សមត្ថកិច្ចកំពុងសាកសួរបុរសអ្នកលេងល្បែងម្នាក់នៅភូមិសុខសាន សង្កាត់និមិត្ត ក្រុងប៉ោយប៉ែត បន្ទាប់ពីចុះបង្ក្រាប។ រូបថត នគរបាល
ភ្នំពេញៈ សមត្ថកិច្ចក្រសួងមហាផ្ទៃបានបង្ក្រាបល្បែងស៊ីសងសរុបបាន ៤៣ ទីតាំង នៅ ១៤ រាជធានី ខេត្តទូទាំងប្រទេស ក្នុងរយៈពេល២១ថ្ងៃ ចាប់ពីថ្ងៃទី១ ដល់ថ្ងៃទី២១ ខែមករា ឆ្នាំ២០២៤ ដោយបានបញ្ជូនជនសង្ស័យយ៉ាងហោចណាស់៧២នាក់ទៅតុលាការ។ នេះបើតាមលោក ទូច សុឃៈ អ្នកនាំពាក្យរងក្រសួងមហាផ្ទៃកាលពីថ្ងៃទី២២ ខែមករា។
ក្នុងចំណោម ទីតាំងដែលបង្ក្រាបបាននោះ ក៏សមត្ថកិច្ចចាត់វិធានការរដ្ឋបាលទៅលើការបង្ក្រាបចំនួន១៧ទីតាំងផងដែរ នៅក្នុង ៤ រាជធានី-ខេត្ត។ ក្នុងនោះរួមមាននីតិវិធីអប់រំ ណែនាំ និងធ្វើកិច្ចសន្យាបញ្ឈប់ចំនួន៣០នាក់។
លោក ទូច សុឃៈ បានបញ្ជាក់ថា«ក្រោមគតិបណ្ឌិត ‘សម្អាតផ្ទះយើង’ របស់សម្ដេចធិបតីនាយករដ្ឋមន្ត្រី និង ទស្សនៈ ‘អ្វីៗដើម្បីភាពកក់ក្តៅ ជូនប្រជាពលរដ្ឋ’» របស់ លោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស សុខា កំណែទម្រង់ជាច្រើនត្រូវបានធ្វើឡើងជាបន្តបន្ទាប់។ ក្នុងនោះ ជាពិសេស លើបញ្ហាអាទិភាពទាំង៦ របស់ក្រសួងមហាផ្ទៃ រួមមាន៖ ការបង្ក្រាបល្បែងស៊ីសង គឺជាវិធានការដ៏ក្តៅគគុកមួយផងដែរ បញ្ហាគ្រឿងញៀន បទល្មើសព្រហ្មទណ្ឌទូទៅ ក្រុមក្មេងទំនើង បញ្ហាចរាចរណ៍ ការជួញដូរមនុស្ស និងបញ្ហានានាដែលកើតឡើងតាមបណ្ដាព្រំដែនកម្ពុជា៕
