ជំនួបរវាងលោក ហ៊ុន សែន និងលោក តូ ឡឹម នៅវិមាន ៧មករា រាជធានីភ្នំពេញ នៅថ្ងៃទី២៣ ខែមករា ឆ្នាំ២០២៤។ រូបថត SHS Media
កម្ពុជា-វៀតណាម បានព្រមព្រៀងបន្តពង្រឹង និងពង្រីកទំនាក់ទំនងលើវិស័យសន្តិសុខរវាងប្រទេសទាំង២ ក្នុងនោះបានឯកភាពគ្នាមិនឱ្យមានកម្លាំងប្រដាប់អាវុធ ឬចលនានយោបាយប្រើប្រាស់ទឹកដីនៃប្រទេស១ ដើម្បីប្រឆាំងរដ្ឋាភិបាលស្របច្បាប់នៃប្រទេស១ទៀតនោះទេ។ នេះបើយោងតាមជំនួបដាច់ដោយឡែកនៅទីក្រុងភ្នំពេញកាលពីថ្ងៃទី២៣ ខែមករា ឆ្នាំ២០២៤ រវាងលោក លោក តូ ឡឹម សមាជិកការិយាល័យនយោបាយ មជ្ឈិមបក្សកុម្មុយនីស្តវៀតណាម ដែលជារដ្ឋមន្ត្រីក្រសួងនគរបាលវៀតណាម ជាមួយលោក ហ៊ុន សែន ប្រធានគណបក្សប្រជាជនកម្ពុជា និងលោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
យោងតាមខ្លឹមសារនៃជំនួបរវាងលោក ហ៊ុន សែន និងលោក តូ ឡឹម ដែលចេញផ្សាយនៅលើទំព័រហ្វេសប៊ុកលោកហ៊ុន សែន លោក ហ៊ុន សែន បានបញ្ជាក់ថា៖ «ទស្សនកិច្ចរបស់ប្រតិភូក្រសួងនគរបាលវៀតណាម នៅកម្ពុជានាពេលនេះ ពិតជាបានរួមចំណែកបន្ថែមទៀត ក្នុងការពង្រឹងនូវទំនាក់ទំនងរវាងគណបក្ស រដ្ឋាភិបាល និងប្រជាជន នៃប្រទេសទាំង២ ឲ្យកាន់តែរឹងមាំថែមទៀត»។
ប្រភពដដែលនេះបានឱ្យដឹងថា លោក តូ ឡឹម ក៏បានបញ្ជាក់ផងដែរថា គណបក្សកុម្មុយនីស្តវៀតណាម ក៏ដូចជាប្រជាជនវៀតណាម គាំទ្រយ៉ាងពេញទំហឹង ចំពោះការដឹកនាំរបស់គណបក្សប្រជាជនកម្ពុជា និងសាទរចំពោះវឌ្ឍនភាពនៃកិច្ចសហប្រតិបត្តិការគ្រប់វិស័យរវាងគណបក្សទាំង២។
លោក តូ ឡឺម បានបញ្ជាក់នៅក្នុងខ្លឺមសារនៃប្រភពដដែលនេះថា៖ «ទំនាក់ទំនងរវាងវិស័យសន្តិសុខនៃប្រទេសទាំង២គឺជាសសរស្ដម្ភដ៏រឹងមាំ ដែលយើងត្រូវតែបន្តពង្រឹងនិងពង្រីក ឱ្យកាន់តែរីកចម្រើនថែមទៀត ដើម្បីជាប្រយោជន៍ដល់ប្រទេស និងប្រជាជន នៃប្រទេសទាំង២»។
ក្នុងជំនួបរវាងលោក តូ ឡឹម និងលោក ស សុខា នៅថ្ងៃដដែលនេះដែរ ភាគីទាំង២ បានពិនិត្យនិងវាយតម្លៃលើសមិទ្ធផលកិច្ចសហប្រតិបត្តិការនាឆ្នាំ២០២៣ រវាងក្រសួងនគរបាលវៀតណាម និងក្រសួងមហាផ្ទៃកម្ពុជា និងបានចុះហត្ថលេខាលើផែនការកសហប្រតិបត្តិការឆ្នាំ២០២៤។
លោក ប៉ែន បូណា ប្រធានអង្គភាពអ្នកនាំពាក្យរដ្ឋាភិបាល បានថ្លែងឱ្យដឹងថា ការឯកភាពរវាងភាគីទាំង២ ចំពោះការមិនអនុញ្ញាតឱ្យមានកម្លាំងអមិត្តប្រើទឹកដីរៀងខ្លួនមកប្រឆាំងតបតប្រទេសនីមួយៗ មានសារៈសំខាន់ដែលជាគោលនយោបាយកសាងភាពសុខដុមរមនារវាងប្រទេសជិតខាង។
លោកថា កន្លងមកគណបក្សកាន់អំណាចកម្ពុជាមានគោលនយោបាយច្បាស់លាស់ក្នុងការកសាងព្រំដែនរវាងប្រទេសជិតខាងជាព្រំដែនមិត្តភាព កិច្ចសហប្រតិបត្តិការ និងការអភិវឌ្ឍ ដែលទាមទារឱ្យប្រទេសសងខាងមិនអនុញ្ញាតឱ្យប្រទេសខ្លូនជាទីជម្រករបស់ក្រុមប្រឆាំងនៃប្រទេសមួយទៀត។
លោក ប៉ែន បូណា បានប្រាប់ថា៖ «គោលនយោបាយគណបក្សប្រជាជនកម្ពុជាឈរលើគោលការណ៍បែបនេះ[កសាងព្រំដែនមិត្តភាព សន្តិភាព កិច្ចសហប្រតិបត្តិការ] អ៊ីចឹងហើយកម្ពុជាយើងមានទំនាក់ទំនងល្អជាមួយប្រទេសជិតខាងទាំងអស់ ដោយប្រែក្លាយព្រំដែនឱ្យទៅជាព្រំដែនមិត្តភាព សន្តិភាព កិច្ចសហប្រតិបត្តិការ និងការអភិវឌ្ឍ ដើម្បីភាពសុខសាន្តរួមគ្នា។
លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជាលើកឡើងថា ទំនាក់ទំនងនៃបក្សកាន់អំណាចទាំង២ ជាទំនាក់ទំនងយូរអង្វែង ហើយមានការប្រស្រ័យទាក់ទងគ្នាស្អិតល្មួតយូរយារមកហើយ ខណៈបានជួយគ្នាទៅវិញទៅមក ហើយនៅបន្តធ្វើការជាមួយគ្នាមកទល់សព្វថ្ងៃ នៅចំពោះមុខការកាន់អំណាចរដ្ឋយូរយារដូចគ្នា ខណៈកម្ពុជានៅតែបន្តដឹកនាំដោយគណបក្សប្រជាជនកម្ពុជា ហើយវៀតណាមជាប្រទេសសង្គមនិយមដឹកនាំដោយគណបក្សតែ១គត់គឺគណបក្សកុម្មុយនីស្តវៀតណាម។
លោកសង្កត់ធ្ងន់ថា៖ «ដ្បិតថា ប្រទេសទាំង២ មានទំនាក់ទំនងល្អនឹងគ្នាហើយក្តី ប៉ុន្តែត្រូវបង្កើនភាពជឿទុកចិត្តគ្នា និងតម្លាភាពចំពោះគ្នា ចំពោះទំនាក់ទំនងការបរទេស កិច្ចការព្រំដែន តួយ៉ាងបញ្ហាអធិបតេយ្យភាពជាដើម»។
លោកថា ប្រទេសទាំង២ ត្រូវតែបង្ហាញភាពស្មោះត្រង់នឹងគ្នាចំពោះទំនាក់ទំនងក្នុងនាមអ្នកជិតខាងល្អ មិត្តប្រកៀកស្មាគ្នា ដើម្បីជំរុញទំនាក់ទំនងនិងកិច្ចសហប្រតិបត្តិការបន្ថែមទៀត ចៀសវាងល្អតែក្នុងន័យនយោបាយ ប៉ុន្តែមិនមានក្នុងសកម្មភាពជាក់ស្តែង៕
