ទីភ្នាក់ងារបារាំងសម្រាប់អភិវឌ្ឍន៍ (AFD) បានចុះហត្ថលេខាលើកិច្ចព្រមព្រៀងផ្តល់ហិរញ្ញប្បទានដល់កម្ពុជាក្នុងទំហំទឹកប្រាក់ដ៏ច្រើនមិនធ្លាប់មានពីមុនមក គឺចំនួន ២១៥ លានអឺរ៉ូ ដែលស្មើនឹងប្រមាណ ២៣៥ លានដុល្លារ សម្រាប់អភិវឌ្ឍន៍លើវិស័យសំខាន់ៗចំនួន ៣ គឺវិស័យទឹកស្អាត ថាមពល និងការបណ្តុះបណ្តាលវិជ្ជាជីវៈ។
ពិធីចុះហត្ថលេខានេះធ្វើឡើងរវាងក្រសួងសេដ្ឋកិច្ច និងហិរញ្ញវត្ថុ និងទីភ្នាក់ងារបារាំងសម្រាប់អភិវឌ្ឍន៍(AFD) កាលពីថ្ងៃទី១៨ ខែមករា ឆ្នាំ២០២៤ នៅឯទីក្រុងប៉ារីស ក្នុងអំឡុងដំណើរទស្សនកិច្ចផ្លូវការនៅប្រទេសបារាំងរបស់លោកនាយករដ្ឋមន្ត្រី ហ៊ុន ម៉ាណែត និងគណៈប្រតិភូជាន់ខ្ពស់ជាច្រើនរូបទៀត។
សេចក្តីប្រកាសព័ត៌មានរួម បានគូសបញ្ជាក់ថា៖«ហិរញ្ញប្បទានទាំងនេះ នឹងជួយទ្រទ្រង់ការផ្លាស់ប្តូររបស់កម្ពុជាឆ្ពោះទៅកាន់សេដ្ឋកិច្ចដែលមានលក្ខណៈលូតលាស់ប្រកបដោយបរិយាបន្ន និងចីរភាព ក្នុងវិស័យអាទិភាពចំនួន៣ ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល»។
ក្នុងពិធីចុះហត្ថលេខាខាងលើ លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុកម្ពុជា បានលើកឡើងអំពីទំនាក់ទំនងទ្វេភាគីប្រកបដោយចីរភាព និងរឹងមាំ ធ្វើឡើងដោយទីភ្នាក់ងារ AFD ជាច្រើនឆ្នាំកន្លងមក។
លោកបានបញ្ជាក់ថា៖«ក្នុងពេលដែលប្រទេសកម្ពុជាបានឆ្លងកាត់ដំណាក់កាលដំបូងៗនៃការអភិវឌ្ឍ យើងកំពុងស្ថិតលើមាគ៌ាមួយដ៏ល្អប្រសើរ ដើម្បីធ្វើការលើវិស័យផ្គត់ផ្គង់ទឹកស្អាត ថាមពល និងការអភិវឌ្ឍមនុស្ស។ បញ្ហាប្រឈមនៃការអភិវឌ្ឍអាចត្រូវបានដោះស្រាយ ដើម្បីផ្តល់ផលវិជ្ជមានដល់កំណើនសេដ្ឋកិច្ចរបស់យើង។ ដោយមានការគាំទ្ររឹងមាំពីទីភ្នាក់ងារ AFD សេដ្ឋកិច្ចកម្ពុជាកំពុងត្រូវបានពង្រឹង បានឆ្លងកាត់បញ្ហាប្រឈមសកល ហើយបន្តឆ្ពោះទៅមុខដើម្បីសម្រេចបានជោគជ័យថ្មីៗទៀត»។
លោកបន្ថែមថា ក្រសួងសេដ្ឋកិច្ច និងហិរញ្ញវត្ថុនឹងបន្តផ្តល់ការគាំទ្រយ៉ាងសកម្មដល់វិស័យអាទិភាពនៃការអភិវឌ្ឍ ជាពិសេសឧស្សាហកម្មនុវានុវត្តន៍ ឌីជីថល និងបច្ចេកវិទ្យាខ្ពស់ ដែលតម្រូវឱ្យមានការបង្កើតថ្មី ឬការស្រាវជ្រាវ និងការអភិវឌ្ឍ ហើយទាក់ទាញការវិនិយោគពីវិស័យឯកជននៅកម្ពុជា។ លោកបង្ហើបថា កម្ពុជាចង់ឃើញកិច្ចសហការថ្មីៗលេចចេញជារូបរាងឡើង ដើម្បីបង្កើតបរិស្ថានជីវិតមួយដ៏ខ្លាំងក្លា រឹងមាំ និងប្រកបដោយគុណភាពសម្រាប់ប្រជាពលរដ្ឋ។
ជាមួយគ្នានោះដែរ លោកស្រី Marie-Hélène Loison អគ្គនាយិការងទីភ្នាក់ងារ AFD បានប្រកាសថា ក្នុងឱកាសនៃខួប៣០ឆ្នាំរបស់ទីភ្នាក់ងារ AFD នៅកម្ពុជា គម្រោងទាំង៣នេះគឺជាដំណាក់កាលថ្មីមួយនៃទំនាក់ទំនងរវាងប្រទេសយើងទាំងពីរ ដោយឆ្លុះបញ្ចាំងឱ្យឃើញពីឆន្ទៈរបស់ទីភ្នាក់ងារ AFD ក្នុងការពង្រឹងភាពជាដៃគូជាមួយកម្ពុជា ដើម្បីគាំទ្រដល់ហេដ្ឋារចនាសម្ព័ន្ធប្រកបដោយចីរភាព និងមានភាពធន់ជាមួយអាកាសធាតុ ក៏ដូចជាការអភិវឌ្ឍធនធានមនុស្សនៅកម្ពុជា។
លោកស្រីបានបញ្ជាក់ថា៖«នៅឆ្នាំ២០២៤ ទីភ្នាក់ងារបារាំងសម្រាប់អភិវឌ្ឍន៍នឹងបន្តសកម្មភាពរបស់ខ្លួននៅក្នុងវិស័យថាមពល ទឹក ទឹកស្អាត ធនធានមនុស្ស និងការអភិវឌ្ឍជនបទ ដើម្បីផ្តល់អត្ថប្រយោជន៍ដល់ប្រជាពលរដ្ឋកម្ពុជា»។
សូមបញ្ជាក់ថា ហិរញ្ញប្បទាន ដែលផ្តល់ដោយទីភ្នាក់ងារបារាំងសម្រាប់អភិវឌ្ឍន៍(AFD) ក្នុងវិស័យទឹកស្អាត គឺក្នុងចំនួន១២០លានអឺរ៉ូ ឬប្រមាណ១៣១លានដុល្លារ នឹងអនុញ្ញាតឱ្យមានការចាប់ផ្តើមដំណាក់កាលទី៣នៃរោងចក្រចម្រោះទឹកស្អាតបាក់ខែង ដែលគ្រប់គ្រងដោយ រដ្ឋាករទឹកស្វយ័តក្រុងភ្នំពេញ។ ជាមួយសមត្ថភាពផ្គត់ផ្គង់ទឹកស្អាតសរុប៦០០ ០០០ម៉ែត្រគុបក្នុងមួយថ្ងៃ រោងចក្រប្រព្រឹត្តិកម្មទឹកស្អាតនេះនឹងក្លាយទៅជារោងចក្រផលិតទឹកស្អាតធំបំផុតមួយនៅអាស៊ីអាគ្នេយ៍ ហើយក៏ជាស្ថានីយកម្រិតពិភពលោកមួយផងដែរ លើផ្នែកគុណភាពនៃសំណង់ បច្ចេកវិទ្យា ប្រសិទ្ធភាពថាមពល និង គុណភាពទឹកដែលត្រូវបានផលិត។
ប្រភពដដែលបញ្ជាក់ទៀតថា៖«សមត្ថភាពនេះនឹងឆ្លើយតបជាមួយតម្រូវការប្រើប្រាស់ទឹកស្អាតការដែលចេះតែកើនឡើងជាលំដាប់របស់ប្រជាពលរដ្ឋ និងក្រុមហ៊ុនសហគ្រាសនានានៅរាជធានីភ្នំពេញ និងតាមតំបន់ជាយរាជធានី។ ការផ្តល់ហិរញ្ញប្បទានបន្ថែមរបស់ទីភ្នាក់ងារ AFD ដែលមានចំនួន៨០លានអឺរ៉ូ គ្រោងធ្វើឡើងសម្រាប់ឆ្នាំ២០២៤ ដើម្បីបង្កើន ជួសជុល និងពង្រីកបណ្តាញបញ្ជូន និងចែកចាយទឹកស្អាត»។
ចំណែកនៅក្នុងវិស័យថាមពលវិញ ហិរញ្ញប្បទានក្រោមរូបភាពជាកម្ចីរបស់ AFD ចំនួន៧០លានអឺរ៉ូ (ប្រមាណ៧៨លានដុល្លារ) នឹងអនុញ្ញាតឱ្យអគ្គិសនីកម្ពុជាបង្កើនទំនុកចិត្ត និងប្រសិទ្ធភាពបណ្តាញបញ្ជូនអគ្គិសនី តាមរយៈការដាក់ពង្រាយអនុស្ថានីយឌីជីថលទីមួយនៅកម្ពុជា។
សេចក្តីប្រកាសព័ត៌មាននេះបានបញ្ជាក់ថា៖«ស្របតាមគោលដៅជាតិក្នុងការបង្កើនការប្រើប្រាស់ថាមពលកកើតឡើងវិញឱ្យបាន៧០%ក្នុងឆ្នាំ២០៣០ គម្រោងនេះនឹងធ្វើឱ្យអគ្គិសនីកម្ពុជាមានសមត្ថភាពខ្ពស់ក្នុងការស្តុកថាមពល (៧៥មេហ្កាវ៉ាត់ម៉ោង គឺស្ថិតក្នុងចំណោមសមត្ថភាពស្តិកថាមពលខ្ពស់បំផុតក្នុងតំបន់) ដើម្បីពន្លឿនសមាហរណកម្មប្រភពថាមពលកកើតឡើងវិញ ដូចជាថាមពលព្រះអាទិត្យ និងថាមពលខ្យល់។ ក្នុងន័យនេះ បណ្តាញអគ្គិសនីជាតិរបស់កម្ពុជានឹងកាន់តែការពារបរិស្ថាននិងធ្វើឱ្យអ្នកប្រើប្រាស់កាន់តែមានទំនុកចិត្ត»។
ដោយឡែក ក្នុងវិស័យបណ្តុះបណ្តាលវិជ្ជាជីវៈវិញ ហិរញ្ញប្បទានក្រោមរូបភាពជាកម្ចីរបស់ទីភ្នាក់ងារ AFD ចំនួន២៥លានអឺរ៉ូ (២៧លានដុល្លារ) ដែលបន្ថែមលើប្រាក់៨០លានដុល្លារផ្តល់ដោយធនាគារអភិវឌ្ឍន៍អាស៊ី នឹងអនុញ្ញាតឱ្យមានការពង្រឹងការបណ្តុះបណ្តាលវិជ្ជាជីវៈកម្រិតខ្ពស់មួយ តាមរយៈក្រសួងការងារ និងបណ្តុះបណ្តាលវិជ្ជាជីវៈ ព្រមទាំងជួយអភិវឌ្ឍធនធានមនុស្ស និងគាំទ្រដល់ការប្រែក្លាយសេដ្ឋកិច្ចកម្ពុជាឆ្ពោះទៅកាន់សេដ្ឋកិច្ចដែលផ្តោតលើឧស្សាហកម្ម គាំទ្រដោយបច្ចេកវិទ្យា និងវិទ្យាសាស្ត្រ។ ការផ្តល់ហិញ្ញប្បទាននេះនឹងជួយដល់ការបណ្តុះបណ្តាល ប្រជាពលរដ្ឋកម្ពុជា ដើម្បីទទួលបានការងារនៅពេលអនាគត ជាពិសេសក្នុងវិស័យការងារបៃតង និងមុខអាជីពឌីជីថល ក្នុងក្របខ័ណ្ឌនៃគម្រោង Global Gatway របស់សហភាពអឺរ៉ុបនៅកម្ពុជា ដែលមានឈ្មោះថា «ភាពជាដៃគូដើម្បីការអប់រំសម្រាប់ការងារបៃតង និងឌីជីថល»។ នេះបើតាមសេចក្តីប្រកាសព័ត៌មានបញ្ជាក់៕
