រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកកិច្ចការការបរទេស និងសហប្រតិបត្តិការអន្តរជាតិលោក តាន់ ហ្សង់ហ្វ្រង់ស័រ ។ រូបថត ក្រសួងព័ត៌មាន
រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកកិច្ចការការបរទេស និងសហប្រតិបត្តិការអន្តរជាតិលោក តាន់ ហ្សង់ហ្វ្រង់ស័រ បានថ្លែងថា ការធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីនៅឆ្នាំ ២០២៦ ខាងមុខ ជាឱកាសសម្រាប់កម្ពុជាអាចបង្ហាញមុខមាត់របស់ខ្លួនបែបថ្មីទៅកាន់ឆាកអន្តរជាតិ ពីវឌ្ឍនភាពនៃប្រទេសកម្ពុជា ដើម្បីប្រាប់ពិភពលោកថា កម្ពុជាមិនមែនជាប្រទេសហែកហួរគ្នាដោយសង្គ្រាមទៀតនោះទេ។
លោកបានលើកឡើងបែបនេះតាមរយៈសន្និសីទកាសែតនៅថ្ងៃទី ២០ ខែមករា ឆ្នាំ២០២៤ ស្តីពីលទ្ធផលនៃដំណើរទស្សនកិច្ចរបស់លោកនាយករដ្ឋមន្ត្រី ហ៊ុន ម៉ាណែត ទៅកាន់បារាំង និងស្វ៊ីស កន្លងទៅថ្មីៗនេះ។
លោក តាន់ ហ្សង់ហ្វ្រង់ស័រ បានថ្លែងថា៖ «អង្គការហ្វ្រង់កូហ្វូនីមានសមាជិករហូតជិត ១០០ ប្រទេស បើសិនជាកិច្ចប្រជុំកំពូលហ្វ្រង់កូហ្វូនីធ្វើនៅកម្ពុជា នោះនឹងមានគណៈប្រតិភូជិត ១០០ ប្រទេសមកចូលរួមនៅកម្ពុជា ដែលជាលទ្ធភាពអាចឱ្យពិភពលោកឃើញកម្ពុជាក្នុងគន្លងថ្មី ដែលនេះជាអ្វីដែលសម្តេចតេជោហ៊ុន សែន អតីតនាយករដ្ឋមន្ត្រីតែងគិតប្រាថ្នា»។
លោកបានសង្កត់ធ្ងន់ថា៖ «កម្ពុជាបែបថ្មី កម្ពុជាមិនមែនជាប្រទេស ហែកហួរដោយសង្គ្រាមទៀតទេ កម្ពុជាមិនមែនជាប្រទេសក្ររហាមដូចកាលចាកចេញពីសម័យខ្មែរក្រហម ភ្លាមៗទេ កម្ពុជាពិតមែនតែនៅជាប្រទេសដែលត្រូវការជំនួយបរទេសនៅឡើយ ក៏ប៉ុន្តែកម្ពុជាគួរតែមានការផ្លាស់ប្ដូរនៅក្នុងស្មារតីរបស់បណ្ដាបរទេស»។
លោកបានបន្តថា កិច្ចប្រជុំនៅឆ្នាំ ២០២៦ អាចជាលទ្ធភាពបើកផ្លូវឱ្យពិភពលោកសម្លឹងឃើញកម្ពុជាក្នុងផ្លូវថ្មី ចំពោះកម្ពុជាដែលកំពុងក្លាយជាទីតាំងនៃការធ្វើវិនិយោគ ហើយកម្ពុជានឹងក្លាយទៅជាដៃគូពាណិជ្ជកម្មពេញមុខមាត់ដូចបណ្តាប្រទេសផ្សេងៗដែរ សំខាន់ស្ថិរភាពសង្គមកម្ពុជា។
លោក ជ័យ តិច អ្នកស្រាវជ្រាវការអភិវឌ្ឍសង្គម បានប្រាប់ឱ្យដឹងថា សន្និសីទហ្វ្រង់កូហ្វូនីរៀបចំធ្វើរៀងរាល់ ២ ឆ្នាំម្តង ដែលក្នុងឆ្នាំ ២០២៤ នេះបារាំងធ្វើជាម្ចាស់ផ្ទះ ហើយកម្ពុជាជជែកជាមួយភាគីបារាំងដើម្បីបើកលទ្ធភាពរៀបចំធ្វើជាម្ចាស់ផ្ទះនៅឆ្នាំ ២០២៦ ខាងមុខ ដែលអាចពង្រឹងសាមគ្គីភាពក្នុងចំណោមបណ្តាប្រទេសជាសមាជិកហ្វ្រង់កូហ្វូនីជិត ៥០ ប្រទេស ក្នុងនោះមានប្រទេសធំៗតួយ៉ាង បារាំង កាណាដា និងស្វ៊ីស ប្រទេសនៅអាស៊ីមួយចំនួន និងបណ្តាប្រទេសពីតំបន់អាហ្វ្រិក ជាដើម។
លោកសង្កត់ធ្ងន់ថា៖ «បើយើងធ្វើជាម្ចាស់ផ្ទះ វាជាការពង្រឹងផ្នែកការទូត លើកមុខមាត់កម្ពុជាលើឆាកអន្តរជាតិ ជាពិសេសពង្រឹងទំនាក់ទំនងជាមួយបណ្តាប្រទេសជាសមាជិក។ បន្ថែមពីនេះ គឺផលប្រយោជន៍ទំនាក់ទំនងវប្បធម៌ និងទេសចរណ៍ ដែលកម្ពុជាអាចទទួលជំនួយបន្ថែមលើការអភិរក្សសម្បត្តិវប្បធម៌។ យើងក៏អាចផ្សាយសក្តានុពលផ្នែកទេសចរណ៍យើងទៅលើពិភពលោក»។
លោក ជ័យ តិច ថ្លែងថា កិច្ចប្រជុំកំពូលខាងមុខនេះ ក៏ជាការបើកផ្លូវដល់ទំនាក់ទំនងពាណិជ្ជកម្ម ដែលបណ្តាប្រទេសសមាជិកអាចស្វែងយល់ពីលទ្ធភាពវិនិយោគនៅកម្ពុជា ហើយកម្ពុជាក៏នឹងអាចទទួលជំនួយលើវិស័យអប់រំពាក់ព័ន្ធចំណេះភាសាបារាំង ជាមួយនឹងជំនួយការអភិវឌ្ឍនានាផ្សេងទៀតពីបណ្តាប្រទេសអ្នកមាន ជាសមាជិក ជាពិសេសនោះគឺផ្នែកបច្ចេកវិទ្យាឌីជីថលដែលជាមុខព្រួញនៃរដ្ឋាភិបាលកម្ពុជាអាណត្តិថ្មី។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ថ្លែងថា ចំជាកិត្តិយសធំធេងរបស់កម្ពុជាដែលអាចធ្វើជាម្ចាស់ផ្ទះកិច្ចប្រជុំកំពូលហ្វ្រង់កូហ្វូនីសម្រាប់ទាំងឆាកតំបន់ និងពិភពលោក ហើយជាឆ្អឹងខ្នងធំសម្រាប់លើកកម្ពស់ទំនាក់ទំនងទ្វេភាគីកម្ពុជា-បារាំង និងទំនាក់ទំនងកម្ពុជា-សហភាពអឺរ៉ុប ខណៈបារាំងអាចជាស្ពានចម្លងសម្រាប់កម្ពុជា។
លោកបានបន្ថែមថា ការធ្វើជាម្ចាស់ផ្ទះនេះ កម្ពុជាអាចធ្វើការផ្សព្វផ្សាយពីសក្តានុពលរបស់ប្រទេសខ្លួនទៅកាន់ពិភពលោកបានដឹង ជាពិសេសជុំវិញរូបភាពទេសចរណ៍ ខណៈមានគណៈប្រតិភូច្រើនចូលមកកម្ពុជា ក្នុងនោះមានវត្តមានអ្នកសារព័ត៌មាន ប្រព័ន្ធផ្សព្វផ្សាយជាច្រើនដែរ។
លោកថ្លែងដោយចង់ឱ្យរដ្ឋាភិបាលប្រើប្រាស់កិច្ចប្រជុំនេះ ដើម្បីជំរុញវិស័យអប់រំភាសាបារាំងនៅកម្ពុជា ខណៈវាមានការធ្លាក់ចុះនៅប៉ុន្មានឆ្នាំចុងក្រោយ ហើយបើអាចកែខៃកម្ពុជាឱ្យក្លាយទៅជាមជ្ឈមណ្ឌលបណ្តុះបណ្តាលភាសាបារាំងកម្រិតតំបន់មួយផងដែរ។
សូមបញ្ជាក់ដែរថា ថ្នាក់ដឹកនាំនៃប្រទេសកម្ពុជា និងប្រទេសបារាំង បានលើកឡើងនូវការយកចិត្តទុកដាក់ដល់ការលើកកម្ពស់អង្គការហ្វ្រង់កូហ្វូនី ដែលកម្ពុជាជាសមាជិកស្ថាបនិកដ៏សកម្មមួយ និងរួមគ្នាជំរុញវត្តមានភាសាបារាំងនៅកម្ពុជា ដែលមានអ្នកនិយមនិយាយភាសាបារាំងច្រើនជាងគេក្នុងចំណោមបណ្តាប្រទេសនៅអាស៊ី។
ប្រធានាធិបតីបារាំង លោក អេម៉ានុយអែល ម៉ាក្រុង បានបង្ហាញជំហរគាំទ្រពេញទំហឹង ចំពោះបេក្ខភាពកម្ពុជាក្នុងការធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីលើកទី២០ នៅទីក្រុងភ្នំពេញ ឆ្នាំ ២០២៦ ខាងមុខ។
ចំណែកលោក ហ៊ុន ម៉ាណែត ក៏បានលើកឡើងដែរថា កម្ពុជាកំពុងត្រៀមខ្លួនរៀបចំព្រឹត្តិការណ៍ដ៏សំខាន់នេះផងដែរ។ នៅក្នុងក្របខ័ណ្ឌនៃការជំរុញ និងលើកកម្ពស់ភាសាបារាំងដែលជាអាទិភាពសំខាន់មួយរបស់បារាំង លោក ហ៊ុន ម៉ាណែត ក៏បានប្រាប់លោក ម៉ាក្រុង នូវគំនិតផ្តួចផ្តើមផ្ទាល់របស់លោកថា ភាគីបារាំងអាចពិនិត្យលទ្ធភាព បង្កើតមជ្ឈមណ្ឌលវប្បធម៌ និងភាសាប្រចាំតំបន់នៅកម្ពុជា តាមរយៈការលើកទឹកចិត្តដល់ការវិនិយោគតាមរូបមន្តភាពជាដៃគូរវាងរដ្ឋ និងឯកជន (PPP)៕
