ក្រុមហ៊ុន ១ កំពុងបណ្តុះបណ្តាលពលករទៅធ្វើការនៅប្រទេសជប៉ុន។ រូបថត AEJC
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈនៅថ្ងៃទី ២ ខែមករា ឆ្នាំ ២០២៤ បានបង្ហាញពីឈ្មោះទីភ្នាក់ងារជ្រើសរើសពលករចំនួន ៤១៩ ក្រុមហ៊ុន ដែលទទួលបានការអនុញ្ញាតក្នុងការជ្រើសរើសបណ្តុះបណ្តាល និងបញ្ជូន ពលករខ្មែរទៅធ្វើការនៅក្រៅប្រទេសរួមមាន ជប៉ុន ថៃ ម៉ាឡេស៊ី កាតា កូវ៉ែត សិង្ហបុរី ហុងកុងនិងអារ៉ាប៊ីសាអ៊ូឌីត។
យោងតាម សេចក្តីជូនដំណឹងស្តីពីទីភ្នាក់ងារជ្រើសរើសឯកជន ដែលបានទទួលការអនុញ្ញាតឱ្យធ្វើការជ្រើសរើសបណ្តុះបណ្តាល បញ្ជូន និងគ្រប់គ្រងពលករខ្មែរទៅធ្វើការនៅព្រះរាជាណាចក្រអារ៉ាប៊ីសាអ៊ូឌីត ចុះថ្ងៃទី ២៦ ខែធ្នូ ឆ្នាំ ២០២៣ ឱ្យដឹងថា៖ «រាល់ទីភ្នាក់ងារជ្រើសរើសឯកជនទាំងឡាយណាដែលពុំមានឈ្មោះក្នុងបញ្ជីនេះ គឺចាត់ទុកថា ជាទីភ្នាក់ងារជ្រើសរើសឯកជនខុសច្បាប់។ ដូច្នេះសូមសាធារណជនរាយការណ៍ជាបន្ទាន់ មកទូរស័ព្ទលេខ ០១៥ ៧៨៦ ៩៨៨ និងទំនាក់ទំនងមន្ទីរការងារ ទាំង ២៥ រាជធានី ខេត្ត នៅរៀងរាល់ម៉ោងធ្វើការ ឬពិនិត្យមើលបញ្ជីឈ្មោះក្រុមហ៊ុនដែលមាននៅក្នុងគេហទំព័ររបស់ក្រសួងការងារនិងបណ្តុះបណ្តាលវិជ្ជាជីវៈ www.mlvt.gov.kh»។
លោកស្រី រាជ សំណាង អគ្គនាយិកា ក្រុមហ៊ុន អ៊ែកស៊ល អេស៊ា យូមេនរីសសស៍ (AAHR) ដែលជាទីភ្នាក់ងារជ្រើសរើសឯកជនស្របច្បាប់មួយក្នុងចំណោមជាង ៤០០ ក្រុមហ៊ុននេះ បានប្រាប់ឱ្យដឹងថា ក្រុមហ៊ុនលោកស្រី មានបទពិសោធន៍ក្នុងការបញ្ជូនកម្មសិក្សាការី ទៅសិក្សា និងធ្វើការនៅប្រទេសជប៉ុន ជាង ១០ ឆ្នាំមកហើយ ដោយកម្មសិក្សាការីម្នាក់អាចចំណាយចន្លោះពី ១ ៥០០ ដុល្លារ ទៅ ៣ ៧០០ ដុល្លារ អាស្រ័យទៅលើពេលវេលាបណ្តុះបណ្តាល។
កម្មសិក្សាការី ដែលក្រុមហ៊ុនបញ្ជូនទៅធ្វើការនៅប្រទេសជប៉ុនក្រៅពីទទួលបានប្រាក់បៀវត្សរ៍ហើយ ក៏ទទួលបានចំណេះដឹង និងជំនាញជាប់ខ្លួន ដែលអាចយមកប្រើប្រាស់បាន នៅពេលពួកគេត្រឡប់មកស្រុកកំណើតវិញ។
លោកស្រី រាជ សំណាង បញ្ជាក់ថា៖ «អ្វីដែលពិសេសមួយទៀតក្រៅពីចំណេះជំនាញលើការងារដែលគាត់បានបម្រើការនៅប្រទេសជប៉ុន គាត់ក៏ទទួលបានចំណេះដឹងភាសាជប៉ុនមួយទៀតយ៉ាងស្ទាត់ជំនាញ ដោយពេលត្រឡប់មកស្រុកខ្មែរគាត់អាចធ្វើការងារនៅតាមក្រុមហ៊ុនជប៉ុននានាដែលទទួលបានប្រាក់កម្រៃខ្ពស់»។
ចំណែក លោក សុខ លាភ ប្រធានទីភ្នាក់ងារសុខ លាភ មេត្រី ដែលមានសិទ្ធិជ្រើសរើសបណ្តុះបណ្តាល បញ្ជូន និងគ្រប់គ្រងពលករខ្មែរទៅធ្វើការ នៅប្រទេសអារ៉ាប៊ីសាអ៊ូឌីត ក៏បានប្រាប់ឱ្យដឹងដែរថា ពលករដែលមានឱកាសចេញទៅបម្រើការងារនៅប្រទេសអារ៉ាប៊ីសាអ៊ូឌីតទទួលបានប្រាក់ខែខ្ពស់និងលក្ខខណ្ឌការងារល្អប្រសើរ។
លោកបញ្ជាក់ថា៖ «ដើម្បីទទួលបានឱកាសចេញទៅបម្រើការងារនៅក្រៅប្រទេស បងប្អូនយើងគួរជ្រើសរើសយកក្រុមហ៊ុនស្របច្បាប់ មានការទទួលស្គាល់ពីក្រសួងការងារ ចៀសវាងទៅតាមមេខ្យល់ខុសច្បាប់ ចាញ់បោកគេ។ ដូច្នេះខ្ញុំលើកទឹកចិត្តឱ្យពលរដ្ឋយើងព្យាយាមទាក់ទងក្រុមហ៊ុនណា ដែលស្របច្បាប់ និងមានបទពិសោធន៍នាំចេញពលករទៅក្រៅប្រទេស ចៀសវាងកើតមានបញ្ហាណាមួយ»។
បើតាមក្រសួងការងារ កម្ពុជាបានខិតខំពង្រឹង និងពង្រីកកិច្ចសហការជាមួយបណ្តាប្រទេសទទួល ដោយពង្រីកឱកាសការងារបន្ថែមជូនប្រជាពលរដ្ឋនៅក្រៅប្រទេសប្រមាណ ១,៣ លាននាក់និងបានប្រាក់បញ្ញើបញ្ជូនមកប្រទេសវិញប្រមាណ ២,៧ ពាន់លានដុល្លារ ក្នុង ១ ឆ្នាំ។
ជាមួយគ្នានោះ ក្រសួងក៏បានបង្កើនការការពារពលករទេសន្តរប្រវេសន៍ ដោយបានពង្រឹងសេវាអនុព័ន្ធការងារអមស្ថានឯកអគ្គរាជទូតកម្ពុជា ព្រមទាំងសហការយ៉ាងជិតស្និទ្ធជាមួយមជ្ឈមណ្ឌលគាំពារពលករបរទេស តាមបណ្តាប្រទេសគោលដៅ,បន្តពង្រឹងយន្តការចុះត្រួតពិនិត្យនិងធ្វើអធិការកិច្ចការងារទីភ្នាក់ងារជ្រើសរើសឯកជន,ផ្ដល់ការគាំទ្រ និងភាពងាយស្រួលជូនពលករពេលធ្វើ ការនៅក្រៅប្រទេស តាមរយៈការសម្រួលបែបបទឯកសារ, ការគាំពារតាមផ្លូវច្បាប់, អន្តរាគមន៍សង្គ្រោះនៅពេលមានហានិភ័យនានា។ ក្រៅពីនេះក្រសួង ក៏បានជួយអន្តរាគមន៍សម្របសម្រួលពលករ និងដោះស្រាយបញ្ហាទូទៅរបស់ពលករជួបការលំបាក (២០១៨-២០២២) សរុបបានចំនួន ១៤ ៨៥១ ករណី៕
