការស្លាប់និងរបួស និងបានជួយកាត់បន្ថយភាពក្រីក្រនៅតំបន់ជនបទរបស់ប្រទេសកម្ពុជាផងដែរ។ នេះជាបញ្ជាក់របស់លោក លី ធុជ អនុប្រធានទី១ នៃអាជ្ញាធរមីន។
ទាក់ទងនឹងមីននេះ នៅថ្ងៃទី១៥ ខែមករា លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីន (ស៊ីម៉ាក់) ក៏បានជួបពិភាក្សាការងារជាមួយ គណៈប្រតិភូសាធារណរដ្ឋប្រជាមានិតចិនផងដែរដែលក្នុងឱកាសនោះ លោកបានលើកឡើងពីសកម្មភាពស្នូលរបស់អង្គភាពស៊ីម៉ាក់ ក្នុងការបោសសម្អាតមីននិងគ្រាប់យុទ្ធភណ្ឌមិនទាន់ផ្ទុះកម្ពុជា ជាពិសេសគម្រោងជំនួយចិនលុបបំបាត់គ្រាប់មីននៅកម្ពុជាដែលបានផ្តល់ជូនរាជរដ្ឋាភិបាលកម្ពុជាចាប់តាំងពីឆ្នាំ២០១៨ រហូតមកដល់បច្ចុប្បន្ន។
សូមរំឭកដែរថា ចាប់ពីឆ្នាំ២០១៨ ដល់ឆ្នាំ២០២៣ ក្រោមជំនួយគាំទ្រពីរដ្ឋាភិបាលចិនតាមរយៈក្រសួងសេដ្ឋកិច្ចនិងហិរញ្ញវត្ថុ អង្គភាពស៊ីម៉ាក់ បានបញ្ចប់ការអនុវត្តកិច្ចប្រតិបត្តិការបោសសម្អាតមីនមនុស្សធម៌បានចំនួន ៣ ដំណាក់កាលរួចមកហើយ ដោយមានទឹកប្រាក់សរុបចំនួន ១៤,៤ លានដុល្លារអាមេរិក។
ជំនួយទាំងនេះដើម្បីគាំទ្រសកម្មភាពបោសសម្អាតមីននិងសំណល់យុទ្ធភណ្ឌសង្គ្រាមរបស់អង្គភាពស៊ីម៉ាក់ក្នុងខេត្តកំពង់ធំ សៀមរាប ឧត្តរមានជ័យ ព្រះវិហារ ក្រចេះ ស្ទឹងត្រែង កំពង់ឆ្នាំង និងខេត្តស្វាយរៀង៕
