សត្វកន្ធាយក្បាលកង្កែបញីវ័យជំទង់ ១ក្បាល មានទម្ងន់ ២៦ គីឡូក្រាម មានពងនៅក្នុងពោះ ងាប់នៅចំណុចកោះអណ្ដែងខ្ចី ឃុំវឌ្ឍនៈ ស្រុកសំបូរ ខេត្តក្រចេះ។ រូបថត WCS
អង្គការសមាគមអភិរក្សសត្វព្រៃ (WCS) ប្រចាំកម្ពុជា បានទទួលដំណឹងពីករណីសត្វកន្ធាយក្បាលកង្កែបញីវ័យជំទង់១ក្បាល មានទម្ងន់ ២៦ គីឡូក្រាម មានពងនៅក្នុងពោះ បានងាប់នៅចំណុចកោះអណ្ដែងខ្ចី ឃុំវឌ្ឍនៈ ស្រុកសំបូរ ខេត្តក្រចេះ។
យោងតាមអង្គការ WCS បានប្រកាសឱ្យដឹងនៅថ្ងៃទី២៤ ខែមករា ឆ្នាំ២០២៤ បញ្ជាក់ថា តាមការធ្វើកោសល្យវិច័យរបស់មន្ត្រីជំនាញនៃខណ្ឌរដ្ឋបាលជលផលក្រចេះ និងអង្គការ WCS បានសន្និដ្ឋានថា សត្វកន្ធាយក្បាលកង្កែបនេះងាប់ដោយសារជាប់សន្ទូចរនង ដោយឃើញមានផ្លែសន្ទូចទាក់ជាប់នឹងជើងរបស់វា។
អង្គការ WCS សង្កត់ធ្ងន់ថា៖«ជាទូទៅ ផ្លែសន្ទូចដែលមិនបិតនុយ ងាយទាក់ជាប់សត្វកន្ធាយក្បាលកង្កែបដោយខ្លួនសត្វកន្ធាយមានលក្ខណៈទន់។ កន្ធាយក្បាលកង្កែបត្រូវបានចាត់ជាប្រភេទងាយរងគ្រោះ ដោយអនុក្រឹត្យលេខ១២៣អនក្រ ដូចនេះ ការចាប់និងជួញដូរជាអំពើខុសច្បាប់»។
រដ្ឋបាលជលផល និងអង្គការ WCS បានអំពាវនាវដល់ប្រជានេសាទ និងពលរដ្ឋ ដែលនៅតាមមូលដ្ឋាន ចូលរួមថែរក្សាសត្វប្រភេទនេះឱ្យបានគង់វង្ស និងចៀសវាងការចាប់និងជួញដូរខុសច្បាប់ ដែលពុំនោះទេ នឹងត្រូវទទួលទោសតាមច្បាប់ជាធរមាន។
ជុំវិញបញ្ហានេះ លោក ញួន ចន្ទី ប្រធានសម្របសម្រួលប្រចាំតំបន់មេគង្គ WCS បានប្រាប់ឱ្យដឹងនៅថ្ងៃទី២៤ ខែមករា ថា ការស្លាប់មេពូជកន្ធាយក្បាលកង្កែបនេះលោកពិតជាមានការសោកស្ដាយជាខ្លាំង បន្ទាប់ពីបានធ្វើការវះកាត់ឃើញមានពងយ៉ាងច្រើនលើសពីការរំពឹងទុក ដែលមេពូជនេះជិតឡើងពងនៅឆ្នេរខ្សាច់ជិតនោះ។
លោក ញួន ចន្ទី បញ្ជាក់ទៀតថា ៖«អង្គការ WCS នឹងបន្តសហការជាមួយរដ្ឋបាលជលផល ខណ្ឌរដ្ឋបាលជលផលក្រចេះ អាជ្ញាធរមូលដ្ឋាន សហគមន៍នេសាទក្នុងស្រុកសំបូរ ខេត្តក្រចេះ ដើម្បីពង្រឹងការងារអនុវត្តច្បាប់ និងបន្តចុះអប់រំផ្សព្វផ្សាយច្បាប់ស្ដីពីជលផល និងការងារអភិរក្សកន្ធាយក្បាលកង្កែប និងជីវៈចម្រុះ»។
បើតាម លោក ញួន ចន្ទី ចាប់តាំងពីឆ្នាំ២០១៩ បើគិតមកទល់ពេលនេះមានតួលេខដែលសត្វកន្ធាយក្បាលកង្កែបងាប់មានចំនួន ៣ក្បាលបើគិតទាំងលើកនេះ ដែលត្រូវបានប្រទះឃើញ និងកត់ត្រាចូលក្នុងតារាងទិន្នន័យ។
សូមរំឭកដែរថា កាលពីខែធ្នូ ឆ្នាំ២០២៣ ក្រុមការងារបច្ចេកទេសប្រចាំខេត្តក្រចេះ នៃអង្គការសមាគមអភិរក្សសត្វព្រៃ (WCS) បានទទួលកូនកន្ធាយក្បាលកង្កែបប្រភេទសត្វជិតផុតពូជ ១ សម្បុក ដែលមានពងចំនួន ២៩ គ្រាប់ ពីសមាជិកសហគមន៍នេសាទ ខណៈក្រុមការងារបច្ចេកទេសយកទៅរក្សាទុកនៅទីតាំងភ្ញាស់ដែលមានសុវត្ថិភាព។
សម្បុកកន្ធាយក្បាលកង្កែប ដែលទទួលបាន គឺជាសម្បុកទី១ក្នុងរដូវកាលពងកូន ដែលសម្បុកកន្ធាយក្បាលកង្កែបនេះ ត្រូវបានក្រុមការងារបច្ចេកទេសនៃអង្គការសមាគមអភិរក្ស និងក្រុមការងារការពារសម្បុកធ្វើការវាស់វែង ប្រមូល និងរក្សាទុកនៅទីតាំងភ្ញាស់ដែលមានសុវត្ថិភាព។
សូមបញ្ជាក់ថា សត្វកន្ធាយក្បាលកង្កែបត្រូវបានចាត់ចំណាត់ថ្នាក់ជាប្រភេទសត្វកំពុងរងគ្រោះ ដោយអនុក្រឹត្យរាជរដ្ឋាភិបាល លេខ ១២៣ អនក្រ.បក ចុះថ្ងៃទី១២ ខែសីហា ឆ្នាំ២០០៩ និងក្នុងបញ្ជីក្រហម នៃអង្គការ IUCN ជាប្រភេទរងគ្រោះថ្នាក់ជិតផុតពូជនៅទូទាំងសកលលោក។ ប្រភេទសត្វនេះត្រូវបានរកឃើញសាជាថ្មីម្ដងទៀតចន្លោះពីស្រុកសំបូរ ខេត្តក្រចេះ រហូតដល់ស្រុកសៀមបូក ខេត្តស្ទឹងត្រែង ដែលមានចម្ងាយប្រមាណ ៥០ គីឡូម៉ែត្រ។
ក្នុងរដូវពងកូនកាលពីខែកុម្ភៈ ឆ្នាំ២០២២ ក្រុមការពារសម្បុកសហគមន៍បានរកឃើញសម្បុកពងកន្ធាយក្បាលកង្កែបចំនួន ២៨ សម្បុក ដែលមានពងសរុបចំនួន ៨២៣ ពង ដែលចំនួននេះ កើនលើស ៥០% បើធៀបទៅនឹងរដូវពងកូនឆ្នាំ ២០២០-២០២១ ក្នុងរយៈពេលដូចគ្នា៕
