ប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) បានថ្លែងថា ការមកដល់ប្រទេសបារាំងរបស់លោក ហ៊ុន ម៉ាណែត ដើម្បីបន្តសរសេរប្រវត្តិសាស្ត្ររបស់ប្រទេសទាំង ២ ជាបន្តទៀតក្នុងចំណងមិត្តភាព និងកិច្ចសហប្រតិបត្តិការរវាងប្រទេសទាំង ២។
លោក ម៉ាក្រុង បានលើកឡើងដូចនេះ ក្នុងជំនួបពិភាក្សាការងារផ្លូវការជាមួយនឹងលោក ហ៊ុន ម៉ាណែត នាយប់ថ្ងៃទី ១៨ ខែមករា ឆ្នាំ២០២៤ (ម៉ោងនៅកម្ពុជា) ដើម្បីរឹតចំណងមិត្តភាព និងកិច្ចសហប្រតិបត្តិការទ្វេភាគីកម្ពុជា-បារាំង នៅក្នុងវិស័យនៃចំណាប់អារម្មណ៍រួម និងផលប្រយោជន៍រួមសម្រាប់ប្រជាជាតិទាំង២។ លោកបានថ្លែងថា ៖ «ខ្ញុំសូមស្វាគមន៍សម្តេចមកកាន់ប្រទេសបារាំងដើម្បីបន្តសរសេរប្រវត្តិសាស្ត្ររបស់យើងទាំង២ជាបន្តទៅទៀតជាប្រវត្តិសាស្ត្រផ្អែកលើមិត្តភាពមិនចេះប្រេះស្រាំរវាងប្រជាជនយើងទាំង២»។
លោក ម៉ាក្រុង ក៏បានលើកឡើងដែរថា ដោយនៅតែអង្រួនចិត្តដោយចំណង់ចង់បង្ខិតប្រទេសទាំង២ឱ្យនៅជិតគ្នាបន្ទាប់ពីប្រទេសទាំង២បានចុះកិច្ចព្រមព្រៀងទីក្រុងប៉ារីសនៅឆ្នាំ១៩៩១ ប្រទេសបារាំងបានជួយជ្រោមជ្រែងកម្ពុជាក្នុងការអភិវឌ្ឍដោយទទួលបាននូវលទ្ធផលដ៏អស្ចារ្យដែលយើងអាចមានមោទនភាព។ លោកថា៖«ដូច្នេះការបំពេញទស្សនកិច្ចរបស់សម្តេចនៅពេលនេះគឺជាឱកាសមួយដើម្បីបង្កើតគម្រោងថ្មីៗទៀតជាមួយនឹងក្រុមហ៊ុនយើងខ្ញុំ ហើយដែលសម្តេចបានមានឱកាសជជែកផ្លាស់ប្តូរយោបល់ជាមួយនឹងក្រុមហ៊ុនជាច្រើនជាពិសេសក្នុងវិស័យថាមពល ដឹកជញ្ជូន និងហេដ្ឋារចនាសម្ព័ន្ធ»។
ថ្នាក់ដឹកនាំកំពូលនៃប្រទេសទាំង២នឹងជជែកគ្នាពីអាទិភាពរបស់កម្ពុជាដើម្បីបារាំងផ្តល់ជូនកម្ពុជានូវមធ្យោបាយ និងជំនាញចាំបាច់នានាដោយមានការជួយជ្រោមជ្រែងពីភ្នាក់ងារអភិវឌ្ឍន៍បារាំងដែលក្នុងសប្តាហ៍នេះបានសន្យាចែកកញ្ចប់២០០លានអឺរ៉ូ ក្នុងវិស័យបណ្តុះបណ្តាលវិជ្ជាជីវៈថាមពល និងប្រព្រឹត្តិកម្មទឹកស្អាត។
លោក ម៉ាក្រុង បានបញ្ជាក់ថា៖ «យើងជឿជាក់យ៉ាងខ្លាំងទៅលើសក្តានុពលដ៏ធំធេងរបស់កម្ពុជា និងប្រជាជនកម្ពុជាដែលបន្ទាប់ពីបានឆ្លងកាត់សង្គ្រាមជាច្រើនទសវត្សរ៍កន្លងមកបានបង្ហាញនូវការដឹងគុណយ៉ាងជ្រាលជ្រៅចំពោះសហគមន៍អន្តរជាតិ»។
ជាមួយគ្នានោះដែរ ប្រធានាធិបតីបារាំង ក៏បានកោតសរសើរវិភាគទានរបស់ប្រទេសកម្ពុជាក្នុងកងកម្លាំងប្រវត្តិសាស្ត្ររក្សាសន្តិភាពអង្គការសហប្រជាជាតិ ជាវិភាគទានធំជាងគេនៅអាស៊ី។
លោកថា៖ «ពិតមែនហើយ យើងបានបង្ហាញឱ្យឃើញពីសម្តេចនាយករដ្ឋមន្ត្រីមុន (លោក ហ៊ុន សែន) កាលពី១ឆ្នាំកន្លងទៅដោយបានផ្តោតការថ្កោលទោសយ៉ាងម៉ឺងម៉ាត់ចំពោះការទម្លាក់គ្រាប់បែកទៅលើលំនៅឋានស៊ីវិល ខណៈសង្គ្រាមឈ្លានពានធ្វើដោយរុស្ស៊ីនៅតែបន្តបំផ្លាញជម្រកទាំងនេះ»។ ជំហរដ៏ក្លាហានរបស់សម្តេចគឺជាទឡ្ហីករណ៍ដ៏ច្បាស់ក្រឡែតបង្ហាញថា បញ្ហាពាក់ព័ន្ធនឹងជម្លោះនេះវាហួសទៅឆ្ងាយពីព្រំដែនអឺរ៉ុបទៅហើយ»។
ក្នុងឱកាសនោះដែរ លោក ហ៊ុន ម៉ាណែត បានលើកឡើងថា បារាំងគឺជាប្រទេសដំបូងនៅក្នុងការបំពេញទស្សនកិច្ចរបស់លោកទៅកាន់ទ្វីបអឺរ៉ុបក្នុងនាមជានាយករដ្ឋមន្ត្រីថ្មីនៃប្រទេសកម្ពុជា ហើយលើសពីនេះទៅទៀតក្នុងរយៈពេលតែ១៣ខែប៉ុណ្ណោះ មានថ្នាក់ដឹកនាំកំពូល៣រូប ដែលរួមមានព្រះមហាក្សត្រ សម្តេចព្រះបរមនាថ នរោត្តម សីហមុនី ព្រះមហាក្សត្រនៃប្រទេសកម្ពុជា កាលពីថ្ងៃទី១៣ ខែវិច្ឆិកា ឆ្នាំ២០២៣។ វត្តមានអតីតនាយករដ្ឋមន្ត្រី ហ៊ុន សែន កាលពីថ្ងៃទី១៤ ខែធ្នូ ឆ្នាំ២០២២ និងវត្តមានរបស់លោកនៅពេលនេះ។
លោក ហ៊ុន ម៉ាណែត មានប្រសាសន៍ថា ៖ «នេះបង្ហាញឱ្យឃើញពីភាពស៊ីជម្រៅនៃចំណងមិត្តភាពរបស់កម្ពុជា និងប្រទេសបារាំង។ កម្ពុជាចងចាំជានិច្ចនូវតួនាទីរបស់បារាំងនៅក្នុងនាមជាស្ថាបនិក និងជាសហប្រធានសន្និសីទទីក្រុងប៉ារីសស្តីពីកម្ពុជាដែលនាំទៅដល់ការសម្រេចបាននូវកិច្ចព្រមព្រៀងទីក្រុងប៉ារីសនៅឆ្នាំ១៩៩១ដែលជាការរួមចំណែកយ៉ាងខ្លាំងរបស់បារាំងនៅក្នុងការស្តារ និងអភិវឌ្ឍប្រទេសជាតិចាប់ពីពេលនោះមក»។
ក្នុងនាមប្រមុខរាជរដ្ឋាភិបាលកម្ពុជា លោក ហ៊ុន ម៉ាណែត បានបញ្ជាក់នូវជំហរយ៉ាងច្បាស់លាស់របស់កម្ពុជា នៅក្នុងការពូនជ្រំ និងបន្តពង្រឹងពង្រីកនូវទំនាក់ទំនងសហប្រតិបត្តិការរវាងកម្ពុជា និងបារាំង។
លោកបានថ្លែងថា៖ «ខ្ញុំសង្ឃឹមថា តាមរយៈការទស្សនកិច្ចផ្លូវការរបស់ខ្ញុំនៅពេលនេះ យើងទាំង២អាចជជែកគ្នានៅក្នុងការពង្រឹង និងពង្រីកនៃទំនាក់ទំនងប្រទេសយើងដោយអាចពិនិត្យលទ្ធភាពនៅក្នុងការលើកតម្កើងកម្រិតនៃសហប្រតិបត្តិការរវាងដៃគូរបស់យើងក្នុងប្រទេសយើងទាំង២ក្នុងភាពជាដៃគូរបស់យើង»។
លោកនាយករដ្ឋមន្ត្រី ហ៊ុន ម៉ាណែត បានលើកឡើងដោយមោទនភាពថា ទំនាក់ទំនងរវាងវិស័យឯកជន និងឯកជននៅក្នុងផ្នែកវិនិយោគ និងពាណិជ្ជកម្មនៃប្រទេសទាំង២បានកើនឡើងជាលំដាប់នៅលើគ្រប់វិស័យ។
លោកថា ៖ «ក្នុងន័យនេះ ខ្ញុំចង់ឃើញទំនាក់ទំនងផ្នែកវិនិយោគ និងពាណិជ្ជកម្មរបស់ប្រទេសយើងទាំង២កាន់តែមានការកើនឡើង នៅក្នុងទំហំនៃទំនាក់ទំនងរបស់យើងមានការកើនឡើងទ្វេដងថែមទៀត»។
លោក ហ៊ុន ម៉ាណែត បញ្ជាក់បន្ថែមថា ៖ «ខ្ញុំសង្ឃឹមថា ដំណើរទស្សនកិច្ចរបស់ខ្ញុំនៅប្រទេសបារាំងនាពេលនេះ ជាពិសេសជំនួបជាមួយនឹងប្រធានាធិបតីនឹងអាចឱ្យយើងជជែកគ្នានៅក្នុងកិច្ចការងារដែលត្រូវបន្តទៅទៀត នៅក្នុងការពង្រឹងទំនាក់ទំនងរវាងកម្ពុជា និងបារាំង»។
សូមបញ្ជាក់ដែរថា លោកនាយករដ្ឋមន្ត្រី ហ៊ុន ម៉ាណែត បំពេញទស្សនកិច្ចផ្លូវការនៅសាធារណរដ្ឋបារាំង ពីថ្ងៃទី១៨-១៩ ខែមករា ឆ្នាំ២០២៤៕
