កិច្ចប្រជុំមន្ត្រី ប.ស.ស។ រូបថត NSSF
ភ្នំពេញៈ អគ្គនាយកបេឡាជាតិសន្តិសុខសង្គមស្តីទី នៃក្រសួងការងារ និងបណ្តុះបណ្តាលវិជ្ជាជីវៈ លោក ម៉េង ហុង លើកឡើងថា ការផ្តល់សេវា និងដោះស្រាយបញ្ហាប្រឈមជូនសមាជិករបស់របបបេឡាសន្តិសុខសង្គម (ប.ស.ស) ឱ្យបានឆាប់រហ័ស ជារឿងសំខាន់និងចាំបាច់បំផុត ដែលត្រូវរួមគ្នាធ្វើ ជាពិសេសនាយកដ្ឋានជំនាញដែលទទួលបន្ទុក។
ការលើកឡើងបែបនេះ ធ្វើឡើងនៅក្នុងកិច្ចប្រជុំផ្ទៃក្នុងស្តីពីការដោះស្រាយបណ្តឹង និងបញ្ហាប្រឈមរបស់សមាជិក ប.ស.ស នៅថ្ងៃទី២ ខែមករា ឆ្នាំ២០២៤ ដោយមានវត្តមានចូលរួមពីថ្នាក់ដឹកនាំ រួមទាំងមន្ត្រី និងបុគ្គលិកជំនាញសរុបប្រមាណជាង ២០ រូប។
តាមរយៈហ្វេសប៊ុកបេឡាជាតិរបបសន្តិសុខសង្គម លោក ម៉េង ហុង បានថ្លែងក្នុងអង្គប្រជុំថា៖ «បញ្ហារបស់បងប្អូនសមាជិក ប.ស.ស គឺជាបញ្ហារួមដែល ប.ស.ស ក៏ដូចជាមូលដ្ឋានសុខាភិបាលដែលបានចុះកិច្ចព្រមព្រៀងត្រូវរួមគ្នាពិនិត្យ និងដោះស្រាយឱ្យបានឆាប់រហ័ស ដោយផ្អែកលើគោលការណ៍ច្បាស់ស្តីពីរបបសន្តិសុខសង្គម ធ្វើយ៉ាងណាឱ្យបងប្អូនសមាជិកទទួលបានការផ្តល់សេវាប្រកបដោយភាពត្រឹមត្រូវ លឿនរហ័ស និងមានប្រសិទ្ធភាព»។
លោកបានបញ្ជាក់ទៀតថា ប.ស.ស មានតួនាទីផ្តល់សេវាជូនសមាជិកខ្លួន ដែលត្រូវធ្វើឱ្យបានឆាប់រហ័ស និងមានប្រសិទ្ធភាព បូករួមការដោះស្រាយបណ្តឹង ការដោះស្រាយរាល់បញ្ហាប្រឈមនានាដែលជារឿងចាំបាច់ និងមានសារៈសំខាន់ ជាពិសេសនាយកដ្ឋានជំនាញដែលពាក់ព័ន្ធទទួលបន្ទុកលើការងារទាំងនេះ។
ទន្ទឹមនឹងនេះ លោកអគ្គនាយកស្តីទី ប.ស.ស ក៏បានអំពាវនាវដល់សមាជិកទាំងឡាយ ត្រូវប្រញាប់ជួបជាមួយភ្នាក់ងារ ប.ស.ស ដែលនៅប្រចាំការតាមមន្ទីរពេទ្យ ឬអាចទំនាក់ទំនងទៅកាន់លេខ ១២៨៦ ឬអាចទំនាក់ទំនងតាមរយៈបណ្តាញសង្គម Facebook និង Telegram ផ្លូវការរបស់ ប.ស.ស បាន ក្នុងករណីជួបបញ្ហាប្រឈមនានា នៅពេលទៅទទួលសេវានៅតាមមូលដ្ឋានដៃគូសុខាភិបាលរបស់ ប.ស.ស ខណៈក្រុមការងារ ប.ស.ស រងចាំសម្របសម្រួល និងដោះស្រាយជូនឱ្យទាន់ពេលវេលាជានិច្ច។
លោក អាត់ ធន់ ប្រធានសហភាពការងារកម្ពុជា ថ្លែងថា កន្លងមកខាងក្រុមការងារ ប.ស.ស បានខិតខំសម្របសម្រួលឱ្យមានការផ្តល់សេវាសុខាភិបាលឱ្យកាន់តែប្រសើរជាងមុន បន្ទាប់ពីមានសំណូមពរ ជាពិសេសពីខាងក្រុមសហជីព ក៏ប៉ុន្តែបញ្ហានេះនៅតែចោទឡើងដោយសារកត្តាមន្ទីរពេទ្យដែលផ្តល់សេវាតាមរយៈ ប.ស.ស ភាគច្រើនមានការរើសអើង និងមិនសូវយកចិត្តទុកដាក់លើអ្នកជំងឺប្រើបណ្ណនេះប៉ុន្មានទេ។
លោកថ្លែងថា៖ «សេវាមន្ទីរពេទ្យត្រូវតែមានការពង្រឹងដើម្បីបញ្ឈប់ការរើសអើងអ្នកជំងឺ ប.ស.ស។ ពេលខ្លះ បញ្ហានេះមិនមែនជាឥរិយាបថគ្រូពេទ្យតែមួយមុខទេ ជាការរៀបចំដោយមន្ទីរពេទ្យ និងប្រធានមន្ទីរពេទ្យតែម្តង ដូចជា អ្នកជំងឺ ប.ស.ស រុញឱ្យទៅអគារផ្សេង អ្នកជំងឺទូទៅនៅអគារផ្សេង ហើយក្នុងហ្នឹងការប្រើប្រាស់សេវា ប.ស.ស គឺមិនសូវទទួលបានការយកចិត្តទុកដាក់ទេ»។
លោក អាត់ ធន់ ថ្លែងថា ចាប់ពីដើមឆ្នាំ២០២៤ តទៅ លោកនឹងបន្តតាមដានលើករណីភាពមិនប្រក្រតីនៅក្នុងសេវា ប.ស.ស នេះទៀត ជាពិសេសទៅលើករណីសម្រាលកូន ដោយកន្លងមក មានការលើកឡើងពីភាពអវិជ្ជមានថា គ្រូពេទ្យខ្លះបង្ខំឱ្យមានការវះកាត់សម្រាលកូន ដើម្បីទទួលបានប្រាក់កម្រៃពីកម្មការិនីផង និងពី ប.ស.ស ទៀតផង ដែលលោកនឹងធ្វើតួលេខពីករណីទាំងនេះទៅកាន់ក្រសួងការងារ។
ដើម្បីពង្រឹងសេវា ប.ស.ស កាន់តែប្រសើរនៅឆ្នាំថ្មី២០២៤ នេះ លោកអាត់ ធន់ សំណូមពរដល់ក្រសួងការងារ និងនាយកដ្ឋាន ប.ស.ស ធ្វើការស្រាវជ្រាវ និងវាយតម្លៃ ក្នុងន័យពង្រឹងសេវារបស់ខ្លួន ជាពិសេសពង្រឹង ចំពោះក្រមសីលធម៌ និងវិជ្ជាជីវៈរបស់គ្រូពេទ្យ និងមន្ទីរពេទ្យ ទាំងមូល ចៀសវាងមានការរើសអើង និងមិនយកចិត្តទុកដាក់លើអ្នកជំងឺក្របខ័ណ្ឌប.ស.ស ដែលអាចពង្រឹងចេញពីមន្ទីរពេទ្យរដ្ឋធំៗ ហើយបន្តពង្រឹងទៅតាមដៃគូមូលដ្ឋានសុខាភិបាលនៅតាមបណ្តាខេត្ត៕
